लुका 11
11
येसुङा बिन्टि चोक्माना रिङ् हिसिक्टुचिचि
(मात्ति ६:९-१३; ७:७-११)
1ठिक् लेम्बा येसु ठिक् डेन्ङि बिन्टि चोगेट्टाना॥ उन्ङा बिन्टि चोग्मा हिडुनामे ठिबाङ् ओचेला उन् सोरि आबाउङ् लोडुए, “आडाङ्बा, बाप्टिस्मा कापि युहान्नाङा ओचेलाचि बिन्टि चोक्मा हिसिक्टुचि गाड्डे आन्याँ चा याप्मिहिसिक्टा लो” पिक्सा लोडुए॥ 2हिट्नुङ् येसुङा हिट्नागा लोडुचे, “खानि नाड्डे पारा बिन्टि चोगानि–
‘हाउ माङ्हाङ् पाबा, कानिङ् सेङ्सेङ् उलियाक्,
खान्ङाना कामुलुक् ओटायाक्॥
3हिट्नुङ् आन्याँलोङ्सा लेन्सेन् चाहाब् लिना चामागा थोक् सोरोक् आन्याँ याप्मिपिडा॥
4आन्याँ पाप छेमा याप्मिचोगाबिडा,
पोङ्भोने आन्याँ चा आन्याँ बिरुद्दाङि पाप ओचोग्गालाउङ्सा छेमा पिडुम्चिम्चिम्मा॥
हिट्नुङ् निङ्ग्वा छिक्माङि ठामा आन्याँ याप्मिपिनेन्॥’”
5हिट्नुङ् येसुङा ओचेलाचि फेरि लोडुचे, “लु मिट्टानुम् टे, खानिलोक् ठिबाङ् साइबा युङ्ग्वा॥ हिट्नुङ् हिट्ना ओसाइबा ओपाङ्ङि आधाराट् युसा खाॽयुक् हिट्नुङ् लोडुटु ‘हाउ आसाइबा, आङा सुम्बोक् चालेपा ठेट्लोङ् याङ्पिडा लो॥ 6लाप्माङ्लाम्मा आपाङ्ङि ठिबाङ् आसाइबा टाइसे, हिट्नुङ् उन् पिमा लोङ्सा आङालोक् चामा-ठुङ्माना पाक्चा वाइना॥’ 7हिट्नुङ् ओसाइबाङा पाङ् भिट्रालाम्मा लोडुए, ‘आङा याप्मा याङ्छामा याङ्चाट्नेन्॥ ढुवारिक् छुप्माहिडुङे, हिट्नुङ् आङा पिच्छाचिलोक् इम्साइसाङे॥ आङा कोब्माउङ् खान् पाक्चा पिमा हिनेन्ना॥’ 8आङा खानि लोनाँनि, ओसाइबा डोक् लिचा हिट्ना कोब्युङ् पिडुन्ना, टरो ओसाइबाङा ढुवारिक् इन्सा नाक्टुना नाक्टुना डोक् चोगुए भोने, हिट्ना कोब्युङ् ओसाइबालोङ्सा चाहाब् लिना टेप्मा चालेपा पिडुटु॥
9“हाट्ले आङा खानि लोनाँनि, खानि चाहाब् आलिसिएसे भोने, नाक्टानि खानिङा आटोगुम्टुम्, कोलानुम् खानिङा आटुबुम्टुम्, माङ्हाङ्लोक् घुवार नाक्टानुम् उन्ङा घुवार माफाडिटि॥ 10पोङ्भोने ओनाग्गा टेप्मा सोब्बेङा ओटोगुटु हिट्नुङ् खोना खोनाँ ओकोलुटु हिट्नागाँ उटुबुटु हिट्नुङ् खोना नाक्युक् हिट्ना लोङ्सा माङ्हाङ्ङा ढुवारिक् ओङ्सुबिडुटु॥ 11खानि माड्डे खोना उप्पाङा उइछाङा ङासा नाक्टुनाँ ओप्पु पिडुटुना टे? 12हिट्नुङ् वाडिन् नाक्टे भोने बिच्छि पिडुटुनि टे? 13खानि ओभेन्गा याप्मिचि आलिसि चा खानि छाचि लोङ्सा आम्टेप्मा नुगा थोक्चि आपिडुम्चिम्गा भोने, खानिङा टोनालोग्ङिना माङ्हाङ् टोकुबालोक् सेङ्सेङ्ना हाङ्सा आनाक्टुमे भोने, खानि उन्ङा मापिडिन्गै टे?”
