Dieimusi 5
5
Amo alinuna angele lea ei
1Nimi amo repaa nimi ambia nina angele pangalepape. Nimi repara epola pea rendaanu repara ree dapape. 2Nimina amo alenuri kuru pande. Gupuma nimina akanuri kolosereme no rumbamende.
3Nimina golo pange silipa muninu makera puaya. Go makera pea eimi nee koda lalia. Gupuma go eimi repana leale nena yongale no rumbilia. Go su yaa peredoa pia dina neeme amo alenu amu puale.
4Nena e mapuna pupudengi nao-ae alinu yangi na-ade. Nimuna kendanu pangape. Nena enda maindao-aeme alinumi loaeme reenu Gode ande Puri Waru Pale Alina kaleme pangande. 5Go suna nena ao pade eiri ora kuma pi eina epepe amo alenu manda ao pade. Yawena mena duame punuame rupa nimina donu pange Godena naarena nimi linaya punuame. 6Nimimi ale menda na-pi ali gole ma-ria ria puma lu komariminde. Go repaame go nimu duame paenda nimuna do na-sese pamende.
Pereyado lea mana angele
7Nina amenuo, ande Reali epola pea ei maisao ara pu na-yokoria pamualepape. Ande e mapu puaya alimi yaa para yai lopoma nipuna poae alenu napelenaya maisambao arare pu yokoria na-pamuaya. 8Nimi pange go rupa pu yokoria na-pamualepape. Puri paloma alepape. Akepeare ande Realina naarere repara ipula.
9Menda menda repara nina amenuo, ape yandanu na-diapape. Go au na-pilindare Godeme nimi na-rali pilia. Ande wenaali rali puaya Ali repara epolame pia. 10Amenuo, ande Godena poropedi alinu kone sialepape. Nimuri angele doamere ande Realina bina lala pamende. Puri paloma kenda pi einu rurumba eiri pula eina manda mulamere nimu repara mipape. 11Go rupa puri paloma kenda riaeri puame repaana bi minyasiaminya. Ande Diopo nipumi misaya kendanuri nimi kone wimi. Ande Realimi nipuna olemole raayo wala werepe alaya ei kone su peme. Akepeare Realiri pakama yarame komala au nipu repara rumbilia.
12Amenuo, go einu raayo oro parayapare ora ririna ale menda gonda. Ale menda lala pulu arare yaa para aya ali masu ora lalo angelenu na-dapape. Ora deandare ora lalo lape. Dia deandare dia angele komea lalapape. Go au pilindare Realimi nee na-rali pilia.
13Nimina rupara menda kenda miliandare yainya pala pinya. Menda apimi raname komalo arare yaisa liala pinya. 14Nimina rupara menda yainya komeleandare mo Keriso wenaalina kalu alinumi yainya painya angele rapainya. Go repaame wambala mo yainya komala alina o wenana kaluna Realina bina liainya. 15Go yainya Reali repara kone rulaoma piri piliandare gore nipuna yainya peredea. Realimi go yainya ma-pereyalia. Gupuma go alimi pea koae aunu repara kone na-wilia. 16Go einare menda menda repara koae einu kepema yainya pala pipape. Go au pala pilimindare nimina yainya peredea. Ora epe rupa alia alimi yainya pilia eiri puri waru palea.
17Ilaidiare naame ande ali. Go ali nipumi yai ora na-epenaloma Gode repara puri paloma yainya pisaya. Go pisayandare kuni gipa repo pange sumba su mindipu rupara yai na-epaya. 18Nipu yainya pulu ara yai konge lisayandare yaa para yai lopisaya. Gupuma suna olemole raayosi ma-opaisa pange enda andapu ralaisaya.
19-20Amenuo, nimi menda ande Realina angelenu giaoma aliminya wala mendame wala karu ma-epeleandare go ei kone sialepape. Go wala karu ipula alimi go alina remo komapanaya go rambamidanda. Gupuma go alina koae einu pange randepealia.
Currently Selected:
Dieimusi 5: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
