Marko 8

1Pa magono gagalagala, apa kawili likayili lipuga likulungu, na wakayili lepe ni kindu wakilye, akikemili wanafunsi wake, na awajowela, 2Nitoleka ni lipyana pa lipuga ili, ndawa hino magono gadatu wahweliti na nenga, na wayilepe ni kindu wakilye: 3na wona niwapela mwanja ni njala yawe, yawasinduke pa ndila; na wangi wa wombe wayili wa patali. 4Na wanafunsi wake wakamhigiti yombe, Kuhumila kuliku mundu yahotole kuwatupalisa awa ni mikate mu lipululu? 5Na akawakotiti, mikate yilinga muyii nayo? 6Leka wakajowiti, Saba. Ni akataukili lipuga kutama pasi: na akatoliti mikate saba, ni apa akapili kihomo, akametwili, ni akawapili wanafunsi nausi wawawikile wombe; na wakaliwikili lipuga lila. 7Ni wakayili ni tusomba twa kuwalangika: na pakatupili kihomo, akataukili wawawikile utu kawili. 8Na wakalili, na wakatupili: na wakatondwili, fya kusigala fya fimenyumenyu, mbalo mhano ni siwili. 9Leka wakayili ngati elfu ncheche: na akawapili mwanja. 10Na hino apa akayingili mu liboti pamonga na wanafunsi wake, nakachiti pa mipaka ya Dalmanutha.

11Na wakapititi waFarisayo, na wakatumbwili kukotana nuyombe, kulondalonda kiwalalilo kwake kuhumila kunani, kungesa yombe. 12Na pakawuwili mu roho yake, ajowa, Ndawa kiki kihogosi iki kilonda kiwalalilo? chakaka niwajowela, Kihogosi iki yakipelewe lepa kiwalalilo. 13Na akawalekiti, na pakayingili kawili mu liboti, akabiti ku lisi lingi.

14Na wakayiwiti kupinda mikate; na wakayili lepa ni mikate pamonga nawo lema umonga waka. 15Na akawataukili, kujowa, Muwone, mulole kuhuma pa kimela kya waFarisayo ni pa kimela kya Herode. 16Na wakajowini yungi ni njini, Tiyilepe ni mikate. 17Nu Yesu, pakaloliti, awajowela, Kwa kiki mujowana ndawa muyilepe nayo mikate? wila mukona kuwona haka kuwalalila? muyii nayo mioyo yinu ya kugulumbala? 18Pakuya ni miho, mulola lepa? na pakuya na makutu, muyufwana lepa? na mukumbukila lepa? 19Pala nikametwili mikate mhano kwa elfu mhano wala, masenjele galinga ga kumemeseka ni fimenyumenyu mukatondwili? Wanjowela, Kumi na gawili. 20Na pala saba kwa elfu ncheche, filingilo fya mbalo silinga sya fimenyumenyu mukatondwili? Na wanjowela, Saba. 21Na awajowela, Mukona wangali kuwalalila?

22Ni wahicha mpaka Betsaida. Na wantolele wakukoyoka miho, na wampembesa nausi ankwafye. 23Na pakankamwili kiwoko kya wakukoyoka miho yula, akampinditi kunja ku mhali; na pakafunyiti mu miho gake, na kumbikila mawoko, akankotiti, Ulola kindu ati? 24Na apa akanyanyamwisi miho, akajowiti, Nilola wandu; pakuya niwona ngati mikongo ya kugendagenda. 25Ni akambikili mawoko kawili pa miho gake; ni akaloliti wicho, ni akakilawusiki ngati mwandi, ni akaloliti fyoha wicho mu miho. 26Na akantumiti ku nyumba yake, kujowa, Haka ku mhali usiyingila.

27Nu Yesu akapititi, na wanafunsi wake, ku mihali ya Kaisaria Filipi: na pa ndila akakotiti wanafunsi wake, kuwajowela, Wandu wanijowa nenga kukita na nani? 28Leka wakantawalili, kujowa, Yohana Wakubatisa: na wangi, Eliya; leka wangi, Yumonga wa wakulweta. 29Na akawakotiti, Leka mwenga mujowa nenga niyii nani? 30Petro ahiga na anjowela, Wenga uyii Kristo. Na akawataukili nausi wasinjowela mundu ya yombe. 31Na akatumbwili kuwayigalisa, kukita Mwana wa adam ngayufwini mahumbuso mingi, ni kukaniwa ni wakulu‐wakulu, ni makasisi makulungu, ni wa kulembela, ni kukomeka, ni panyuma pa magono gadatu kusyuka kawili. 32Na akalongili lilowe pa lulanga. Nu Petro akantoliti, na akatumbwili kundakalila. 33Koma pakagelawini, ni kuwawona wanafunsi wake, akandakalili Petro, na ajowa, Bita kunyuma kwangu, Shetani: pakuya uholangana lepa fya Mulungu, koma fya wandu. 34Na akikemili lipuga pamonga na wanafunsi wake, nakajowiti, Mundu ayi yoha wona alonda kuyicha munyuma mwangu, ikane mwene, na itwike msalaba wake, na anikise nenga. 35Pakuya ayi yoha uyu alonda kuyokola wumi wake yautage; leka ayi yoha uyu yautage wumi wake ndawa ya nenga na ya evangel yauyokole. 36Pakuya mundu yayipatile mbendo nyiki, wona apata ndima wa mfilimila, ni alipasika wumi wake? 37Pakuya mundu ngapeliki kiki kya kuyandungana nu wumi wake? 38Pakuya ayi yoha uyu yalekeleke lihamu pa nenga na pa malowe gangu kwa kihogosi iki kya ukeme ni kyene sambi, Mwana wa adam kawili yalekeleke lihamu pa yombe, baha ayiche pa kukwisika kwa Dadi mundu pamonga na wakamalaika wapakape.

Currently Selected:

Marko 8: MGS1937

Highlight

Copy