Matiye 19

Yiezu bòo lɛ á bie hɔ̀ yaamu yaakɛrɔ́ bòo hũn

Mar 10.1-12

1Ɛ́ hɔ́ lɛ ɛ́ Yiezu ɛ́ bie hɔ̀pe sí vɔ́, á lɔ́ hɔ́ Kalile pɛ̃̀hɛ̃ ɛ́ khie van hɔ̀ Zudee pɛ̃̀hɛ̃ lɛ cánkɛa van lɔ́ wi le vṹn lɛ ɛ́ ɓɛ́ wóo ve nɛ Zurudɛ̃n máahṹ. 2Ɛ́ nìnbí-kuì ɛ́ bɔ̀ piè máahṹ, á wiɛniɛ peɓɛ̀ dɔriè yán. 3Ɛ́ ɓɛ́ Farizĩɛɓɛ dɔ̀ ɛ́ ɓɛrɛ yú-o ɛ̀ ɓɛ̀ wɛ ɓɛ ɛ̀ vĩ-ɛ mí biehĩ́ hũn, ɛ́ ɓɛ́ ɔ̀ dìenin ɛ́ nɛ làa: «Kìe làndɛ́ hũn, ɛ́ bɛ́rɔ ɛ́ sũǹ dɛ̀ ɓá hṹnu ɛ́ ɲɛ bòo yée bòo lɛ á nɛ a wɔ́ khɔn bòo hũn?» 4Ɛ́ Yiezu ɛ́ zɔn kɔ̃́niɛ ɓɛ̀ ɛ́ nɛ làa: «Mí bìe ɛ́ yí kɛ̀rán hɔ́ bòo lɛ ɛ́ wɛ̃́ lé Dɔfĩn bienù vɛ̃hṹ hũn? Hɔ̀ ɛ́ wɛ̃́ yán ɛ́ nɛ làa: Bòo míkùi fìi ɓánlén ɛ́ Dɔfĩn ɛ́ mɛ́ á bɛ́rɔ àá ɔ́ hṹnu 5ɛ̀ Hɔ̀ ɛ́ bie nɛ: Ɛ́ sí iè hɔ̀pe á bɛ́rɔ ɛ́ dàa ɛ́ wóo fùansí ɓá yàá àá ɓá nín ǹ à ɛ́ khíi cɛɓán àá ɓá hṹnu, ɛ́ ɓɛ́pe ɓɛ́ ɲuunáa ɛ́ wo wé tɛkɛ-cóoní. 6Ɛ́ kɛ̀amu, ɛ́ ɓɛ́ wo bĩniɛ ɛ́ yí nìɛ ɓɛ̀ ɲu, kɛ́ ɓɛ́ iè nìnbí-cóoní. Ɛ́ Dɔfĩn bòo lɛ ɛ́ Hɔ́ wɔ́ àá dìcóoní ɛ́ nìnbírɔ ɛ́ bí sankɛ wɛ̀.» 7Ɛ́ ɓɛ́ Farizĩɛɓɛ ɛ́ zɔn ɔ̀ dìenin ɛ́ nɛ: «Ɛ́ hɔ́ iè ńɓùo á Moyiize ɛ́ dàa nɛ bɛ́rɔ ɓen mii ɲɛ ɓá hũnu, à wóo lɛ́ hɔ́ yaamu fuakɛrɔ́ vɛ̃hṹ ɔ̀ ǹ à fùansí-e ǹ nɛ a lan?» 8Ɛ́ Yiezu ɛ́ zɔn nɛ làa: «Hɔ̀ ɛ́ iè mi tĩɛ̀ hìerɔ́ temu lɛ́ á Moyiize ɛ́ dàa nɛ mí dɛ̀ mì hã́a ɛ́ wóo ɲɛ́. Kɛ́ pehɔ̀ fìi ɓánlén ɛ̀ hɔ̀ hṹn yí dɛ̃̀ kɛ̀amu wɛ̀. 9Ɛ́ nin bie lɛ́ miɛ ǹ nɛ bɛ́rɔ kɛ́ á ɲɛun ɓá hṹnu, kɔ́ hɔ́ lò yí bòo á iè bɛ́fé, à khie yan hɛ̃́-ɓuɛ̀, hɔ́rɔsí àpe bɛ́rɔ sɔ ɛ́ iè hɛ̃́fé.»

