Pag-ighit 8

1Magkun ti Panginuun sa kan Muysis, “Pag-ati kawu sa hari Ihiptu ag sabihun nimu sa kanya, ‘Inda ti pagsabihun Panginuun: Paighita nimu ti nasakupan niku hampay makasamba sida sa kangku. 2Nu unman nimu sida paighitun, pun-un niku manga pikaw kanmu nasyun. 3Mapnu pikaw ti Sapa Nilu ag sumulud inda sa kanmu balay, sa kanmu sulud-sulud hanggan sa igyaan nimu. Sumulud diman inda sa balay nimu manga may kangaranan hanggan sa kanmu manga nasakupan, ag sa manga arapyan hanggan sa manga haraugan arina. 4Luksuhan kawu manga pikaw hanggan kanmu nasakupan ag ti tanan nimu may kangaranan.’ ”

5Magkun waya ti Panginuun sa kan Muysis, “Sabiha nimu sa kan Aarun iantay niya kay sugkud sa manga sapa, sa manga laad, ag sa manga linaw, bag-u lumuwang ti manga pikaw sa daga Ihiptu.”

6Nakan iinantay ngani ni Aarun kay sugkud sa manga danum sa Ihiptu, ag linmuwang ti manga pikaw ag naglingatag sa daga Ihiptu. 7Dapat binuwat diman inda manga manugsalumangka sa panab-anan nida salumangka. Nipalwang diman nida ti manga pikaw sa danum Ihiptu.

8Ipinatawag hari Ihiptu sida ni Muysis ni Aarun, magkun sa kanda, “Pagdarangin kamu sa Panginuun paighita inda pag manga pikaw sa kangku hanggan sa kang nasakupan, bag-u paighitun niku kanyu manga kasimanwa, hampay makahandug sida sa Panginuun.”

9Magkun si Muysis sa hari Ihiptu, “Sabiha lang nimu sa kangku nu kapira aku pag mandarangin para sa kanmu, hanggan sa kanmu manga may kangaranan ag sa kanmu nasakupan, hampay madura inda pag manga pikaw ginan sa kanyu ag sa kanyu manga balay. Ti masawad lang pag pikaw ti manga pikaw sa Sapa Nilu.”

10Sinmagut ti hari Ihiptu, “Idarangin nimu aku aldaw.”

Magkun si Muysis, “Matupad tida angay sa pagsabihun nimu, hampay maalaman nimu unman may kaparihu ti Panginuun nimi Diyus. 11Madura ti tanan pikaw sa kanyu purya sa Sapa Nilu.”

12Pagka ginminan sida ni Muysis ni Aarun sa atubangan hari Ihiptu, nandarangin si Muysis sa Panginuun kuntay paighita yi niya ti ipinadara pag manga pikaw sa Ihiptu. 13Tinupad ngani Panginuun ti idinarangin ni Muysis. Nagkaramatay ti manga pikaw sa manga balay, sa manga sugkadan hanggan sa manga tanman. 14Tinipun tunda manga Ihipsiyu ag tinumpuk. Dahil sa manga namatay pikaw namawu ti buu daga Ihiptu. 15Dapat pagka nakitan hari Ihiptu udyi ti manga pikaw, nagmaganit yi maan siya, balaw siya naniwala sa kanda ni Muysis ag ni Aarun, parihu sa sinabi Panginuun.

Ti Sarut manga Namuk

16Magkun ti Panginuun sa kan Muysis, “Sabiha nimu sa kan Aarun ihampak niya kay sugkud sa daga, ag bumaliw namuk#8:16 namuk: ngatay, kutu. Balaw malinaw kay ibug sabihun sa Hibriyu inda. ti manga galbuk sa buu daga Ihiptu.” 17Sinunud nida inda, nakan pagka ihinampak ni Aarun kay sugkud sa daga, nagbaliw namuk ti manga galbuk sa buu daga Ihiptu. Nangapun inda pag manga namuk sa manga tawu hanggan sa manga hayup. 18Sinamitan diman manga manugsalumangka huwadun inda sa panab-anan nida salumangka, dapat nibuyu sida. Parargu nangapun ti manga namuk sa manga tawu ag sa manga hayup.

19Magkun ti manga manugsalumangka sa hari Ihiptu, “Diyus ti may buwat inda!” Dapat maganit diman ti tagipusuun hari Ihiptu, balaw siya naniwala sa kanda ni Muysis ag ni Aarun, parihu sa sinabi Panginuun.

Ti manga Insiktu pag Sarut

20Magkun ti Panginuun sa kan Muysis, “Pagbangun kawu kaaga aldaw, alagdun nimu ti hari Ihiptu habang atag siya sa sapa. Sabihun nimu sa kanya inda kang pagsabihun, ‘Paighita nimu ti nasakupan niku hampay makasamba sida sa kangku. 21Nu balaw nimu paighitun sida, padaran-an niku kawu mayamu pag insiktu, hanggan kanmu manga may kangaranan ag nasakupan. Mapnu manga insiktu kanyu manga balay, mas-ub nida ti daga. 22Dapat inda unman mangyari sa daga Gusin nu naan pag mag-uli kang nasakupan; balaw mandapu ti manga insiktu ati pag rugar, hampay maalaman niyu aku ti Panginuun sa ati pag daga. 23Ipablag niku kang nasakupan sa kanmu pag nasakupan. Inda pag makadululaw mangyari aldaw.’ ”

24Namadara ngani ti Panginuun mayamu pag insiktu sa balay hari Ihiptu hanggan sa balay niya manga may kangaranan, ag nandaut inda sa buu daga Ihiptu.

25Nakan pinatawag maan hari Ihiptu sida ni Muysis ni Aarun, magkun, “Ta, paghandug yi kamu sa kanyu Diyus, dapat sitay lang sa Ihiptu.”

26Sinmagut si Muysis, “Balaw mahimu sitay kami pag manhandug sa Ihiptu, dahil kanmi manga handug sa Panginuun nimi Diyus mayagting sa manga Ihipsiyu. Ag nu manhandug kami manga handug mayagting sa kanda, pihu bintukun nida kami. 27Kailangan lumakaw kami tulu ka sirang atag sa pangawakawaan hampay manhandug sa Panginuun nimi Diyus, parihu sa pag-isugu niya sa kanmi.”

28Magkun ti hari Ihiptu, “Pasnuan niku kamu manhandug sa Panginuun niyu Diyus sa pangawakawaan, dapat danga kamu magpakarayu. Kainda yi, daranginan niyu aku.”

29Sinmagut si Muysis, “Ta, mighit aku sitay ginan, rargu mandarangin sa Panginuun. Ag aldaw madura yi sa kanyu tanan ti manga insiktu. Dapat pihuun nimu balaw yi nimu kami lukuhun uman ag amparahun umighit agud manhandug sa Panginuun.”

30Ginminan ngani si Muysis, nandarangin sa Panginuun, 31ag sinagut Panginuun kay pakihampang ni Muysis. Nighit ti manga insiktu sa tanan Ihipsiyu. Unman may nasawad una di usa. 32Dapat nagmaganit di maan ti hari Ihiptu ag unman niya pinaighit ti manga Israilita.

Currently Selected:

Pag-ighit 8: HNN

Highlight

Copy