लुका 9
9
येसुङा चेलाचि पारचार चोक्मा पाङ्सुचिगा
(मात्ति १०:५-१५; मारकुस ६:७-१३)
1ठिक् लेम्बा येसुङा बारो जाना ओचेलाचि एक्केउ छेम्डुचे॥ हिट्नुङ् हिट्नागा ओचाफेन्गा रिमेट्चि होप्माना हिट्नुङ् उटुग्गा याप्मिचि नुमानिङ् चोक्माना बोल् हिट्नुङ् आधिकार पिडुचे॥ 2हिट्नुङ् उन्ङा हिट्नागा माङ्हाङ् उमुलुक् पारचार चोक्ङा हिट्नुङ् उटुग्गा याप्मिचि नुमानिङ् चोक्सिङा पाङ्सुचे॥ 3हिट्ना बेला येसुङा हिट्नागा लोडुचे, “खानि आखाडिनाँ लाम्बो लोङ्सा लाहुरिक्, जाप्रामा, चालेपा, ओफाबा हिट्नुङ् आरु फेरफारे लोट्लिङ् पाक्चा खुनेनुम्॥ 4खानि आखाडिनाँ पाङ्ङि स्वागाट् माचोगिए भोने, हिट्ना खालाङ्गाङि आयुङिलोक् सोम्मा हिट्ना पाङ्ङि डोक् युङानि॥ 5टरो खानि आखाडिना डेन्ङि याप्मिचिङा स्वागाट् माचोगेट्टिन् भोने, हिट्ना खालाङ्गा आपोक्टुम्नाँ खानि लाङ्ङि नुप्टागा खाम्धारि हिट्नि डोक् ठाम्साढानुम्॥ ना रिङ् हिट्नागा बिरुद्दाङि ओकोबाना रिङ्ङाना साँचि लोङ्सा लियुक्॥”#लुका १०:४-११; मुलिचेला टोॽवा १३:५१ 6हिट्नुङ् हिट्नागा ओसाम्डे, हिट्नुङ् युक्ताम्-युक्ताम्ङि ओखाडाउङ् सोब्बे डेन्ङि ओचेट्नुना खाबोर खेम्मेट्सा सोब्बे उटुगागा याप्मिचि नुमानिङ् ओचोगुचे॥
हेरोद बान्डाना बारे
(मात्ति १४:१-१२; मारकुस ६:१४-२९)
7नागा सोब्बे घाट्नाचि बारेङि गालिल छेट्राङि सासान् काचोक् हेरोद एन्टिपासङा खेम्सुनाँ उन् डोङ् ठोङ्डे॥ पोङ्भोने आम्टेप्मा याप्मिचिङा “बाप्टिस्मा कापि युहान्ना उहिङ्ग्वाट् लिसे” पिक्सा ओमाट्टुए॥ 8खोट्टेप्माङा “एलिया ओलोडुना माङ्काटा होन्डेना रैछो” ओमाट्टुए, हिट्नुङ् आरुङाम्बाक् “उइलेना माङ्काटा माड्डे ठिबाङ् उहिङ्ग्वाट् लिसेसे” पिक्सा ओमाट्टुए॥#मात्ति १६:१४; मारकुस ८:२८; लुका ९:१९ 9हिड्डे लिसाउङ् हेरोद पिगे, “बाप्टिस्मा कापि युहान्नाङाना ओटेहेक् आङा डोक् चेप्मा मेट्टुङ्चिङे॥ टरो ना याप्मि साइना उन्ङाना बारेङि आङा खेम्सुएट्टुङ्?” हिट्नुङ् हेरोद हाङ्बाङा येसु टुब्माना निङ्ग्वा चोगुए॥
येसुङा लेम्बोक् हाजार याप्मिचि चामा ख्वाबा चोगुचिगा
(मात्ति १४:१३-२१; मारकुस ६:३०-४४; युहान्ना ६:१-१४)