10Ɛ́ Yiezu kɛ̀ránzɛ̀ɓɛ̀ ɛ́ zɔn bie lɛ́ à ǹ ɛ́ nɛ làa: «Kɛ́ sí ɓen iè bɛ́rɔ bòo lɛ á dàa fɔ́ɓán à dàá ɓá hṹnu, kɛ́ nìnbírɔ ɛ́ tan yí yɛ hṹnu ɛ̀ hɔ̀ bòo tṹ.» 11Ɛ́ Yiezu ɛ́ zɔn kɔ̃́niɛ ɓɛ̀ ɛ́ nɛ làa: «Ɓɛ̀ yí nìnbirìe ɓɛ́kùi ɛ́ temu dɛ̀ hɔ̀pe kɛ̀ránlɔ́ sɔ lɛ bòo ɛ́ tɛ̀ wɛ̀, kɛ́ ɓɛ́ ɓen yí ɓɛ́lɛ ɛ́ Dɔfĩn ɛ́ lɛ́ pehɔ̀ pànkɛ́ nin. 12Bòo cɛ̀rìɛɛ ɛ́ wi yán ɛ́ temu ɛ́ wóò lɛ́ ɛ̀ ɓɛ̀ báa dɔ̀ ɛ̀ dàá yá yɛ ɓɛ hã́a wɛ̀: ɓɛ̀dɔ̀ ɛ́ wóo te lé kɛ̀amu kɛ́ peɓɛ̀ bɛ́mu ɛ́ mí wɛ̀, ɛ̀ ɓɛ̀dɔ̀ ɛ́ ɓɛ́ nìnbirìe ɛ́ te wóò wé kɛ̀amu iè hɔ̀ lɛ ɛ́ ɓɛ́ munɛ ɓɛ̀, ɛ̀ ɓɛ̀dɔ̀ ɛ́ wóo pĩ́ nɛ ɓɛ́ yá yɛ hã́a lè Dɔfĩn bɛ́záanú bòo hũn. Nɛ ape nìnbírɔ ɛ́ dɛ̀ lèpe bienù sɔ lɛ bòo ɛ́ tɛ̀, ɛ̀ tɛ̀ lè bòo.»

Yiezu ɛ́ ɓɛ̀ zĩncãahɛ̃ ɛ̀ dúɓɛ́nin

Mar 10.13-16; Lik 18.15-17

13Ɛ́ ɓɛ́ nìnbirìe dɔ̀ ɛ́ van dàa ɓɛ zĩncãahɛ̃ ɛ́ dàa ɓɛrɛ nɛ Yiezu ɛ̀ bè mí níhĩ́ peɓɛ̀ lɔ̀n à hɛ̃un Dɔfĩn ɛ̀ lɛ́ ɓà ǹ. Ɛ́ piè kɛ̀ránzɛ̀ɓɛ̀ ɛ́ khie pɛ̃́ àá ɓàasiè. 14Kɛ́ Yiezu pe den zɔn bie ɛ́ nɛ làa: «Mì fùansí ɓɛ́ zĩncɛ́-cíini ǹ nɛ ɓɛ ɓen niǹ viì, ɛ̀ mì bí si ɓɛ wɛ̀; iè hɔ̀ lɛ ɛ́ Dɔfĩn bɛ́záanú bòo ɛ́ sɛ̃̀ ɓɛ̀lɛ ɛ́ kɛ kɛ̀a ɓɛpe.» 15À síɛ bɔ̀ mí níhĩ́ ɓɛ̀ zĩncãahɛ̃ sɔ lɔ̀n, à khie lɔ́ yán ɛ́ khie cɔ́.

Zufìɛ bòo ɓàasɔ dɔ̀ bòo

Mar 10.17-31; Lik 18.18-30

16Ɛ́ biɛ̀ dɔ̀ ɛ́ van ɓɛrɛ ɓen yú Yiezu à ɔ̀ dìenin ɛ́ nɛ làa: «Kɛ̀ránlɔ, hɔ̀ iè bɔ̀tente hɔ́sɔ ɛ́ ń fɔ́ɓán ɛ̀ ǹ wé ɛ̀ dàá yí lé mɛkɛ̃nì lɛ yá vé?» 17Ɛ́ Yiezu zɔn kɔ̃́niɛ ɔ̀ ɛ́ nɛ làa: «Kɔ́ wiɛ dàá ɛ́ nìn dìenin àá bɔ̀tente bòo? Dɔfĩn mí dòonún ɛ́ temu iè nìtente. Kɔ́ ɓen wɛ nɛ kɔ yí lé mɛkɛ̃nì, ɛ̀ kɔ̀ tɛ̀ ɛ̀ wé hɔ́ bòo lɛ ɛ́ hɔ́pe Dɔfĩn nɛ a nìnbírɔ ɛ́ fɔ́ɓán à wé.» 18Á biɛ̀ ɛ́ zɔn nɛ làa: «Hɔ̀ iè bòo hɔ́sɔ ɛ́ Dɔfĩn nɛ a nìnbírɔ ɛ́ fɔ́ɓán à wé?» Ɛ́ Yiezu zɔn kɔ̃́niɛ ɔ̀ ɛ́ nɛ: «Bí ɓé nìnbírɔ wɛ̀; bí wé hɛ̃́fé tàá bɛ́fé wɛ̀; bí kɛ̃̀mɛ́ bòo wɛ̀; bí ɓúu ɓúo ɛ̀ bè nìnbírɔ dɔ̀ lɔ̀n wɛ̀; 19ɓàaní mì yàá àá mì nín; wɛní mì ńkɔnù kɛ̀a bòo lɛ ɛ́ kɔ́ dàa wɛ kɔ kùrú sɛ̃́hṹ.» 20Á zufìɛ ɛ́ zɔn nɛ làa: «Hɔ̀pe sí míkùi ɛ́ nín wé lò. Ɛ́ hɔ́ bĩniɛ kɛ́ ńɓùo?» 21Ɛ́ Yiezu ɛ́ zɔn bie lɛ́ à ǹ ɛ́ nɛ làa: «Kɔ́ ɓen wɛ nɛ kɔ ce ɛ̀ ɲunù tí, ɛ̀ kɔ̀ vɛ yìɛní kɔ́ bòo lɛ ɛ́ kɔ́ dàa míkùi ɛ̀ khíi lɛ́ pe hɔ̀ màa ɓɛ̀ nìkherà ǹ, ɛ́ kɔ́ ɓén yí yírɛ́ hɔ̀ hóohũn; ɛ̀ kɔ̀ ɓen bè niǹ máahṹ.» 22Ɛ́ hɔ́ lɛ á zufìɛ sɔ ɛ́ ɲɛ́ hɔ́pe biehĩ́ sí, á khie cɔ́ kɛ́ á híɛhɔ́ ɛ́ hɛ̀ yaa iè hɔ̀ lɛ á hṹn iè bòo ɓàasɔ cɛ̃̀un.

