1 Pida 4
4
Angele mi wenaaliri rando menda rupa ao-palinya
1Keriso nipuna do rendaa andaai nisaya. Go einare nimimi pange nipumi wisaya konenu wi pape. Go eiri gurupa. Nipumi pisaya rupa nimi pange rendaa nape eina lelepuma alepape. Nipuna dome rendaa nena lea alimiri koae au pape aunuri ambala minyapalaya. 2Go einare ambia go suna pa arare go nipuna dome raname komala alenu giaya. Nipumiri Godena rana pea ei komea raluaya. 3Ambalandere ande kama nane pa aeme repaame puarimi aunu waru pamende. Go aunuri go einu. Wena o ali pake nala aunu pange koae ipa napuae aunu pange dome raname komala alenu waisa eiri pula aunu pange Godena angele kou waloma yayapi gode repara yainya pia aunu. 4Ambiare nimimi nimu rapu go aunu wala na-pemenda nimu rungulu mealo pambalo ara nimi repara koae angelenu loaeme. 5Go peapare werepere nimuna pimi aununa reenu Godena lee rona werepe lademe. Gode nipumi pa aeme wenaali pange komeme wenaali raayo rali pula pea ali aya. 6Ambalandare kome wenaali repara Godena angele laisimiya. Wenaali raayo nimuna yangiri komala ei muaeme rupa nimu pange nimuna dona komala ei misimiya. Go peapare go Gode endoma aya rupa nimuna remo pange endoma ao-ainyayanda monde epe angelere nimu para walande.
Godeme gida alenu epe rupa andere-aminya
7Olemole pereda pea naare ambiare repara aponda. Go einare nimi ora rendepona epe kone suma yainya waru pualepape. 8One mone aunu raayo pu ada aumi lu rambuao-ainya dapape. Akepeare pu ada aumiri koae koae aunu raayo lu rambuao-aya. 9Nimina yangonu menda nimi rapu epa aliandare ora epepe aunu pipape. Go repaa wamopape eina pu kendame na-komalepape. 10Nimi raayo rando randolo Godeme pakama gea ale apo siamba-aemenda. Go eina go einu siamba arare yangonu waru rambamipape. Go au pilimindare gore menda menda repara Godeme alea alenu rali rali pilimi. 11Mendame Godena angele laliandare gore nipumi ora Godena angele walainya. Ali mendame yango menda rambamiliandare gore nipumi Godeme alea purimi go yango rambaminya. Ali raayome go pupudenginu neleme ei andomare Yesuna bina Gode minyasianya. Godena biri naare raayosi puri paloma bi andaai wia.
Yesu rapu kenda rilia ei
12Nina amenuo, go nimi repara rendaa pi landala einu ipula eina rungulu mealo na-pambalepape. Go eina na-ande aunu menda pia kone na-sialepape. 13Go konenu na-wiri Kerisome nisaya rendaanu midama kone sialepape. Werepe nipu epelea dinare nipuna paa pi puri andala arare raname waru komeleme.
14Nee Yesu ralialenda nee ero lala pilimindare raname komalepape. Go eiri ande Godena Sipiridi nena rupara pianda pia. 15Nimi rendaa mi auri ali lu komaemenda o mendana alenu pake nalemenda o pa aunu menda piliminda o mendana auna maa wako pamu puma nimimi rendaa na-mipape. 16Nimi rendaa mi auri nimi Kerisona bi memenda piliandare go eina yalame na-komalepape. Yesuna bi sia aemenda pia loma raname komalepape. 17Godeme wenaali rali pula pea naare epelea. Godeme nipuna repaa rali pi au ambala pilia. Naa repara kini piliandare ande Godena angele na-meme repaare ora rendaa pilia. 18Ande Godena angele wia bukamere gupi lea.
Epe rupa aeme wenaali rambamealore rendaa pea.
Go peapare koae au puaeme repaa rambamealore
ora rendaa andaai pea.
19Go einare Godena ranana go repaa rendaa milimindare go repaame nimuna aeme einu raayo Godena ki nane winya. Nipumi naa wapea. Gupuma naa ora epe rupa andere-aya.
Currently Selected:
1 Pida 4: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
