1 Pida 2
2
Pa endoma aya anda pingina angele lea ei
1Go einare nimimi ande payapo angele loarimi ei pange one mone yayapi aunu raayo gialepape. Gupuma yanda li aunu pange ero lala pi angelenu gialepape. 2Naame kone wima. Pena nongo nakinuri andu nalame waru komeme. Go rupa mandare naana Keriso aunu andalenayare nipuna angele waru pangalepape. Go Godena angelenu pange aunu andu pange manda nalame komelemendare nimi ora rambamilia. 3Ande Godena angele wia bukame gupi lisayande rupa manda. Ande Reali ora epe ali lomare nimina ambala kone wimi.
4Nimi ipuma Reali repara ipulupa. Nipuri pa endoma aya anda pingi manda. Go anda pingiri wenaalimi rambua rambua pamepare Gode nipunare ora angaa aya ale ma-aularipa. 5Nimi pange go anda pingi endoma aya ei manda. Godeme nimiri ande Epe Yaakopi Sipiridina anda manda ma-au lada. Go au puma nimiri ande Gode repara alinau pia repaa manda aoma nipu repara alinau paluame epepe alenu ademe. Yesu Keriso nipuna rupara go au pilimi. 6Godena angele wia bukamere gupi lea.
Neme ora epe pingi Diurusaleme anda para
go nongopealonda lisaya.
Go einare nipu repara kone rulalia repaare yalame
na-komeleme lea.
7Nimi angele meme repaa nimi reparare Yesuri ora ale. Go peapare angele na-meme repaa parare go ei.
Ande anda eloaeme alinumi pakama kana
kone wisimiyapare ande kanare wala puri pale
kana auda popayae, lea. 8Gupuma mo angele na-meme repaa parare go ei.
Go pingimi gole wenaali ma-lopalia.
Nimu lope auri Godena angele na-memenda lopeleme. Go auri Godeme pinya lea au. 9Go peapare Godeme nimi ambala mea. Nimiri Gode ande kini alina repaa aeme. Gupuma go kini alina alinau pao-aya repaa. Gupuma nimiri nipuna yaakopi wenaali aeme. Nipuna epe aununa angele daminyayanda rimbale para aya ei minyapalaoma paana epeme. 10Ambalandere Godena yarame komala aunu kone na-siamepare ambiare nipuna yarame komea ei andaleme.
Godena pakama pupudengi nademe repaa
11Nina amenuo, nimiri go sunare pa kimisu alinu epa aeme. Go einare neme go angele lalo. Go peale ambalana aunu ora gialepape. Go aunumi nimina remonu rapu yanda puaya. 12Angele na-mi repaa rapu arare ora epe aunu komea pipape. Nimi repara koae aunu pimi demendare nimina epe aunu andalo ara nimumi Godena bi nipu epelea dina minyasialimi.
13-14Realina angeleyandare go suna andere pidimi alinuna rolo para ao-paidapape. Go suna andere pidimi alinumi muma malimi alinuna angele waru pangalepape. Go koae au pilimi repaare rendaa alalo ara epe au pilimi repaa raname kome auri nimuna ale komea. 15Godemere go au paliminya kone wia. Nimimi ora epe aunu pipape. Go au pilimindare kone na-wi keyalinumi nimi repara angele menda na-deme.
16Nimi ale mendame na-andi yolena dapape. Go lalo ara koae aunu pa na-pu rambualepape. Go peapare nimi Godena pupudengi nao-aeme repaa ao-alepape.
17Wenaali raayo waru andasiaoma andalepape. Nena yangonu rapu kuma kuma puma alepape. Gode paalame komalepape. Nena andere pidimi gapamani alinu waru andasiaoma andape.
Yesumi pisaya au paminya
18Nimi mendana pupudengi nademe repaa nimimiri go alinumi deme angelenu waru pangalepape. Nimi repara koae aunu pilimi repaa para pange go au pipape. 19Go epe aunu pili eina neeme rendaa milindare Gode nipuna rana pi au padendare nee ora epe aunu komea palia. 20Neeme koae au pilinda nee dimindare gore nena pili eina yangi meale. Go peapare neeme epe au pulu-ainyaloma nee dimindare gore Godeme nee ora epe aunu ma-andalia. 21Godeme nimi wi lea eiri go au raidaminyayanda wi lea. Kerisore nimi rambamulameya rendaa nisaya. Nimimi raidaminyayanda go au pisaya. 22Nipumi koae aunu menda na-pisaya pange nipuna angaa kambulu para koae angelenu na-lisaya. 23Nipu ero lala pisimiya pange nipu rendaa ora waru alisimiya. Go peapare nipumi go angelenu yango na-liaisaya. Godeme komea palia kone siaya. 24Yesu ekeraisa wape pi repenana naana koae einu mealuame komisaya. Go au pisaya eiri naame koae einu giaoma epe rupa ao-paliamonoyanda pisaya. Nipuna kome eimiri nimina Keriso aunu puri paloaya. 25Nimiri alu pae sipisipi mena manda. Go peapare ambiare Yesu raidaminyayanda wala apo karu ipuma sipisipi mena andere-aya alinumi andere-ao-aeme rupa nimi andere-aya.
Currently Selected:
1 Pida 2: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
