Marko 10

1Na kuhumila kukulakula akayimiti, na ahicha kuyingila mipaka ya Yudaya na mwisi mwa Yordan: na mapuga gawungana pamonga kwa yombe kawili; na, umu asyowalili, akawayigalisi kawili. 2Ni wakanjichili waFarisayo, ni wankotaga, Iyitikalika ati kwa ngosi kunsula mhanu mundu? kungesa yombe. 3Leka pakahigiti akawajowili, Musa akawataukili kiki? 4Leka wakajowiti, Musa akayitakili kulemba kalata ya kusula. 5Leka Yesu akawajowili, Ndawa ya kunonopa mwoyo kwinu akalembiti kwa mwenga luwimbi lula. 6Leka kitumbulile pa kupanga mapangiko, Akakiti wombe kya kigosi ni kya kidala. 7Ndawa iyi mundu yaleke dadi mundu nu nyina, ni yakumbatilane ni mhanu mundu; 8na wawili wala yawaye nyama yimonga: mpaka wayilepe kawili wawili koma nyama yimonga. 9Mumu kila Mulungu akakungiti mu lingoli‐ngoli limonga, mundu asikipatula. 10Ni pa nyumba wanafunsi wakankotiti kawili ya kindu iki. 11Na awajowela, Ayi yoha uyu yansule mhanu mundu, ni yantuwule yungi, akita ukeme kumhokela mhanu mundu: 12na wona yombe mwene yankane ngwana mundu, ni kutuwulika na yungi, akita ukeme.

13Ni wakantolili twana, nausi atukwafye: leka wanafunsi wakawalakalili. 14Leka pakaweni Yesu, akapili mwoyo, na akajowiti kwa wombe, Muyitakile twana kunichila nenga; mukotoke kutukanisa: pa kukita utwa wa Mulungu uyii wa ntundu uwu. 15Chakaka niwajowela mwenga, Ayi yoha uyu yaleme kuyupa utwa wa Mulungu ngati kamwana, yayingile lepa mula. 16Na pakatufyambili tula, akatupili kihomo, akatuwikili mawoko gake.

17Na pakugenda mwanja mu ndila, yumonga akankimbalili, ni kunfugamila, ni akankotiti, Mwalimu nnofu, yanikite kiki nausi niyingile mu kulama kwa miaka lipwela? 18Leka Yesu akanjowili, Ndawa kiki unijowela na nnofu? ayilepe nnofu lema yumonga, yuyu Mulungu. 19Umanya mimbi, Usikoma, Usikita ukeme, Usiyiwa, Usinkupakisa, Usikonga, Uginike dadiyu nu nyoko. 20Leka akanjowili, Mwalimu, ifi fyoha nifigohiti kitumbulile uchoko wangu. 21Leka Yesu pakandoliti akanganiti, ni akanjowili, Kindu kimonga kikupelewela: bita, utase fyoha uyii nafyo, na uwapele wagaju, na yauye ni kikokoli kunani: na uyiche, unikise nenga. 22Koma akayili kyene ng’ong’onya pa lilowe lila, na akawukiti ni kuniongoneka: pakuya akayili mwene findu fingi.

23Nu Yesu pakagelawini, awajowela wanafunsi wake, Uwi! wene kyuma yawayingile mu utwa wa Mulungu kinonopile! 24Leka wanafunsi wakakangichi pa malowe gake. Leka Yesu pa ahiga kawili awajowela, Uwi! wana, Kindu kinonono kwa wala wa kuhuwalila kyuma kuyingila mu utwa wa Mulungu! 25Kya manyata kukita ngamila yiluta pa mbugu ya sindano, nukuya kukita mundu nkafi kuyingila mu utwa wa Mulungu. 26Leka wakakangichi kulutila muni, kunjowela yombe, Nu nani wila ahotola kuyokoleka? 27Yesu pakawaloliti awajowela, Kwa wandu kihotoleka lepa, koma nukuya kwa Mulungu: pakuya fyoha fihotoleka kwa Mulungu. 28Akatumbwili Petro kunjowela, Lola, tenga tilekiti fyoha nausi tikukise wenga. 29Yesu akajowiti, Chakaka niwajowela, Pa waka mundu yula alekiti nyumba, pangi walongo, pangi walumbu, pangi nyina, pangi dadi, pangi wana, pangi migunda, ndawa ya nenga, 30ni ya evangel, ni yaleme kuyupa kamia pa lukumbi ulu, nyumba, ni walongo, na walumbu, na wanyina, na wana, ni migunda, pamonga na makimbasiko; na pa miaka yila yayiyiche kulama kwa miaka. 31Koma wingi wa palongolo yawaye wa panyuma; na wa panyuma yawaye wa palongolo.

