Ezekeli 33

Ezekeli na jigi teo yereno tei to

1 Baŋa Wɛ kwora daa ta ma yi amo we:

2“Nabiinu, ta de nmo dwi tiina bam we: ‘Amo ná pɛ chwoŋa se jara ba teo kodwoŋi baŋa, ye ko nɔɔna bam kuri ba wone dedoa se o taa yere ba teo kom, 3kotu ná nɛ we jar-keira mo beene teo kom baŋa pa o wu nabɔnɔ se o ma o kaane teo kom nɔɔna, 4wolo maama ná nigi nabɔnɔ kom kwori ye o ke ne o yiga mo tera, nɔɔno wom konto ná tege jara yam wone, ko ye o tete yiga mo. 5Kokuri, kotu nigi nabɔnɔ kom kwori mo ye o ke ne o yiga tera pa o te. O ya ná ke o tɔge nabɔnɔ kom kwori na bere tei to, o ya wó jwoŋi o ŋwea. O toone tɔge de o tete mo. 6Ko daare, wolo na zege o yere teo kom to ná nɛ we jar-keira mo maa beene se ba jeeri-ba de jara, ye o ná ve se o wu nabɔnɔ kom o kaane nɔɔna bam pa ba badwonna te jara yam baŋa ne, ko ye ba nɛ waarem ba tusim kikia ŋwaane mo. Amo nam wó bwei nɔɔna bam konto jana bam jene wolo na zege o yere teo kom to tei ne mo.’

7Nabiinu, a kuri nmo mo se n ji wolo na zege n yere Isarele dwi tiina bam to. Nmo totoŋe mo ye se n cheigi taane delo a na tɛ to, se n laam vo n kaane-ba n pa-ne. 8Amo ná tage puseŋ-nyeno yera taane we o jege se o te mo, ye nmo ná ve se n ŋɔɔne jaja n kaane‑o se o yage o keim-balwaaro tem, puseŋ-nyeno wom konto wó seene o te o tusim kikia yam ŋwaane. A nam wó bwei kotu jana bam jene nmo tei ne mo. 9Ko daare, nmo ná kaane puseŋ-nyeno wom se o yage o keim-balwaaro tem ye o ná ve n ni-kaana yam, o wó seene o te o tusim kikia ŋwaane, ye nmo nam wó jwoŋi n tete n yage.#1 Tim 4:16

10Nabiinu, ta de Isarele dwi tiina bam we, ‘Abam na kare á tɛ tei to mo tento: Cham delo debam na nɛ dé zwabania kikia dedaane dé wɛleera yam ŋwaane to tiini de daga de dwoi dé jaanem. Dé wora dé bugi dé jia ya ŋwaane. Debam wó ke tetɛ mo se dé jwoŋi dé ŋwea?’ 11Nam ta de-ba we, ‘Ne amo Yuu-tu Baŋa Wɛ na jege ŋwea tei to, ko ye chega mo we, puseŋ-nyeno toone bá pwoli amo wo. A nam swoi se puseŋ-nyena pipiri ba yage ba totoŋ-nɛ sem, se ba daare ba na ŋwea mo. Isarele dwi tiina bam, nam pipiri-na á yage á lwarem kikia yam. Á wó kuri toone se bɛ mo?’#Ezekeli 18:23

12Nabiinu, nam ta de n dwi tiina bam we, ‘Nɔn-ŋom ná tusi o chwoŋa, o nɔn-ŋonne kikia bá jwoŋi‑o ya yage. Puseŋ-nyeno nam ná yage o puseŋa kikia yam, o de bá to o puseŋa kikia yalo o ya na ke to ŋwaane. Nɔn-ŋom ná bobo se o taa ke wɛleera, o faŋa nɔn-ŋonne dem bá wane‑o de jwoŋi de yage se o na ŋwea.’ 13Amo nam ná tage de nɔn-ŋom we o wó na ŋwea, pa se o laam kwei o teena o daŋe o nɔn-ŋonne dem baŋa ne se de jwoŋi‑o de yage, ye o bobo se o taa ke totoŋ-lwanno, amo daa bá jeeli wo-laaro telo o ya na ke to de dedoa de. O nam wó te mo o lwarem kikia yam ŋwaane. 14A nam ná tage de puseŋ-nyeno a we, ‘N jege se n te mo,’ ye kotu ná pipiri o yage o wɛleera yam, ye o daare o toŋe chega kam, de kikia yalo na maŋe to, o wó jwoŋi o tete. 15Puseŋ-nyeno ná kwei wonnu telo nɔɔna na pɛ‑o ba ma tiŋi daare to, de wonnu telo o na vere nɔɔna tei ne to o jwoori o pa-ba, ye o ná ke o tɔge a bera yam na pae ŋwea to, ye o daa ba ke wo-lwanno, kotu wó na ŋwea ye o daa bá te. 16Amo daa bá jeeli wɛleera yalo maama o ya na ke to se a ma a chɔge‑o. O laam toŋe chega mo ye o ke kolo na maŋe to. O wó seene o na ŋwea.

