लुका 8
8
येसु मेन्झेमाचिङा घुवार ओफाडुना
1हिट्नुङ्ना येसु माङ्हाङ् उमुलुक्ङाना ओचेट्नुना खाबोर खेम्मेट्सा खालाङ्गा-खालाङ्गा हिट्नुङ् युक्टाम्-युक्टाम्ङि खाडे॥ हिट्नुङ् उन्लोक् बारो जाना ओचेलाचि चा ओवासेट्टागा॥ 2उन्लोक् ओचाफेन्ना रिमेट् हिट्नुङ् रोगालाम्मा नुमानिङ् उलिसागा आम्टेप्मा मेन्झेमाचि ओवासेट्टागा॥ हिट्नागा माड्डेङि सि गोडा टेप्मा ओचाफेन्ना रिमेट्ङा लाबुङ् नुमानिङ् लिसाना माग्दालिनि ओलोडुना मारियाम चा वासेट्टाना॥ 3हिट्नुङ् हेरोद हाङ्बाङाना ओपाङ्ठाङ् कापुबा मुलि हाकिम खुजासङाना ओमेन्झेमा योआन्ना, हिट्नुङ् सुसान्ना लोक् जोम् आरु मेन्झेमाचि ओडागा॥ नागा मेन्झेमाचिङा उन्चि माक्फेन्सुबेन् उपिडुचिउङ् येसु हिट्नुङ् ओचेलाचि घुवार ओफाडुचे॥#मात्ति २७:५५-५६; मारकुस १५:४०-४१; लुका २३:४९
लालिक्ङाना मुन्डुम्
(मात्ति १३:१-९; मारकुस ४:१-९)
4ठिक् लेम्बा जोम् खालाङ्गालाम्मा जोम् याप्मिचि येसुङि ओटाए॥ हिट्नुङ् उन्ङा हिट्नागा ठिक् मुन्डुम् लोडुचे, 5“ठिबाङ् याप्मि लालिक् हिसिङा होन्डे, हिट्नुङ् लालिक् हिसा खाडानाँ खोट्टेप्माम्बाक् लाम्बोङि ओठाए हिट्नुङ् याप्मिचिङा ओयेप्टुए, हिट्नुङ् नुवाचि ओटायाउङ् ओकोबुङ् ओचोए॥ 6हिड्डे डोक् खोट्टेप्मा लालिक्उम्बाक् लिङ्गेॽवा एना खाम्ङि ओठाए, हिट्नि लालिक् कोप्माउङ् ओकोबे, टरो चिसेनि खाम् वानेट्निउङ् ओचोबाडे॥ 7आम्टेप्मा लालिक्उम्बाक् उटिउँबा घारिङि ओठाए, हिट्नुङ् लालिक्चिलोक् उटिउँबाचि चा ओपोया ओकाडाउङ् लालिक्चि पोमा उपिडुवाट्टुन्चिन्॥ 8टरो आम्टेप्मा लालिक्उम्बाक् मोलिलो खाम्ङि ओठाए, लालिक्चि ओकोबाउङ् साए नुङ्ना जोम् उसा ओकेङुए॥” ना मुन्डुम् माप्मा हिडुङ् येसुङा हिट्नागा ठेना ओसोरा चोगुङ् लोडुचे, “खेम्माना नुभेक् लोक्गाङा ना रिङ् नुलोक् खेम्सानुम्॥”
मुन्डुम्ङाना उटुप्
(मात्ति १३:१८-२३; मारकुस ४:१०-२०)
9हिट्नुङ् येसु ओचेलाचिङा ना मुन्डुम्ङाना उटुप् पाइना पिक्सा उसिलाप्टुए॥ 10येसुङा हिट्नागा लोडुचे, “खानिङाउम्टे माङ्हाङ् उमुलुक्ङाना सोगोप्ना रिङ्चि ठाहा टोग्माना ठोना आटोगुएसुम्मे, टरो आङा आरुलोक् मुन्डुम्ङि एडोक् चेक्ङा॥
‘हिड्डेउङ् नागाँ उपुयु चा उनिसुन्गा, ओखेम्सु चा बुजा ओचोगुन्गा॥’#यासैया ६:९-१०
11“ना मुन्डुम्ङाना उटुप्बाक् नाड्डे लियुक्: लालिक्बाक् माङ्हाङ्ङाना रिङ् ए॥ 12हिट्नुङ् लाम्बोङि ओठायागा लालिक्चिम्बाक् माङ्हाङ् रिङ् काखेम्बाचि उलियुक्, टरो सैतान टायुङ् याप्मिचिङा बिस्वास ओचोगुन्चा हिट्नुङ् मुक्टि ओटोगुन्चा नुङ् उन्चि निङ्ग्वालाम्मा माङ्हाङ् रिङ् नाप्टुचिउङ् खाट्टुएट्टुटु॥ 13हिट्नुङ् घेट्रेक् लिङ्गेॽवा बारिङि ओठायागा लालिक्उम्बाक् माङ्हाङ् रिङ् ओखेम्सुङ् हारका उलियुङ् होप्मो बेला सोम्मा बिस्वास काचोक् याप्मिचि उलियुक्॥ हिट्नागाँ माङ्हाङ् रिङ् ओचेट्नुलोक् उन्चि निङ्ग्वाङि युङ्मा उहिडुन्ना, हिट्नुङ् जब निङ्ग्वा छिक्मा बेला टायुक्, बिस्वास ओनाडुएट्टुटु॥ 14टिउँबा घारिङि ओठायागा लालिक्चिम्बाक् माङ्हाङ् रिङ् काखेम्बा याप्मिचि उलियुक्॥ टरो ना चोलाङि लिना चिन्ता, माक्फेन्सुबेन् हिट्नुङ् ना नाराङिना मोज्मोज्जाङा बान्डुचिउङ् बिस्वासङि पोमा उहिनिगा, हिट्नुङ् हिट्नागाँ टुल्फुल ओकेङुन्गा॥ 15हिट्नुङ् ओचेट्नुना खाम्ङि ओठायागा लालिक्उम्बाक् माङ्हाङ् रिङ् ओखेम्सुङ् उन्चि निङ्ग्वाङि ओचेट्नुलोक् उयुङ्सुगा याप्मिचि उलियुक्॥ हिट्नागाँ माङ्हाङ् रिङ् ओखेम्सुङ् हिड्डे गाड्डे डोक् ओचोगुङ् ढुक्का उलियुङ् जोम् टुल्फुल ओकेङुटु॥
कुपिङाना ओव्हाङ्
(मारकुस ४:२१-२५)
16“साङा चा कुपि ओहाट्टुङ् पाटि डालिङा ओटेप्टुन्गा हिट्नुङ् खाटा उछिक्ङि चा उयुङ्सुन्गा, टरो पाङ् भिट्रा ओआप्गालाङ्सा व्हाङ् उलियाक् नुङ् चोट्चोट्नाङि उयुङ्सुटु॥#मात्ति ५:१५; लुका ११:३३ 17हिड्डेउङ् निनिम्गेट्निम्गा थोक्चि चा व्हाङ्ङि निसुम्टुम् हिट्नुङ् ठोप्बालाक् रिङ्चि चा सोब्बे ठाहा टोक्युक्॥#मात्ति १०:२६; १२:२
18“नाड्डेउङ् खानिङा आखेम्सुम्गा रिङ्चि खानि निङ्ग्वाङि नुलोक् युङ्सानुम्॥ पोङ्भोने जुन्लोक् युङ्ग्वा हिट्नाँ आझै याप्मा टोगुटु, टरो जुन्लोक् युङ्ग्वा नुङ् मिट्युक् हिट्ना चा हिट्नालाम्मा नाप्युक्॥”#मात्ति २५:२९; लुका १९:२६
येसुङा उमा हिट्नुङ् उन्झाचि
(मात्ति १२:४६-५०; मारकुस ३:३१-३५)
19हिट्नुङ् येसुङा उमा हिट्नुङ् उन्झाचि उन्ङि ओआबे, टरो जोम् याप्मिचिङा ओचोगुनाँ उन् सोरि खाप्मा उहिनेट्नि॥ 20हिट्नि ठिबाङ् याप्मिङा उन् लोडुए, “कामा लोक् कान्झाचि खान् टुब्सिङा ओटाइसे हिट्नुङ् भारा माहाङ्येट्॥”
21हिट्नुङ् येसुङा हिट्नागा लोडुचे, “माङ्हाङ् रिङ् काखेम्बाचि हिट्नुङ् हिट्ना गाड्डे काचोक्बाचि डोक् आङागा आमाचि हिट्नुङ् आन्झाचि उलियुक्॥”
येसुङा हिॽवा हुन्डारि सिप्टुए
(मात्ति ८:२३-२७; मारकुस ४:३५-४१)
22ठिक् लेम्बा येसु ओचेलाचिलोक् नाउङि ठाङे, हिट्नुङ् हिट्नागा लोडुचे, “आनि तालङाना याहाँपारा खाडि॥” हिट्नुङ् उन्चि नाउङि ओठाङाउङ् ओखाडे॥ 23हिट्नागा नाउङि ओखाडागेट्टाना बेला येसुम्बाक् इम्से॥ इक्किनाँ हिट्ना तालङि ठेना हिॽवा फेम्मा ठालाँ चोगुए, हिट्नुङ् नाउङि चुवा उपुच्वा लिग्सा खाडे हिट्नुङ् उन्चि आट्टुरिङि ओठाए॥
24हिड्डे लिसानाँ ओचेलाचि उन् सोरि ओखाडाउङ् उन् फोग्सा ओलोडुए, “काहिसिक्बा, काहिसिक्बा, आनि चुवाङि लुमिउङ् सियि लाबिए॥”
हिट्नुङ् येसु कोबाउङ् हिट्ना हुन्डारि हिट्नुङ् चुवा ओभेट्लेॽवा खेमा लाप्टुए॥ हिट्ना बेला डोक् हिट्ना हुन्डारि हिट्नुङ् चुवा ओभेट्लेॽवा सिप्टाडे॥ 25हिट्नुङ् येसुङा ओचेलाचि लोडुचे, “खोलो खानि बिस्वास खोनि खाडेना?”
