Matiye 17

Yiezu tɛkɛ̀a zɛ̀nírɔ́ bòo

Mar 9.2-13; Lik 9.28-36

1Ɛ́ wihĩ́ huiezĩ́ ɛ́ van khie, ɛ́ Yiezu ɛ́ fɔ́ Piɛre àá Zaake àá ɔ́pe Zaake ɓà zuú Zãn ɛ́ dàa van yòó lé ɓúkìe dɛ̀bɛhɔ́ dɔ̀ lɔ̀n ɓɛ́ dòonún. 2Ɛ́ Yiezu ɛ́ yòó van zɛ̀niɛ peɓɛ̀ híɛhɔ́. Piè híɛhɔ́ ɛ́ zɛ̀niɛ ɛ́ ɲiiníkɛ kɛ̀a wurù bòo sí, ɛ̀ piè tĩ̀ɛ ɛ́ zɛ̀niɛ ɛ́ ce kɛ̀a ńpiemu. 3Ɛ́ mí laà hũn, ɛ́ ɓɛ́pe kɛ̀ránzɛ̀ɓɛ̀ nìɛ ɓɛ̀ tĩ ɛ́ mɔn Moyiize àá Elii kɛ́ ɓɛ́ ɛ́ dìkìmú àá Yiezu. 4Ɛ́ Piɛre ɛ́ zɔn bie lɛ́ Yiezu ǹ ɛ́ nɛ làa: «Ɲunsɔ, hɔ̀ sãa ɛ̀ kè wo kań hũ̀nún; kɛ́ kɔ́ tɛ̀ ɛ́ nín ɓɔn kùdàahɛ̃ bɔ̀nbɔ̀ tĩ ɛ́ lɛ́ miɛ ǹ: kɔ̀pe ɛ́ teń lédɔ̀, à Moyiize ɛ́ teń lédɔ̀ à Elii ɛ́ teń lédɔ̀.» 5Ɛ́ hɔ́ lɛ á ɛ́ bie kɛ̀amu, ɛ́ dùndùí dɔ̀ lɛ ɛ́ ɲiiníkɛ ɛ́ ɓɛrɛ hiɛ ɓà ǹ, ɛ́ hɔ́ tɛmu dɔ̀ ɛ́ zɔn tɛ̀ lè hũn ɛ́ nɛ làa: «Àpe lɛ iè niǹ Zuú lɛ ń wɛ cɛ̃̀un; ń wɛ niǹte piè bòo hũn cɛ̃̀un. Ɛ́ mí ɲí piè bòo!» 6Ɛ́ hɔ́ lɛ ɛ́ ɓɛ́ kɛ̀ránzɛ̀ɓɛ̀ ɛ́ ɲɛ́ lé tɛmu sɔ, ɛ́ ɓɛ́ hɛ̀ zɛ́rɛ cɛ̃̀un ɛ́ kùenkɛa siɛ ɓúnkɛasí ɓɛ́ híɛhɛ̃ lè sṹsùnù. 7Ɛ́ Yiezu ɛ́ van lúwiniɛ ɓà ǹ à siɛ hankɛ ɓà ǹ à zɔn bie ɛ́ nɛ: «Mì síɛ hĩ́ní, mì bí zán wɛ̀.» 8Ɛ́ ɓɛ́ hánkɛa ɓɛ́ yìe ɛ́ yòó ɛ́ húi kɛ́ ɓɛ́ den yí bĩní mi nìnbírɔ dɔ̀ kɛ́ Yiezu mí dòonún ɛ́ ɓen bòo mí.

9Ɛ́ hɔ́ lɛ ɛ́ ɓɛ́ yòó lɔ́ lé ɓúkìe lɔ̀n ɛ́ síɛ, ɛ́ Yiezu ɛ́ bie hièniɛ lɛ́ ɓà ǹ ɛ́ nɛ làa: «Hɔ̀ bòo lɛ ɛ́ mí mɔn ɛ́ mí bí bie ɛ̀ lɛ́ nìnbírɔ dɔ̀ ǹ fúu kɛ́ yí bòo lɛ á nìnbírɔ Zuú ɛ́ van húrún ɛ́ vìé lɔ́ hɔ́ húmú hũn vɔ́.»

