Dieimusi 4
4
Keriso wenaalimi Godena angele pangoalimi
1Nimina rupara ape yanda pia aunuri aneyame ipula. Go aunu ma-epao-aya eiri nena pu para wee pambade aunumi ma-epao-aya. Go einumi nimina rupara yanda yanda ma-pao-aeme. 2Nena ranare olemole meawe kone wili. Go peapare neeme meape na-dandare go alenu mulame ali pange lu ma komali. Go alenu meape eina ape yanda pili. Nena rana pi alenu na-meale eiri neeme Gode na-lora pilinda pili. 3Neeme Gode lora pili dinare na-meale. Akepeare epe au pape alena na-lora pili. Nena rana pilia aunu pape eina lora pilinda Godeme na-gilia. 4Nimiri Gode repara kone na-rulao-aeme wenaali. Nimi go suna aunu raname komelemendare gore nimiri Godena yanda runguli alinu aeme. Ali menda nipuna rana go suna aunu radua kone wiliandare gore nipuri Godena yanda runguli ali aya. 5Ande Godena angele wia bukame lea angele gurupa lea eiri ora lea lo nimi kone wimi. Gode ora nipuna rana pea eiri nipuna wenaalimi nipu komea panda punyaoma yainya pinya kone wia. 6Go peapare nipu naa para pakama yarame waru komoaya. Go einayandare mo Godena angele wia bukame gupi lea.
Godeme ali menda nipu ora lea aliri yanda liapare
panda puma pamuaya ali repara pakama
yarame komala ei aloaya.
7Go einare Godena angele kome pangoalepape. Sadani repara yanda lualepape. Go au pilindare go remo pane pindipia pelea. 8Gode repara epape. Go au pilindare Gode nee repara epelea. Nimi koae aunu puaeme repaa nimina kinu randepedapape. Nimi Godena aunu raname komala ara wala go suna aunu raname komoaeme repaa nimina pu romba kaake pi wenaali alepape. 9Nimi yarame komoma ree dapape. Nimina giri dame ei giaoma ree dapape. 10Realina lee rona andanyaoma pamualepape. Go au pilimindare nipumi nimi minyasialia.
Nena Keriso yango na-ralipape
11Amenuo, nimina Keriso yangonu ero na-lalepape. Menda apimi go au piliandare gore Godena Rudule Angele kolea da pange rali pia. Neeme go Rudule Angelenda go rali pilindare gore neere go angele raluma puale ali diayapare go angele rali pili ali.
12Gode nipu komea Rudule Angele guaya ali pange nipu komea wenaali rali puaya ali. Nipumi komea wenaali rambamida ali pange ma-koyada ali nipu komea. Nena yango rali painya neere api kone sialepae.
Werepe pula pea au nee kone na-wili
13Neme doame pi angele pangape. Nimi mendame gupi dame. Ruli o ambia andaa ree anda menda bainya lale. Go anda para kuni gipa komea aoma pupudengi waru noma muni andapu meaminya kone wimi. 14Nee ruli pula pea au nee na-andele. Nimiri pa londo manda. Pa riambo komea epa suma wala pereda ei manda. 15Nimimiri go au dapape. Reali nipuna rana pi ei deandare naa pa ara go au paminya o mongo au paminya deme. 16Go peapare ambiare nimi ora ako lambi diame. Gupuma nimi ora dame. Go nimi ora dame angelere pa au pimi.
17Go einare ali menda nipuna kone para go auri ora au kone widapare na-pia ali nipuri koae au go pianda.
Currently Selected:
Dieimusi 4: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