हिट्नागा उकिट्टे हिट्नुङ् डोङ् ओठोङ्डे, हिट्नुङ् उन्चि उन्चि नाड्डे उपिगे, “ना खोड्डे पाराना याप्मि हाउ? हुन्डारि हिट्नुङ् चुवा ओभेट्लेॽवा चा आग्याँ पिडुचिगा हिट्नुङ् ओटेन्गा॥”
येसुङा ओचाफेन्ना रिमेट् लाहाब् लिसाना याप्मि नुमानिङ् चोगुटु
(मात्ति ८:२८-३४; मारकुस ५:१-२०)
26हिट्नुङ् येसु हिट्नुङ् ओचेलाचि गालिल तालङाना याहाँपारा गेरासेनास छेट्राङि ओटासुए॥ 27हिट्नुङ्ना येसु नाउलाम्मा भारा पाखाङि होन्डानामे ठिबाङ् याप्मि टुबुए, हिट्ना ओचाफेन्ना रिमेट्ङा याङ्सुएसुना॥ हिट्ना याप्मिङा याप्मा लेम्बालाम्मा लोट्निङ् चा वाडुन्गेट्टुवाटुन्ना, हिट्नुङ् पाङ्ङि चा मियुङ्ङे उहुम्पाघारिङि एलोक् युङाना॥
28हिट्ना येसु निसुङ् राट्टे, हिट्नुङ् येसु ओटोकानाङि खाडाउङ् गुङ् चोक्सा टुक्लोक् राट्टाउङ् लोडुए, “सोब्बे नुङ्ना ठेना माङ्हाङ् छा येसु, खान्लोक् आङाना पाक्ङाना चा साइनो वाइना, आङा खान् स्या मेट्नाँ, याङ्छामा याङ्चाट्नेन्॥” 29पोङ्भोने येसुङा ओचाफेन्ना रिमेट्लोङ्सा हिट्ना याप्मिलाम्मा होन्डारा लोडुएसुना॥ हिट्ना याप्मि याप्मा खेप् ओचाफेन्ना रिमेट्ङा याङ्छामा चाट्टुएसुना॥ याप्मिचिङा हिट्ना उलाङ् उमुक् ढाउङाना साङ्लाङा ओरेक्टुङ् उयुङ्सुए टरो चा साङ्ला पुडुउङ् पिन्डाना हिट्नुङ् ओचाफेन्ना रिमेट्ङा खुसुना डेन्लेङ् खाट्टुना डाना॥
30येसुङा हिट्ना “कानिङ् पाइना?” पिक्सा सिलाप्टुए, हिट्नुङ् हिट्नाङा “फौज” माट्टुए पोङ्भोने हिट्ना याप्मिङि जोम् ओचाफेन्ना रिमेट्चि उलिगाइसागा॥ 31हिट्नुङ् हिट्नागाँ घाइरो भाड्खालोङि#८:३१ नाड्डेना घाइरो भाड्खालोम्बाक् ओचाफेन्गा रिमेट्चि छुयुम् छुयुम् उलिलोक् साजाए पिना डेन् ए॥ याप्मिपाङ्नेन् पिक्सा येसु बिन्टि ओचोगुए॥
32हिट्नि नेट्टाङ्ना झोन्झोन्बा याम्बा-नायाम्बा फाक्चिगा ठिक् ठेना बागाल चाराङा उलिसेट्टागा॥ हिट्नुङ् ओचाफेन्ना रिमेट्चिङा हिट्नागा फाक्चि भिट्रा लिग्मा लोङ्सा येसुङि स्या ओचोगुए हिट्नुङ् उन्ङा खाडानि लोडुचे॥ 33हिट्नुङ् ओचाफेन्ना रिमेट्चि हिट्ना याप्मिलाम्मा ओहोन्डाउङ् फाक्चिङि उलिगे, हिट्नुङ् हिट्नागा फाक्चिगा बागाल याक्ठेरेक्लाम्मा हुरयाँ उलिसाउङ् सामुन्दराङि कोसा ओठाए, हिट्नुङ् चुवाङि उलुमा उसिए॥