32Na wakayili pa ndila, kukwela ku Yerusalem; nu Yesu akayili mu kuwalongolela wombe: na wakayili mu kuganagana; na wa kukisa wakayili mu kuyogopa. Na akatoliti kawili kumi na wawili wala, na akatumbwili kuwatawalila ifi yafikitike kwake, 33kujowa, Lola, tikwela ku Yerusalem; nu Mwana wa adam yafumbulike kwa wakulungu wa makasisi na kwa wakulembela; ni yawampawule kukita akomeke, na yawamfumbule kwa Mihuku: 34na yawankitile mihenje, na yawamfunyile, na yawantowe, na yawankome; na panyuma pa magono gadatu yasyuke.

35Na wamhegelela papipi Yakobo nu Yohana, wana wa Zebedayo, kunjowela, Mwalimu, tilonda kukita kiyi kyoha yatiluwe kwako utikitile. 36Leka akajowiti kwa wombe, Mulonda kiki niwakitile mwenga? 37Leka wakajowiti kwa yombe, Utipele nausi titame, yumonga kiwoko kyako kya ndilo, na yumonga kiwoko kyako kya mangigi, pa kukwisika kwako. 38Leka Yesu akajowiti kwa wombe, Mumanya lepa kila mukiluwila. Muhotola ati kunywa ntimbo wula ninywela nenga? pangi kubatasika nu ubatiso wula nibatasika nawo nenga? 39Leka wakajowiti kwa yombe, Tihotola. Leka Yesu akajowiti kwa wombe, Ntimbo wula ninywela nenga yamunywe; nu ubatiso wula nibatasika nawo nenga yamubatiswe nawo: 40koma kutama pa kiwoko kyangu kya ndilo pangi pa kiwoko kyangu kya mangigi nukuya kwangu kupeleka: koma kwa wala kiwikile ngani kwawe. 41Na pa wakayufwini kumi wala, wakatumbwili kuwina mwoyo nu Yakobo nu Yohana. 42Nu Yesu akawakemili kwake, kuwajowela, Mumanya kukita wala wakuwalangika manduna pa Mihuku wawakitila ngani bambo; na wakulungu wawe wawakitila ngani chengo. 43Leka kiyilepe wila pa mwenga: koma ayi yoha uyu alonda kutama nkulungu pa mwenga, yaaye wakutumakila winu: 44na ayi yoha uyu alonda kuya wa palongolo pa mwenga, yaaye mbanda wa woha. 45Pakuya chakaka Mwana wa adam akachiti lepa kutumakalika, koma kutumakila, ni kupela wumi wake ukombosi wa wa mahele.

46Ni wahicha ku Yeriko: ni pa kupita yombe pa Yeriko, pamonga na wanafunsi wake ni lipuga likulungu, mwana wa Timayo, Bartimayo, wa kuluwaluwa wa kukoyoka miho, akayili mu kutama pasi mu makigi mwa ndila. 47Ni apa akayufwini kukita Yesu wa Nazareti ayii, akatumbwili kukuwa, ni kujowa, Yesu, wenga mwana wa Daudi, unipwelekele lipyana. 48Na wingi wakandakalili, nausi atame kinunu: leka akakuwiti nyahope, Mwana wa Daudi, unipwelekele lipyana. 49Ni pakayimiti Yesu, akajowiti, Mukemele yombe. Ni wankemela wakukoyoka miho, kunjowela, Uye nu mwoyo: yimuka, akukemela. 50Leka, pakatagiti nguo yake, akalandawiki, akanchilili Yesu. 51Nu Yesu akamhigiti yombe nakajowiti, Kiki ulonda nikukitile wenga? Leka wakukoyoka miho akajowiti kwa yombe, Rabboni, nausi niwone kawili. 52Nu Yesu akajowiti kwa yombe, Bita; kiyitakiso kyako kikuyokwili. Ni hino apa akaloliti kawili, na akankisiti pa ndila.

Currently Selected:

Marko 10: MGS1937

Highlight

Copy