लुका 13
13
माङ्हाङ्ङि काएल्-काबु लिमा
1हिट्ना बेला हिट्नि ओवासेट्टागा आम्टेप्मा याप्मिचिङा गालिलि छेट्राङिगा याप्मिचि बारेङि येसु ओलोडुए, “गालिलि याप्मिचि माङ्ठानाङि साम्माङ् ओचोगेट्टाना बेला पिलातास ओलोडुना रोमि हाकिमङा आम्टेप्मा याप्मिचि सेट्मा मेट्टुचे, हिट्नुङ् हिट्नागाँगा हेलिक् चा हिट्नि डोक् मिसाङा ओचोगुए॥” 2येसुङा हिट्नागा लोडुचे, “नागा ओसेडुचिगा गालिलिङिगा याप्मिचि पाक् आरु गालिलि याप्मिचि नुङ्ना चा जोम् पापिचि नुङ् खानि आमिट्टिटिगि? 3आङा खानि लोनाँनि, हिट्डे माखाक्, खानि चा पापलाम्मा माङ्हाङ्लेङ् निङ्ग्वा आरिनेट्निम् भोने खानि चा हिट्डेडोक् फ्याङ् आमेगिटि॥ 4आथाबा सिलोआमङि केना पाङ् होडाउङ् फुक्टुसेडुचिगा आठार जाना याप्मिचि चा यरुसलेम खालाङ्गाङिगा याप्मिचिङि माड्डे सोब्बे नुङ्ना पापिचि नुङ् आमिट्टिटिगि? 5हिट्डे माखाक्, टरो आङा फेरि खानि लोनाँनि, खानि निङ्ग्वा माङ्हाङ्लेङ् आरिनेट्निम् भोने खानि चा सोब्बे हिट्नाड्डे डोक् फ्याङ् आमेगिटि॥”
वामाखोक्पोङाना मुन्डुम्
6हिट्नुङ्ना येसुङा हिट्नागा ठिक् मुन्डुम् लोडुचे, “ठिबाङ् याप्मिङा ओकोठेबारिङि ठिक् वामाखोक्पो लेट्टुएसुना॥ हिट्ना बेला वामाखोक्पो उसा केङेनि नुङ् पुसिङा आबायाक्टाना डाना, टरो उसा केङाना टुबुवाट्टुन्॥ 7टब स्वाँराङि टोॽवा काचोक् चाकार लोडुए, ‘आङा सुम्बोक् बारखालाम्मा ना वामाखोक्पोङा उसा केङुटुनि नुङ् पुयेट्टुङ्, टरो केङ्मा केङ्नेट्नि॥ हाट्ले ना वामाखोक्पो चेप्टुडेसु, ना पोङ् बिट्थाङि स्वाँरा कोक्मा पिमाना?’ 8टरो टोॽवा काचोक्बाङा लोडुए, ‘आडाङ्बा, ना वामाखोक्पो उभुङ्मा आझै ठिक् बारखा टेप्मा युङ्सुम् हिट्नुङ् आङा ना ओजारा याम्बा-नायाम्बा टोयुङ् मोल ठेन्डुङ्टुङ्॥ 9हिट्नुङ् हान्डेमाङ् उसा केङे भोने ओचेट्नु डोक् लियुक्, केङ्नेट्नि भोने खोक्टुडेसु॥’”
युङ्माना लेम्बा ओएक्चुरिक् गुङ् लिसाना मेन्झेमा येसुङा नुमानिङ् चोगुटु
10ठिक् खेप् युङ्माना लेम्बा येसुङा याहुदिचिगा ठिक् छुम्मापाङ्ङि हिसिक्टुएट्टुचिगा॥ 11हिट्नि ठिबाङ् आठार बारखालाम्मा ओचाफेन्ना रिमेट् लाहाब् लिसाउङ् टुगाना मेन्झेमा डाना॥ हिट्ना ओयाक्चिरिक् गुङ् लिसाउङ् सोट् चोक्मा चा हिनेट्निना डाना॥ 12येसुङा हिट्ना मेन्झेमा निसुए हिट्नुङ् ओटोक्कानाङि छेम्डुङ् लोडुए, “आनो, हाट्ले कारोगालाम्मा खान् आनुए॥” 13हिट्नुङ् येसुङा हिट्ना उठुङ्ङि उमुक् युङ्सुए, हिट्नुङ् हिट्ना बेला डोक् ओयाक्चुरिक् सोट् लिसे हिट्नुङ् माङ्हाङ्ङाना उनिङ् चोन्मा ठालाँ चोगुए॥