10Ɛ́ ɓɛ́ kɛ̀ránzɛ̀ɓɛ̀ ɛ́ zɔn ɛ́ Yiezu ɛ̀ dìenin ɛ́ nɛ làa: «Ɛ́ hɔ́ iè ńɓùo ɛ́ ɓɛ́ làndɛ́ kɛ̀ránliè ɛ́ dàa wóò nɛ a Elii ɛ́ sãawi à ɓen vé?» 11Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Elii ɛ́ pe wo sãawi à ɓen ɛ̀ ɓen sɛ́sɛ́ hɔ́ bòo míkùi ɛ̀ bìsí vé. 12Kɛ́ ń den nin bie lɛ́ miɛ ǹ nɛ a Elii ɛ́ ɓɛrɛ vɔ́, kɛ́ ɓɛ́ nìnbirìe ɛ́ yí dũń ɔ́ wɛ̀; ɛ́ ɓɛ́ wo wɔ́ hɔ́ bòo lɛ ɛ́ ɓɛ́ wɛ míkùi àá ɔ́. Ɛ́ sí iè pe á nìnbírɔ Zuú ɛ́ lò ɓiɛ̀ lɔ̀n ɓén be peɓɛ̀ núnú hũn kɛ̀amu.» 13Ɛ́ ɓɛ́ kɛ̀ránzɛ̀ɓɛ̀ ɛ́ den wo dũnɛ kɛ́ á iè Zãn lɛ wóò líikɛ ɓɛ nìnbirìe hɔ̀ ɲumu hũn bòo á ɛ́ bie àá ɓɛ́ kɛ̀amu.

Zĩncáahɔ́ dɔ̀ lɛ ɛ́ lɛ ɛ́ ńɲíkĩ́rɔ ɛ́ lɔ̀n ɛ̀ biení wiɛnírɔ́

Mar 9.14-29; Lik 9.37-43

14Ɛ́ bòo lɛ ɛ́ ɓɛ́ van dɛ̃un le viì lɛ ɛ́ ɓɛ́ nìzã̀amáa ɛ́ wi nin, ɛ́ nùún dɔ̀ ɛ́ ɓɛrɛ siɛ mí nunkɛ́yìe lɔ̀n Yiezu híɛhɔ́ 15à zɔn bie ɛ́ nɛ làa: «Ɲunsɔ, mi niǹ zuú miinɛ̀. Dàndɛ̀híirɛ́ duiè ɛ́ wi-e ǹ á lɔ̀n ɛ́ be cɛ̃̀un. Á wóò wé à kùén zɔ dṹn, ɛ̀ hɔ̀ dɔ̀ à kùén zɔ ɲumu. 16Ɛ́ ń dàa ɔ̀ ɛ́ dàa ɓɛrɛ kɔ̀ kɛ̀ránzɛ̀ɓɛ̀ viì kɛ́ ɓɛ́ yí dań ɔ́ ɛ́ yí wiɛní wɛ̀.» 17Ɛ́ Yiezu ɛ́ zɔn bie ɛ́ nɛ làa: «Nìnbirìe lɛ ńdɛsìnlɔ́ mí, mí wiɛ dàa ɲɛkɛ̃̀a dɛ̃un kɛ̀amu? Nin kań àá miɛ fúu ɛ̀ vɛ dɛ̃ wuàwurù? Nin hè niǹ hũn àá miɛ fúu ɛ̀ vɛ dɛ̃ wuàwurù? Mì dàá ɔ́ zĩncáahɔ́ sɔ dàá ɓen hũ̀nún!» 18Ɛ́ Yiezu ɛ́ zɔn tĩ́nɛ àpe ńɲíkĩ́rɔ ɲún hũn á zɔn lɔ́ á zĩncáahɔ́ ǹ, ápe zĩncáahɔ́ ɛ́ yòó wan mí laà hũn. 19Ɛ́ ɓɛ́ kɛ̀ránzɛ̀ɓɛ̀ ɛ́ ɓɛrɛ lúwiniɛ Yiezu ǹ ɓɛ́ dòonún ɛ̀ ɓɛ̀ ɛ́ ɔ̀ dìenin ɛ́ nɛ làa: «Hɔ ńɓùo ɛ́ ké dàa ɛ́ yí dàń ɔ́pe ńɲíkĩ́rɔ sɔ ɛ́ yí ɲɛ?» 20Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Hɔ̀ iè hɔ̀ lɛ ɛ́ mí ǹdɛsĩ̀nlɔ́ ɛ́ mìniɛ cɛ̃̀un. Nin bie lɛ́ miɛ ǹ àá bɔ̀bín nɛ kɛ́ mí hṹn dàa ńdɛsĩ̀nlɔ́ hɛ̀rí kɛ́ hɔ́ kɛ fĩi kɛ̀a ńpièhĩ́ biì bòo sí, ɛ́ mí dɛ̀ ɛ́ wóò bie ɛ́ lɛ́ lépe ɓúkìe sɔ lɛ ǹ nɛ le bùín míte lé hũ̀nún ɛ̀ khíi vɛ hũ̀nyénín, ɛ́ lé ɛ́ bùín míte ɛ́ khíi vɛ yán. Ɛ́ bòo dɔ̀ lɛ ɛ́ wóo wé tɛ mi viì ɛ́ yá wé wɛ̀. [21Kɛ́ ápe ńɲíkĩ́rɔ sɔ sí ɓà ńmàa ɛ́ yáà lé kɛ́ ɲunù lìnlɔ́ àá Dɔfĩn hɛ̃nnɛ ɛ́ ɓen bòo mí.»]