34हिट्नुङ् फाक् कापुबाचिङा ना घाट्ना उनिसुङ् हिट्निलाम्मा पिन्सा ओखाडाउङ् खालाङ्गाङि हिट्नुङ् हिट्ना याम्बा-नायाम्बाङिगा युक्टाम्ङि ना खाबोर ओमाट्टुए॥ 35हिट्नुङ् याप्मिचि पाक् लिसेना पिक्सा पुसिङा हिट्ना डेन्ङि ओटाए॥ हिट्नि हिट्नागाङा ओचाफेन्ना रिमेट् लाहाब् लिसाना याप्मि नुयाउङ् लोट्निङ् वाडुङ् येसु सोरि युङासाना उनिसुए॥ हिट्नुङ् ना रिङ् उनिसुङ् हिट्नागा सोब्बे उकिट्टे॥ 36हिट्नुङ् हिट्नि ओटायागालोङ्सा ओचाफेन्ना रिमेट् लाहाब् लिसाना याप्मि खोड्डे पारिक् नुलोक् लिसेना हिट्ना रिङ् उनिसुगाँ ओलोडुचे॥ 37हिट्नुङ्ना हिट्ना गेरासेनास छेट्राङाना याम्बा-नायाम्बा सोब्बे युक्टाम्ङिगा याप्मिचि आड्डिक् टुक्लोक् उकिट्टे हिट्नुङ् हिट्नागाँ आन्याँ युक्टाम्लाम्मा खाडायेट्टा पिक्सा येसु स्या ओचोगुए॥
हिड्डेउङ् येसु हिट्नालाम्मा नाउङि ठाङाउङ् नोक्टा खाडे॥ 38हिट्ना बेला ओचाफेन्ना रिमेट्लाम् नुयाना याप्मि येसु सोरि आबाउङ् आङा चा खान्लोक् याङ्खाट्टा पिक्सा बिन्टि चोगुए, टरो येसुङा हिट्ना याप्मि नाड्डे लोसा पाङ्सुए, 39“खान् कापाङ्ङि खाडा हिट्नुङ् माङ्हाङ्ङा खान्लोङ्सा खोड्डेना ठेना टोॽवा चोगुएना हिट्ना खाबोर आरु लोडुचि॥” हिट्नुङ् हिट्ना याप्मि खाडाउङ् उन् लोङ्सा येसुङा चोगुना ख्वाप्पा रिङ्चि खालाङ्गा टेप् माट्टुए॥
याइरसङाना मेन्झेमा उइछा हिट्नुङ् ठिबाङ् मेन्झेमा
(मात्ति ९:१८-२६; मारकुस ५:२१-४३)
40येसु तालङाना नाहाँपारा होन्डा आबानाँ जोम् याप्मिचिङा उन् स्वागाट् ओचोगुए, पोङ्भोने सोब्बेङा उन् ओहाङ्सुएट्टुना॥ 41हिट्नुङ् ठिबाङ् याहुदि छुम्मापाङ्ङिना ओठेडोङ् याइरास ओलोडुना याप्मि आबे हिट्नुङ् ओटेहेक् गुङ् चोगुङ् आपाङ्ङि आबा पिक्सा येसु स्या मेट्टुए, 42पोङ्भोने बारो बारखा टेप्मा टासुना याइरासङाना ठिबाङ् एना मेन्झेमा उइछा टुगाउङ् सियालाबैसाना॥ हिट्नुङ् येसु हिट्ना याप्मिलोक् खाडागेट्टाना बेला याम्बा-नायाम्बालाम्मा जोम् याप्मिचिगा खिमेयाङ्मेङा येप्मा डोक् ओकोलुए॥
43हिट्नि जोम् याप्मिचिगा खिमेयाङ्मेङि बारो बारखा सोम्मा हेलिक् होन्ना रोगाङा टुगाना ठिबाङ् मेन्झेमा डाना॥ उन् साङा चा नुमानिङ् लिलोक् चोक्मा उहिडुवाट्टुन्॥ 44ना मेन्झेमा येसु ओएङ्स्वालाम्मा आबाउङ् उन्ङाना ओलोट्लिङ् ओफेरो खोट्टुए हिट्नुङ् हिट्ना बेला डोक् हेलिक् होम्माना रोगालाम्मा नुमानिङ् लिसे॥
45हिट्नुङ् येसुङा सिलाप्टुचे, “आङा साङा याङ्खोट्टेना?”
