Dieimusi 3
3
Keriso wenaalina angele kone suma lena
1Amenuo, nimi raayo wada alinu aluame na-rapalepape. Akepeare nimi kone wimi. Naa wadama alinu naare koda ora andaai dema. 2Naa raayo na-pape aunu waru puaema. Go peapare ali menda nipuna loaya angeleme na-lape angelenu menda ora na-loaliandare gore nipuna rupara ora ale menda na-rale ora rendepolea. Nipuna do ria manda surumbelea. Gupuma nipuri ora epe Keriso ali aya. 3Osi menanu pange naana rana pea para penayare nipuna angaa para kopea ao-aema. Go pema dinare naana rana pea nane pea. 4Ipa naini pamuala andaa sipinu pange kone sialepa. Go sipinuri ora andaai gupuma pokiki ora andaaimi puri aloaya. Go au pi ale gole mo sipi mendane mendane penayare kou nane ae onge alesi menda warala pea dina mo ma-pamuala ali nipuna rana pi nane pea. 5Go rupa mandare naana angaa kambulu pange mendaa au pea. Wena o ali mendame onge aleme gole nipuna pape aununa nipuna bi minyasialia. Repana palupe onge repana sulame manda ro rumbula pea ei kone sialepape. 6Naana angaa kambuluri gore repana manda. Naana angaa kambuluri koae eimi andere pia ei manda. Nipu naana rupara epa piri naana do pange remo ria ma-koyao-aya. Naana ao-paluaema ei repana manda ma-rao-aya. Go repana lengare ande repana pa ro lombaai pao-aya para roae repana.
7Alimiri pa piri alenu manda yaanu pange keronu pange repalinu pange kawambu puma punilia.
8Go peapare angaa kambulu komea mendame na-kawambu pilia. Angaa kambulu komea kama komea ora kolea. Nipuri ora romo manda. Gupuma mendame nipu na-lu pambalia. 9Naana angaa kambulumi naana Apa Gode para ranae angele loaema. Mendaa angaame gole naana ali yango gole koae angele loaema. Go naana yangonuri Gode nipu manda meaoma wari alenu.
10Ranae angele da ei pange koae angele da ei laapo raida menda angaa para gole epea. Amenuo, go au nimina rupara na-pinya dapape. 11Ipulu piri ipa mendame mendaa para rende pi ipa pange rero pi ipa na-epena loaya. 12Poke pore eloaya repaname balape na-edea. Kaimi pange kama kili na-ma-lopalia. Mendaa rupare rero pi ipa ipuaya para rende pi ipa na-epelea.
Godeme gida epe konenu
13Nimina rupara kone waru su rekele puma wia ali menda aliandare go nipuna andea ei nipuna ao-paluaya eimi walena. Kalu andanio aoma epe rupa aeri pula eimi walena. 14Go peapare nena pu rupara nee mendame epe au pianda yanda liiale au wilianda pange rero pi aunu wilianda pange nena komea kone siale aunu wiliandare gore neeme ande Godena angele para koae au pili. Go koae au pili eiri neeme nena rupara go koae einu winya gole neeme andainya au pili eina.
15Go rupa epe kone su rekele pea eiri Gode repara na-ipula. Go suna suma ipula pange suna au pange koae remonu para ipula. 16Epe au pianda yanda dia aunu pia ei pange menda nipuna komea kone wida aunu wia paranuri olemole raayo epe rupa na-wilia. Gupuma koae aunu one mone aunu waru wilia. 17Go peapare ora epe kone Gode para ipula eiri ale menda na-ralea. Go eiri ora kuma pi ei pange menda menda para epe au pia ei. Go eiri ora yarame waru komea au pia ei pange ora epepe aunu komea pilia. Go eimiri menda repara yanda liialo ara menda para epe au na-pea. Nipuri ora angelenu komea loaya. 18Yanda ma-paliao-ae repaame poaleme wai alemere epepe aununa kili komea edea.
Currently Selected:
Dieimusi 3: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
