लुका 12
12
येसुङा ओचेलाचि ओछेक्छेक् चोगुचिचि
(मात्ति १०:२६-२७)
1हिट्ना बेला नेमा डोक् हिनिलोक् जोम् याप्मिचि उछुमे॥ याप्मा याप्मिचि उलिसाउङ् उन्चि उन्चि येप्गा येप् चामा ठालाँ ओचोगे॥ हिट्नुङ् येसुङा पाइला ओचेलाचि लोडुचे, “खानि फारिसि याप्मिचिङा खामिर ओठेन्डुगा थोक्चिलाम्मा चाचाट् युङानि॥ ना खामिरम्बाक् याप्मिचि छालाँ चोग्माना ओमाक्पा निङ्ग्वा ए॥#मात्ति १६:६; मारकुस ८:१५ 2पोङ्भोने हाट्लेम्बाक् पाक् पाक् ठोबाइसे ठिक् लेम्बा सोब्बे ठेट्युक् हिट्नुङ् ठोबाइसागा सोब्बे रिङ्चि माङ्हाङ्ङा ठेट्लोक् चोगुटु॥ 3हिट्डेउङ् खानिङा डुम्बारिक् डुम्ङि आमाट्टुम्गा रिङ्चि लेम्बाना व्हाङ्ङि सोब्बेङा ओखेम्सुटु॥ पाङ् भिट्रा सोगोप् रिङ् आमाट्टुम्गा पाङ्ढुङ्मालाम्मा ठे-ठेलोक् पारचार लियुक्॥”#मात्ति ४:२२; लुका ८:१७
किप्माना रिङ्ङाना बारे
(मात्ति १०:२८-३३; १२:३२)
4येसुङा नाड्डे चा माट्टुए, “हाउ साइबाचि, खानि येम् जाखाम् काचोक्बा याप्मिचिलोक् किट्नेनिन्, टरो हिट्नागाँ खानि हाङ्सा पाक्चा चोक्मा उहिडुन्ना॥ 5टरो आङा खानि माङ्हाङ्लोक एडोक् किट्टानि नुङ् लोनाँनि॥ उन्लोक् एडोक् येम् सेडुङ् योनालोग्ङि लेप्माना ओबोल् युङ्ग्वा॥ आए, आङा खानि लोनाँनि, उन्लोक् एडोक् किट्टानि॥ 6पाक् टेम्बोक् गोडा भाङ्गेराचि इप्पोक् राङ्ङि उछुक्निगै टे? टरो माङ्हाङ्ङा हिट्नागा माड्डे ठिक् चा मुन्डुन्चिन्गा॥ 7माङ्हाङ्ङाम्टे खानि टेहेक्ङिना ठिक्-ठिक् फ्याक् चा नेडुएसुए॥ हिट्डेउङ् खानि किट्नेनिन्, खानि जोम् भाङ्गेराचि नुङ्ना चा आड्डिक् बाहुमुल्ले ए॥
8“आङा खानि लोनाँनि, खोनाङा याप्मिचि सोरि आङा याङ्लाड्युक्, हिट्नुङ् याप्मि छाङा चा हिट्नागा माङ्हाङ्ङाना माङ्हाङ् रिङ् काउग्बाचि टोकानाङि आयाप्मिचि नुङ् मिसेन् निसुचिचि॥ 9टरो खोनाङा आङा याप्मिचि सोरि इन्कार याङ्ओचोक्युक्, हिट्नागा आङा चा माङ्हाङ्ङाना माङ्हाङ् रिङ् काउग्बाचि टोकानाङि इन्कार चोगुङ्चिङ्चिङ्॥ 10हिट्नुङ् जुन् याप्मि छाङाना बिरुद्दाङि चेक्युक्, हिट्नाँ छेमा टोगुटु, टरो सेङ्सेङ्ना हाङ्साङाना बिरुद्दाङि चेक्ना याप्मिङा छेमा टोगुन्ना॥#मात्ति १२:३२; मारकुस ३:२९
11“हिट्नुङ् खानिलोङ्सा याहुदिचिगा छुम्मापाङ्ङि सासान् काचोक्बाचिङा हिट्नुङ् मुलि याप्मिचिङा मालाबियुङ् उन्चि सोरि माखाट्टिनाँ खानिङा पाक् माप्माना नुङ् चिन्तित् लिनेनिन्॥ 12हिट्ना बेला डोक् पाक् चेक्माना नुङ् सेङ्सेङ्ना हाङ्साङा खानि माहिसिक्टिटि॥”#मात्ति १०:१९-२०; मारकुस १३:११; लुका २१:१४-१५