14टरो हिट्ना मेन्झेमा युङ्माना लेम्बा येसुङा नुमानिङ् चोगुना याहुदि छुम्मापाङ्ङिना ओठेडोङ्ङा निसुङ् ओरेक् काडे॥ हिट्नुङ् हिट्नाँ याप्मिचि लोडुचे, “हाप्टाङि सि लेम्बा टेप्मा टोॽवा चोक्मा हिडुम्टुम्, युङ्माना लेम्बा माखाक्॥ आरु लेम्बा नुसिङा टायानि॥”#पारस्थान २०:९-१०; धारमाबिधि ५:१३-१४
15टरो येसुङा हिट्नागा लोडुचे, “हाउ निङ्ग्वा ओमाक्पाचि! पाक् सोरोक् युङ्माना लेम्बा चा खानिङा पिट् आथाबा गाधा आलेडुम्चिमुङ् चुवा ठुङ्सिङा आखाट्निम्चिम्गै टे? 16हिट्डेउङ् युङ्माना लेम्बा ना उटुखुमाङ्लाम्मा नुमानिङ् चोक्मा ओचाफेम्मा माखाक्॥ पोङ्भोने ना आब्राहाम पाङ्ङिना मेन्झेमा डोक्, हिट्नुङ् उन् ना टुखुमाङ्ङि आठार बारखालाम्मा ओचाफेन्ना रिमेट्ङा पोट्राकाक् चोगुएसुना॥” 17येसुङा ना रिङ् माट्टुनाँ सोब्बे ओसाट्टुरचि ओमोन्डासिए, टरो उन्ङा डोङ् ठोङ्डिना टोॽवा चोगुनाँ सोब्बे याप्मिचिगा उन्चि चाप् टाए॥
माङ्हाङ् उमुलुक् बारेङि इप्पोक् मुन्डुम्
(मात्ति १३:३१-३३; मारकुस ४:३०-३२)
18हिट्नुङ् येसुङा हिट्नागा लोडुचे, “माङ्हाङ् उमुलुक् खोड्डेना नुङ् आङा पाक्लोक् टोङ्सुङ्ना? 19ना पाट्छेयो सागाङाना लालिक् गाड्डेना ए॥ ठिबाङ् याप्मिङा हिट्ना लालिक् खाट्टुङ् ओस्वाँराङि हिसुटु, हिट्नुङ् कोब्युङ् पोयुङ् सिङ् उभुङ्मा लियुक्॥ हिट्नुङ् हिट्ना ओहागेप्पाचिङि नुवाचिङा उन्चि हाप् ओचोगुटु॥”
20येसुङा फेरि हिट्नागा लोडुचे, “माङ्हाङ् उमुलुक् आङा पाक्लोक् टोङ्सुङ्ना टे? 21हिट्ना चालेपा भुक्भुक् चोगुना खामिर गाड्डेना ए॥ ठिबाङ् मेन्झेमाङा खाट्टिप्मा खामिर सुम्बोक् पाटि डालो टेप्मा पिठोङि ठेन्डुङ् फोडुटु, हिट्नुङ् ख्वाप्पा पिठो डोक् खामिरङा ठाक्टुङ् भुक्भुक् चोगुटु॥”
चिफिप्ना ढुवारिक्
(मात्ति ७:१३-१४,२२-२३)
22हिट्नुङ् येसु यरुसलेम खालाङ्गाङि खाडागेट्ना बेला उन्ङा युक्ताम्ङि हिट्नुङ् खालाङ्गाङि लिगाउङ् हिट्निगा याप्मिचि हिसिक्टुचे॥ 23हिट्ना बेला ठिबाङ् याप्मिङा येसु सिलाप्टुए, “आडाङ्बा, पाक् खाट्टिप्मा याप्मिचिङा एडोक् मुक्टि ओटोगुटुगि टे?” 24येसुङा हिट्नागा लोडुचे, “चुबुरुक्ना ढुवारिक्लाम्मा माङ्हाङ् उमुलुक्ङि लिग्मा कोलानि, पोङ्भोने आङा खानि लोनाँनि, जोम् याप्मिचि फिप्ना ढुवारिक्लाम्मा लिग्मा ओकोन्युक्, टरो लिग्मा उहिनिगा॥ 25हान्डेङ्म्बाक्, जब पाङ् ओडाङ्बा कोप्युङ् ओढुवारिक् छुप्टुटु, टब भिट्रा लिग्मा हिडिन्ना॥ हिट्नुङ् खानिम्बाक् भारालाम्मा ढुवारिक् इन्सा, ‘आडाङ्बा, ढुवारिक् याप्मिओङ्साबिडा’ पिक्सा आपिगिटि॥ टरो उन्ङा मालोडिटि, ‘खानि साइगा? खोनालाम्मा आटाइगा? आङा खानि मिसेन् निनेनिन्गा॥’
