Matiye 20

Lè wĩ̀i lɛ ɛ́ Yiezu ɛ́ wɛ̃̀ ɓɛ̀ nìnbirìe lɛ ɛ́ tɛ́ á nùún dɔ̀ mún hũn bòo

1Ɛ́ Yiezu ɛ́ bĩniɛ zɔn bie ɛ́ nɛ làa: «Ɛ́ mí húi, Dɔfĩn bɛ́záanú ɛ́ lɔ́ɓán àá mún ɓàasɔ dɔ̀ lɛ dan lɔ́ ɲɛǹbín dùdù ɛ́ nɛ mii vɛ cɛ̀ tɔntɛ́riè ɛ̀ ɓɛ̀ vɛ tɛ́ mí mún hũn. 2Á khɛ́ tɔ̀ àá ɓɛ́ tɔntɛ́riè sɔ ɛ́ nɛ mí wóo mii sàaní hɔ́rɔ àá denie#20.2 Denie dìcóoní ɛ́ hàarí wóò wé tɔntɛ́ wu-kùi sàanín. dí-cóoní wúsɔn-kùi hũn, à wo lɛ́ ɓɛ́ cɔ́ van ɛ́ tɛ́ piè mún hũn. 3Á bĩniɛ khũ̀a lɔ́ kɛ́ lé wurù ɛ́ wo ɛ́ yòó ɛ́ lɔ́ mɔn ɓɛ̀dɔ̀ kɛ́ ɓɛ́ wi hɔ fɔ́hĩ́ hũn ɛ́ yá bòo dɔ̀ ɛ̀ wé wɛ̀. 4Á bie lɛ́ ɓà ǹ nɛ làa: “Mìpe lò ɓiɛ̀ lan vɛ tɛ́ niǹ mún hũn ɛ̀ ǹ sàaní miɛ àá hɔ́ bòo lɛ ɛ́ mí fɔ́ɓán ɛ̀ mì yí.” 5Ɛ́ ɓɛ́ khie cɔ́. Á mún ɓàasɔ ɛ́ sĩ̀n zɔn lɔ́ wú-sɔnù hũn, àá wu-háalé hũn, ɛ́ lɔ́ mɔn ɓɛ̀dɔ̀, á bĩniɛ bie hɔ̀ bɔ̀cóoní sɔ ɛ́ lɛ́ ɓà ǹ. 6Ɛ́ zĩ́ihṹ, à mún ɓàasɔ bĩniɛ lɔ́ ɛ́ lɔ́ yú ɓɛ́ nìnbirìe dɔ̀ kɛ́ ɓɛ́ dɛ̃̀. Á ɓɛ̀ dìenin nɛ làa: “Mí wiɛ dàa dɛ̃̀ kiɛ́ ɛ́ tɔ̀ lè wurù kɛ́ mí yá bòo dɔ̀ ɛ̀ wé?” 7Ɛ́ ɓɛ́ zɔn nɛ: “Iè hɔ̀ lɛ ɛ́ nìnbírɔ dɔ̀ ɛ́ yí yɛ̀ kie nɛ ke vɛ tɛ́ mí tɔnlɔ́ wɛ̀.” Á zɔn bie lɛ́ ɓà ǹ nɛ: “Ɛ́ mípe lò ɓiɛ̀ lan vɛ tɛ́ niǹ mún hũn.”

