1 Pida 3
3
Repaaluna angele wia ei
1Go einayandare ali pe wenanu nimi pange nimina alinuna rolo para ao-paidapape. Nimina alinu mendapare angele na-mi alinu menda alimindare nimu manda karu epele loma lalo. 2Neme angelenu menda na-da pelepare nena pili rendepona aunu andoma manda raluma epeleme. 3Mandaa yongole komea au na-lalepape. 4Go au na-piri none nena runane pea aumi komea nee ma-epe-ainyalape. Go epe aulea eiri ora na-peredea pange Gode ora rana ma-pae au gonda. Runane wia kuma pi eimiri go epe au ma-laoaya. 5Ambala Godena angele pangoaisimiya wenanumiri go au pisimiya. Nimuna runane aulaya auri nimuna alinuna rolo para ao-paluaisimiya eimi ma-epeaisimiya.
6Go wenanumi pisimiya au Serame pange go au pisaya. Eparame parare andaa alio loaisaya. Go einare nimimi ale menda para paalame na-kome epe au pualimindare nimiri nipuna nongonu aeme.
7Nimi alinu pange nimina wenanu mendaa rupa andere-alepape. Wenanu puri na-palemendare waru andere-alepape. Nimumi pange nimi rapu ralaoma ara Godeme endoaya ei gilia ei milima kone sialepape. Go aunu pualimindare ale mendame nimina yainya pilimi einu na-sese pilia.
Ora aunu pili eina rendaa meale ei
8Go angele ambia neme gupa lo pora poalo. Nimi raayo komea kone suma menda menda repara epepe aunu puma amealu leale andainyaoma ao-alepape.
9Mendame koae aunu piliandare neeme wala koae aunu na-pumoneape. Epe aunu pumoneape. Akepeare Godeme nee wi le auri epepe aunu painyaya wi lea pange nipumi naa repara epepe aunu pilia. 10Ande Godena angele wia bukamere gupi lea.
Menda apimi epe aunu andari pualua kone wiliandare
nipumi yayapi angele na-lo pange
koae angelenu na-lena.
11Koae aunu repara kou waloma ora nipuna pu
ruparare ora epe aunu komea wasualia.
Gupuma naare raayosi kuma pi rupa ao-ape eina
raname komoalia.
12Akepeare ande Realimiri ora rendepona aeme
wenaali komea andere-aoma
nimuna yainya peme einu komea pangoaya.
Koae aunu puaeme repaare kou walea.
13Nimi ora epe aunu puluame rapo alimindare nimiri apimi waraliayapae. 14Go peapare nimimi ora aunu pala aliminyaloma mendame nee rendaa giliandare gore pa raname komalepape.
Menda ali paalame na-komalepape pange
kone konenu na-sialepape.
15Nimina ruparare Keriso komea nimina Andaa Ali ainya dapape. Go nimina kone rulaoma aeme alena mendame nimi lora piliandare gore ladaminya lele puma alepape. Nimu repara angele doamere ora kuma pi rupa ladapape. 16Nimina rupara rendepona ara dapape. Nimi repara koae angele alenda demendare gore nimimi epe aunu pulu ara Yesu raluma pulumi eina demendare gore nimuna gole yalame komeleme.
17Godena rana deandare gore epe au pili eina rendaa milindare epelea. Koae aunu pili eina rendaa mi auri kolea. 18Naame Keriso pange kone siaminya. Naana koae einu mealuame nipu rana komea komisaya. Nipumi naa Gode repara karu polameyare nipu rondo menda na-ae ali naana anda panda wala nipumi misaya. Nipuna dore komisayapare nipuna remore pa endoma aisaya. 19Gupuma nipuna remore no dipula pirisimiya remonu repara pua angele walisaya. 20Go dipula pirisimiya repaare ambalande Noa nipuna naarenare Godena angele yoko aisimiya. Go pameyapare Godeme go eina yangi ambe na-liaripaya. Nipumi go wenaali pa maisambao aisaya. Noame go naarena kawaso warisaya. Mendane ki pereyoma repo wenaali komea pua kondo pambisimiya. Go wenaaliri ipame na-misaya.
21Go ipare baparaisi au pape ei gole walalo ara pisaya. Go baparaisi aumiri ambia nimi rambamuaya. Go eiri naana dona ralea kodo kunape ei dia. Go eiri ande Godena lee rona ora epe rendepona ao-palu alualoma wili mandaa meme ei. Go au pi auri Yesu Keriso wala ma-rekaisaya eimi pea. 22Nipu so yaa nane ambala pea. Gupuma Godena popeke ki nane ambala pua pia. Gupuma eindiolonu pange yaa nane andere pimi repaa raayo nipuna rolo para pimi.
Currently Selected:
1 Pida 3: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
