Matiye 18

À nìnbírɔ lɛ ɲún lì lè Dɔfĩn bɛ́záanú hũn bòo

Mar 9.33-37; Lik 9.46-48

1Ɛ́ pehɔ̀ yìi hũn, ɛ́ Yiezu kɛ̀ránzɛ̀ɓɛ̀ ɛ́ ɓɛrɛ yú-o ɛ̀ ɓɛ̀ ɔ̀ dìenin ɛ́ nɛ làa: «À iè wieni ɛ́ temu ɲún lì ɛ́ pɔ ɓɛlɛ kɛ́ ɓɛ́kùi Dɔfĩn bɛ́záanú hũn?» 2Ɛ́ Yiezu ɛ́ khie vɔn zĩncáahɔ́ dɔ̀ ɛ́ ɓɛrɛ dìniɛ peɓɛ̀ tĩ́ihṹ, 3à zɔn bie ɛ́ nɛ làa: «Nin bie hɔ lɛ́ miɛ ǹ àá bɔ̀bín nɛ kɛ́ mí yí zɛ̀ní ɛ̀ wé kɛ̀a zĩncãahɛ̃, ɛ́ mí yí dɛ̀ Dɔfĩn bɛ́záanú hũn ɛ́ yá zɔ wɛ̀. 4Ɛ́ sí iè pe temu lɛ́ ɛ́ nìnbírɔ lɛ wóò síɛní míte ǹ ɛ̀ síɛ dìń kɛ̀a ɔ̀pe zĩncáahɔ́ lɛ ɓà ńmàa, ɛ́ temu iè ɔ̀pe lɛ ɲún lì ɛ́ pɔ ɓɛlɛ kɛ́ ɓɛ́kùi Dɔfĩn bɛ́záanú hũn. 5Ɛ́ nìnbírɔ kɛ́ á perɛ àpe zĩncáahɔ́ lɛ ɓà ńmàa niǹ yèrè lɔ̀n, ɛ̀ hɔ̀ ɛ́ iè ǹpe ɛ́ ɓàasɔ ɛ́ perɛnin.

Mar 9.42-48; Lik 17.1-2

6Kɛ́ nìnbírɔ ɛ́ lɛ́ ɛ́ ɓɛ́pe zĩncãahɛ̃ sɔ lɛ dũmuasɛ̃̀ mi ǹ ádɔ̀ ɛ́ khɔn Dɔfĩn wṹn, ɛ̀ hɔ̀ bòo ɛ́ hṹn tṹ ɓàasɔ viì ɛ̀ ɓɛ̀ ɛ̀ cɛ niihṹ dɛ̀bɛhɔ́ piè fɔnù ǹ, ɛ̀ ɓɛ̀ mìí ɔ́ ɛ̀ tɛ́ dé hɔ́ ɲun-bɛhɔ́ hũn. 7Hɔ̀ hɛ̀ hie ɓɛ̀pe dímíɲɛ́ sɔ lɛ nìɛ lɔ̀n, iè hɔ̀ lɛ ɛ́ hɔ́ bòo lɛ ɛ́ wóò lɛ́ ɛ̀ ɓɛ̀ dàá khe Dɔfĩn wṹn ɛ́ wi. Hɔ̀pe bòo lɛ ɛ́ wóò lɛ́ ɛ̀ ɓɛ̀ dàá khe Dɔfĩn wṹn ɛ́ pe wo wóo ɓén wé fúu. Kɛ́ á nìnbírɔ lɛ temu wóò lɛ́ ɛ̀ hɔ̀ dàá wé ɛ́ pe wo yìi ɓén mi hɔ! 8Kɛ́ kɔ́ núnú tàá kɔ̀ zeǹ ɛ́ ɓen temu wóò lɛ́ ɛ̀ kɔ̀ dàá khe Dɔfĩn wṹn, ɛ̀ kɔ̀ ɓúukɛ hɔ kóosí. Hɔ̀ bòo ɛ́ tṹ ɛ̀ kɔ̀ zɔ le mɛkɛ̃nì lɛ yá vé hũn àá yì dìcóoní tàá àá zeǹ dìcóoní ɛ́ pɔ hɔ lɛ ɛ́ kɔ vɛ zɔ hɔ dṹn lɛ yá vé hũn àá kɔ́ zehĩ́ bɔ̀nbɔ̀ ɲu, tàá àá kɔ́ níhĩ́ bɔ̀nbɔ̀ ɲu. 9Kɛ́ kɔ́ yìi ɛ́ ɓen temu wóò lɛ́ ɛ̀ kɔ̀ dàá khe Dɔfĩn wṹn, ɛ̀ kɔ̀ mun lè tɛ́viɛní. Hɔ̀ bòo ɛ́ tṹ ɛ̀ kɔ̀ vɛ zɔ le mɛkɛ̃nì lɛ yá vé hũn àá yìi dìcóoní ɛ́ pɔ hɔ lɛ ɛ́ kɔ dàá kɔ́ yìe bɔ̀nbɔ̀ ɲu kɛ́ ɓɛ́ ɓɛ ɛ̀ vɛ mìí kɔ tɛ́ dé hɔ́ cã̀ámìnɛ́ dṹn hũn.»