23Ɛ́ Yiezu ɛ́ khie ɛ́ bie àá mí kɛ̀ránzɛ̀ɓɛ̀ ɛ́ nɛ làa: «Nin bie hɔ lɛ́ miɛ ǹ àá bɔ̀bín nɛ hɔ hɛ̀ hie ɛ̀ bòo ɓàasɔ ɛ̀ zɔ hóohũn bɛ́záanú. 24Ɛ́ nín bĩní bie lɛ́ miɛ ǹ nɛ ńɲúkṹmì ńzɔ khíi àá mísĩ́mí kṹun ɛ́ den wuawi pɔ bòo ɓàasɔ ńzɔ Dɔfĩn bɛ́záanú hũn.» 25Ɛ́ hɔ́ lɛ ɛ́ ɓɛ́ kɛ̀ránzɛ̀ɓɛ̀ ɛ́ ɲɛ́ hɔ́, ɛ́ hɔ́ hɛ̀ yòokɛa peɓɛ̀ lɔ̀n ɛ́ ɓɛ́ ɛ́ bie ɛ́ nɛ: «Á wo iè wiení ɛ́ temu dɛ̀ ɓén fuen?» 26Ɛ́ Yiezu ɛ́ huie ɓɛ̀ à zɔn bie lɛ́ ɓà ǹ ɛ́ nɛ làa: «Hɔ̀ iè bòo lɛ ɛ́ yí dɛ̀ yá wé nìnbirìe viì, kɛ́ bòo míkùi ɛ́ pe wóò wé yí Dɔfĩn viì.» 27Ɛ́ Piɛre zɔn bie lɛ́ à ǹ ɛ́ nɛ: «Ké lɛ wo fùɛrɛ̀sí ké bòo míkùi ǹ ɛ̀ kè ɓɛrɛ bɔ̀ kɔ̀ máahṹ. Ɛ́ ké bòo ɛ́ wo ɓén wé wiɛ?» 28Ɛ́ Yiezu zɔn bie lɛ́ ɓà ǹ ɛ́ nɛ làa: «Nin bie hɔ lɛ́ miɛ ǹ àá bɔ̀bín nɛ pɛ̃̀hṹ lɛ kɛ́ á nìnbírɔ Zuú ɛ́ yòó kɛsí mí bɛ́záanú wànlè lɔ̀n mí ɓàarɔ́ hũn lè dímíɲɛ́ dɛ̀fĩì hũn, ɛ́ mípe nìɛ pírú àá nìɛ ɓɛ̀ ɲu lɛ ɛ́ bɔ̀ niǹ máahṹ ɛ́ ɓiɛ̀ ɓén kansí bɛ́záanú wànlɛà pírú àá bɔ̀nbɔ̀ ɲu lɔ̀n, ɛ̀ mì ɛ́ lè Yizarayɛɛle zĩhĩ́ɛ ɲúuhɛ̃ pírú àá bɔ̀nbɔ̀ ɲu lìe. 29Ɛ́ nìnbírɔ lɛ fùɛrɛ̀sí mí zĩhĩ́ɛ ǹ, tàá ɓá zɛ̀ɓɛ̀, tàá ɓá hĩ́ini, tàá ɓá yàá, tàá ɓá nín, tàá ɓá hṹnu, tàá mí zɛ̀ɓɛ̀, tàá mí mɛ̃hɛ̃, ǹpe niǹ yèrè bòo hũn, ɛ́ ɓàasɔ ɛ́ ɓén yí hɔ́pe sí míkùi fúu yìe khĩminù, à lò ɛ́ yí lé mɛkɛ̃nì lɛ yá vé. 30Ɛ́ ɓɛ́ hándíe bìkùi ɛ́ ɓén wé mɛ́ndíe, ɛ̀ ɓɛ̀ mɛ́ndíe bìkuì ɛ́ ɓén wé hándíe.»

Currently Selected:

Matiye 19: bwj

Highlight

Copy