Luka 14

Yezu vei Farisi tu sɔŋɔ

1Siu dɛ dedwoŋi déem ma yi. Yezu ma vo Farisi tiina nadum sɔŋɔ o zo se o di wodiu. O na wora to, nɔɔna maa kwaane ba yere‑o se ba nii o na wó ke tei to. 2Na-dea tu maa tɔge o jei da. 3Yezu na nɛ‑o to, o ma bwei Wɛ nia zamesem tiina bam de Farisi tiina bam o we, “Nɔɔno jege chwoŋa se o yɔɔre o dwoŋi siu dɛ dem ne naa ko chula?” 4Ba ma chem. O laam ma ja nɔɔno wom o pa o na yazura ye o yage‑o se o viiri.

5O laam ma bwei-ba o we, “Abam wolo bu ná to vole wone siu dɛ dem ne, n bá‑n ke lela n vo n vaŋe‑o n le na? Ko ná ye n nabea de, n bá‑n ke konto na?” 6Ba maa ware ba leiri‑o kolokolo.

7Nɔɔna balo na tu se ba tɔge ba di wodiu Farisi tu wom sɔŋɔ ne to ma zo ba lage jeiŋa jei. Yezu ma na we ko ye jei-laao jei ne mo ba lage se ba jeini da. O na nɛ konto to, o ma maŋe memaŋe o bere-ba o we: 8“Nɔɔno ná ke kadiri ye o bwoŋi‑m se n ba n di, yé kwaane n jeini nɔn-kamuna jeiŋa jei ne. Nmo ná ke konto, ye nɔn-yero ná tua, 9ko laam wó pa se n na n chaveera mo. Sɔŋɔ tu wolo na bwoŋi abam maama to wó ba o ta de nmo o we, ‘Zaŋe se n daare jei n pa nɔn-yero konto.’ Nmo laam wó nwoŋi n vo n jeini kwaga kwaga de n chaveera yam.

10Ko daare, ba ná bwoŋi‑m se n vo n di, vei n jeini kwaga kwaga. Nmo ná ke konto, ye sɔŋɔ tu wom ná tu o na‑m, o laam wó ta we, ‘A badwoŋi, zaŋe n ba yiga n jeini.’ Konto wó pa se n na zula nɔɔna bam maama yiga ne.#Memaŋa 25:6-7 11Kolo ŋwaane, wolo ná bere o tete kamunim, konto tu wó ba o ji nɔn-balaŋa mo. Wolo nam ná gwooni o tete, Wɛ wó zeiŋi konto tu nɔɔna yiga ne.”#1 Piita 5:5

12Yezu laam ma ta de sɔŋɔ tu wom o we, “Nmo ná lage n ke wodi-fɔrɔ n pa nɔɔna, se n yé bwoŋi n badwonna bam, de n chorro tem, de n dwonna naduna bam se ba ba ba di. Nmo ná ke konto, banto wó wane ba jwoori ba ke‑m konto dwoŋi ba ŋwe jene dem. 13Nmo nam ná lage n ke kuri, se n bwoŋi balo na ye yiniga tiina, de gwaaro, de gwane, de lilwoa, se ba ba ba di. 14Nmo ná ke konto, nmo wó ta‑n jege yu-ywoŋo. Nɔɔna banto dwoŋi bá wane ba jwoori ba ŋwe nmo jene dem. Maŋa kam Wɛ na wó pa nɔn-ŋona bi toone wone to, nmo nam wó jwoŋi n keim dem kwora.”

15Nɔɔno wodwoŋi na tɔge o jei Yezu tei ne o di to ma ni o na tage kolo to. O ma ta ded‑o o we, “Nɔɔno wolo maama na zo Wɛ woro kom wo o jeini o di ywoni dáane to mo ye yu-ywoŋo tu.”

