लुका 10
10
येसुङा सात्तारि जाना ओचेलाचि पाङ्सुचिगा
1येसु डाङ्बाङा सात्तारि#१०:१ कोइ-कोइ बाइबलङि बाहात्तार आचेलाचि नुङ् चा छेप्टेसे॥ जाना आरु ओचेलाचि सेगुचे॥ हिट्नुङ् उन् खाट्ना युक्ताम्ङि लोक् खालाङ्गाङि उन् खाप्मा नुङ्ना पाइले डोक् इ-इप्पाङ् चोगुचिउङ् पाङ्सुचे॥ 2हिट्नुङ् येसुङा हिट्नागा नाड्डे लोडुचे, “चासोङ् जोम् सोङ्ग्मैडे टरो चासोङ् काहेग्बाचिम्बाक् खाट्टिप्मा एडोक् ओवाहेट्॥ नाड्डेउङ् चासोङ्ङाना डाङ्बाङि उन्ङाना चासोङ् छुम्मा टोॽवालासि काचोक्बा याप्मिचि याप्मि पाङ्साबिडा नुङ् बिन्टि ठाङ्सानुम्॥#मात्ति ९:३७-३८ 3हाट्ले खानिङा ना रिङ् ठाहा टोगानुम् आङा खानि ब्वाँसोचि माझै ठुँबा उइछाचि गाड्डे डोक् याप्मिचि सोरि पाङ्नागेट्नानि॥ लु खाडानि॥#मात्ति १०:१६ 4खानिङा ओफाबा, जाप्रामा हिट्नुङ् लाङ्सुप् पाक्चा खुनेनुम्॥ हिट्नुङ् लाम्बोङि याप्मिचिलोक् स्या चोक्माना रिङ्ङि एडोक् बान्नेनिन्॥”
5हिट्नुङ् खानि आखाडिना पाङ्ङि सोब्बे नुङ्ना पाइले “ना पाङ्ङि हाङ्हाङ् उलियाक्” नुङ् माट्टानुम्॥ 6हिट्ना पाङ्ङिगा याप्मिचि ओटोङ्युङ् युङ्मा ओकोन्युक् भोने, आसिक्ङा खोना बेला चा नाडुन्चिन्गा, टरो हिड्नाडेना वाइना भोने हिट्ना आसिक् खानिलेङ् डोक् नोक्युक्॥ 7ठिक्ए पाङ्ङि डोक् युङायाक्टानि॥ हिट्ना पाङ्ङिगा याप्मिचिङा पाक् पाक् चामाउङ्सा मापिडिटि हिट्नागा डोक् चायानुम्, ठुङानुम्, ओचाफेन्लोक् लोनेनिन्॥ पोङ्भोने टोॽवालासि काचोक्बाङा उनिम्याक् टोक्मा नुना लियुक्॥ योम्बोना पाङ् टोम्बोना पाङ् चोक्सा बास हेन्नेनिन्॥#१ कोरिन्थि ९:१४; १ तिमोथि ५:१८
8“हिट्डेडोक् खालाङ्गाङि आखाडिनाँ हिट्नुङ् हिट्नागाँ खानि स्वागाट् माचोगिउङ् जे खानि लोङ्सा चामा मापिडिटि हिट्नागा डोक् चायानुम्॥ 9हिट्नुङ् हिट्ना खालाङ्गाङि टुखुमाङ् याप्मिचि नुमानिङ् चोगानुम्चिम् हिट्नुङ् ‘माङ्हाङ् उमुलुक् खानि सोरि डोक् टाइसे’ लोडानुम्चिम्॥ 