येसु हिट्नुङ् सैतान
(मात्ति १२:२२-३०,४३-४५; मारकुस ३:२०-२७)
14ठिक् लेम्बा येसुङा ठिबाङ् ओकेलुबा याप्मिलाम्मा ओचाफेन्ना रिमेट् रिक्टुएट्टुना॥ हिट्ना ओचाफेम्मा रिमेट् ओकेलुबा याप्मिलाम्मा होन्डाउङ् हिट्ना ओकेलुबा चेक्मा ठालाँ चोगुए॥ ना रिङ् याप्मिचिङा उनिसुङ् सोब्बे डोङ् ओठोङ्डे॥ 15टरो हिट्नागा माड्डे आम्टेप्मा याप्मिचिङा “नाङा टोंडेबाचिगा हाङ्बा बालजिबुल ओलोडुना ओबोल्ङा टोंडेबाचि होट्टुचे” पिक्सा ओलोडुए॥#मात्ति ९:३४; १०:२५; मारकुस ३:२२ 16हिट्नुङ् कोइ याप्मिचिङा टोनालोग्लाम्मा ठिक् चिन्ना याप्मिनिमेट्टा पिक्सा येसु वारिक्ङि ठेम्मा ओकोलुए॥#मात्ति १२:३८; १६:१; मारकुस ८:११
17टरो येसुङा हिट्नागा याप्मिचिगा निङ्ग्वा ठाहा टोगुङ् लोडुचे, “खोना चा देसङिगा याप्मिचि खेसा उयुङे भोने, हिट्ना देस डोक् जाखाम् लियुक्॥ हिट्नाडेडोक् ठिक्ए पाङ्ङिगा याप्मिचि चा उचुङे भोने, हिट्नागा चा ओसाम्युक्॥ 18हिड्डे डोक् सैतान आप्पे उबिरुद्दाङि टोॽवा चोगुए भोने, खोड्डेउङ् उमुलुक् लियुयाक्युक्ना टे? पोङ्भोने खानिङा आङा बालजिबुल ओबोल्ङा याप्मिचिलाम्मा ओचाफेन्ना रिमेट् होट्टुचे नुङ् आलोडेट्टिङा॥ 19लु आङा बालजिबुल ओबोल्लाम्मा ओचाफेन्गा रिमेट्चि होट्टुङ्चिङ्गा भोने, खानि चेलाचिङाम्बाक् खोनाङाना ओबोल्लाम्मा टोंडेबा ओहोट्टुएट्टुचिगा टे? हिट्नाडे भोने खानि चेलाचिङा डोक् खानि ओचाफेन्गा याप्मिचि नुङ् पारमान् माचोग्याक्॥ 20टरो आङा माङ्हाङ् ओबोल्ङा ओचाफेन्ना रिमेट्चि होट्टुङ्चिङ्गा भोने, माङ्हाङ् उमुलुक् खानि सोरि डोक् टाइसे नुङ् ठाहा टोगानुम्॥
21“ठिबाङ् बोल्लेउ याप्मिङा चेप्सा फिम्सुङ् ओपाङ् कोडुटु भोने, सोब्बे ओपाङ्ठाङ्ङिगा माक्फेन्सुबेन् साङा चा पाक्चा चोक्मा उहिडुन्ना॥ 22टरो ना याप्मि नुङ्ना चा बोल्लेउ याप्मि टाए भोने, हिट्ना याप्मि मेट्टुसेडुटु हिट्नुङ् ओचेप्सा चा नाप्टुटु हिट्नुङ् उन्लोक् युङागा सोब्बे माक्फेन्सुबेन् नाप्टुङ् ओसाइबाचिलोक् हान्डुटु॥
23“आङालेङ् ओकेङ्निगा याप्मिचि आङाना बिरुद्दाङि उलियुक्॥ आङा छुम्सिङा घुवार याङ्ओफानिङ्गाँ चेम्बेलेङ् ओचोगुटु॥#मारकुस ९:४०
