Marko 5

1Na wakachiti ku lisi lya nyanja, ku ndima wa waGeresa. 2Na pakafuwiki yombe pa liboti, hino apa akawonangini nako kuhuma pa manyinja mundu wa roho ya wafu, uyu akayili mu kuhwela pa manyinja: 3na pa waka mundu akahotwili kawili kunkunga, haka ni minyololo; 4pakuya wakankungiti apa ni apa ni findawatila ni minyololo, leka minyololo yikadumwiki nuyombe, ni findawatila fikanyopwiki: na pa waka mundu akahotwili kundima. 5Na magono goha, kilo nu musi, akayili pa manyinja na pa fidunda, kukuwa ni kwitema‐tema na maganga. 6Na pakambweni Yesu patali, akakimbili ni akangwilikimbo; 7na pakakuwiti ni njowelo yikulungu, ajowa, Kiki kwa nenga na wenga, Yesu, Mwana wa Mulungu wa kunani kwene? Nikulapalakisa kwa Mulungu, usinihumbusa. 8Pakuya akanjowili yombe, Pita, roho ya wafu, pa mundu uyu. 9Na akankotiti, Lihina lyako nani? Na anjowela, Legion lihina lyangu; pakukita tawingi tiyii. 10Na akampembisi nyamhope kukita asiwatuma kunja kwa ndima. 11Leka likayili bahapa pa kidunda lipuga likulungu lya maguluwe lilyaga. 12Na wakampembisi, kujowa, Utitume mwa maguluwe nausi tiyingile ngani mugati mwawe. 13Na akawayitakili. Na roho sya wafu sikapititi ni sikayingili mu maguluwe: ni lipuga likakimbili maliayo kuselela pa ligema kuyingila mu nyanja, ngati elfu siwili; ni gakiniongiti mu nyanja. 14Na wala wakudima wakakimbili, na wakalongili ndumi pa likaya, na pa migunda. Na wakachiti kuwona kila kikakitiki. 15Na wanchilila Yesu, na wandolakesa yula akakamuliki ni madaimon atemi pasi, afwikiki, na ayii wa luhala, yuyulayula akayili ni Legion: na wakayogwipi. 16Na wala wakaloliti wakawakokosili umu yikayili na yula wakukamulika na madaimon, ni ndumi sya maguluwe. 17Ni wakatumbwili kumpembesa awuke pa mipaka yawe. 18Ni pakuyingila yombe mu liboti, yula akakamuliki ni madaimon akampembisi kukita aye pamonga nuyombe. 19Na akanjitakili lepa, koma anjowela, Bita ku nyumba yako ni kwa walongowo, na uwakokosele fila fikulungu akukitili Bambo, na umu wakakupwelekili lipyana. 20Na akabiti, akatumbwili kuwandisa pa Dekapoli fila fikulungu fikakitiki nu Yesu kwa yombe: na wandu woha wakakangichi.

21Nu Yesu apa akayombwiki kawili pa liboti ku lisi lingi, lipuga likulungu likawunganiki kwake: na akayili pa makigi ga nyanja. 22Na ahicha yumonga wa wakulungu wa sunagoge, lihina lyake Yairo; na pakumbona, agwila pa njayo syake, 23na ampembesa nyahope, kujowa, Kanangu kahinja kayii lung’olela: nikupembesa uhiche ni uwike kiwoko kyako pa yombe, nausi ayokoleke, na alame. 24Na akabiti pamonga nuyombe; ni lupuga likulungu likankisiti, na wakamfinyikisi.

25Nu ndala, yula akayili wa kuhulula mwasi miaka kumi ni yiwili, 26ni akahumbusiki nyamhope kwa waganga wa mahele, na yula akalipiti fyoha fiyii kwake, koma akasangalwiki lepa kindu, 27koma akalutili kulwala, pala akayufwini mbili ya Yesu, akachiti pa lipuga kunyuma, akakwafiti nguo yake. 28Pakuya akajowiti, Wona nikwafye haka nguo syake syakape, yaniyokoleke. 29Na hino apa kisima kya mwasi wake kikayumiti; na akawalalili pa mbili wake kukita alamasiki pa kipumundu kila. 30Na hino apa Yesu, pa kuwalalila mugati mwake kukita mbafu kipitile kwake simpitili, akang’anamwiki ku lipuga, nakajowiti, Nani akakwafiti nguo syangu? 31Na wanafunsi wake wakanjowili, Ulola lipuga likufinyikisa, na ujowa, Nani akanikwafiti? 32Na akagelawini kumbona yuyu akakiti iki. 33Leka ndala pakayogwipi ni kudigida, ndawa akamanyiti kila kikakitiki kwake, akachiti, na akagwili kwa yombe, na akakokosili kwa yombe fya chakaka fyoha. 34Leka akajowiti kwa yombe, Mwana ndala, kiyitakiso kyako kikuyokwili; bita pa kindamba, ni uye wakusangaluka pa kipumundu kyako.

35Akona kilongalile, wahicha kuhuma pa nyumba ya nkulungu wa sunagoge, kujowa, Mwanao ndala afwili: ndawa kiki umfwahisa Mwalimu kawili? 36Leka Yesu, pakasiwagini lilowe lila likalongaliki, anjowela nkulungu wa sunagoge, Ukotoke kuyogopa, uyitakile pela. 37Na akayitakili lepa mundu kukisana pamonga nuyombe, lema Petro, nu Yakobo, nu Yohana nung’una wa Yakobo. 38Na wahicha ku nyumba ya nkulungu wa sunagoge; na alolakesa kuywawa, ni wa kulila ni wa kukuwa kwingi. 39Na pakayingili, awajowela, Kiki muyii mu kukuwa, ni kulila? kamwana kafwili lepa, koma kayii mu lugono. 40Na wakamhekiti mihenje. Leka yombe, apa akatagiti kunja woha, atola dadi wa kamwana nu nyina na wala wakayili nako, na ayingila pala kakayili kamwana. 41Na apa akakamwili kiwoko kya kamwana, anjowela, Talitha kumi; lili kukokoseka, Kahinja, nikujowela, Yimuka. 42Na hino apa kahinja kakayimi, na kakagenditi; ndawa kakayili ka miaka kumi ni yiwili. Na wakakangichi hino apa kikangachile nyamhope. 43Na akawataukili kwingi kukita pa waka mundu apate kumanya iki; ni akatawiki apelewe kya kulya.

Currently Selected:

Marko 5: MGS1937

Highlight

Copy