À pirɔ lɛ hṹn vṹnun kɛ́ ɓɛ́ khũ̀a mɔn ɔ̀ wĩ̀i

Lik 15.3-7

10Ɛ́ Yiezu ɛ́ bĩniɛ zɔn bie ɛ́ nɛ làa: «Mì pɛ mite ɛ̀ mì bí wóò lɛ́ nɛ mi yìe ɛ̀ bí tí ɓɛpe nìnbí-cíini sɔ lɛ dɔ̀ wɛ̀. Nin bie hɔ lɛ́ miɛ ǹ nɛ ɓɛ mɛlɛkɛɓɛ lɛ ɛ́ peɓɛ̀ bòo ɛ̀ húi ɛ́ wi hɔ́ hóohũn kìe Yàá Dɔfĩn híɛhɔ́ fúu. [11Á nìnbírɔ Zuú ɛ́ ɓɛrɛ ɛ́ mii fuení ɓɛ́ lɛ ɛ́ vṹnun ǹ.]

12Mí tĩì ɛ̀ mì nɛ wɛrɛ? Kɛ́ nìnbírɔ dɔ̀ ɛ́ dàa pirìe khĩminù (100), kɛ́ wìcóoní ɛ́ vṹnun, á yá fùansí ɓɛ́pe kĩ̀mí àá pírú àá bìe káani (99) sí kɛ́ ǹ lè ɓúkìe lɔ̀n à ɛ́ vɛ cɛ̀ àpe lɛ vũnun? 13Kɛ́ á van mɔn ɔ̀, ɛ́ nin bie lɛ́ miɛ ǹ nɛ a ɛ́ wɛní míte piè bòo hũn ɛ́ pɔní ɓɛ́pe kĩ̀mí àá pírú àá bìe káani (99) sí kɛ́ lɛ yí vĩ́ wɛ̀. 14Ɛ́ sí ɓiɛ̀ iè hɔ̀pe ɓà ńmàa ɛ́ mì Yàá Dɔfĩn lɛ wi hɔ hóohũn ɛ́ yí wɛ nɛ ɓɛ́pe nìnbí-cíini sɔ lɛ ɛ́ nìcóoní dɔ̀ ɛ̀ vĩ́ wɛ̀.»

Hɔ̀ bɔ̀koohɛ̃ sɛ́wɛ́rí dénlɔ́ bòo

15«Kɛ́ mì zuú ɛ́ wɔ́ bɔ̀koohɔ́, ɛ̀ kɔ̀ vɛ piè viì kɔ̀ dòonún, ɛ̀ kɔ̀ zɛ̃́ní piè ńwékhemù ɛ̀ lɛ́ à ǹ. Kɛ́ á ɲɛ́ kɔ́ bòo, ɛ̀ kɔ̀ wo yú mì zuú ǹ. 16Kɛ́ á pɛ̃́ nɛ mí yá ɲí kɔ́ bòo, ɛ̀ kɔ̀ vɛ ve nìnbí-cóoní tàá nìɛ ɓɛ̀ ɲu dɔ̀ ɛ̀ páa kɔ́ lɔ̀n ɛ̀ dàá vɛ piè viì, bòo lɛ ɛ́ wé, ɛ̀ kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn, ɛ̀ hɔ̀ bòo míkùi ɛ̀ dàá wóokɛ nìɛ ɓɛ̀ ɲu tàá nìɛ ɓɛ̀ tĩ yìe hũn. 17Kɛ́ á pɛ̃́ nɛ mí yá ɲí peɓɛ̀ bòo, ɛ̀ kɔ̀ bie hɔ ɛ̀ lɛ́ ɓɛ́ Dɔfĩn zũnù nìɛ ǹ; kɛ́ á pɛ̃́ nɛ mí yá ɲí ɓɛ́pe Dɔfĩn zũnù nìɛ bòo, ɛ̀ kɔ̀ wo líi ɔ́ àá nìnbírɔ lɛ ɛ́ yí bè Dɔfĩn wṹn tàá kɛ̀a lànpɔ́-férɔ.

