Luka 13

Dé ná wo leiri dé wo, dé wó na chɔgem

1Kanto maŋa kam ne nɔɔna badwonna maa wora ye ba vo ba ta Galili tiina badwonna taane ba bere Yezu. Gɔmena tu Pilata ya jaane banto o go maŋa kalo ba na wora ba kaane Wɛ to, pa se ba jana bam nwoŋi ba gwaane de vara jana. 2Yezu ma leiri nɔɔna bam o we, “Galili tiina banto bam na tiini ba na cham konto dwoŋi to, á boŋe we ko ye ba na tiini ba ye nɔn-chechɔgero ba dwoi ba dwonna bam to ŋwaane mo na? 3Aawo, ko dae konto. Abam tete de ná wo leiri á wo de á keim-balwaaro tem, abam maama de wó na chɔgem. 4Ko ta ná ye nɔɔna fuga-nana balo ya na tege Siloam ne maŋa kam wɛyuu diga na to ba baŋa ne to, á boŋe we ko ye ba na maŋe de chɔgem se ko dwoni ba dwonna Jerusalem tiina to ŋwaane mo na? 5Aawo, ko dae konto. Abam tete ná wo leiri á wo Wɛ ŋwaane, abam maama de wó na chɔgem.”

6Yezu laam ma maŋe memaŋe o bere-ba o we, “Nɔɔno mo wora. O maa jege kaporo o gaare wone. O ma vo se o nii, o wó na ko bia o gwori na. O maa wo nɛ. 7Ko na ba leiri bia to, o ma ta de o gaare tontoŋeno wom o we, ‘Dɔɔm jege bena yatɔ mo amo na tui a lage ko bia ye a ba nae kolokolo. Nam gwoni-ko n de tega ne. Ko zege da kafɛ mo.’ 8Tontoŋeno wom ma leiri‑o o we, ‘Amo tu, yage se ko daa ke bene dedoa. Amo wó ko gwoŋo a gilimi ko maama ye a ke popɔnɔ da. 9Ko ná yi bene dedoa ye ko ná leigi bia, ko wó taa lana. Ko nam ta ná wo leigi, de laam wó gwoni-ko de de tega ne.’ ”

Yezu yɔɔre kaane wodwoŋi siu dɛ ne

10Juu tiina siu dɛ dedwoŋi déem ma yi. Yezu maa wo ba jeerim diga kam ne o bere-ba Wɛ taane. 11Kaane wodwoŋi maa tɔge o wora, chichira na jege‑o ka daana taa, bena fuga-nana, pa se o ye gɔrɔ. Kaane wom maa tiiri tega ne ye o daa ware o kwoni o tete. 12Yezu na nɛ‑o to, o ma ta ded‑o se o ba o tei. O laam ma ta ded‑o o we, “A nakɔ, Wɛ wó pa n sii de n yaara yam.” 13O na tage konto to, o ma daŋe o jea o baŋa ne. Bedwe baŋa ne mo kaane wom kwoni wɛɛne. O laam na dana to, o ma tei Wɛ.

14Jeerim diga kam yuu tu wom na nɛ Yezu na ke tei ba siu dɛ dem ne ye o yɔɔre kaane wom to, o bane ma zaŋe. O ma ta de nɔɔna balo na wo diga kam wone to o we, “Wɛ pɛ debam da yaredo mo se dé taa maa toŋe totoŋa. Konto to, á jege se á ta‑á tui da yam konto ne mo se á na yɔɔrem, se ko dae siu dɛ dem ne.”

15Dé Teiru Yezu ma leiri‑o o we, “Abam ye pipiri-nyena mo! Abam wolo ná jege nabea naa bonaga, n bá‑n sɛ n bwoli-ka n ja n vo buga se ka nyɔ na á siu dɛ dem ne na? 16Konto to, ko chula se a pa kaane wonto sii de o yaara yam siu dɛ dem ne na? Wonto maa ye Abaraham dwi tu ye setaana pɛ ya jege‑o o peene taa, bena fuga-nana. Ko ya chula se a bwoli‑o a yage na?”

17O na tage konto to, ko ma pa balo na ve‑o to na ba chaveera. Ko daare nɔn-kɔgɔ kom maa jege wopwolo dedɛ de wo-kenkagela yalo maama o na ke to.