24“हिट्नाडेडोक् कोइ याप्मिलाम्मा ओचाफेन्ना रिमेट् होन्युखाट्युङ् हिट्ना युङ्मा लोङ्सा खेरेङ्ना डेन् कोन्सिङा खाॽयुक्, हिट्नुङ् खोनाइ चा टुबुव्ट्टुन् भोने हिट्ना पिक्युक्, ‘पाइले नाडुङ्ढाङ्ना पाङ्ङि डोक् नोक्ङा खाट्नाँ॥’ 25हिट्नुङ् हिट्ना ओचाफेन्ना रिमेट् नोक्युखाट्नाँ हिट्नाँ हिट्ना पाङ् खालि, ओफेगुङ् वाहिलेङ् ओचोगुङ् साजाँ ओचोगुना टुबुटु॥ 26नाड्डेना निसुङ् हिट्ना ओचाफेन्ना रिमेट् खाट्युङ् आरु सि टेप्मा उन् नुङ्ना चा जोम् ओचाफेन्गा रिमेट्चि छेम्डुचिउङ् टाडुचिचि हिट्नुङ् हिट्नागा सोब्बे हिट्ना याप्मिङि उलिक्युङ् उयुङ्युक्॥ हिट्नुङ् हिट्ना याप्मिङाना याङ्छामा आसेन्ना नुङ्ना चा आड्डिक् जोम् ओचाफेन्ना लियुक्॥”
छेम्बाना चाप्टामा
27येसुङा नागा रिङ्चि माट्टुएट्टुना बेला हिट्नि याप्मिचिगा खिमेयाङ्मेलाम्मा ठिबाङ् मेन्झेमा ओसोरा ठेना चोगुङ् राट्टे, “छेम्बा डोक्, जुन्ङा खान् मापोङ्से हिट्नुङ् स्यार माचोगे, हिट्ना मेन्झेमा माङ्हाङ्ङा आसिक् पिडुएसुए॥” 28येसुङा लोडुए, “हिट्नाड्डे माखाक्, टरो माङ्हाङ् रिङ् काखेम्बा हिट्नुङ् हिट्डेडोक् काचोक्बा याप्मिचि गो माङ्हाङ्ङा जोम् आसिक् पिडुचिचि॥”
योनाङाना चिन्ना
(मात्ति १२:३८-४२)
29हिट्नि जोम् याप्मिचि उछुमाउङ् खिमेयाङ्मे लिसानाँ येसुङा लोडुचे, “ना टालाङिगा याप्मिचि औधि दुस्टा॥ नागाँ डोङ् ठोङ्डिना चिन्ना पुमा ओकोलुगा, टरो माङ्काटा योनाङि लिसाना घाट्ना नुङ्ना आरको चिन्ना निमा ओटोगुन्ना॥#मात्ति १६:४; मारकुस ८:१२ 30निनाबे खालाङ्गाङि याप्मिचि लोङ्सा योना ओलोडुना याप्मिङि लिसाना चिन्ना गाड्डे डोक् याप्मि छाङि चा नागा टालाङिगा याप्मिचि लोङ्सा चिन्ना लियुक्॥”#मात्ति १२:४०; योना ३:४
31न्याए चोक्माना लेम्बा पारघान्ङिना सेबा देसङिना हाङ्माङा ना टालाङिगा याप्मिचिगा बिरुद्दाङि फाट्टुर लाबुचिचि, पोङ्भोने ना मेन्झेमा लाप्माङ् देसलाम्मा जोम् ठोना लिसाना सोलोमान हाङ्बाङाना रिङ् खेम्सिङा टाइसाना॥ टरो खेम्सानुम्, नाहि सोलोमान हाङ्बा नुङ्ना चा ठेना ठिबाङ् वाहेट्॥#१ हाङ् १०:१-१०; २ इतिहास ९:१-१२ 32हिट्नुङ् न्याए चोक्माना लेम्बा निनाबे खालाङ्गाङिगा याप्मिचि चा ना टालाङिगा याप्मिचि बिरुद्दाङि छोक्सिङा ओकोब्युक्, पोङ्भोने योनाङा पारचार चोगुना ओखेम्सुङ् हिट्निगा याप्मिचिङा उन्चि पापलाम्मा काएल्-काबु उलिसे॥ हाट्ले नेहि योना नुङ्ना चा ठेना ठिबाङ् वाहेट्॥#योना ३:५
कायेम्ङाना कुपिउम्बाक् कामिक्
(मात्ति ५:१५; ६:२२,२३)