16Yezu ma ma memaŋe o leiri o we: “Nɔɔno wodwoŋi ya wora o na lage o ke wodi-fɔrɔ o pa o dwonna. O ma bwoŋi nɔɔna dedɛ se ba ba ba di.#Matiyu 22:2-10 17Kuri dem maŋa na yi to, o ma toŋe o tontoŋeno se o vo o ta de balo o na bwoŋi to o we, woŋo maama ti ko yiga se ba laam ba. 18Nɔɔna bam na nigi konto to, ba maama maa wora ba lwoori chwoŋa o tei ne. Ba dedoa maa we, ‘Leile konto a nɛ kara mo se a va. Amo jege se a vo dáane mo. Popo, pa-ne chwoŋa.’ 19Nɔɔno wodwoŋi de maa we, ‘Leile konto a yeigi nabɛ fuga mo se a ma va. Amo wo chwoŋa ne mo se a vo a ke a nii. Popo, pa-ne chwoŋa.’ 20Nɔɔno wodwoŋi de ma ta o we, ‘Leile konto a di kaane mo. Amo daa bá wane a ba.’

21Tontoŋeno wom laam ma jwoori sɔŋɔ o vo o ta de o tu wom ko na ke tei to. Sɔŋɔ tu wom na nigi to, o bane ma zaŋe. O ma ta de o tontoŋeno wom o we, o nwoŋi lela o vo teo kom pwooni jei maama o la yiniga tiina, de gwaaro, de lilwoa, de gwane o pa ba ba ba di. 22Tontoŋeno wom na ke konto to, o ma ta o we, ‘Amo tu, a ke kolo maama nmo na tage to, ye laŋa daa ta daare se nɔɔna jeini da.’

23Sɔŋɔ tu wom daa ma ta ded‑o o we, ‘Nwoŋi teo kom wo n vo n beeri kare sem wone, de gaao chwei sem maama ni ne, se n pa balo na wora to ba ba zo a sɔŋɔ kom se laŋa daa yé daare. 24Amo tɛ abam we, ko ná ye nɔɔna balo a ya na bwoŋi ye ba ve to, banto wolowolo bá na jeiga amo sɔŋɔ ne se ba tɔge ba di.’ ”

Dé wó seene dé yia dé taa tɔge Yezu

Matiyu 10:37-38

25Yezu na wo chwoŋa ne o maa vei to, nɔn-kɔgɔ dedɛ maa tɔge o kwaga. O ma pipiri o nii ba seeni ye o we, 26“Nɔɔno wolo ná tu amo tei, ye o ná wo ve o kwo, de o nu, de o kaane, de o bia, de o zembaara, de o nyaana, de o nakwa, ye o ná wo ve o tete boboŋa de, konto tu bá wane o ji amo kwaga tɔgeno. 27Wolo maama ná tɔge amo kwaga ye o ná wo sɛ se o na yaara, ne wolo na zeŋe dagara o maa vei o toone tei to, konto tu bá wane o ji amo kwaga tɔgeno.

28Abam wolo ná boŋe se o lɔ wɛyuu di-dedɔrɔ, nmo laam wó bobo n jeini n jeeli n nii, sabu kom wó wane diga kam ko lɔ ko ti naa ko bá wane. Ko dae konto na? 29N ná wo ke konto, ye n ná chwi diga kam kuri ye ka lɔɔm daa ware ko guri, balo maama na lɔre to wó taa mɔne‑m, 30ye ba we, ‘Nɔɔno wonto bobo diga lɔɔm ye o ware o guri-ka.’

31Ko woli da, pɛ ná lage o ke jara de pɛ wodwoŋi, o laam wó bobo o jeini o bwɛ o nii, nɔɔna morro fuga (10,000) balo na wo o kwaga ne to wó wane ba jeeri nɔɔna morro finlei (20,000) balo na wo pɛ wodwoŋi wom kwaga ne to naa ba bá wane. Ko dae chega na? 32O nam ná bá wane, pɛ wodwoŋi wom ta ná wo yiga yiga o beena, o wó toŋe tontoŋena o tei ne se ba kwoori‑o se o yage jara yam. 33Tɔ. Ko ye bedwe mo de abam wolo maama ná wo kwei o woŋo maama o yage dáa ne, kotu bá wane o ji amo kwaga tɔgeno.

34Yɛ lamma ye de wae de kwɛ wodiu. Yɛ ni nam ná ti, n daa‑n bá‑n wane n pa de jwoori de ja ni. 35Dento daa ba jege kuri. N bá‑n wane n ke-de n kaduga ne, naa n ma n ke popɔnɔ. Nmo jege se n lwo-de n yage mo.

Abam nam fɔge á cheigi amo taane dem.”

Currently Selected:

Luka 14: KBG

Highlight

Copy