10टरो खानि हिट्ना खालाङ्गाङि स्वागाट् माचोगेट्टिन् भोने, हिट्ना खालाङ्गाङाना लाम्बो-कोक्पोङि होन्डानिउङ् नाड्डे लोडानुम्चिम्, 11‘ना खानि खालाङ्गाङिना खाम्धारि आन्याँ लाङ्ङि नुप्टागा चा खानि बिरुद्दाङि नाहि डोक् ठाम्सुम्टुम्मा॥ टरो माङ्हाङ् उमुलुक् खानि सोरि डोक् टाइसे नुङ् मिट्टानुम्॥’ 12न्याएङाना लेम्बा हिट्ना खालाङ्गाङिगा याप्मिचिङा टोग्माना याङ्छामा सादोम खालाङ्गाङिगा याप्मिचिङा ओटोगुना याङ्छामा नुङ्ना चा टुक्ना लियुक् नुङ् आङा खानि लोनाँनि॥#उत्पति १९:२४-२८; मात्ति १०:७-१५; ११:२४; मारकुस ६:८-११; लुका ९:३-५
बिस्वास काचोक्निबा खालाङ्गाङिगा याप्मिचि
(मात्ति ११:२०-२४; १३:१६-१७)
13“इनाबा, हाउ खानि खोराजिन हिट्नुङ् बेथसेदा खालाङ्गाङिगा याप्मिचि! खानि माझै चोक्बालाक् डोङ् ठोङ्डिगा टोॽवाचि टुरोस हिट्नुङ् सिदोन खालाङ्गाङिगा याप्मिचिङि चोगानाँ बे, हिट्निगा याप्मिचिङा पाइले डोक् सानिङ्ग्वा लोसा बोराङाना लोट्लिङ् ओवाडुङ् हिट्नुङ् ठाबुट् ओनेक्टुङ् काएल्-काबु उलिसाएट्टे बे॥#यासैया २३:१-१८; इजिकिएल २६:१–२८:२६; योएल ३:४-८; आमोस १:९-१०; जाकारिया ९:२-४ 14न्याएङाना लेम्बा टुरोस हिट्नुङ् सिदोन खालाङ्गाङिगा याप्मिचिङा ओटोगुना याङ्छामा नुङ्ना चा टुक्ना याङ्छामा नागा खालाङ्गाङि ठायुक्॥ 15हाउ काफारनाहुम खालाङ्गाङिगा याप्मिचि! पाक् खानि टोनालोग् सोम्मा डोक् टासुम्टुम्मा नुङ् आमिट्टिटिगि? हिड्डे माखाक्, खानिउम्टे यो-यो योनालोग्ङि आठाइटिटि॥”#यासैया १४:१३-१५
16येसुङा ओचेलाचि लोडुचे, “खानि रिङ् काखेम्बाचिङा आरिङ् चा ओखेम्सुटु, हिट्नुङ् खानि एङ्फुट् माचोगिए भोने, आङा चा एङ्फुट् याङ्ओचोक्युक् हिट्नुङ् हिट्नाडेडोक् आङा एङ्फुट् काचोक्बाचिङा आङा याङ्पाङ्बा चा एङ्फुट् ओचोगुटु॥”#मात्ति १०:४०; मारकुस ९:३७; लुका ९:४८; युहान्ना १३:२०
सात्तारि जाना ओचेलाचि ओनोक्टागा
17सात्तारि जाना ओचेलाचि उन्चि चाप् टासा ओनोक्टा ओटायाउङ् येसु ओलोडुए, “आन्याँ डाङ्बा, कानिङ्ङि आधिकारलोक् ओचाफेन्गा रिमेट्चि खेमा लाप्टुम्चिम्ङाना हिट्नागा याप्मिचिलाम्मा ओहोन्डे॥”