8Ɛ́ hɔ́ lɛ ɛ́ ɓɛ́ tɔntɛ́riè hĩ́nírɔ́ yìi ɛ́ van dɛ̃un, á mún ɓàasɔ ɛ́ khie bie lɛ́ álɛ ɛ́ te ɓɛ tɔntɛ́riè bòo ɛ́ húi ǹ nɛ: “Ve ɓɛ tɔntɛ́riè ɛ̀ kɔ̀ sàaní ɓɛ́; ɛ̀ kɔ̀ ɓɛ́ hɔ́ fìi àá ɓɛ́lɛ ɛ́ ɓɛrɛ hɔ̀ máahṹ ɛ̀ dàá vɛ víení àá ɓɛ́lɛ ɛ́ ɓɛrɛ hɔ̀ híɛhɔ́.” 9Ɛ́ ɓɛ́lɛ ɛ́ van lè mún hũn hɔ̀ zĩ́ihṹ ɛ́ ɓɛrɛ lɔ́, ɛ́ hɔ́rɔ ɛ́ wóò yí denie dìcóoní, lɛ iè piè wúsɔn-kùi sàanín. 10Ɛ́ hɔ́ lɛ ɛ́ hɔ́ ɓɛrɛ dɛ̃un ɓɛ̀lɛ ɛ́ van lè mún hũn hɔ̀ híɛhɔ́, ɛ́ ɓɛ́ ɛ́ lieníkɛ ɛ̀ ɓɛ̀ nɛ ɓɛ́ ɓén yí ɛ́ pɔní ɓɛ́ sí khie; kɛ́ hɔ́ lò den wɔ́ denie dìcóoní ɛ́ ɓɛ́ wóò lɛ́ hɔ́rɔ ǹ. 11Ɛ́ ɓɛ́ hɔ̀ fé kɛ́ ɓɛ́ ɛ́ khĩ́ ɓɛ́ ɲihĩ́ɛ hũn ɛ́ nɛ̀ àpe mún ɓàasɔ 12ɛ́ nɛ: “Ɓɛ̀pe sí ɛ́ ɓɛrɛ hɔ̀ máahṹ ɛ́ ɓɛrɛ wɔ́ líɛrɛ́ dìcóoní tɔnlɔ́ ɛ́ ɓɛ́ tɛ́, ɛ̀ kɔ̀ sàaaniɛ ɓɛ̀ ɛ́ màaniɛ àá képe lɛ ɛ́ tɛ́ lɔ̀n bɔn ɛ́ tɔ̀ lè wurù, ké lɛ ɛ́ lé wurù ɛ́ ɲɛ́ ɲɛ́.” 13Á mún ɓàasɔ ɛ́ khie ɛ́ bie àá ɔ́dɔ̀ ɛ́ nɛ làa: “Kè biɛ̀, ń yí zɔ kɔ ǹ lò! Kɔ́ yí khɛ́ ɛ̀ tè àá mi nɛ kɔ tɛ́ wúsɔn-kùi ɛ̀ ǹ sàaní kɔ àá denie dìcóoní? 14Ɛ́ kɔ́ fé kɔ́ sàanín ɛ̀ kɔ̀ lan lò! Ń wɛ nin sàaní ɓɛ́ mɛ́ndíe ɛ̀ màaní àá kɔ. 15Nin wìe sũǹ yí dɛ̀ bòo lɛ ɛ́ ń wɛ ɛ́ yá wé àá niǹ màa? Yée kɛ́ hɔ́ lɛ ɛ́ nín niǹ sãamu ɛ̀ zɛ̃́ní ɛ́ te kɔ tĩì ɛ́ cĩ̀?”» 16Ɛ́ Yiezu zɔn bie sĩiniɛ ɛ́ nɛ làa: «Ɛ́ sí iè hɔ̀pe ɛ́ ɓɛ́ mɛ́ndíe ɛ́ dàa ɓén wé ɓɛ́ hándíe, ɛ̀ ɓɛ̀ hándíe ɛ́ ɓén wé ɓɛ́ mɛ́ndíe.»

