1 Pida 1
1
1Ni Pida Yesu Kerisona aposolo ali. Nimi nimina ree andanu giaoma rapa rapayoma aeme Keriso wenaali para rapado. Go wenaali nimiri Pondasi pange Galaesia pange Kapadosia pange Esia pange Bidinia anda paranu aeme repaa nimi para rapadema.
2Ambalande Apa Godeme nimi nipuna ei loma ambala mea. Yesu Kerisona angele pangoma raidaminyayanda ande Epe Yaakopi Sipiridimi nimi yaako ma-paya. Gupuma Yesuna weeme nimi randepema yaako ma-paya. Kuma pi ei pange Godena yarame komea ei nimi rapu winya.
Keriso wenaali raname komoainya
3Naame naana Reali Yesu Keriso nipuna Gode para ranae angele laminya. Ande Godere Yesuna Apa ao-aya. Nipumi naa ora yara andaaimi komisaya eimiyalore Yesu Keriso komisayapare wala ma-rekaya eimiri naa wala ma-endaya. Go eimiri naa ora endelema kone suma aema.
4Naa Epeni nane endoaya ei milima loma ambala la wia. Go endoaya eiri ale menda na-ralea pange ale mendame na-koyalia. Gupuma naa masumba pia.
5Nimimi Gode repara ora kone waru rulaeme. Go eina nipuna purimi nimi waru andere-aya. Nipumi nimi wala mulameya rapo aya. Go eiri go su yaa peredea dina werepe andaminya.
6Nimi repara go kenda epeleandare pa raname komalepape. Akepeare go eiri pa riambo komea piale.
7Go landala einu ipula eiri nena kone rulale ei ora puri palea ei yapaleme landolame pia. Golo pange nipuna puri pale ei andolamere repename ambala kiru andeme. Golore pa na-sualia. Nena kone rulale eiri golome na-andea. Golo pange ma-wanduaya. Go einare ande landala ei epeleandare nee puri ma-palaluameyanda piale kone na-sialepape. Werepe Keriso penameyala epelea dinare nimimi ora bi andaai milimi. 8Nipu ambe na-andemepare nipu raname ora waru komeme. Nipu na-andemepare nipu repara kone rulaeme. Go einare nimimi rana ora andaaimi komoaeme. Angeleme pange lape-na-ya. 9Go raname komeme eina reere nimimi kone rulaemendare Godeme nimi wala muaya. Go auri ora ririna au pea.
10Ambia go pia aunu ande Godena poropedi alinumi pange angele lisimiyande. Go Godeme naa wala mea eina ree waru walisimiya. 11Kerisona Sipiridi nimu para pirisaya. Kerisome nolapa rendaa ambala nipumi kone wisaya. Go ei perelenalomare werepe nipumi bi ora andaai wia ei milia. Gupuma nimumi gupa angaa muaeme. Go aliri apiyapae loaeme pange andepele epeleayapae loaeme. 12Gode nipumi ambala go alinu para gupa lisaya. Go nimumi nisimiya pupudengiri nimuna ei para na-pisimiyapare nimina ei para paisimiya. Godeme Epe Yaakopi Sipiridi Epeni nane aoma rapaisaya. Nipuna purina Godena angele waloaeme. Go angelere ande Godena poropedi alinumi loaisimiya angele. Go angelenuri ande eindiolonumi pange pangawe kone wimi einuyapare manda na-pangeme.
Godeme naa wilia eiri rendepona ao-amonoya pea
13Go einare nimina konenu ma-ririyaoma waru andere-alepape. Kone waru rulaoma Yesu nipumi naa ora epe aunu pilia loma ao-alepape. Go au pi auri nipu penameyala epelea dina go au pilia. 14Godena angele waru pangoma alepape. Ande nipuna angele ambe na-mi aliminya loma nimina konenu yolo aripande alenu repara wee na-pambala pape. Go einumi nimina ao-paluaeme einu na-andere-ainya dapape. 15Gode nimi wi lea ali nipuri yaako peandare nimi pange yaako pi rupa ao-palualepape. 16Ande Godena angele wia bukamere gupi lea.
Niri Yaakopi Ali ayondare nimi pange yaakopi repaa
ao-paidapape lea.
17Gode repara yainya pele dinare Apao loale. Nipumi wenaali rali pulamere ora menda rupa rali puaya. Ali menda nipuna paala pilia aunu andoma rali paala pilia. Go einare go suna arare ora Godena aunu epe rupa pao-alepape. 18Nimi kone wimi. Ambalare nimina aya kasuanumi pisimiya rupa go ei kondalo ara koae rupa ao-palisimi. Go peapare Godeme go eimi nimi ma-koyapanaya nimi kambo mea. Golo, pange silipa go suna koyape alenumi nimi na-kambo mea.
19Nimi kambo mea eiri Yesuna weeme kambo mea. Go weere ora yangi andaai pea. Keriso nipuri ale menda na-rale yaakopu pa pea sipisipi mename andea.
20Godeme go su yaa ambe na-wari ara Kerisome go au pinyaloma ambala la wisaya. Go peapare nimi rambaminyayare pename la wisaya ei ambia go andalemenda.
21Nipumi nimi rambameanda ambia nimi Gode repara kone go rulaemenda. Godeme nipu komayapare wala ma-rekaoma ora minyasiaisaya. Go einare nimimi Gode repara kone rulaoma nipumi nimi minyaya maisambao-aeme.
Amenu ora raname waru komalepape
22Ambiare go Godena angele para kone rulaeme eimiri nimina lo punu ma-kaake paeme. Go eimi nimina amenu rapu ora epe rupa anda muma aeme. Makirae au na-pimi. Go einare nimina amenu rapu pu alolo puma alepape. 23Nimiri pena wenaalinu aeme. Godena pa suala pea angelemere nimi pena nongo nakinu aeme. Godena pa suala pea angelemere naare raayosi ora pa sualia. 24Ande Godena angele wia bukamere gupi lea.
Wenaali raayore nomame andea lea.
Gupuma nimuna au leme aunuri palawasimi
andea lea.
Go nomanu komeleme dinare nipuna palawasinu
raayo komelea.
25Go peapare Godena angelere naare raayosi ora
pa sualia lea.
Go pa suala pea angelere nimi repara walamende angele.
Currently Selected:
1 Pida 1: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