वागाठागा याप्मिङाना रिङ्
13हिट्नुङ् जोम् याप्चिगा खिमेयाङ्मेलाम्मा ठिबाङ् याप्मिङा येसु लोडुए, “आडाङ्बा, आन्याँ पाबाङाना माक्फेन्सुबेन्लाम्मा आभागा आङा याङ्उपियाक् नुङ् आम्बु याङ्लोडाबिडालो॥”
14हिट्नुङ् येसुङा हिट्ना लोडुए, “हाउ साइबा, साङा खान्चि माक्फेन्सुबेन् काहाम्बा याप्मि नुङ् याङ्ओचोगेना आथाबा न्याए काचोक्बा याप्मि लिसाङेना?” 15टब येसुङा हिट्नागा लोडुचे, “ओछेक्छेक् चोगानि, सोब्बे थोक्चिगा लोभ चोक्नेनिन्, पोङ्भोने जोम् माक्फेन्सुबेन्ङि छेम्बाना चोला लिनिना॥”
16हिट्नुङ्ना येसुङा हिट्नागा ठिक् मुन्डुम् लोडुचे, “ठिबाङ् जोम् माक्फेन्सुबेन् लिसाना याप्मिङा ओस्वाँरालाम्मा जोम् चासोङ् छुमुए॥ 17हिट्नुङ् हिट्नाङा उनिङ्ग्वाङि मिट्टे, ‘हाट्ले आङा पाक् चोक्ङाना? नागा ख्वाप्पा चासोङ् ठोब्माना डेन् डोक् वाइना॥’ 18हिट्नुङ् हाट्ले नाड्डे चोक्मा पोरो पिक्सा उनिङ्ग्वा रिसुए, नागा खाटिटिउगा सोब्बे ढुङ्गुरिचि होडुङ्चिउङ् ठे-ठेगा चासोङ् युग्माना ढुङ्गुरिचि चोगुङ्टुङ् हिट्नुङ् हिट्नि डोक् ख्वाप्पा चासोङ् हिट्नुङ् आरु थोक्चि चा युङ्सुङ्टुङ्॥ 19हिट्नुङ् आसोक्मा लोडुङ्टुङ्, ‘आभागेए ठेना रैछो, याप्मा बारखा सोम्मा युलोक् थोक्चि छुमुएसुङे॥ हाट्ले मोज्जालोक् युङा, चो, ठुङु हिट्नुङ् काचाप् उटायाक्॥’
20“टरो माङ्हाङ्ङा हिटना लोडुए, ‘हाउ काठोना मालेना याप्मि, हाट्ले युसा डोक् खान् आसियुक्॥ हिट्नुङ् खान्ङा आठोबुगा सोब्बे कामाक्फेन्सुबेन् आरु याप्मिचिगा लियुक्॥’”
21ना मुन्डुम् माप्मा हिडुङ् येसुङा माट्टुए, “आए, आप्पे लोङ्सा माक्फेन्सुबेन् काछुम्बा याप्मिचि हिट्नुङ् माङ्हाङ्लेङ् निङ्ग्वा ओचोगुन्गा याप्मिचिगा हालात नाड्डे डोक् लियुक्॥”
ओफाबा हिट्नुङ् माक्फेन्सुबेन्ङाना बारेङि हिसिक्मा
(मात्ति ६:२५-३४)
22हिट्नुङ् येसुङा ओचेलाचि लोडुचे, “हिड्डे डोक् आङा खानि लोनाँनि, ना चोलाङि हिङ्मा लोङ्सा पाक् चामाना हिट्नुङ् पाक् वाप्माना नुङ् याप्मा सुरटा चोक्नेनिन्॥ 23पोङ्भोने चामा हिट्नुङ् ठुङ्मा नुङ्ना चा खानि चोला ठेना ए, हिट्नुङ् खानि येम् लोट्निङ् नुङ्ना चा ठेना रिङ् ए॥ 24काॽवाचि पुयानुम्चिम् टे, हिट्नागाँ पाक्चा उहिसुन्गा चा हिट्नुङ् उछुम्सुन्गा चा॥ हिट्नागाङा ढुङ्गुरिङि आथाबा ढुकुटिङि उन्चि आहारा उयुङ्सुन्गा चा टरो माङ्हाङ्ङा डोक् हिट्नागा आहारा पिडुचिचि॥ खानि नागा नुवाचि नुङ्ना चा आड्डिक् बाहुमुल्ले ए॥