Yiezu ɛ́ sĩ̀n ɛ́ mí húmú àá mí vìerɔ́ bòo ɛ̀ bie kɛ̀a yìehɛ̃̀tĩlán

Mar 10.32-34; Lik 18.31-34

17Ɛ́ Yiezu ɛ́ hàarí yòó vaá-vɛ Zerizalɛɛmu. Á vɔn mí kɛ̀ránzɛ̀ɓɛ̀ pírú àá nìɛ ɓɛ̀ ɲu ɛ́ khie ɛ́ bie lɛ́ nin ɓɛ́ dòonún kɛ́ ɓɛ́ bɔ̀ lè wṹn ɛ́ nɛ làa: 18«Ké lɛ iè pe ɛ́ wo yòó vaá-vɛ hɔ Zerizalɛɛmu, á nìnbírɔ Zuú ɛ́ ɓɛ́ ɓén yòó vɛ́ dé ɓɛ́ khɛ̃́ndàariè hándíe àá ɓɛ́ làndɛ́ kɛ̀ránliè núnú hũn. Ɓɛ̀ ɓén bie nɛ a fɔ́ɓán à ɓé, 19ɛ̀ ɓɛ̀ ɛ́ khíi dí-e ɓɛ̀lɛ ɛ́ yí dũ Dɔfĩn núnú hũn, ɛ́ ɓɛ́ ɛ́ yáakɛ a, ɛ́ nàa ɔ àá hɔ́ ńhùiehĩ́, ɛ̀ ɓɛ̀ ɛ́ khíi ɓáa ɔ́ lè ɓáalén dãanù lɔ̀n. Ɛ́ pehɔ̀ sítĩnlɔ́ bɔ̀nbɔ̀tĩlán zɔn, à ɛ́ vìé.»

Zaake àá Zãn ɓà nín bòo lɛ á hɛ̃nnɛ Yiezu viì

Mar 10.35-45; Lik 22.24-27

20Ɛ́ Zebede ɓà hṹnu ɛ́ van ɓɛrɛ àá mí zɛ̀ɓɛ̀ bìɛ ɲu, ɛ́ ɓɛrɛ yú Yiezu, à síɛ hùerɛ̀sí piè híɛhɔ́ à hɛ̃nnɛ à ǹ nɛ a wé mí àá hiì. 21Ɛ́ Yiezu ɛ́ zɔn ɔ̀ dìenin ɛ́ nɛ làa: «Hɔ̀ iè ńɓùo ɛ́ kɔ́ ɛ́ cɛ̀?» Á zɔn kɔ̃́niɛ ɔ̀ nɛ: «Niǹ zɛ̀ɓɛ̀ bìɛ ɲu lɛ ɛ́ kɔ́ húi, ɛ́ pɛ̃hṹ lɛ kɛ́ kɔ́ wi kɔ bɛ́záanú hũn, ɛ̀ kɔ̀ tɛ̀ nɛ a wìcóoní ɛ̀ kansí kɔ́ ńdóonín à wìcóoní ɛ̀ kansí kɔ́ ńmiinín.» 22Ɛ́ Yiezu ɛ́ zɔn kɔ̃́niɛ ɔ̀ nɛ làa: «Mí yí dũ hɔ bòo lɛ ɛ́ mí ɛ́ hɛ̃un wɛ̀. Lè lɔ̀nbiè ɲunlán dìɛ lɛ ɛ́ nín ɲu hũn ɛ́ mí dɛ̀ ɛ́ ɓén ɲu hũn?» Ɛ́ ɓɛ́ zɔn nɛ ɓɛ́ dɛ̀ hɔ̀. 23Ɛ́ Yiezu zɔn nɛ: «Hɔ̀pe wo bɔn kɛ́ lé ɲunlán dìɛ lɛ ɛ́ nin ɲu hũn ɛ́ mí ɓiɛ̀ ɓén ɲu hũn. Kɛ́ hɔ́ ǹkansí niǹ ńdóonín àá niǹ ńmiinín ɛ́ ńpe yí te yá lɛ́ wɛ̀. Hɔ̀ kansílénɓɛ̀ ɛ́ kiè Yàá ɛ́ te sɛ́sɛ́a bɔ̀sí ɓɛ́lɛ sãawi ɛ̀ ɓɛ̀ kansí yán bòo hũn.»