10हिट्नुङ् मुलिचेलाचि ओनोक्टाउङ् उन्चिङा ओचोगुगा सोब्बे रिङ् येसु ओखेम्मेट्टुए॥ हिट्नुङ् येसुङा हिट्नागा खाट्टुचिउङ् बेथसेदा ओलोडुना खालाङ्गालेङ् सोगोप् खाडे॥ 11टरो जोम् याप्मिचिङा येसु हिट्नालाम्मा खाट्ना रिङ् ठाहा ओटोगुङ् हिट्नागाँ ओएङ्-ओएङ् रोक् उरिक्टोए॥ येसुङा हिट्नागा याप्मिचि स्वागाट् चोगुचे, उन्ङा हिट्नागा माङ्हाङ् उमुलुक् बारेङि हिसुक्टुचे हिट्नुङ् उटुगागा याप्मिचि चा नुमानिङ् चोगुचे॥
12हिट्नुङ्ना नाम् कुडाना पाका बारो जाना ओचेलाचि ओआबाउङ् येसु ओलोडुए, “आडाङ्बा, हाट्ले नागा याप्मिचि नाहिलाम्मा पाङ्सुचि, हिट्नुङ् नागा उखाट्युङ् योम्बो-टोम्बो डेन्ङि उन्चि चामा-ठुङ्मा लोङ्सा हिट्नुङ् युङ्माजामा पाङ् आप्पे ओकोलुजो, पोङ्भोने आनि नेहि खुसुना डेन्ङि वासेट्टि॥” 13टरो येसुङा ओचेलाचि लोडुचे, “हाट्ले खानिङा डोक् नागा याप्मिचि चामा चामा पिडानुम्चिम्॥” टरो हिट्नागा उपिगे, “आन्याँलोक् नेहि लेम्बोक् चालेपा हिट्नुङ् इप्पोक् ङासा एडोक् युङ्ग्वा॥ नागा सोब्बे याप्मिचि चामा पिमाचिगा भोने, आन्याँ आरु चालेपा इन्सिङा खाप्मा कोन्युक्॥” 14हिट्नि येम्बिछा याप्मिचि एडोक् लेम्बोक् हाजार टेप्मा ओवासेट्टागा॥
येसुङा ओचेलाचि लोडुचे, “नागा याप्मिचि पाचास पाचासङाना रुबुजुक् चोगानुम्चिमुङ् टिरिम् युङ्सानुम्चिम्॥” 15हिट्नुङ् ओचेलाचिङा हिड्डे डोक् ओचोगुङ् उयुङ्सुचे॥ 16हिट्नुङ्ना येसुङा लेम्बोक् चालेपा हिट्नुङ् इप्पोक् ङासा याङुए हिट्नुङ् टोनालोग्लेङ् पुयुङ् माङ्हाङ्ङि आसिक् नाक्टुए हिट्नुङ् ङासा लोक् चालेपा एगुङ् याप्मिचि हान्डाबिडानुम्चिम् पिक्सा ओचेलाचि पिडुचे॥ 17हिट्नुङ् ख्वाप्पाङा फोक् उइप्लोक् ओचोए, हिट्नुङ् येसु ओचेलाचिङा मोन्डागा खोजेमोजे बारो डालि टेप्मा उछुम्सुए॥
खिरिस्टङाना रिङ्
(मात्ति १६:१३-२३; मारकुस ८:२७-३३)
18ठिक् लेम्बा येसु ओएकेले बिन्टि चोगेट्टेना डाना, हिट्ना बेला ओचेलाचि चा उन् सोरि ओटाए॥ हिट्नुङ् येसुङा ओचेलाचि सिलाप्टुचे, “आङा साइना नुङ् याप्मिचिङा याङ्ओलोयुग्गा?”
19हिट्नागाँ ओलोडुए, “खोना खोनाङा बाप्टिस्मा कापि युहान्ना मालोना, कोइङा एलिया हिट्नुङ् आरुङाम्बाक् उइलेना माङ्काटा माड्डे ठिबाङ् फेरि हिङेसे उपिग्गा॥”#मात्ति १४:१-२; मारकुस ६:१४-१५; लुका ९:७-८
20हिट्नुङ् येसुङा हिट्नागा सिलाप्टुचे, “खानिङाम्बाक् आङा साइना नुङ् याङ्आलोडिटिङागा टे?”
हिट्नुङ् पाटरुसङा लोडुए, “खान्उम्टे माङ्हाङ्ङा मासेगाना खिरिस्ट ए!”