25“खानि माड्डे साक्ङा सुरटा चोगुङ् उन्ङाना ओआयु खाट्टिप्मा केलोक् चोग्मा हिडुटुना टे? 26हिड्डेउङ् खानिङा नाड्डेना खाट्टियुना रिङ् चा चोक्मा आहिनिम्ना भोने पोङ् आरु रिङ्ङाना बारेङि चिन्ता आचोगिटिगा? 27लिलि फुङ्चि पुयानुम् हिट्नागा खोड्डेउङ् ओपोयुग्गा, हिट्नागा टोॽवा चा ओचोक्निगा, हिट्नुङ् लोट्निङ् चा उफुयुन्गा, टरो आङा खानि लोनाँनि, सोलोमान हाङ्बा वागाठागा याप्मि लिसा चा नागा लिलि फुङ्चि टेप्मा चा ओचेट्नुना लोट्लिङ् वाडुवाट्टुन्॥#१ हाङ् १०:४-७; २ इतिहास ९:३-६ 28टरो हाट्ले लिना हिट्नुङ् हान्डेङ् डोक् मिङि उडुम्ना फुङ् हिट्नुङ् बारिङिगा राॽवाउम् माङ्हाङ्ङा स्यार चोगुचिगा भोने, पाक् माङ्हाङ्ङा नागा नुङ्ना चा जोम् स्यार खानि माचोगिन्गै टे? खोलो टे खानि बिस्वास? 29हिट्नुङ् पाक् चामाना हिट्नुङ् पाक् ठुङ्माना नुङ् खानि निङ्ग्वा टिनेनुम्॥ हिट्नुङ् नागा रिङ्ङि एरोक् सुरटा चोक्नेनिन्॥ 30पोङ्भोने नाराङिगा सोब्बे याप्मिचिङा गोलो नाड्डेगा सोब्बे थोक् ओकोलुटु॥ टरो खानि लोङ्सा पाक् थोक्चि चाहाब् लियुक्ना हिट्नागा सोब्बे खानि टोकुबा माङ्हाङ्ङा ठाहा टोगुटु॥ 31टरो पाइले माङ्हाङ् उमुलुक् कोलानुम् हिट्नुङ् नागा सोब्बे थोक्चि उन्ङा मापिडिटि॥”
टोनालोग्ङि जागेडा चोक्माना माक्फेन्सुबेन्
(मात्ति ६:१९-२१)
32येसुङा लोडुचे, “खाट्टिउना छुम्माङिगा आचेलाचि, खानि किट्नेनि! पोङ्भोने खानि टोकुबाङा उमुलुक् खानि पिमा लोङ्सा ओचाप् टाइसे॥ 33खानिलोक् लिसागा माक्फेन्सुबेन् छोङ्सानुम्मुङ् पाक्चा वानिगा याप्मिचि पिडानुम्चिम्॥ आप्पे लोङ्सा काइले चा लाट्निना माक्फेन्सुबेन् टेयार चोगानुम् हिट्नुङ् खोना बेला चा जाखाम् लिनिना माक्फेन्सुबेन् टोनालोग्ङि छुम्सानुम्॥ हिट्नि याङ्काखुट्चिङा चा याङ्उखुट्टुन्ना हिट्नुङ् फेबा चा ठानिना॥ 34पोङ्भोने खोनि कामाक्फेन्सुबेन् युङ्ग्वा, हिट्नि डोक् कानिङ्ग्वा चा लियुक्॥
ओछेक्छेक् हिट्नुङ् बिस्वासिलो लिमाना बारे
(मात्ति २४:४२-५१; मारकुस १३:३२-३७)