24Ɛ́ hɔ́ lɛ ɛ́ ɓɛ́ kɛ̀ránzɛ̀ɓɛ̀ pírú sí kɛ́ ɛ́ ɲɛ́ hɔ́, ɛ́ peɓɛ̀ tĩɛ̀ ɛ́ cɛ̃̀ ɓɛ̀pe zɛ̀ɓɛ̀ bìɛ ɲu sɔ ǹ. 25Ɛ́ Yiezu ɛ́ khie vɔn ɓɛ̀ ɓɛ́kùi à bie lɛ́ ɓà ǹ ɛ́ nɛ làa: «Mí dũ kɛ́ ɓɛ́ cɛ̃̀mɛ̀náa lɛ ɛ́ yí dũ Dɔfĩn bɛ́zɛ̀ɓɛ̀ ɛ́ wóò vɛ́ ɓɛ́pe ɓɛ́ cɛ̃̀mɛ̀náa nìɛ ɲɛkɛ̃̀a, ɛ̀ peɓɛ̀ nì-bɛ̃hɛ̃ ɛ́ lò wóò zɛ̃́ní ɓɛ́ pànkɛ́ àá ɓɛ́. 26Kɛ́ hɔ́pe sí ɛ́ yí fɔ́ɓán ɛ̀ hɔ̀ wé kɛ̀amu mì tĩ́ihṹ wɛ̀. Àlɛ kɛ́ á wɛ nɛ mí wé nì-bɛhɔ́ mì tĩ́ihṹ, ɛ̀ ɓàasɔ ɛ̀ wé míte àá mípe mìkùi tɔntɛ́. 27Àlɛ ɛ́ wɛ nɛ mí wé mí hándí, à sãawi à wé mí wɔnù. 28Ɛ́ sí iè hɔ̀pe, á nìnbírɔ Zuú ɛ́ dàa yí ɓen bòo lɛ ɛ́ wé ɛ̀ ɓɛ̀ tɛ́ tɔnlɔ́ ɛ̀ lɛ́ à ǹ, kɛ́ á ɓɛrɛ ɛ́ mii tɛ́ tɔnlɔ́ ɛ̀ lɛ́ ɓɛ́ nìnbirìe ǹ, ɛ̀ lɛ́ mí mɛkɛ̃nì ɛ̀ dàá yɛ̀ nìnbirìe bìkuì ɲún.»

Muaɓɛ̀ bìɛ ɲu dɔ̀ wiɛnírɔ́

Mar 10.46-52; Lik 18.35-43

29Ɛ́ hɔ́ lɛ ɛ́ Yiezu àá mí kɛ̀ránzɛ̀ɓɛ̀ ɛ́ zɔn ɛ́ lé Zeriko lóo hũn, ɛ́ nìnbí-kùi ɛ́ khie bɔ̀ Yiezu máahṹ. 30Ɛ́ muaɓɛ̀ bìɛ ɲu dɔ̀ lɛ ɛ́ kɛsí lé wṹn ɲunù ɛ́ ɲɛ́ ɛ̀ ɓɛ̀ nɛ a iè Yiezu temu ɛ́ khíi. Ɛ́ ɓɛ́ zɔn ɛ́ bénkɛ ɛ́ nɛ: «Ɲunsɔ, Daviide Zuú, mi ke miinɛ̀.» 31Ɛ́ ɓɛ́ nìzã̀amáa ɛ́ khie ɛ́ fi àá ɓɛ́ ɛ́ nɛ ɓɛ hĩì, kɛ́ ɓɛ́ den wookɛa ɛ́ zɔn ɛ́ bénkɛ cɛ̃̀un ɛ́ nɛ: «Ɲunsɔ, Daviide Zuú, mi ke miinɛ̀.» 32Ɛ́ Yiezu ɛ́ van dɛ̃̀, à vɔn ɓɛ̀ à ɛ́ ɓɛ̀ dìenin ɛ́ nɛ làa: «Hɔ̀ iè ńɓùo ɛ́ mí wɛ nɛ n wé ɛ̀ lɛ́ miɛ ǹ?» 33Ɛ́ ɓɛ́ zɔn ɛ́ bie lɛ́ à ǹ nɛ: «Ɲunsɔ, lɛ́ nɛ ke yìe ɛ̀ mi bòo.» 34Ɛ́ peɓɛ̀ miinɛ̀ ɛ́ yòó ɓaa Yiezu, á yòó han peɓɛ̀ yìe ǹ, ɛ́ mí laà hũn, ɛ́ peɓɛ̀ yìe ɛ́ yòó loo bòo, ɛ́ ɓɛ́ khie bɔ̀ Yiezu máahṹ.

Currently Selected:

Matiye 20: bwj

Highlight

Copy