हिट्नि सोब्बेङा आङा माखाक् पिक्सा ओमाट्टुना बेला पाटरुसङा लोडुए, “आडाङ्बा, नेहि सोब्बे याप्मिचिङा मापुप्टाउङ् माइन्येट्॥”
46टरो येसुङा लोडुचे, “आङा ठिबाङ्ना ठिबाङ्ङा याङ्खोट्टाना डोक्, पोङ्भोने आयेम्लाम्मा बोल् होन्डाना ठाहा आङा टोगुङे॥” 47हिट्नुङ् हिट्ना मेन्झेमाङा उन् आप्पेलाउङ्सा ठोप्मा हिनिङ्ना नुङ् ठाहा टोगुङ् उन् किट्टे हिट्नुङ् योग्सा येसु ओटोकानाङि आबाउङ् पोङ् येसु खोट्टुएना, हिट्नुङ् खोड्डे पाराउङ् उन् नुमानिङ् लिसेना हिट्ना रिङ् सोब्बे याप्मिचि सोरि माट्टुए॥ 48येसुङा हिट्ना मेन्झेमा लोडुए, “आनो, काबिस्वासङा खान् आनुयाइसे, हाट्ले नुलोक् खाडा॥”
49येसु चेक्टेटाना बेला याहुदि छुम्मापाङ्ङिना ओठेडोङ् याइरासङाना ओपाङ्लाम्मा ठिबाङ् याप्मि आबाउङ् याइरास लोडुए, “काइछाउम् सिये, हाट्ले काहिसिक्बा याङ्छामा चाट्टुन्॥”
50टरो येसुङा हिट्ना रिङ् खेम्सुङ् याइरास लोडुए, “खान् किट्नेन्, बिस्वास एरोक् चोगु, काइछा हिङ्युक्॥”
51हिट्नुङ् येसु याइरासङा ओपाङ्ङि टासुङ् पाटरुस, याकुब, युहान्ना हिट्नुङ् हिट्ना मेच्छा उमा-उप्पा एडोक् उन्लोक् पाङ् भिट्रा उलिगे॥ टरो आरु लिग्मा पिडुवाटुन्चिन्॥ 52हिट्नि उछुमागा सोब्बे याप्मिचि उन्चि निङ्ग्वाङि सानिङ्ग्वा लोसा ओहाबेट्टागा, येसुङा हिट्नागा लोडुचे, “खानि हाप्नेनिन्, मेच्छा सिनिगेट्निना, टरो इम्सेसे॥”
53हिट्नुङ् ना रिङ् ओखेम्सुङ् हिट्नागाँ येसु खिजेक्पा ओचाट्टुए, पोङ्भोने हिट्ना खाट्टिउना मेच्छा सियाडाना नुङ् ठाहा ओटोगुएसुना॥ 54टरो येसुङा हिट्ना खाट्टिउना मेच्छाङाना उमुक्ङि लाबुङ् “मामु, कोबा” पिक्सा लोडुए॥ 55हिट्ना बेला डोक् हिट्ना मेच्छाङाना ओसोक्मा नोक्टाकाडाउङ् हिङे, हिट्नुङ् मुठिलिक् वाठिलिक् कोबे॥ हिट्नुङ् येसुङा “मेच्छा पालोवालो चामा पिडानुम्” पिक्सा उप्पा-उमा लोडुचे॥ 56हिट्ना मेच्छाङाना उप्पा-उमा डोङ् ठोङ्डाचे, टरो येसुङा हिट्नागा ना लिसाना घाटाना साक्चा लोनेनुम्चिम् पिक्सा आग्याँ पिडुचे॥
Currently Selected:
लुका 8: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