35“खानि फोॽइ ठोट् रेक्टानुमुङ् सेवा चोक्ङा टेयार लिसानिउङ् युङानि हिट्नुङ् खानि कुपि हाट्टा याक्टानुम्॥#मात्ति २५:१-१३ 36हिट्नुङ् भ्या भातेरलाम्मा टाना पाङ् ओडाङ्बा ओलाम्बो पुसा ओहाङ्सुना ओचाकारचि गाड्डे डोक् खानि लिसानि॥ उन्चि डाङ्बा टायुङ् ढुवारिक् ठोक् ठोक् चोगुनामे हिट्नागाँ ढुवारिक् ओङ्सुबिडुटु॥ 37पाङ्डाङ्बा नोक्यु आप्नाँ ओचाकारचि मिइम्मे उयुङागा टुबुचे भोने, हिट्नागा लोङ्सा ना आड्डिक् ओचेट्नुना लियुक्॥ छेम्बा डोक्, आङा खानि लोनाँनि, हिट्ना पाङ् ओडाङ्बा आप्पे टेयार लियुङ् ओचाकारचि चामा चासिङा युङ्सुचिचि हिट्नुङ् सेवा चोगुचिचि॥ 38हिट्डेडोक् पाङ् ओडाङ्बा आधारात् युसा आथाबा ना नुङ्ना चा हामो टाचा ओचाकारचि मिइम्मे उयुङागा टुबुचे भोने, हिट्नागा चाकारचि लोङ्सा ना रिङ् आड्डिक् ओचेट्नुना लियुक्॥
39“ना रिङ् ठाहा टोगानुम्, पाङ् ओडाङ्बाङा याङ्काखुट्बाचि खोना बेला ओटायुक्ना नुङ् ठाहा टोगुना बे उन् मिइम्मे युङे बे हिट्नुङ् याङ्खुप्मा पिडुन्चिन्गा॥ 40हिट्डेउङ् खानि जाइले चा टेयार लिसानिउङ् युङानि, पोङ्भोने याप्मि छा खोना बेला टायुक्ना खानिङा ठाहा डोक् आटोक्निम्ना॥”
बिस्वासिलो हिट्नुङ् आबिस्वासिलो चाकारङाना मुन्डुम्
(मात्ति २४:४५-५१)
41हिट्नुङ् पाटरुसङा येसु सिलाप्टुए, “आडाङ्बा, ना मुन्डुम् आन्याँ लोङ्सा एरोक् याप्मि आलोडाना इ आरु सोब्बे याप्मिचि लोङ्सा चा इ?”
42येसु डाङ्बाङा पाटरुस लोडुए, “बिस्वासिलो चाकार हिट्नुङ् ठोना लिसाना याप्मि साइना होला? बिस्वासिलो चाकार हिट्ना लियुक्, जुन् पाङ् ओडाङ्बाङा आरु चाकारचि पुमा जिम्मा पिडुटु हिट्नुङ् ठिक्का बेलाङि डोक् हिट्नाङा चामा-ठुङ्मा हिट्नागा पिडुचिचि॥ 43हिट्नुङ् पाङ् ओडाङ्बा नोक्युङ् टानाँ ओचाकारङा हिट्डेडोक् चोगुएट्टुना टुबुए भोने, हिट्ना चाकार लोङ्सा आड्डिक् ओचेट्नुना लियुक्॥ 44छेम्बा डोक् आङा खानि लोनाँनि, हिट्ना चाकार ओडाङ्बाङा ख्वाप्पा ओपाङ्ङिना माक्फेन्सुबेन्ङाना जिम्मा पिडुटु॥ 45टरो हिट्ना चाकारङा ओडाङ्बा एला टानिना पिक्सा उनिङ्ग्वाङि मिट्युङ् आरु चाकार हिट्नुङ् चाकारनिचि लेम्मा ठालाँ चोगुचे, हिट्नुङ् चामा, ठुङ्मा हिट्नुङ् टेमा ठालाँ चोगुए भोने, 46हिट्नाँ ओडाङ्बा उन्ङा मिट्टुन्गेट्टुन्ना लेम्बा हिट्नुङ् आसा चोगुन्गेट्टुन्ना बेला होन्युटायुक् हिट्नुङ् हिट्नाँ टुक्लोक् साजाए टोगुटु, हिट्नुङ् हिट्नाङाना याङ्छामा माङ्हाङ् बिस्वास ओचोगुन्गेट्टुन्गा याप्मिचिगा गाड्डे डोक् लियुक्॥
47“डाङ्बाङाना निङ्ग्वाङिना रिङ् ठाहा टोगुङ् चा हिट्ना गाड्डे चोक्मा टेयार लिनिना चाकारम्बाक् ओडाङ्बाङा आड्डिक् टुक्लोक् लेम्सुटु॥
