1 Pida 5
5
Nimi kalu alinumi Godena sipisipi menanu waru andere-alepape
1Ambiare nimina kalu alinu para go angele lalo. Ni pange kalu alimi lalo. Keriso rendaa nisa eiri neme nina leeme andawa. Nimi pange ni pange werepe Godena paa pi ei penameyala epelea dinare andelema. Go einare nimi kalu alinu para go angele lalo. 2Godena wenaali nimina kina sipisipi menanu leale apo aemele waru andere-alepape. Go naleme pupudengiri pa mendame pusimi piandare na-pipape. Nena koneme lalo ora nina Realina pupudengi yanda nado lalo ara pipape. Yangi meape eina pima kone na-sialepape.
3Nimi ora andaa ali kone sialo ara nimimi andere-aeme repaare ale menda dia kone na-sialepape. Ora Godena sipisipi menanu andere-ape poranu ora epe rupa wada alinu alepape. 4Gupuma Keriso ande sipisipi menanu andere-aeme alinuna kalu ali epelea dinare nimi ora andaa bi milimi. Go biri na-alu pilia.
5Nimi pena alinu pange go andere-aeme alinuna rolo para ao-paidapape. Gupuma wenaali raayo kalu andainyaoma nimina Keriso amenuna rolo para ao-paidapape. Ande Godena angele wia bukamere gupi lea.
Godeme ni ora kone suaya aliri ale menda dia
leapare panda punyaoma aya ali komea
nipuna yarame komea ei aloaya lea.
6Go einare nimi pange andainyaoma ara Godena rolea para ao-paidapape. Gupuma nipuna rana pilia dinare gurupa nimina bi minyasialia. 7Nipumi nimi andere-aya. Go einare nimina kendanu nipuna ki nane su monedapape.
8Nimi ora kone waru suma andere-alepape. Sadani nipuri laioni yaname pia rupa ali nolameyanda elari apo pamualanda. 9Puri waru paloma kone waru rulalepape. Go au pilimindare manda Sadanina aunu wandualimi. Nimina amenu go su kuni kuni para aeme repaa raayo pange nimimi pimi rupa rendaa midame.
10Godere yarame komala ei raayona ree. Yesu rupara nimi wi lea eiri nipuna paa pi ei pa siaeri polopea ei nimimi mealiminyayanda wi lea. Go einare go kenda pi eiri pa riambo komea midame. Werepere nipuna gole nimina kone rulaeme einu wamo puma nimi puri ma-palalia.
11Pa siaeri polapea puri nipu rapu pa sia eiri pena.
Pereyado angele
12Sailasimi rambamidanda go peao ramayo nimi repara rapado. Nipuri ora nina epe Keriso ame. Nimina pu konenu puri ma-palaluame go angele lalo. Neme go ramayona wape pawande einuri ora Godena yarame komala ei lama nimi para lalo. Go eina puri paloma alepape. 13Babiloni nane aeme Keriso wenaalimi paidapape dame. Go repaa pange Godeme wi lea repaa. Nina naki Makame pange paidapape da. 14Nimi raayo yangonu rapu yarame komalo ara ki mulolo pipape. Keriso wenaali nimi raayo kuma pi ei nimina rupara winya ae.
Currently Selected:
1 Pida 5: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