18Nin bie hɔ lɛ́ miɛ ǹ àá bɔ̀bín nɛ bòo yée bòo lɛ ɛ́ mí pɛ̃́ bòo lè sṹsùnù, ɛ́ Dɔfĩn ɓén yòó pĩ́ bòo hɔ̀ hóohũn; ɛ̀ bòo yée bòo lɛ ɛ́ mí tɛ̀ bòo lè sṹsùnù, ɛ́ Dɔfĩn ɓén tɛ̀ bòo hɔ̀ hóohũn.

19Ɛ́ nin bĩní bie lɛ́ miɛ ǹ nɛ kɛ́ mí tĩ́ihṹ, ɛ́ nìɛ ɓɛ̀ ɲu ɛ́ ɲɛ́ ɓán ɛ̀ ɓɛ̀ hɛ̃nnɛ bòo dɔ̀ lè sṹsùnù, ɛ́ kìe yàá lɛ wi hɔ hóohũn ɛ́ wé hɔ́ ɛ́ lɛ́ ɓà ǹ. 20Iè hɔ̀ lɛ ɛ́ viì yée viì lɛ ɛ́ nìɛ ɓɛ̀ ɲu tàá nìɛ ɓɛ̀ tĩ ɛ́ van koo ɓánlɔ̀n hũn niǹ yèrè lɔ̀n, ɛ̀ ǹ wi peɓɛ̀ tĩ́ihṹ.»