21हिट्नुङ् ओचेलाचि “ना रिङ् साक्चा लोमा लोनेनुम्चिम् ए” पिक्सा आग्याँ पिडुचे॥ 22हिट्नुङ् उन्ङा लोडुचे, “याप्मि छाङा जोम् याङ्छामा फोक्मा कोन्युक्, हिट्नुङ् उन् ओठेडोङ्चिङा, गाडुवाडाङ्बाचि हिट्नुङ् धारमाबिधि काहिसिक्बाचिङा इन्कार ओचोगुटु हिट्नुङ् उन् ओसेडुटु॥ टरो उन् सुम्बोक् लेम्बा उहिङ्ग्वाट् लियुङ् कोब्युक्॥”
चेला लिमाउङ्सा चोग्माना टोॽवा
(मात्ति १६:२४-२८; मारकुस ८:३४–९:१)
23हिट्नुङ् येसुङा सोब्बे याप्मिचि लोडुचे, “खानि माड्डे आचेला लिमा आकोलिटि भोने, खानि आप्पे लोङ्सा माया चोक्मा नामा कोन्युक्, हिट्नुङ् लेन्सेन् उखाप्चे आप्पे खुयुङ्#९:२३ उखाप्चे खुमा नुङ् येसुलोङ्सा याङ्छामा खुमा हिट्नुङ् सिमा चा टेयार लिमा॥ आएङ् ओआप्याक्॥#मात्ति १०:३८; लुका १४:२७ 24पोङ्भोने जुन्ङा आप्पे ओसोक्मा जोगाँ चोक्मा कोलुटु हिट्नाङा हिट्ना चा मासुटु॥ टरो हिट्नाँ आङालोङ्सा ओसोक्मा सामारपान् चोगुटु, भोने हिट्नाँ लाट्निना चोला टुबुटु॥#मात्ति १०:३९; लुका १७:३३; युहान्ना १२:२५ 25याप्मिङा ना नाराङिगा ख्वाप्पा थोक्चि टोगु चा ओसोक्माम्बाक् जाखाम् चोगुए भोने, उन् लोङ्सा पाक् ओचेट्नुना लिसेना टे? 26टरो खानि याप्मिचि आङालोक् हिट्नुङ् आङा हिसिक्नानिगा रिङ्चिलोक् आमोन्डिसिए भोने, याप्मि छा चा आङा, माङ्हाङ् पाबाङाना, हिट्नुङ् सेङ्सेङ्गा माङ्हाङ् रिङ् काउग्बाचिलोक् माहिमाङि उङ्ना बेला हिट्ना मिसेन् निमा मोन्युसियुक्॥ 27टरो छेम्बा डोक्, आङा खानि लोनाँनि, नेहि ओयेब्गा कोइ-कोइ याप्मिचि माड्डे माङ्हाङ् उमुलुक् मिने सोम्मा उसिनिगा॥”
येसुङाना ओनाभाक् ओम्युक्
(मात्ति १७:१-८; मारकुस ९:२-८)
28ना रिङ् लोमा हिडुचिउङ् साङ् लेम्बा ओएङ्स्वालेङ् येसुङा पाटरुस, युहान्ना हिट्नुङ् याकुब खाट्टुचिउङ् झोन्झोबाङि बिन्टि चोक्ङा खाडे॥ 29येसु बिन्टि चोगेट्टाना बेला ओनाभाक् ओम्सा खाडे, हिट्नुङ् ओलोट्लिङ्चि चा फुट्टुम्बुरि लिसा ओम्से॥ 30-31हिट्नुङ् हिट्नि इप्पाङ् मोसा हिट्नुङ् एलिया माहिमित रुपाङि ठेट्टाचे हिट्नुङ् येसु सिना बारेङि उमुन्डुप्टे॥ ना सोब्बे रिङ् येसुङा यरुसलेमङि युमा कोलाना डाना॥
32हिट्नि पाटरुस हिट्नुङ् ओसाइबाचिम्बाक् मिक्युमाङा मोस्ता उइम्सेसेगा॥ हिट्नागा ओचेन्डानाँ येसु टोनालोग्ङिना ओम्साना भेरेङ्ङि उन्लोक् येबैसाचिगा इप्पाङ् याप्मिचि उनिसुचे॥ 33हिट्नुङ् हिट्नागाचि उन्लोक् साम्डाचिना बेला पाटरुसङा येसु लोडुए, “आडाङ्बा, आनि नाहि युङ्मा ओचेट्नु लियुक्॥ आन्याँ सुम्बोक् युङ्माना याक्सा चोगुम्टुम्मा, ठिक् खान् लोङ्सा, ठिक् मोसा लोङ्सा हिट्नुङ् ठिक् एलिया लोङ्सा॥” टरो (पाटरुसङा पाक् माट्टुएटुना उन्ङा आप्पे चा ठाहा डोक् टोगुव्ट्टुन्॥)
