Marko 6

1Na akapititi kukulakula; nakayingili mu ndima wake mwene; na wanafunsi wake wakankisiti. 2Ni pakufika sabato, akatumbwili kuyigalisa pa sunagoge: na wingi apa wakanjufwini wakakangichi, kujowa, Kuhumila kuliku uyu ayii nafyo ifi? na kawili, Malango maki apeliwi uyu, ni mbafu ngati isi sikitiki wuli pa mawoko gake? 3Si uyu wa sermala, mwana wa Mariamu, ni ndongo wa Yakobo, ni Yoses, ni Yuda, ni Simon? ni walumbu mundu si wayii kuni kwitu? 4Ni wayili mu kukuwasika pa yombe. Nu Yesu akajowiti kwa wombe, Wa kulweta nukuya wangali liginiko, lema pa ujengo wa dadi mundu, ni pa nsafi wake mwene, ni pa nyumba yake mwene. 5Ni akahotwili lepa bahapa kukita kindu kya mbafu, lema pakalekili mawoko pa wakulegeleka wachokope, akawalwasiti. 6Na akakangichi ndawa pangali kukela kwawe.

Na akasyungutili pa mihali yawe kuyigalisa.

7Na akikemili kumi na wawili wala, na akatumbwili kuwatuma wawili wawili; ni akawapili chengo panani pa roho sya wafu; 8na akawataukili kukita wasipinda kindu pa ndila, lema ndonga yakape; nukuya nkate, nukuya lihako, nukuya mapesa mu lukoto; 9koma kwikungila sapato pasi: na wasifwata mingila yiwili. 10Na akawajowili, Payi poha baho muyingila mu nyumba, kukula muhwelaye mpaka mupite kukula. 11Na payi poha apa wawakemelesa lepa, haka wawayufwanila lepa, apa mupite kunja kukula, mukung’undaye lufumbi luyii pasi pa njayo sinu kwa ulungamakiso kwawe. 12Na wakapititi, kuwandisa kukita wapelaye. 13Na wakatagiti kunja madaimon mingi, na wakabakisi mafuta wa mahele wa kulwala, na wakawalwasiti.

14Nu Herode mutwa akayufwini; pakuya lihina lyake likamanyiki: na akajowiti, Yohana Wakubatisa asyukiti pa wakufwa, na ndawa ya iki fya mbafu ifi fikita mahengo pa yombe. 15Leka wangi wakajowiti, Eliya ayii. Leka wangi, Wa kulweta, ngati yumonga wa wakulweta wala. 16Leka Herode, pakayufwini, akajowiti, Uyu nenga nikandumwili mutu, Yohana, yuyu asyukiti. 17Pakuya Herode mwene akatumiti, akankamwili Yohana, na akankungiti pa kukungika ndawa ya Herodia, mhanu wa Filipo nung’una: pakukita akantuwili. 18Pakuya Yohana akanjowili Herode, Yiyitikalika lepa kukita uye nako mhanu wa nung’unawo. 19Leka Herodia akambikili mitumba, na akalonditi kunkoma; 20na akahotwili lepa; pakuya Herode akanjogwipi Yohana, pakumanya kukita mundu ngolofu ni mbalafu ayii, ni akamgohiti. Na pala akanjufwanili, akayili mu kuholangana fingi; ni akanjufwanili kiniambile. 21Ni pakufika ligono linofu, apa Herode pa ligono lya kuhogoleka kwake akawakitili manduna wake kyakulya, na makapitao wa maelfu gake, na wandu wakutumbula wa Galilaya; 22na pala mwana ndala wa Herodia akayingili ni akahiniti, akanganisi Herode na wala wakatemi pasi pamonga nuyombe pa kyakulya; leka mutwa akanjowili mwali yula, Uluwe kwangu kiyi kyoha iki ulonda, na yanikupele. 23Na akandapalili, Kiyi kyoha iki yauniluwe, yanikupele, mpaka pinga ya utwa wangu. 24Na akabiti kunja, akantawalile nyina, Yaniluwile kiki? Leka yombe akajowiti, Mutu wa Yohana Wakubatisa. 25Na hino apa akayingili kiyumbatakile kwa mutwa, nakiluwili, kujowa, Nilonda unipele hino apa mu kiheneko mutu wa Yohana Wakubatisa. 26Nu mutwa akanionganiki nyahope; koma ndawa ya kulapila kwake, na ndawa ya awa wakutama pasi pa kyakulya, akalonditi lepa kumkana. 27Na hino apa mutwa akatumiti askari, na akataukili kutola mutu wake: ni akabiti, akadumwili mutu wake pa kukungika, 28ni akatoliti mutu wake pa kiheneko, na akampili mwali yula; nu mwali akaupeliki kwa nyina. 29Na pala wanafunsi wake wakayufwini, wakachiti na wakapinditi ntufi wake, na wakauwikiti pa manyinja.