18हिट्नुङ् येसुङा हिट्नागा लोडुचे, “आए, आङा सैतान टोनालोग्लाम् मिङा ओलाप्को गाड्डे ओम्साउङ् ठाया उङ्साना निसुङे॥ 19छेम्बा डोक्, आङा साट्टुरङाना बोल् मेप्माना आधिकार खानि पिनैनाने॥ हिट्नुङ् बिखालु ओप्पु लोक् बिच्छिचि चा आयेप्टुम्चिम्चिम्॥ हिट्नुङ् खानि पाक्ङा चा हान्ति चोक्मा माहिडिन्गा॥#छाम्लोमा छाप्ला ९१:१३ 20टरो खानिङा ओचाफेम्मा रिमेट्चि होप्मा हिडुम्चिम्मे नुङ् खानि चाप् उटानि चा, टरो टोनालोग्ङि खानि निङ् छेप्टेसे नुङ् खानि चाप् उटायाक्॥”
21हिट्ना बेला डोक् येसु सेङ्सेङ्ना हाङ्साङा इप्टुङ् हारका लिसाउङ् माट्टुए, “हाउ माङ्हाङ् आप्पा, टोनालोग् हिट्नुङ् नाराङिना टाङ्बा, आङा खान्ङि पोए-पोए ठाङ्सुङ्टुङ् पोङ्भोने ओचाप्पाङ् याप्मिचि हिट्नुङ् जोम् ठोना उलिसागा याप्मिचिलाम्मा आठोबुङ् आयुङ्सुना नागा रिङ् खान्ङा पिच्छाचि गाड्डेगा याप्मिचि आनिमेट्टुचे॥ छेम्बा डोक् आप्पो, नाड्डे चोक्मा डोक् कानिङ्ग्वाङि नुलोक् आलोसे॥
22“ख्वाप्पा रिङ्चिगा आधिकार आप्पाङा आङा याङ्पिडैसे॥ हिट्नुङ् उप्पाङा एडोक् उइछा मिसेन् निसुटु, उइछाङा एडोक् उप्पा मिसेन् निसुटु, आरुङा मिसेन् उनिसुन्ना, हिट्नुङ् माङ्हाङ् पाबा साइना नुङ् उइछाङा सेगुचिगा याप्मिचिङा एडोक् उन् मिसेन् उनिसुटु॥”#युहान्ना ३:३५; १०:१५
23हिट्नुङ् येसु ओचेलाचिलेङ् नोक्टाउङ् ओचेलाचि एडोक् लोडुचे, “खानिङा जोम् आसिक् आटोगुएसुम्मे, पोङ्भोने खानिङा नागा लिसागा ख्वाप्पा रिङ्चि निमा आटोगुमे॥ 24छेम्बा नाहि खेम्सानुम्, जोम् माङ्काटाचि हिट्नुङ् हाङ्बाचिङा ना खानिङा आनिसुम्गा हिट्नुङ् आखेम्सुम्गा नागा रिङ्चि पुमा हिट्नुङ् खेम्मा ओकोलुए, टरो पुमा हिट्नुङ् खेम्मा ओटोग्वाट्टुन्॥”
आङाना साइना ओचेट्नुना टाक्लुङ्?
(मात्ति २२:३४-४०; मारकुस १२:२८-३१)
25ठिबाङ् याहुदिचिगा धारमाबिधि काहिसिक्बाङा येसुङाना निङ्ग्वा कोन्माउङ्सा ठिक् रिङ् सिलाप्टुए, “आडाङ्बा, हाट्ले आङा लाट्निना चोला टोक्माउङ्सा पाक् चोक्मा कोन्युक्ना?” 26हिट्ना याप्मि येसुङा सिलाप्टुए, “पाक् खान्ङा धारमाबिधिङि छेप्टाना रिङ् पोढाँ आचोगुन्गेट्टुन्नि? हिट्नि पाक् छेप्टेसेना टे?”