34पाटरुस चेक्टेट्टाना बेला डोक् खिमेमा उङ्साउङ् हिट्नागा टेप्टुचे, हिट्नुङ् येसु ओचेलाचि आड्डिक् टुक्लोक् उकिट्टे॥ 35हिट्ना बेला खिमेमा भिट्रालाम्मा ठिक् नाड्डेना सोरा मुक्टे, “नाउम् आङा सेगुङ्ना आइछा, उन्ङा मालोडिगा रिङ् खेम्सानुम्॥”#यासैया ४२:१; मात्ति ३:१७; १२:१८; मारकुस १:११; लुका ३:२२ 36हिट्ना रिङ् मुक्मा नाडाउङ् हिट्नि येसु एडोक् उनिसुए॥ हिट्ना बेला ओचेलाचिङा उनिसुगा रिङ्चि साक्चा मिलोङे उन्चि निङ्ग्वाङि डोक् उयुङ्सुए॥
ओचाफेन्ना रिमेट्ङा खोट्टुना पिच्छा नुयाना
(मात्ति १७:१४-१८; मारकुस ९:१४-२७)
37हान्डेङ् लेम्बा येसु सुम्बाङ् ओचेलाचिलोक् झोन्झोन्बोलाम्मा उङ्से हिट्नुङ् जोम् याप्मिचि उन् टुब्सिङा ओटाए॥ 38हिट्नि जोम् याप्मिचि माझालाम्मा ठिबाङ् याप्मि राट्टाउङ् लोडुए, “आडाङ्बा, आङा स्या चोक्नाँ, ना आङाना ठिबाङ् एना आइछा, दाया चोगुङ् घुवार याङ्फाडाबिडा॥ 39ना ठिक् ओचाफेम्मा रिमेट्ङा लाबुङ् याङ्छामा चाट्टुना हिट्नुङ् टुक्लोक् राट्ना हिट्नुङ् हिट्ना ठोट् मेट्टुना हिट्नुङ् ओयासिलाम्मा ठ्याबुज् होट्टुलोक् ठाम्सुना॥ हिट्ना ओचाफेम्मा रिमेट्ङा खेसिक् मिलिए सोम्मा नामा नाडुन्ना॥ 40आङा काचेलाचि ना ओचाफेन्ना रिमेट् होट्टानुम् पिक्सा बिन्टि चोगुङ्चिङे, टरो हिट्नागाँ होप्मा उहिडुवाट्टुन्॥”
41येसुङा लोडुचे, “हाउ बिस्वास मालेगा हिट्नुङ् ओचाफेन्गा याप्मिचि, आङा खोना बेला सोम्मा खानिलोक् युङ्ङाना हिट्नुङ् खानि आङ्नानिगा? हिट्ना पिच्छा नाहि आप्टानुम्॥”
42उप्पाङा उइछा आप्टुगेट्टुलोक् ओचाफेन्ना रिमेट्ङा हिट्ना लाबुए हिट्नुङ् ठाम्सुङ् ठोट् चोगुए॥ टरो येसुङा हिट्ना ओचाफेम्मा रिमेट् खेमा लाप्टुए हिट्नुङ् नुमानिङ् चोगुङ् उप्पा पिडुए॥ 43माङ्हाङ्ङाना नाड्डेना ठेना बोल् उनिसुङ् सोब्बे याप्मिचि डोङ् ओठोङ्डे॥
येसुङा उन् सिमाना बारेङि माट्टुना
(मात्ति १७:२२-२३; मारकुस ९:३०-३२)
येसुङा चोगुना सोब्बे टोॽवा बारेङि याप्मिचि डोङ् ओठोङ्डेटाना बेला येसुङा ओचेलाचि लोडुचे, 44“आङा माट्टुङ् लाबुङ्ना रिङ् नुलोक् खेम्सानुम् हिट्नुङ् खानि निङ्ग्वाङि युङ्सानुम्, पोङ्भोने याप्मि छा ओलाबुङ् ओसाट्टुरचि उमुक्ङि उपिडुटु॥” 45टरो येसुङा माट्टुना रिङ् ओचेलाचिङा बुजा ओचोग्वाट्टुन्, पोङ्भोने हिट्ना रिङ् हिट्नागालाम्मा ठोबैइसाना हिट्नुङ् हिट्नागाँ उन् सिलाब्मा चा उकिट्टे॥
सोब्बे नुङ्ना ठेना साइना?
