Marko 9

1Ni akawajowili wombe, Chakaka niwajowela, Wayii wangi wa awa nawombe wayima apa, yawalose lepa kifwa, mpaka pala yawawone utwa wa Mulungu uhicha ni mbafu.

2Ni panyuma pa magono sita Yesu awatola pamonga nuyombe Petro, nu Yakobo, nu Yohana, ni akwela nawo ku kidunda kilacho pa mweya wala wakape: na akang’anamwiki palongolo pawe: 3na nguo syake sikakitiki sya kung’anyma, siwalafu mbee; ngati umu wakuguyula pa ndima ahotola lepa kusiwalasa. 4Na wakawonangini nawo Eliya pamonga na Musa: na wakayili mu kulongela nu Yesu. 5Na ahiga Petro na anjowela Yesu, Rabbi, kiyii kinofu titame apa: na uyitakile tijenge fikonji fidatu; kimonga kwa wenga, ni kimonga kwa Musa, ni kimonga kwa Eliya. 6Pakuya akamanyiti lepa iki ngaahigiti; pakuya wakayogwipi nyahope. 7Ni likafiki lifundi kuwalekela kifwinyi: ni yikapititi njowelo kuhumila ku lifundi, Uyu ayii Mwanangu wakuganika muni: munjufwanile yombe. 8Na kikenyemukile, pa wakagelawini, wakambweni lepa kawili mundu, lema Yesu wakape pamonga nuwombe.

9Na pa kuselela wombe pa kidunda, akawataukili nausi wasintawalila mundu fila wakafiweni, mpaka baha Mwana wa adam yasyuke pa wakufwa. 10Na wakagohiti lilowe ili, kukotana yungi ni njini kiki kusyuka kula pa wakufwa. 11Na wakankotiti, kujowa, Wakulembela wajowa kukita Eliya ngalongwili kuhicha. 12Leka akawajowili, Eliya nakukotoka lepa kuhicha palongolo, ni yayimike kawili fyoha: na yilembiki wuli ya Mwana wa adam, kukita yayufwane mahumbuso mingi ni kuhepeka? 13Koma niwajowela, kukita Eliya achiti, na wakankitili mula wakalondili, ngati umu yilembekili ya yombe.

14Na pala wakawachilili wanafunsi, wakaweni lipuga likulungu kuwasyungutila, na wakulembela wakayili mu kukotana nawo. 15Na hino apa lipuga lyoha, pa wakambweni, wakagana‐ganiti nyamhope, ni kunkimbalila, wakandamukili. 16Na akawakotiti wombe, Mukotana nawo kiki? 17Na akamhigiti yumonga wa lipuga, Mwalimu, nikachiti kwako nu mwanangu, uyu ayii nayo roho yangajowa; 18na payi poha wona yinkamula, yingwisa pasi: na akita lifulufulu, ni kugogodola mino, ni afulufusika: na nikajowiti kwa wanafunsi wako nausi wayitage kunja; na wakahotwili lepa. 19Leka awahiga na ajowa, Kihogosi kyangali kiyitakiso, mpaka ndali yaniye pamonga nu mwenga: mpaka ndali yaniyisinge nu mwenga? ukantole yombe kwangu. 20Na wakantolili kwa yombe: na pa kumbona roho hino apa yikankachwili ngani; na pakagwili pasi, akagalawiki ni kukita lifulufulu. 21Na akankotiti dadi mundu, Lukumbi wuli luyii kitumbulile iki kikangwilili yombe? 22Leka akajowiti, Kitumbulile ukeke wake. Na pingi pingi yintaga haka pa mwoto, haka ku machi, nausi yinjanange: leka wona uhotola kindu, utoleke lipyana nutenga, na utitangatile. 23Leka Yesu akajowiti kwa yombe, Wona uhotola! 24Fyoha fihotoleka kwa yula yuakela. Hino apa akakuwiti dadi wa mwana yula, nakajowiti, Nikela; utangatile pangali kukela kwangu. 25Nu Yesu pala akaweni kukita lipuga likimbila pamonga, akalakalili roho ya wafu, kunjowela, Wenga roho ya ngalongela ni ya kisiwasi, nikutaukila, upite pa uyu, na usiyingila kawili pa yombe. 26Na pala yikakuwiti, na kukachula kwingi, yikambukiti: nu mwana akayili ngati wa kufwa; mpaka wingi wakajowiti, Afwili. 27Leka Yesu akankamwili kiwoko, nakanjimwisi; na akayimiti. 28Na pala akayingili mu nyumba, wanafunsi wakankotiti ku mweya, kujowa, Tenga tikahotwili lepa kuyitaga kunja. 29Na akawajowili, Ntundu uwu uhotoleka lepa kuwusika, lema pa kusali.