26“हिट्नुङ् खानि आपिगिटि, ‘आन्याँ खान्लोक् युङिङे चाम्मे, ठुङुमे हिट्नुङ् खान्ङा आन्याँ पाङ्ठाङ्ङि याप्मि आहिसिक्टे॥’ 27टरो उन्ङा फेरि माट्टुटु, ‘खानि साइगा? आङा खानि मिसेन् निनेनिन्गा॥ हाउ दुस्टा याप्मिचि, आङालाम्मा खाडाजानि॥’
28“हिट्नुङ् खानि टुबाठेबाचि आब्राहाम, इसाहाक, याकुब हिट्नुङ् सोब्बे माङ्काटाचि माङ्हाङ् उमुलुक्ङि उयुङागा आनिसुम्चिम्चिम्, टरो खानि आप्पेम्बाक् भारा मालेप्टिगा ठाहा आटोगुम्टुम्॥ हिट्नुङ् खानि हिट्नि आहाबिटि हिट्नुङ् खानि केङ् आचान्डुम्टुम्॥ 29हिट्नुङ् नाम् होन्नालेङ्लाम्मा, नाम् ठानालाम्मा, उत्तार हिट्नुङ् पारघानलाम्मा याप्मिचि उटायुक् हिट्नुङ् माङ्हाङ् उमुलुक्ङि उन्लोक् भातेर चासिङा एक्केउ उयुङ्युक्॥#मात्ति ८:११-१२ 30हिट्नुङ् हाट्ले एङ्स्वा उलिगाम्बाक् पाइलेगा उलियुक्, हिट्नुङ् पाइले उलिसागाम्बाक् एङ्स्वा उलियुक्॥”#मात्ति १९:३०; २०:१६; मारकुस १०:३१
येसुङा यरुसलेम माया चोगुटुटु
(मात्ति २३:३७-३९)
31हिट्ना बेला खोट्टेप्मा फारिसि याप्मिचि येसु सोरि ओआबाउङ् ओलोडुए, “खान् नाहिलाम्मा आरकोलेङ् खाडालेट्टा, पोङ्भोने हेरोद एन्टिपास हाङ्बाङा खान् सेप्मा माकोन्येट्॥”
32येसुङा हिट्नागा लोडुचे, “खाडानिउङ् हिट्ना स्याला लोडानुम्, ‘नाहि खेम्सानुम्, हाट्ले डोक् हान्डेङ् ओचाफेन्ना रिमेट् याप्मिचिलाम्मा होट्टुङ्चिङ्चिङ्, हिट्नुङ् टुखुमाङ् याप्मिचि नुमेट्टुङ्चिङ्चिङ्, हिट्नुङ् छिन्डेङ्म्बाक् आटोॽवा लाट्टुङ्टुङ्॥’ 33टरो आङा हाट्ले हान्डेङ् हिट्नुङ् छिङ्डेङ् सोम्मा आटोॽवा चोक्मा हिडुङ्टुङ् हिट्नुङ् यरुसलेमलेङ् खाप्मा डोक् कोन्युक्, पोङ्भोने यरुसलेम नुङ्ना भारा आरु डेन्ङि माङ्काटा सेप्मा लिनिना॥
34“हाउ यरुसलेमङिगा याप्मिचि! खानिङा माङ्काटाचि आसेडुम्चिम्गा॥ माङ्हाङ्ङा खानि सोरि पाङ्सुचिगालाउङ्सा लुङ्गेॽवाङा आलेप्टुम्चिम्गा॥ आङा खानिलोङ्सा वाङा वाजिलेट्चि छुमुचि गाड्डे हिट्नुङ् वाजिलेट्चि कुप्टुचि गाड्डे डोक् आम्टेप्मा छुम्मा हिट्नुङ् सुराक्छा पिमा कोलुङ्चिङे, टरो खानि आटेन्डेट्टिन्॥ 35नाहि खेम्सानुम्, खानि पाङ् धुरिठोङ् लिलोक् नाडाइसे॥ हिट्नुङ् आङा खानि लोनाँनि, जाइले सोम्मा ‘टाङ्बा उनिङ्ङि टायाना माङ्हाङ्ङा आसिक् पिडुटु’#छाम्लोमा छाप्ला ११८:२६; यारमिया २२:५ नुङ् आपिगिन्गा टब सोम्मा खानिङा आङा याङ्आनिसिन्नागा॥”
Currently Selected:
लुका 13: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