(मात्ति १८:१-५; मारकुस ९:३३-४०)
46हिट्ना बेला येसुङा बारो जाना ओचेलाचिङा उन्चिङि सोब्बे नुङ्ना ठेना साइना पिक्सा रिङ् ओहोट्टुए॥#लुका २२:२४ 47येसुङा उन्चि निङ्ग्वाङिना रिङ् ठाहा टोगुङ् उन्ङा ठिक् ओओ आप्टुङ् उन्चि टोकानाङि युङ्सुए॥ 48हिट्नुङ् हिट्नागा लोडुचे, “जुन्ङा आनिङ्ङि ना ओओ स्वागाट् चोगुटु हिट्नाङा आङालोक् आङा याङ्पाङ्साना माङ्हाङ् पाबा स्वागाट् चोगि गाड्डे डोक् ए॥ खानिङि सोब्बे नुङ्ना खाट्टिउना डोक् सोब्बे नुङ्ना ठेना लियुक्॥”#मात्ति १०:४०; लुका १०:१६; युहान्ना १३:२०
49हिट्नुङ् युहान्नाङा माट्टुए, “आडाङ्बा, आन्याँ ठिबाङ् याप्मिङा कानिङ्ङि ओचाफेन्गा रिमेट्चि होट्टुङ् रिक्टुएट्टुचिगा निसुम्मे, हिट्नुङ् आन्याँ हिट्ना हिट्नाडे चोक्मा पिनेट्निम्मा, पोङ्भोने हिट्ना आनि छुम्माङिना याप्मि माखाक्॥” 50टरो येसुङा हिट्नागा लोडुचे, “हिट्ना छाक्नेनुम्, पोङ्भोने खानि बिरुद्दाङि ओवानिगा याप्मिचि खानिलेङ् डोक् उलियुक्॥”
सामारिचिङा येसु सिसा उहिडुवाट्टुन्
51येसुङाना टोनालोग्लेङ् खाप्मा बेला लिसालाबानाँ उन् यरुसलेमलेङ् खाप्मा लोङ्सा निङ्ग्वा चोगुए॥ 52हिट्नुङ् उन्ङा खाबोर कालोबाचि पाइले डोक् पाङ्सुचे॥ हिट्नुङ् हिट्नागा येसु लोङ्सा चाहाब् लिगा थोक्चि टोङ्सिङा सामारि छेट्राङाना ठिक् युक्ताम्ङि ओखाडे॥ 53टरो येसु यरुसलेमलेङ् खाट्ना रिङ् ठाहा ओटोगुङ् सामारि याप्मिचिङा येसु उन्चि युक्टाम्ङि आप्मा उपिडुवाट्टुन्॥ 54हिड्डेउङ् ना निसाचुङ् ओचेलाचि याकुब हिट्नुङ् युहान्नाङा उन् सिलाप्टाचुए, “आडाङ्बा, आन्याँ टोनालोग्लाम्मा मि ओसाङ् ठेन्डुमुङ् ना युक्टाम् सोब्बे लुट्लोक् चोगानुम् नुङ् आमिट्निनै?”#२ हाङ् १:९-१६
55टरो येसु हिट्नागालेङ् नोक्टाउङ् हिट्नागा खेमा लाप्टुचे॥ 56हिट्नुङ् येसुङा ओचेलाचि खाट्टुचिउङ् आरको युक्ताम्लेङ् खाडे॥
येसुङा ओचेला लिमा हुङ्माना मुल्ये
(मात्ति ८:१९-२२)
57येसु हिट्नुङ् ओचेलाचि लाम्बोङि ओखाडागेट्टाना बेला ठिबाङ् याप्मि आबाउङ् येसु लोडुए, “खान् खोनि खोनि आखाट्युक्ना आङा चा खान्लोक् डोक् खाट्नाँ॥”
58येसुङा हिट्ना लोडुए, “टाँबुराचिगा युङ्माना लुम्भुक् युङ्ग्वा हिट्नुङ् टाङ्साङ्ङि ओपेगा नुवाचिगा ओहाप् उयुङ्ग्वा, टरो याप्मि छाङाना ओटेहेक् युङ्मासिङ् डेन् चा वाइना॥”
59हिट्नुङ् येसुङा आरको याप्मि लोडुए, “आङा रोक् याङ्रिक्टा॥” टरो हिट्ना याप्मिङा लोडुए, “आडाङ्बा, पाइले आप्पा ओलास हुम्मा आपाङ् खाट्मा याङ्पिडा॥”
60हिट्ना येसुङा लोडुए, “उसियागाँ उसियागा याप्मिचि डोक् हुम्मा पिडानुम्चिम्, टरो खान् खाडाउङ् माङ्हाङ् उमुलुक् पारचार चोगु॥”
61हिट्नुङ् आरको याप्मिङा येसु लोडुए, “आडाङ्बा, आङा काचेला लिङा, टरो पाइला आपाङ्ङिगा याप्मिचिलोक् बिदा नाक्सिङा याङ्पाङ्सा॥”#१ हाङ् १९:२०
62टरो येसुङा हिट्ना याप्मि लोडुए, “हालो काफेङ्बाङा उमुक् आनाउङि युङ्सुङ् एङ्स्वालेङ् पुसा फेङ्सुगा भोने, हिट्ना माङ्हाङ् उमुलुक्ङाना सेवा चोक्मा लोङ्सा नुना लिनिना॥”
Currently Selected:
लुका 9: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