Wɛ paare dem taane

Matiyu 13:31-33; 7:13-14, 21-23; Maake 4:30-32

18Yezu daa ma ta o we, “Wɛ paare dem ye tetɛ mo? Amo wó ke tɛ mo a maŋe de na ye tei to a bere abam? 19Wɛ paare dem nye de nɔɔno na kwei tio-bu-memeeno o vo o du o kara ne. Tio-bu wom konto ma nwoŋi, ye tio kom tiini ko ji kamunu. Zuna laam ma ba ba sɔ ba pworu da.”

20Yezu daa ta ma ta o we, “Amo ta wó ke tɛ mo a maŋe Wɛ paare dem na ye tei to a bere abam? 21De nye de kaane wodwoŋi na kwei sabɔle o gwaane de bworobworo muni dedɛ tei to. De laam ma pa se bworobworo muni dem maama fole.”

22Yezu déem wo chwoŋa ne o maa vei Jerusalem. O na maa vei to, o tole teene dem maama ye o bere Wɛ taane. 23Nɔɔno wodwoŋi ma bwei‑o o we, “Amo tu, nɔɔna fenfee yerane mo wó na verem na?”

Yezu ma ta de nɔɔna bam o we, 24“Ta‑á cho-na á tete se á kwaane á da ni delo na peene to á zo Wɛ woro kom wo. A tɛ abam, nɔɔna dedɛ wó kwaane se ba zo, ye ba bá wane ba na chwoŋa. 25Maŋa kam wó yi, ye sɔŋɔ tu wom zaŋe o pe manchwoŋo kom. Abam laam wó ba á zege pwooni ne á dɔne dɛ sem ye á lwoori‑o á we, ‘Debam tu, popo, pore n pa debam.’ O laam wó leiri o we, ‘Amo nam yeiri abam kɔtaa.’ 26Abam maa wó ta we, ‘Debam ya tɔge de nmo dé jeini dé di wodiu ye dé nyɔa. Ko ye debam teo kom pwooni mo n zege da n bere Wɛ taane.’ 27O nam ta wó leiri abam o we, ‘Amo nam yeiri abam kɔtaa. Lage-na jei! Abam maama ye wo-lwan-keira mo.’

28Ko ná ke abam konto, á wó na Abaraham, de Izaak, de Jakob na jeini Wɛ woro kom wone, ko woli de faŋa faŋa Wɛ sampwori sem maama. Abam tete nam bá na chwoŋa se á zo. Abam wó maŋe dáa ne, yaara na wora pa se nɔɔna keera ye ba done ba nwa mɛ to. 29Nɔɔna wó nwoŋi logo baŋa jei maama ne ba ba ba zo Wɛ woro kom wo, ye ba jeini ba di ywoni daane.#Matiyu 8:11-12 30Nam ta‑á yei-na we, nɔɔna badaara zem na ye kwaga tiina to wó ba ba ji yiga tiina. Badaara de na maŋe ba ye yiga tiina to wó jwoori ba ji kwaga tiina.”

Yezu wo chɔge Jerusalem tiina ŋwaane

Matiyu 23:37-39

31Maŋa kam konto ne Farisi tiina badwonna ma vo Yezu tei ye ba ta ded‑o ba we, “Yage ywo-seeni se n vo jei sedwoŋi. Pɛ Herodi lage se o pa ba go nmo mo.”

32O ma leiri-ba o we, “Wonto ye nasea mo! Véi-na á ta á bere‑o we, zem da yanto ne amo jege se a taa zeili setaana ye a kwori a yɔɔre nɔɔna jaweero. Da yatɔ ná kɛ, amo laam wó yi a kweelim jeiga. 33Amo nam jege se a daa kwei a chwoŋa a taa kɛa se ko ke da yatɔ, kolo ŋwaane ko bá wane se wolo na ye Wɛ ni-jwoŋinu to ga o ŋwea ye ko dae Jerusalem ne.

34Ei! Jerusalem tiina bam, á yeini á go Wɛ sampwori selo o na toŋe abam tei ne to, ye á dole-ba de kandwa. Kuni dedɛ mo a ya lage se a la abam nɔn-bia a ke daane se a taa nii á baŋa ne, nenɛɛne chworo na kukwori ko bia ko ke ko vɔna kuri ne tei to. Abam maa ba sɛa. 35Wɛ nam wó dɔne o jea abam teo kom baŋa ne se ko ji di-dwonnu. Á ta‑á yei we, á daa bá na-ne se ko taa vei maŋa kalo á na wó ta we, ‘Baŋa Wɛ wó swɛ wolo na tu o yere ŋwaane to swolim.’ ”#Lei 118:26

Currently Selected:

Luka 13: KBG

Highlight

Copy