33“साङा चा कुपि ओहाट्टुङ् पाटि डालिङा ओटेप्टुन्गा हिट्नुङ् ओठोबुन्गा चा, टरो पाङ् भिट्रा ओआप्गालाङ्सा व्हाङ् उलियाक् नुङ् चोट्चोट्नाङि उयुङ्सुटु॥#मात्ति ५:१५; मारकुस ४:२१; लुका ८:१६ 34खान्ङाना कायेम्ङाना कुपिउम्बाक् कामिक् ए॥ कामिक्ङा ओचेट्नुलोक् निसुए भोने ख्वाप्पा कायेम् डोक् व्हाङ्ङा इप्टुटु॥ टरो कामिक् नुना वाइना भोने, सोब्बे कायेम् चा डुम्बारिक् डुम्ङा इप्टुटु॥ 35हिट्डेउङ् ओछेक्छेक् चोगानि, खानि निङ्ग्वाङिना कुपि उसिनि चा हिट्नुङ् माकुन्धेरेक् उलिनि चा॥ 36हिट्डेउङ् कायेम् ख्वाप्पा व्हाङ् चोगाइसे भोने आथाबा डुम्बारिक् वाइना भोने हिट्ना सोब्बे व्हाङ् लियुक्॥ कुपिङा व्हाङ् चोगि गाड्डे डोक् सोब्बे कायेम् व्हाङ् लियुक्॥”
फारिसि याप्मि हिट्नुङ् धारमाबिधि काहिसिक्बाचि लोङ्सा येसुङाना हिसिक्मा
(मात्ति २३:१-३६; मारकुस १२:३८-४०)
37येसुङा नागा रिङ्चि चेक्मा हिडुङ्, हिट्नि ठिबाङ् फारिसि याप्मिङा ओपाङ्ङि चामा चासिङा येसु छेम्डुए॥ हिट्नुङ् येसु हिट्ना ओपाङ्ङि खाडाउङ् चामा चाङा युङे॥ 38हिट्नुङ् येसुङा याहुदिचिगा चालान् गाड्डे उमुक् मिवासिङे चामा चाङा युङाना निसुङ् हिट्ना फारिसि याप्मि डोङ् ठोङ्डे॥ 39हिट्नुङ् येसु डाङ्बाङा हिट्ना फारिसि याप्मि लोडुए, “खानि फारिसि याप्मिचिङा ठालि हिट्नुङ् खोरे भारा एडोक् आवासिडुम्गा, टरो खानि निङ्ग्वा भोने माक्ना हिट्नुङ् ओचाफेन्गा थोक्ङा आइप्टुएसुम्मे॥ 40हाउ ठोनाबा याप्मिचि, भाराङिना थोक् काचोक्बाङा भिट्राङिना थोक् चा चोगुना नुङ् पाक् खानिङा ठाहा आटोक्निम्गै? 41टरो खानि निङ्ग्वालाम्मा डोक् पाक्चा मालेगा याप्मिचि लोङ्सा पिडानुम्चिम् हिट्नुङ् सोब्बे रिङ् खानि लोङ्सा सेङ्सेङ् लियुक्॥
42“टरो इनामा, खानि फारिसि याप्मिचि! खानिङा नाट्टियुगा पुदिना, जिरा हिट्नुङ् आरु सिडापाङ्डाङाना दासांसा माङ्हाङ्ङि आटाडुम्गा, टरो खानिङा याप्मिचि नुलोक् चाट्ला आमेट्निम्चिम्गा हिट्नुङ् माङ्हाङ् चा माया आचोग्निम्ना॥ टरो खानिङा याप्मिचि नुलोक् चाट्ला मेप्माचि कोन्युक् हिट्नुङ् आझै माङ्हाङ्ङि दासांसा टाप्मा कोन्युक्॥#लेबि २७:३०
43“इनाबा, खानि फारिसि याप्मिचि! पोङ्भोने खानि छुम्मापाङ्ङिना मुलि-मुलि ठोङ्ङि एडोक् युङ्मा आकोलिगा हिट्नुङ् खालाङ्गाङि सोब्बे याप्मिचिङा बाबा याप्मि ओमेट्याक् नुङ् निङ्ग्वा आचोगुम्गा॥ 44इनामा खानिलोङ्सा! खानिम्टे मिसेन् डोक् निमा हिनिम्ना ओहोम्पा गाड्डे आनिङ्सिगा॥ याप्मिचि ठाहा मिटोक्ङे डोक् हिट्ना ओहोम्पा उठुइलाम्मा ओलाम्टिगा॥”
