Luka 15

Pi-jia kam memaŋe

Matiyu 18:12-14

1Dɛ dedwe lampwoo lara de nɔn-chechɔgero dedɛ ma fɔɔre ba yi Yezu tei se ba cheigi o kwora. 2Farisi tiina de Wɛ nia zamesem tiina na nɛ konto to, ba maa poona ba we, “Ta‑á nii nɔɔno wonto na yeini o jeeri nɔn-chechɔgero lanyerane, ye o ta kwori o di wodiu de-ba.”

3Yezu laam ma maŋe memaŋe o bere-ba o we: 4“Abam wolo ná jege pei bi (100), ye se dedoa ná jei, o bá yage pei funogo-nogo sem (99) gaao ne, ye o daare o vo o beeri pi-jia kam na? 5O nam ná beeri o na-ka, o laam wó kwei-ka o daŋe o bakala baŋa ne de wopwolo 6o ja vo sɔŋɔ. O ná tu o yi sɔŋɔ, o wó bwoŋi o badwonna de o sɔŋɔ tiina maama ye o ta de-ba o we, ‘Á pa se dé di ywoni daane, amo na nɛ a pia kalo ya na jei to ŋwaane.’

7Tɔ. A tɛ abam we, ko ye bedwe mo de nɔn-chechɔgɔ dedoa ná leiri o wo Wɛ ŋwaane, ko wó pa se ywoni taa daga Wɛ telaao ne. Ba wó taa jege wopwolo dedɛ ded‑o se ko dwoni nɔn-laaro funogo-nogo (99) na ba boŋe se ba leiri ba wo Wɛ ŋwaane to.

Sabu-jiu kom memaŋe

8Ko woli da, kaane ná jege sabu-dala fuga, ye dedoa ná jei, o bá tɔre kanea ye o zuri o yera o zɔre sɔŋɔ kom wo maama se o nii, o wó na-de na? 9O nam ná nɛ-de, o laam wó bwoŋi o badwonna de o sɔŋɔ tiina maama, ye o ta de-ba o we, ‘Á pa se dé di ywoni daane, amo na nɛ sabu-dale delo ya na jei to ŋwaane.’

10Tɔ. A tɛ abam chega ŋwaane to, nɔn-chechɔgɔ dedoa ná leiri o wo Wɛ ŋwaane, ko pa se wopwolo dedɛ wora Wɛ malese sem tei ne.”

Bu-jiu kom memaŋe

11Yezu daa ta ma ta o we: “Nɔɔno mo wora o na jege bakeiri selei. 12Dɛ dedwe nyaane wom ma zaŋe o ta de o kwo o we, ‘Amo kwo, a lwoori‑m se n pɔɔre amo teiri nmo wonnu tem wone n pa-ne leile konto.’ O kwo ma sɛ. O ma pɔɔre o jejegero tem o pa o bia balei bam.

13Ko na ke da yalei to, nyaane wom ma zaŋe o kwaleme o wonnu maama o ja nwoŋi o vo sa-teo yiga yiga. O maa zoore da ye o ke poweeni yerane. O maa jege o wonnu tem o chɔge yɔɔ yɔɔ. 14O wonnu tem laam ma ba te chɔge te ti maama. Kana ma tiini ka zo teo kom ye o daa ba jege kolokolo. 15O ma vo teo kom nɔɔno dedoa tei o lwoori‑o wolim. Nɔɔno wom ma pa se o vo o tɔge o teira gaao ne. 16Kana na tiini ka chɛ o yera ne to, o ma boŋe se o tɔge o di teira yam so-porro tem. Nɔɔn-nɔɔno maa ba pa‑o kolokolo se o di. 17O boboŋa laam ma jwoori. O ma bwɛ o tete ne o we, ‘Amo kwo yeini o pae o tontoŋena bam maama wodiiru dedɛ pa se ba di ba daara. Ko daare amo wo ywo-seeni ye kana wora ka go-ne. 18Amo jege se a zaŋe a jwoori a vo a kwo tei ye a ta ded‑o we, “Amo kwo, a tusi a chɔge Wɛ yiga, ye a ta ke a chɔge nmo wo. 19Konto to, amo daa ba jege kuri se n ke-ne ne nmo bu tei. Nam pa se a taa tɔge a ye nmo tontoŋena bam dedoa.” ’

20O na boŋe konto to, o laam ma zaŋe o maa vei o kwo tei. O ta na wo yiga yiga to mo o kwo wom nɛ‑o. O na nɛ‑o to, o bu wom ŋwaŋa ma zo‑o lanyerane. O ma zaŋe o duri o vo o jeeri o bu wom o kukwori‑o de wopwolo dedɛ. 21Bu wom laam ma ta ded‑o o we, ‘Amo kwo, a tusi a chɔge Wɛ yiga, ye a ta ke a chɔge nmo wo. Konto to, amo daa ba jege kuri se n ke-ne ne nmo bu tei.’ 22O kwo wom ma ta de o sɔŋɔ tontoŋena bam o we, ‘Á ke lela á zo á kwei gare-dedɔrɔ kolo na tiini ko lana to á ja ba á zo‑o. Kwei-na jafolo á ke o jeŋa ne, se á kwei natera de á pa o zo. 23Véi-na á ja na-paale kamunu kom á ja ba á go, se dé ma ke wodi-fɔrɔ dé di se dé daare dé kwɛɛre o ŋwaane. 24Kolo ŋwaane amo bu wonto ya tege mo ye o laam jwoori o bi. O ya jei mo ye a laam na‑o.’ Ba ma bobo wodiiru tem dim ye ba kwɛɛra.

25Maŋa kalo nyaane wom na tu o yi sɔŋɔ konto to, o zembaaro wom ya wo kara ne mo o vara. O na nwoŋi kara kam ne o maa beene sɔŋɔ to mo o nigi ba na mage wonnu ye ba sae. 26O ma bwoŋi o kwo tontoŋena bam dedoa o bwei‑o woŋo kolo na ke ye ba kwɛɛre to. 27Tontoŋeno wom ma leiri‑o o we, ‘Nmo nyaane wom mo tua. Nmo kwo ma ja na-paale kamunu kom o go se ba di, o na nɛ‑o ye o ŋwe de yazura to ŋwaane.’

28Bu-kwea kam na nigi konto to, o bane ma zaŋe. O maa ba lage se o zo diga. O kwo wom ma nwoŋi o vo o kwoori‑o se o zo. 29O ma ta de o kwo wom o we, ‘Ta‑n nii, bena yanto maama amo tiini a toŋe dedɛ a pa nmo. Amo yeini a sɛ nmo ni maŋa maama. Nmo nam wo pɛ-ne varem se a go, se amo de a badwonna ma di ywoni daane, de bo-bala de. 30Ko daare nmo bu wonto na tu to, n jaane na-paale kamunu kom n go n pa‑o, ye o ye wolo na kwei nmo wonnu tem o vo o chɔge ka-bworru baŋa ne ye o laam jwoori o ba to.’

31O kwo wom ma leiri‑o o we, ‘Amo bu, nmo maŋe n wo amo tei ne maŋa maama. Wonnu telo maama amo na jege to ye nmo nyem. 32Dé zem nam jege se dé di ywoni ye dé kwɛɛre, kolo ŋwaane nmo nyaane wom ya tege mo ye o jwoori o bi. O ya jei mo ye dé daa na‑o.’ ”

Currently Selected:

Luka 15: KBG

Highlight

Copy