27हिट्नुङ् हिट्ना याप्मिङा येसु लोडुए, हिट्नि नाड्डे छेप्टाइसे, “‘खान्ङा कामाङ्हाङ् डाङ्बा ख्वाप्पा कानिङ्ग्वालाम्मा, ख्वाप्पा कासोक्मालाम्मा, ख्वाप्पा काबोल्लाम्मा, ख्वाप्पा काठोनालाम्मा डोक् माया चोगु’, हिट्नुङ् ‘खान्ङा आप्पे गाड्डे डोक् काटाक्लुङ्चि चा माया चोगुचि॥’”#लेबि १९:१८; धारमाबिधि ६:५
28हिट्नुङ् येसुङा हिट्ना याप्मि लोडुए, “खान्ङा माहामा डोक् आमाट्टुए, हाट्ले नुङ् खान् चा हिड्डे डोक् चोगा, हिट्नुङ् खान्ङा लाट्निना चोला आटोगुटु॥”#लेबि १८:५; मात्ति २२:३५-४०; मारकुस १२:२८-३४
29हिड्डेलोडु चा आझै हिट्ना याप्मिङा आङा नुङ्ना साक्चा उवाइगा गाड्डे चोगाउङ् येसु लोडुए, “हिड्डे भोने आटाक्लुङ्म्बाक् साइना टे?” पिक्सा सिलाप्टुए॥
30हिट्ना बेला येसुङा ठिक् मुन्डुम् लोडुए, “ठिक् याप्मि यरुसलेम खालाङ्गालाम्मा यारिहो ओलोडुना खालाङ्गालेङ् खाडागेट्टाना हिट्नि लाम्बोङि हिट्ना याप्मि याङ्काखुट्चिङा उलाबुङ् एकिलिपोट् ओचोगुए॥ हिट्नुङ् टुक्लोक् सिमा हिङ्मा लिसालोक् ओलेम्सुङ् हिट्नि डोक् उनाडुडोए॥ 31छोप्मोङा ठिक् पुजारि याप्मि हिट्ना लाम्बो लिसा उङ्सागेट्टाना बेला लाम्बोङि सिमालोक् हिङ्मा लिसाना याप्मि निसु चा मिपुङे, हिट्नालाम्मा चिपा याम्बालाम्मा खाडे॥ 32हिट्नुङ् छोप्मोङा माङ्ठानाङि घुवार काफाबा आरको लेबि याप्मि चा हिट्ना लाम्बो लिसा उङ्सागेट्टाना हिट्नाङा चा लाम्बोङि सिमा हिङ्मा लिसाना याप्मि निसुङ्, उन् चा हिट्नालाम् चिपा याम्बालाम्मा खाडे॥ 33हिट्नुङ् ठिक् सामारि याप्मि#१०:३३सामारि याप्मि नुङ्म्बाक् ठिक् खालाक्ङाना छोङ् ए॥ याहुदिचिगा नागा सामारिचिलोक् खोना चा चाट्ला टोङ्न्याट्निना, पोङ्भोने सामारि याप्मिचिगा उन्चि आप्पेना धारमा लिसानाँ याहुदिचिङा खाटिउना छोङ्बाचि ओलोडुचे॥ युहान्ना ४:४-९,२० हिट्ना लाम्बो लिसा उङ्सानाँ हिट्नि लाम्बोङि सिमा हिङ्मा लिसाना याप्मि निसुङ् उलुक्मा टुक्टुए, 34हिट्नुङ् हिट्ना याप्मि सोरि खाडाउङ् हिट्नाङाना ओखेसिक् वासिडुबिडुए, जैतुनङाना क्या#१०:३४ जैतुनम्बाक् ठिक् सिङ् उभुङ्मा ए॥ हिट्नालाम्मा केङागा टुल्फुललाम्मा याप्मिचिङा क्या ओचोगुगा डागा हिट्नुङ् सिडापाङ्डा चा ओचोगुए॥ ना क्याम्बाक् खेसिक्ङि हिट्नुङ् येम्मि चा नेक्टुम्ना ए॥ लोक् आङ्गुरङाना इमालिङ् नेक्टुङ् ओखेसिक्ङि लोट्लिङ्ङा रेक्टुबिडुए॥ हिट्नुङ् उन्लोक् युङाना गाधाङि हिट्ना याप्मि ठाङ्सुङ् लाम्बोङि युसा युङ्माना ठिक् पाटिङि#१०:३४ हिट्ना बेला पाटि पौवा नुङ्म्बाक् हाट्लेसेन्ना होटेल गाड्डेना डोक् लिसाना डाना॥ हिट्नि ओफाबा हुङुमुङ् चामा-ठुङ्ग्मा हिट्नुङ् इम्मा टोगिना लिसाना डाना॥ हिट्ना बेलागा याप्मिचि ओफाबा उहुङुङ् हिट्ना पाटि पौवाङि उयुङागा उइम्सागा डागा॥ टासाचुङ् हिट्नि युङाचे॥ हिट्ना युसाटेप् सामारि याप्मिङा हिट्ना याप्मि स्यार चोगुए॥#२ इतिहास २८:१५ 35हान्डेङ् भ्यानिक् सामारि याप्मिङा पाटि डाङ्बा इप्पोक् रुपाक् राङ्#१०:३५ इप्पोक् रुपाक् राङ् (सिक्का) गिरिक्ङि दिनार ओलोडुए॥ ठिक् दिनारउम्बाक् ठिक् लेम्बाटेप् टोॽवा काचोक्बाङाना निमेक् लियुक्॥ हिट्ना बेला इप्पोक् माइना सोम्मा पाटि डाङ्बाङा ठिबाङ् याप्मि इप्पोक् दिनारङि युङ्मा हिडुना डाना॥ पिडुङ् लोडुए, ‘हाट्ले आङा खाट्ना, ना याप्मि सिडापाङ्डा चोक्मा ना नुङ्ना याप्मा ओफाबा लाहाब् लिसे भोने आङा नोक्ङा आप्ङानाँ खान् पिनाँ॥’”
36ना मुन्डुम् येसुङा माट्टुङ् हिट्ना याहुदिचिगा धारमाबिधि काहिसिक्बा याप्मि सिलाप्टुए, “नागा सुम्बाङ् याप्मिचिङि खोनाम्बाक् याङ्काखुट्चिङा सिलोक् ओलेम्सुना याप्मिङाना ओटाक्लुङ् लिसेना टे?”
37हिट्ना याहुदिचिगा धारमाबिधि काहिसिक्बाङा येसु लोडुए, “ना लुक्मा काटुक् याप्मिम्बाक् सिमा हिङ्मा लिसाना याप्मिङाना ओटाक्लुङ् लिसे नुङ् माट्टुए॥”
येसुङा धारमाबिधि काहिसिक्बा लोडुए, “हिट्नाडे भोने, खान् चा हिट्ना याप्मि गाड्डे डोक् चोगा॥”
येसुङा मारथा हिट्नुङ् मारियाम टुबुचिगा
38येसुलोक् ओचेलाचि ओखाडागेट्टाना बेला ठिक् युक्ताम्ङि ओटासुए, हिट्नि मारथा ओलोडुना मेन्झेमाङा स्वागाट् चोगुचिउङ् ओपाङ्ङि खाट्टुचे॥ 39हिट्ना पाङ्ङि मारथाङा उन्झा मारियाम चा वासेट्टाना॥ हिट्ना मारियाम येसु डाङ्बा ओटाकानाङि युङाउङ् उन्ङा माट्टुगा रिङ्चि खेम्सा युङे॥#युहान्ना ११:१ 40टरो मारथाम्बाक् ओटायागा याप्मिचि लोङ्सा चामा-ठुङ्मागा थोक्चि चोगुलोक् होगोप् पोप्टे हिट्नुङ् येसु सोरि आबाउङ् लोडुए, “आडाङ्बा, ना पारा लिनेट्नि, आन्झाङाम्बाक् आङा घुवार याङ्फानिना हिट्नुङ् आङा आएकेले ख्वाप्पा टोॽवा चोगुएट्टुङ्, हाट्ले घुवार फासिङा खाडा पिक्सा याङ्लोडाबिडालो॥”
41टरो येसु डाङ्बाङा हिट्ना लोडुए, “मारथा, मारथा खान् याप्मा रिङ्ङि चिन्टा आचोगुङ् कानिङ्ग्वा याङ्छामा चाट्टुन्॥ 42टरो खान् लोङ्सा ठिक् रिङ् एडोक् चाहाब् आलिसाइसे, हिट्ना ओचेट्नुना रिङ्म्बाक् मारियामङा सेगुएसुए॥ ना रिङ् उन्लाम्मा नाप्निना॥”
Currently Selected:
लुका 10: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