À tɔntɛ́ lɛ nɛ mí yá dé sɛ́wɛ́rí bòo

21Ɛ́ Piɛre ɛ́ ɓɛrɛ lúwiniɛ Yiezu ǹ à ɛ́ ɔ̀ dìenin ɛ́ nɛ làa: «Ɲunsɔ, kɛ́ kìe zuú ɛ́ wɔ́ khɔn àá mi, ɛ̀ fɔ́ɓán ɛ̀ ǹ dé sɛ́wɛ́rí lɛ́ à ǹ fúu yìehɛ̃̀ yɛ? Fúu yìe hùuɲu yée?» 22Ɛ́ Yiezu zɔn bie lɛ́ à ǹ ɛ́ nɛ làa: «Ńɓùé, nín bie lɛ́ kɔ ǹ nɛ yìe hùuɲu bòo mí wɛ̀; kɛ́ yìe ɓaàtĩ àá pírú fúu yìe hùuɲu. 23Ɛ́ sí iè hɔ̀pe, ɛ́ lɛ iè hɔ̀ bòo lɛ ɛ́ Dɔfĩn bɛ́záanú ɛ́ dàa lɔ́ɓán: Lè lɔ́ɓán àá bɛ́zuú dɔ̀ lɛ ɛ́ nɛ mii dì mí kehĩ́ mí tɔntɛ́riè viì. 24Ɛ́ hɔ́ lɛ á ɓɛ́ hɔ́ fìi ɛ́ mí kehĩ́ ɛ̀ dì, ɛ́ ɓɛ́ van ɛ́ dàa ɔdɔ̀ dàa ɓɛrɛ kɛ́ piè kiè lɛ wi-è ǹ ɛ́ iè màa bùanìɛ muasié pírú (10 000). 25Kɛ́ hɔ́ lɛ á tɔntɛ́ sɔ ɛ́ yí dɛ̀ mí kiè sɔ ɛ́ yá sàaní, á bɛ́zuú nɛ ɓɛ yìɛní-ɛ pe àá ɓà hṹnu àá piè nìɛ àá bòo lɛ á dàa míkùi ɛ̀ dàá sàaní piè kiè. 26Á tɔntɛ́ sɔ ɛ́ van síɛ mí nunkɛ́yìe lɔ̀n ɓɛ́ ɲúnsɔ híɛhɔ́ à ɛ́ ɔ̀ ɓɔ́nɓɔ́ninin ɛ́ nɛ làa: “Hĩ̀ kɔ̀ hũn àá mi, ń ɓén sàaní hɔ́ míkùi.” 27Ɛ́ piè miinɛ̀ ɛ́ yòó ɓaa peɓɛ̀ ɲúnsɔ, á nɛ a fùansí ɛ̀ bí sàaní bòo wɛ̀, à fùɛrɛ̀sie ɔ̀ ǹ nɛ a lan. 28Ápe tɔntɛ́ sɔ ɛ́ lɔ́ vaá-lan á lɔ́ mɔn ɓá ńkɔnù tɔntɛ́ dɔ̀ lɛ ɛ́ piè kiè ɛ́ ɓiɛ̀ wi nin kɛ́ hɔ́ iè vɛ̃n-zɛ̀ɓɛ̀ khĩminù (100) mí dòonún. Á khie sun piè fɔnù kɛ̀a wìe mii ɓí-e kɛ́ á bie ɛ́ nɛ: “Sàaní hɔ́ bòo lɛ ɛ́ kɔ́ sãawi ɛ̀ kɔ̀ lɛ́ mi ǹ!” 29Ɛ́ ɓà ńkɔnù ɛ́ kuerɛ síɛ piè híɛhɔ́ à ɛ́ ɔ̀ ɓɔ́nɓɔ́ninin ɛ́ nɛ làa: “Hĩ̀ kɔ̀ hũn àá mi, ń ɓén sàaní hɔ́!” 30Kɛ́ á den pɛ̃́, à dàa ɔ̀ ɛ́ van dɔ́ lé kɛ̀sí hũn fúu á van sàaniɛ piè kiè sɔ. 31Ɛ́ ɓà ńkɔhĩ́ tɔntɛ́riè ɛ́ mɔn hɔ̀ bòo lɛ ɛ́ wɔ́, ɛ́ ɓɛ́ hɛ̀ yí wɛní ɓɛ́te wɛ̀; ɛ́ ɓɛ́ van bie hɔ̀ ɛ́ lɛ́ ɓɛ́ ɲúnsɔ ǹ. 32Ɛ́ peɓɛ̀ ɲúnsɔ ɛ́ vɔn ɔ̀ tɔntɛ́ sɔ à bie lɛ́ à ǹ ɛ́ nɛ làa: “Tɔntɛ́ mɛkɛ̃nɲiì ɓàasɔ! Ń hɛ̃un kɔ̀ kiè míkùi àá kɔ iè hɔ̀ lɛ ɛ́ kɔ́ ɓɔ́nɓɔ́niɛ mi ǹ. 33Ɛ́ kɔ́ ɓiɛ̀ hṹn yí sãawi ɛ̀ kɔ̀ mi mì ńkɔnù miinɛ̀ kɛ̀a bòo lɛ ɛ́ ń dàa mɔn kɔ̀ miinɛ̀?” 34À ɲúnsɔ tĩì ɛ́ hĩ́nà ɔ̀ ǹ, á nɛ ɓɛ vɛ dí-e lè kɛ̀sí hũn ɛ̀ vɛ́ á ɲɛkɛ̃̀a fúu kɛ́ yí bòo lɛ á sàaniɛ mí kiè míkùi.»

35Ɛ́ Yiezu ɛ́ zɔn bie sĩiniɛ ɛ́ nɛ làa: «Ɛ́ sí iè pe bòo lɛ ɛ́ kìe Yàá lɛ ɛ́ wi hɔ hóohũn ɛ́ ɓiɛ̀ ɓén wé àá miɛ kɛ́ mí dàa ɓén yáà dé sɛ́wɛ́rí àá mí tĩɛ̀ míkùi ɛ̀ lɛ́ mì zɛ̀ɓɛ̀ lɛ wɔ́ khɔn àá miɛ ǹ.»

Currently Selected:

Matiye 18: bwj

Highlight

Copy