45ठिबाङ् धारमाबिधि काहिसिक्बाङा येसु लोडुए, “आडाङ्बा, खान्ङा नागा रिङ् आमाट्टुङ् आन्याँ नाभाक् ठाना रिङ् आचोगुएट्टु॥” 46हिट्नुङ् येसुङा लोडुचे, “इनाबा खानि धारमाबिधि काहिसिक्बाचि लोङ्सा चा! खानिङा लिसाडायागा धारमाङागा रिति रिवाज आचोगुमुङ् याप्मिचिङा चोक्मा डोक् उहिडुन्लोक् चोक्मा आमेट्टुम्चिम्गा, टरो खानिङाम्बाक् याप्मिचि ठिक् आङ्गुलिक्ङा चा फोक्मा घुवार आफानिम्चिम्गा॥
47“इनामा खानिलोङ्सा! पोङ्भोने खानिगा टुबाठेबाचिङा ओसेडुचिगा माङ्काटाचिगा ओहोम्पाचि खानिङा आचोगुम्गा॥ 48खानिउम्टे खानि टुबाठेबाचि जे ओचोगे हिट्ना टोॽवा डोक् आचोगुमुङ् आटोङेइसिए, पोङ्भोने खानि टुबाठेबाचिङा माङ्काटाचि ओसेडुचे हिट्नुङ् खानिङाम्बाक् हिट्नागाँगा ओहोम्पा आचोगुएसुम्मे॥ 49हिड्डेउङ् सोब्बे रिङ् कानिबा माङ्हाङ्ङा नाड्डे माट्टुए, ‘आङा खानि सोरि माङ्काटाचि हिट्नुङ् मुलिचेलाचि पाङ्सुङ्चिङ्चिङ्, टरो खानिङा आम्टेप्मालोङ्सा आसेडुम्चिम्चिम् हिट्नुङ् आम्टेप्माम्बाक् ओचाफेन्लोक् आमेट्टुम्चिम्चिम्॥’ 50नाड्डेउङ् ना नाराङाना उटुम्ङि नुङ् हाट्ले सोम्मा ओसेडुचिगा माङ्काटाचिगा ओहेलिक्ङाना फाट्टुर ना टालाङिगा याप्मिचिङा ओटोगुटु॥ 51छेम्बा डोक्, आङा खानि लोनाँनि, हाबिल नुङ् बेदि माझै हिट्नुङ् सेङ्सेङ्ना डेन्ङि ओसेडुना जाकारिया सोम्मा माङ्काटाचिगा हेलिक्ङाना फाट्टुर ना टालाङिगा याप्मिचिगा टेप्टेप्पाङि डोक् ठायुक्॥#उत्पति ४:८; २ इतिहास २४:२०-२१
52“इनामा, खानि धारमाबिधि काहिसिक्बाचि! पोङ्भोने खानिङा ठोनाङाना साँचो याप्मिचिलाम्मा आखाट्टुएसुम्मे, टरो चा खानि आप्पेम्बाक् ना भिट्रा आलिगिन्गेट्टिन्गा हिट्नुङ् लिक्मा ओकोन्गा याप्मिचि चा लिग्मा आछाक्टुएसुम्चिमे॥”
53येसुङा हिट्ना डेन् नाडुए हिट्नुङ् धारमाबिधि काहिसिक्बाचि हिट्नुङ् फारिसि याप्मिचिङा आड्डिक् ओचाफेन्लोक् ओमेट्टुए हिट्नुङ् पारिक् पारिक्ङागा रिङ्चि सिलाप्मा ठालाँ ओचोगुए॥ 54हिट्नुङ् हिट्नागाँ येसुङा ओचाफेन्ना रिङ् माट्टुटुनि नुङ् वारिक्ङि ठेम्मा ओलाम्बो ओकोडुए॥
Currently Selected:
लुका 11: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