30Na wakawukiti kukula, na wakagenditi pagati pa Galilaya; na akalonditi lepa kukita mundu apate kumanya. 31Pakuya akawayigalisi wanafunsi wake, nakawajowili, Mwana wa adam afumbulika mu mawoko ga wandu, na yawankome; na wona akomiwi, panyuma pa magono gadatu yasyuke kawili. 32Leka wakawalalili lepa lilowe ili, na wakayogwipi kunkota.

33Na wakachiti pa Kapernaum: na pala wakayili mu nyumba akawakotiti kujowa, Mujowaneye kiki pa ndila? 34Leka wakatemi kinunu: pakuya wajowaneye yungi ni njini pa ndila, nkulungu nani? 35Na pakatemi pasi, akakemili kumi na wawili wala; na awajowela, Mundu wona alonda kuya wakutumbula, yaaye wa panyuma wa woha, na wakuwatumakila woha. 36Na pakatoliti kana, akakawikiti pagati pawe; 37na pakakapagiti, akajowiti kwa wombe, Ayi yoha uyu yakakemelese kamonga ka tuwana ngati aka pa lihina lyangu, anikemelesa nenga: na ayi yoha uyu anikemelesa nenga, nukuya nenga lepa, koma yula akanitumiti nenga.

38Nu Yohana akanjowili yombe, Mwalimu, tikambweni nunuyu pa lihina lyako ataga kunja madaimon: na tikambesiti, pakuya atikisa lepa. 39Leka Yesu akajowiti, Mukotoke kumbesa: pakuya payilepe mundu yuyu yuakita fya mbafu pa lihina lyangu, na yahotole manyata kunijowa nenga fiwifu. 40Pakuya uyu nukuya wakutipindika ayii wa kutiyimalila. 41Pakuya ayi yoha uyu yawanywese mwenga ntimbo wa machi, ndawa muyii wake Kristo, chakaka niwajowela, uyu yatage lepa njombe yake. 42Na ayi yoha uyu yakuwase yumonga wa awa wachoko wa kukela pa nenga, mbanga kwa yombe lwala lusyungusike pa singo yake, na atagike pa nyanja. 43Na wona kiwoko kyako kikukuwasa, ukidumule: kiyii kinofu kwako kuyingila mu kulama wa kilema, nukuya mwene mawoko gawili kuyingila mu gehena, kuyingila pa mwoto wangasimika; 44pala lisomi lyawe lyangafwilika, nu mwoto wangasimika. 45Na wona lwayo lwako lukukuwasa, uludumule: kiyii kinofu kwako kuyingila pa kulama wa kuchipila, nukuya mwene njayo siwili kutagika pa gehena, kuyingila pa mwoto wangasimika; 46pala lisomi lyawe lyangafwilika, nu mwoto wangasimika. 47Na wona liho lyako likukuwasa, ulikolombole: kiyii kinofu kwako kuyingila ni liho limonga mu utwa wa Mulungu, 48nukuya mwene miho gawili kutagika mu gehena; pala lisomi lyawe lya ngafwilika, nu mwoto wangasimika. 49Pakuya nu mwoto ayi yoha yalekelewe mwinyu. 50Mwinyu uyii unofu: leka wona mwinyu uyii teeke, nu kiki yaunogele? Muye nawo mwinyu mugati mwinu, ni muye ni kindamba yungi ni njini.

Currently Selected:

Marko 9: MGS1937

Highlight

Copy