Yiezu ɛ́ sĩ̀n ɛ́ mí húmú àá mí vìerɔ́ bòo ɛ̀ bie

Mar 9.30-32; Lik 9.43-45

22Ɛ́ hɔ́ lɛ ɛ́ Yiezu àá mí kɛ̀ránzɛ̀ɓɛ̀ ɛ́ wi hɔ Kalile pɛ̃̀hɛ̃ hũn, ɛ́ wurù dɔ̀ zɔn, ɛ́ Yiezu ɛ́ bie àá ɓɛ́ ɛ́ nɛ làa: «À nìnbírɔ Zuú ɛ́ ɓɛ́ ɓén dé ɓɛ́ nìnbirìe núnú hũn, 23ɛ́ ɓɛ́ ɛ́ ɓé. Kɛ́ pehɔ̀ sítĩnlɔ́ bɔ̀nbɔ̀tĩlán zɔn, à ɛ́ vìé.» Ɛ́ piè kɛ̀ránzɛ̀ɓɛ̀ ɛ́ hɛ̀ tĩɛ̀ yòo yáa míkùi.

Dɔfĩn zũ-bɛhɔ́ lànpóo sàanírɔ́ bòo

24Ɛ́ bòo lɛ ɛ́ Yiezu àá mí kɛ̀ránzɛ̀ɓɛ̀ ɛ́ van dɛ̃un Kapɛrɛnayiimu, ɛ́ lé Dɔfĩn zũ-bɛhɔ́ lànpó-fériè ɛ́ ɓɛrɛ luwiniɛ Piɛre ǹ ɛ́ ɓɛ̀ ɔ̀ dìenin ɛ́ nɛ làa: «Mì kɛ̀ránlɔ ɛ́ yáà sàaní lé Dɔfĩn zũ-bɛhɔ́ lànpóo yée?» 25Ɛ́ Piɛre ɛ́ nɛ a wóò sàaní hɔ́. Ɛ́ bòo lɛ ɛ́ Piɛre ɛ́ yòó zɔn lè zunù, ɛ́ Yiezu ɛ́ dú híɛhɔ́ ɛ́ zɔn ɔ̀ dìenin ɛ́ nɛ làa: «Simɔn, hɔ̀ ńɓùo ɛ́ kɔ́ ɛ́ nùún hɔ́pe lɛ bòo hũn? Ɓɛ̀ bɛ́sɔ ɛ́ temu fɔ́ɓán ɛ̀ ɓɛ̀ wóo sàaní hɔ́ lànpóo ɛ̀ lɛ́ ɓɛ́ dímíɲɛ́ bɛ́zɛ̀ɓɛ̀ ǹ? Ɓɛ̀ iè peɓɛ̀ lóo nìɛ yée kɛ́ ɓɛ́ iè ɓɛ̀ nɛ̀hãà?» 26Ɛ́ Piɛre ɛ́ zɔn nɛ ɓɛ iè ɓɛ̀ nɛ̀hãà. Ɛ́ Yiezu ɛ́ zɔn nɛ: «Ɛ́ ɓɛ́ lóo nìɛ ɛ́ wo yí fɔ́ɓán ɛ̀ ɓɛ̀ sàaní lò! 27Kɛ́ lɛ ɛ̀ kè bí yaaní ɓɛ́pe nìɛ sɔ lɛ tĩɛ̀, ɛ́ kɔ́ síɛ vɛ le vṹn ɲunù ɛ̀ vɛ tɛ́ kɔ́ hĩì ɛ̀ dé hɔ́ ɲumu hũn; à hán cɔ lɛ ɛ́ kɔ́ ɛ̀ yí ɛ́ kɔ́ haà ɲunù, ɛ́ kɔ́ zɔ́ mi vɛ̃hṹ yán, ɛ̀ kɔ̀ leń lé ɛ̀ kɔ̀ ɓen sàaní ńpe àá kɔ́pe kè lànpóo.»

Currently Selected:

Matiye 17: bwj

Highlight

Copy