48“टरो हिट्ना चाकारङा ओडाङ्बाङाना निङ्ग्वाङिना रिङ् ठाहा मिट्टोक्ङे टोॽवा चोगुटु भोने, हिट्ना चाकारङा खाट्टिप्मा एडोक् साजाए टोगुटु॥ खोनाङा जोम् टोगुएसुए, हिट्नाँ जोम् डोक् पिमा कोन्युक्, हिट्नुङ् खोनाङा जोम् जिम्मा टोगुएसुए, उन्लोङ्सा आज्जा जोम् नाक्युक्॥
साम्माना रिङ्
(मात्ति १०:३४-३६)
49“आङा ना नाराङि माङ्हाङ्ङाना न्याएङाना मि मेट्सिङा टायाङ्ना, टरो ना पाइले डोक् मि हाट्टालेट्टाना बे नुलोक् लिसे बे॥ 50आङा ठिक् याङ्छामाना बाप्टिस्मा लाट्मा कोलाइसे, हिट्ना मिचोक्ङे सोम्मा आसोक्मा ठेक्टाइसे॥ 51आङा ना नाराङिगा याप्मिचि हाङ्हाङ् पिमा लोङ्सा टायाङ्ना नुङ् खानि मिट्नेनिन्॥ आङा खानि लोनाँनि, आङाम्टे याप्मिचि साम्मा टायाङ्ना॥ 52पोङ्भोने हाट्लेलाम्मा ठिक् पाङ्ङिगा टेम्बोक् जाना जाहानचिङि आ-आप्पे उसाम्युक्, सुम्बाङ् बिरुद्दाङि इप्पाङ् हिट्नुङ् इप्पाङ् बिरुद्दाङि सुम्बाङ् ओकोप्युक्॥ 53उप्पा बिरुद्दाङि उइछा, उइछा बिरुद्दाङि उप्पा कोप्युक् हिट्नुङ् उमा बिरुद्दाङि उइछा, उइछा बिरुद्दाङि उमा कोप्युक्, हिट्नुङ् ओनाम्मा बिरुद्दाङि ओपाङ्लुमेट्, ओपाङ्लुमेट् बिरुद्दाङि ओनाम्मा कोप्युक्॥”#मिका ७:६
बेलाङाना बारेङि ठाहा टोक्मा
(मात्ति १६:२-३; ५:२५-२६)
54हिट्नुङ् येसुङा याप्मिचिगा खिमेयाङ्मे लोडुचे, “खानिङा नाम् ठामालेङ् खिमेमा कोब्युगेट्ना आनिसुम्मे भोने, ‘हाट्ले वेहेट् टायुक्’ पिक्सा आपिगिटि हिट्नुङ् वेहेट् चा टायुक्॥ 55हिट्डेडोक् लाङ्लेलाम्मा हिॽवा फेने भोने ‘हाट्ले हुटुॽवामा लियुक’ पिक्सा आपिगिटि हिट्नुङ् हिट्डेडोक् लियुक्॥ 56हाउ निङ्ग्वा ओमाक्पाचि! खानिङा ना नाराङि हिट्नुङ् टाङ्साङ्ङि आपुयुमुङ् हान्डेङ् पाक् लियुक्ना नुङ् आड्काल चोक्मा आहिडुम्गा, टरो ना बेलाङिना उटुप्उम्बाक् पोङ् खानिङा ठाहा आटोक्निम्गा? 57खोना रिङ् माहामाना नुङ् खानिङा आप्पे ठाहा टोक्मा कोन्निगै?
58“खोनाङा चा खानि फाट्टुर लाहाब् माचोगिउङ् आदालातङि माखाट्टिना बेला फाट्टुर लाहाब् काचोक्बालोक् लाम्बोङि डोक् टोङानि, हिट्डे आचोग्याट्टिन् भोने हिट्नाङा न्याए काचोक्बा याप्मिङि माखाट्टिटि हिट्नुङ् हिट्ना न्याए काचोक्बा याप्मिङा ओफाबाचि उमुक्ङि मापिडिटिटि हिट्नुङ् हिट्नागाँ खाम्बाङ्ङि माछाक्टिटि॥ 59हिट्नुङ् आङा खानि लोनाँनि, खानिङा सोब्बे जारिमाना मिहुङ्ङे सोम्मा खानि हिट्नालाम्मा होम्मा आहिडिन्गा॥”
Currently Selected:
लुका 12: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
