Marko 7

1Ni wawunganika kwake waFarisayo, na wangi wa kulembela, wala nawombe wakahumili pa Yerusalem, 2na wakawaweni wangi wanafunsi wake walya mikate ni mawoko ga waka, gaga gangakusa. 3Pakuya waFarisayo, na waYehudi woha, wona walemiti kukusa mawoko, kisingile ni makonde, walyaga lepa, kugoha mawungu ga wakulu‐wakulu: 4na pa kuhuma pa chengo, wona walemiti kuyoga, walyaga lepa: ni fya mahele fingi fila wakafiyupiti kufigoha, fifi maguyuliko ga mitimbo ni fiwiga ni masufuria. 5Na waFarisayo na wa kulembela wankota yombe, Kwa kiki wanafunsi wako wagenda‐genda lepa kwa ndingo wa mawungu ga wakulu‐wakulu, koma walya nkate wawe na mawoko gangakusa? 6Leka akajowiti kwa wombe, Wicho Isaya akawalwetili mwenga wakwikangalakisa, umu yilembekili,

Nsafi uwu waniginika ni milomo yawe,

Koma mwoyo wawe uyii patali na nenga.

7Leka waka wanigwilakimbo,

Kuyigalisa mawulo mimbi sya wandu.

8Muleka luwimbi lwa Mulungu, kukamula mawungu ga wandu. 9Na akawajowili, Wicho muhepa luwimbi lwa Mulungu, nausi mugohe liwungu linu. 10Pakuya Musa akajowiti, Ginikaye dadiyu nu nyoko; na, Wakunjowela dadi mundu pangi nyina fiwifu, afwe kifwilile: 11leka mwenga mujowa, Wona mundu ajowa kwa dadi mundu haka kwa nyina, Kiyi kyoha ngaupatiti kindu kwa nenga kiyii Korban, ili liyii, Njetulo; 12kitumbulile bahalapala munjitakila lepa akite kindu kwa dadi mundu pangi nyina; 13kuhepa lilowe lya Mulungu pa liwungu linu, lila mukapisiti: ni fingi ngati ifi mufikita. 14Na akikemili lipuga kawili, nakawajowili, Muyufwanile mwawoha, ni muwalalile: 15payilepe kindu kya kuhumila kunja kwa mundu, kila kiyingila mugati mwake, kihotola kunkita wa waka: koma fila fipita pa mundu, fifi finkita wa waka. 16Mundu ayi yoha, wona ayii ni makutu gakuyufwana, ayufwanilaye. 17Na pala akayingili mu nyumba kulekana ni lipuga, wanafunsi wake wakankotiti ngongo iyi. 18Na awajowela wombe, Wiwi na mwenga kawili muyii lepa nu luhala? Muwona lepa, ati, kukita kiyi kyoha kya kunja, kila kiyingila mugati mwa mundu, kihotola lepa kunkita wa waka; 19ndawa kiyingila lepa mu mwoyo wake, koma mu lileme lyake, ni kipita mwanja pa mayendo? Akajowiti iki kukita fyakulya fyoha fiye fyakuguyulika. 20Leka akajowiti, Kya kupita pa mundu, kikilakila kinkita mundu wa waka. 21Pakuya kuhumila kugati, kipitile pa mwoyo wa wandu, maholo mawifu gapisika, fiyaka, fya kuyiwa, fya kukoma, 22fya ukeme, fya kunyonyela, fya usokosi, fya kukonga, fya kunyuluka, liho liwifu, blasfemia, fya kwikwisa, fya kuhimuka: 23findu ifi fyoha fya usokosi fipita mugati, ni finkita mundu wa waka.

24Leka pakayimi akawukiti kukulakula, nakabiti ku mipaka ya Turo ni Sidon. Nakayingili mu nyumba, nakalonditi lepa kukita mundu apate kumanya: koma akahotwili lepa kuyuwalika. 25Koma hino apa ndala, yula kana mundu kadala kakayili ni roho ya wafu, pakayufwini fya yombe, akachiti na akagwili pa njayo syake. 26Leka ndala uyu akayili mGriki, mSurofenike pa ntangilo. Na akampembisi nausi atage kunja daimon kupita pa kana mundu kadala. 27Na akanjowili, Uleke huti wana watupilaye: pakuya kinofu lepa kutola nkate wa wana ni kutupela tumabwa. 28Leka akamhigiti ni kunjowela, Ena, Bambo: haka tumabwa pasi pa mesa tulya fimenyumenyu fya fyakulya fya wana. 29Na akajowiti kwa yombe, Ndawa ya lilowe ili bita mwanja; daimon apititi pa mwanao ndala. 30Na pakabiti ku nyumba yake, akankolili kana mundu agoniti pa kitala, nu daimon apititi.

31Na akapititi kawili pa mipaka ya Turo, nakachiti pagati pa Sidon mpaka pa nyanja ya Galilaya, pagati pa mipaka ya Dekapoli. 32Na wantolela mundu wa kisiwasi, wa kimama; ni wampembesa nausi ambikile kiwoko kyake. 33Na akantoliti ku mweya kulekana ni lipuga, nakayingisi ngonji syake mu makutu gake, na pakafunyiti, akakwafiti lulimi lwake; 34na apa akaloliti kunani, akawuwili, na anjowela, Efatha, lili liyii, Udindulike. 35Na makutu gake gakadinduliki, nu lutata lwa lulimi lwake lukawopoliki, na akatumbwili kulongela wicho. 36Na akawataukili kukita wasinjowela mundu ayi yoha: koma umu akawataukili wombe, kilutile nyamhope wakakiwandisi. 37Na kulutila nyamhope, wakakangichi muni, kujowa, Akiti fyoha wicho: akita haka wa kisiwasi wayufwane, na wangalongela walongele.

Currently Selected:

Marko 7: MGS1937

Highlight

Copy