30Na ma‐apostolo wawungana kwa Yesu; na wakantawalili yombe fyoha fila wakakiti, na fyoha fila wakafiyigalisi. 31Na awajowela, Muhichaye mwenga mwawene pa mweya pandu pa lipululu, na mupumulile huti. Pakukita wakayili wingi wakuhicha na wingi wakubita, na wakayili lepa nu lukumbi lunofu haka lwa kulya. 32Na wakabiti pa liboti ku pandu pa lipululu pa mweya. 33Na wandu wakawaweni wombe wayii mu kuluta, na wingi wawawalalili, na pa ndima kuhumila makaya goha wakakimbili pamonga kukulakula, na wakalutalili. 34Na pakapititi yombe, akaloliti lipuga likulungu, na akatoliki lipyana kwa wombe, ndawa wakayili ngati mambelele gangali wa kudima: na akatumbwili kuwayigalisa fingi. 35Na pala saa yikayili mu kuyiwila, wanafunsi wake wakanchilili, ni wakajowiti, Pa lipululu pandu apa, ni saa hino yiyii mu kuyiwila: 36uwapele awa mwanja, nausi wabite mu migunda na mihali yiyii papipi, na wayihemele wene kyakulya. 37Koma akahigiti akajowiti kwa wombe, Muwapele kyakulya walye. Na wanjowela, Wila tibite ni kuhemela mikate ya madenario mia siwili, nu kuwapela awa walye? 38Leka awajowela, Mikate yilinga muyii nayo? mubitaye, muwone. Na apa wakamanyiti, wajowa, Mhano, ni somba siwili. 39Na akawataukili kukita woha watame pasi mipango mipango pa ndindi. 40Na wakatemi pasi migawo migawo, mia mia na makumi mhano mhano. 41Na akatoliti mikate mhano ni somba siwili sila, na akaloliti kunani, na akapili kihomo, na akametwili mikate yila; na akawapili wanafunsi nausi wawawikile wombe; ni somba siwili akawagawili woha. 42Na wakalili woha, na wakatupili. 43Na wakatondwili fimenyumenyu, masenjele kumi na gawili, na fya somba kawili. 44Na wala wakulya mikate wakayili maelfu mhano wagosi.

45Na hino apa akawakikisili wanafunsi wake kuyingila mu liboti, ni kulongola ku lisi lingi ku Betsaida, mpaka pala mwene alipela lipuga mwanja. 46Na apa akawalagili wombe, akabiti ku kidunda kusali. 47Ni pakufika kimihi, liboti likayili pagati pa nyanja, nuyombe wakape pa ndima. 48Na pakawaweni wahumbusika pa kufiga, pakukita mbepo yikayili mulongolo, ngati lukumbi lwa kuyupilana pa kacheche kilo awachilila, kigendile panani pa nyanja; na akalonditi kuwalutalila: 49koma wombe apa wakambweni agenda‐genda panani pa nyanja, wakaholiti kukita kiyii kya kiroho, ni wakakuwiti: 50pakuya woha wakambweni, ni wakayambaniki mioyo. Leka hino apa akalongili nawo, ni awajowela, Muye nu mwoyo: nenga niyii; mukotoke kuyogopa. 51Na akakweliti kwawe pa liboti; ni mbepo yikalisiti: 52na wakakangichi muni mugati mwawe; Pakuya wakawalalili lepa ya mikate yila, koma mwoyo wawe ukayili wa kugulumbala.

53Na apa wakayombwiki, wakachiti pa ndima ku Genesaret, na wakalekili nanga. 54Na pala wakafuwiki pa liboti, hino apa wandu wakambalalili yombe, 55na wakakimbalili kisyungutile pa ndima woha wula, na wakatumbwili kutola pa ndengati syawe watamu, pala wakayufwini kukita ayii kula. 56Na payi poha akayingili yombe, pa mihali, pangi pa makaya, pangi pa migunda, wakawawikili watamu pa machengo, na wakampembisi kukita wakwafye haka lupeto lwa nguo yake: na wala woha wakakwafiti wakayokoliki.

Currently Selected:

Marko 6: MGS1937

Highlight

Copy