17Nmo dwi tiina bam nam jege ni mo ba tɛ ba we, ‘Chega tera Baŋa Wɛ na ke tei to wone.’ Ko nam ye banto mo ba jege chega de kolo ba na jege ba ke to. 18Nɔn-ŋom ná pipiri o yage o nɔn-ŋonne kikia, ye o bobo se o taa toŋe lwarem, o wó te mo ko ŋwaane. 19Puseŋ-nyeno nam ná yage o puseŋa kikia yam, ye o bobo se o taa ke chega kam de kolo na maŋe to, o wó na ŋwea mo o keina yam baŋa ne. 20De ko de, Isarele dwi tiina bam, abam ta kare á tɛ mo á we, ‘Chega tera Baŋa Wɛ na ke tei to wone.’ Amo nam wó bore abam dedoa dedoa taane se ko maŋe de o kikia na ye tei to mo.”

Jerusalem teo totoore dem taane

21Ba na kale debam ba vo sa-teo yiga yiga ye bena fuga-yalei kɛ to, bene dem konto chane fuga kam da yanu dɛ dem ne mo nɔɔno wodwoŋi nwoŋi Jerusalem teo kom ne o duri o lu, ye o ba o ta de amo o we, “Jerusalem teo kom yɔɔre ko to mo jara baŋa ne!” 22Dɛ delo tega na wó poore se nɔɔno wom laam ja kwora kam o ba o pa-ne to, dedaan-ni maŋa ne mo Baŋa Wɛ dam yɔɔre de ba amo baŋa. O ma pa se a ni puri pa a wae a ŋɔɔna se ko lwoori nɔɔno wom tutuuri dem.#Ezekeli 24:26

23 Baŋa Wɛ kwora laam ma yi amo we:

24“Nabiinu, nɔɔna balo ta na maŋe Isarele teo kom di-dwonnu wone to yeini ba tɛ ba we, ‘Abaraham déem ye o yerane dedoa mo, ye o wane tega kam maama o jwoŋi. Debam nam ye kɔgɔ mo. Dé jege se dé jwoŋi tega kanto mo se ka taa ye debam nyem.’ 25Nam ta de-ba we, ‘Yuu-tu Baŋa Wɛ na tage tei to mo tento: Abam ta swoi se á ta‑á di nɔna yalo yera jana na wo ya wone to mo, ye á daare á kaane jwona, ye á goe nɔɔna. Konto to, ko maŋe se á ta‑á tei tega kam na? 26Abam teege á se-zɔɔro tem baŋa ne mo, ye á kare á ke wo-zɔɔna dwi maama. Nɔɔno maama maa beeri chwoŋa se kotu chɔge o dwoŋi kaane. Abam boŋe we konto maama kwaga ne ko maŋe se á ta‑á tei tega kam mo na?’

27Nam ta de-ba we, ‘Yuu-tu Baŋa Wɛ na tage tei to mo tento: ne amo na jege ŋwea tei to, ko ye chega mo we balo na daare ba zoore di-dwonnu tem wone to wó te jara wone mo. Ko ta ná ye balo de na wo pwola ne to, a lage a pa kago-vara mo go-ba. Ko nam ná ye balo na vei ba dale dam jei de gugworru wone to, jawe-chɛɛro mo wó go-ba. 28Amo nam wó pa se ba teo kom maama taa tigi di-dwonnu yerane, se ba dam dem ba na teere de baŋa ne to ji kafɛ. Isarele teo peero jei sem wó ji kagoa ka taa tiga, ye nɔɔn-nɔɔno bá wane o tɔge dáane o kɛ. 29Konto baŋa ne ba wó lɔre we amo mo ye Baŋa Wɛ wom, ne a ná pɛ se ba teo kom ji di-dwonnu, wo-zɔɔna yalo ba na jege ba ke to ŋwaane.’

30Ko daare nmo nabiinu, nmo dwi tiina bam yeini ba jeeri daane mo á teo kabiri sem teiŋa ne, de ba sam manchwo-nia ne, ba waase ba bere daane ba we, ‘Pa-na se dé vo Ezekeli tei, se dé ni Baŋa Wɛ kwora kam o na jege se o pa debam to.’ 31Ba maa yeini ba tui nmo tei de kɔgɔ, ye ba cheigi n taane dem, ne ko na maŋe de a nɔɔna bam na ke tei to. Ba nam ba lage se ba toŋe ba tɔge a taane dem na bere tei to. Swono taane wo ba nia ne. Ba fera nam wo wonnu telo na wó pa ba duni to wone mo. 32Ta‑n yei we banto pae n ye gɔgɔ kolo na leeni lei selo na bere swono taane to mo. Ba maa sɛ we n jege kwor-ywoŋa, ye n yei kɔnɔ tam lanyerane. Ba swoi se ba taa cheigi n kwora kam. Ba nam ba toŋe ba tɔge ka na bere tei to. 33Wonnu telo a na tage to nam wó seene te ke. Maŋa kam konto ne mo ba wó lɔre we Wɛ sampwora ya wo ba tetare ne.”

Currently Selected:

Ezekeli 33: KBG

Highlight

Copy