Ezekeli 34

Nayera de ba pei taane

1 Baŋa Wɛ daa ta ma pa-ne o kwora o we:

2“Nabiinu, pworisi taane n chɔge Isarele teo yiga tiina balo na nii a nɔɔna bam baŋa ne to. Nam ta de-ba we: ‘Yuu-tu Baŋa Wɛ na tage tei to mo tento: Lɛɛro taa wo á baŋa ne! Nayera jege se ba taa nii ba pei sem baŋa ne mo. Ko dae konto na? Abam nam nii á tete baŋa ne mo. 3Á swoi se á ta-á di á pei lara kam, ye á kwei se koro tem á sɔ gwaaro á ma á kwoli á tete. Á ma daare á kuri vare-laaro tem á go á pa á tete, ye á yiga laam tere pei sem wone. 4Á wo nii ko baŋa ne se á ta‑á cho pei selo na bwona to se se na dam. Á ta maa wo yɔɔre vare-jaweena bam, se á daare á vɔ balo na nɛ zonne to ŋɔna yam. Abam chem mo ye á pei sem ywori se maa jia. Selo maa na jei to, á wo beeri-se se á ja á jwoori. Abam nam bɛɛse pei-kɔgɔ kom de je-chɛa mo. 5Ko maa pa se se jage jei maama, se na ba jege nayero se kotu taa nii se baŋa ne to ŋwaane. Se na jage konto to, se laam ma ji kago-vara dwi maama ni-wodiu. 6Amo pei sem yɔɔre se jage mo se yi tega baŋa ni maama. Se maa kare zwonnu de peero maama yuni ne se kekara, ye nɔɔn-nɔɔno wo ke o yiga se wone se kotu beeri se jei.

7Konto ŋwaane, abam balo na nii a nɔɔna bam baŋa ne ne nayera na ke tei to, cheigi-na Baŋa Wɛ kwora kam: 8Ne amo Yuu-tu Baŋa Wɛ na jege ŋwea tei to, ko ye chega mo we a dwoni de abam mo. Kokuri to, a pei-kɔgɔ kom gɛ nayero pa kago-vara jege-se ba tore ba di. A nayera bam nam wo beeri amo pei selo na tusi chwoŋa to jei, ye ba yɔɔre ba nii ba tete mo, pa ba yiga tere amo pei sem wone. 9Konto ŋwaane, abam nayera bam, nam cheigi-na Baŋa Wɛ kwora kam. 10Yuu-tu Baŋa Wɛ na tage tei to mo tento: Amo dwoni de nayera bam mo. A maa wó bwei-ba de ba na ke a pei sem tei to. Amo wó jwoŋi a pei sem a daare-ba se ba daa yé taa nii-se. Nayera bam daa bá na chwoŋa se ba kɔne pei sem, naa se ba taa kɔne ba tete pei sem baŋa ne. Ba daa bá done pei sem nɔna.

11Yuu-tu Baŋa Wɛ na tage tei to mo tento: Amo tete mo lage a nwoŋi a beeri a pei sem jei se a taa nii se baŋa ne.#Luka 19:10; Jɔn 10:11 12Ne nayero na beeri o pei selo na jage pwola ne tei to, konto mo amo de wó taa nii a pei sem baŋa ne. Amo pei sem déem yɔɔre se jage mo dɛ delo ne kunkwon-lilirru na tu te li tega kam maama to. A nam wó beeri se jei ye a jwoŋi-se a yage. 13Amo wó ja-ba a nwoŋi teene dedwonna dem ne se a la-ba a ke daane, ye a pa ba jwoori ba tete tega kam ne. Amo laam maa wó kale-se se se na gaaro se di Isarele peero jei sem ne, de bwollu tem ne, de jei selo maama nɔɔna na zoore da to. 14A lage a taa yere-se se se taa di ga-zuru mo Isarele peero tem yuni ne. Se wó taa tigi ga-zuru jei ne mo, ye se taa di se boboŋa Isarele teo peero tem ne. 15Amo tete nam mo lage a taa nii a pei sem baŋa ne, ye a daare a pa se taa tigi tega ne de bochare-zuru. Yuu-tu Baŋa Wɛ na tage kolo to mo konto.#Lei 23:1 16Amo ta wó beeri pei selo na jei to mo, se a daare a kale selo na ywori chwoŋa to a ja a jwoori. A maa wó vɔ pei selo na nɛ fufwollu to ŋwana se ya jei, se a daare a taa cho selo na bwona to se se na dam. Ko daare, ko ná ye pei selo na nugi bigila bigila ye se dana to, a lage a go-se mo. Amo wó taa kɔne a pei sem ko chwoŋa kam ne mo.

17Ko nam ná ye abam na ye amo pei sem to, Yuu-tu Baŋa Wɛ na tage tei to mo tento: Ta‑á yei-na we amo lage a bore taane pia de ka dwoŋi tetare ne, ye a daare a pɔɔre pi-bale de bo-bale daane mo. 18Abam na nɛ ga-zuru se á ta‑á di to, ko ta wo maŋe ko pa abam na? Bɛŋwaane mo á yɔɔre á titirigi gaao kom ne, ye á jege-ko á nɔne á chɔga? Abam wo ba tigi de na-zura balo á na jege á nyɔ to mo pa se á jege na bam á pɔgele na? 19Amo pei sesem sem daa bá na ga-zuru se di, ko ná dae gaao kolo abam na nɔne á chɔge to. Se maa jege se se nyɔ na balo abam á pɔgele pa ba ji bworu yerane to mo.

20Yuu-tu Baŋa Wɛ nam na tage tei de pei sem to mo tento: Amo tete mo lage a bore pei selo na nugi to de selo na kwaare to daane. 21Abam kwei á vɔna mo á yigi pei selo na bwona to, ye á daare á chu-se de á nyea se á zeili-se pa se jage se kɛ se wo dáa dáa. 22Konto ŋwaane amo wó jwoŋi a pei sem a yage, se se daa yé na bɛɛsem. A ta wó bore pia de ka dwoŋi taane. 23A laam maa wó le nɔɔno dedoa se wonto ji a nɔɔna bam maama nayero. A tontoŋeno David mo konto. O maa wó kɔne-ba ye o ta nii ba baŋa ne. 24Amo Baŋa Wɛ tete wó taa ye ba Tu Wɛ wom. A tontoŋeno David maa wó taa ye ba maama dedɛɛro. Amo Baŋa Wɛ mo tage konto.

25Amo wó gwoni ni de-ba bochare-zuru ŋwaane, ye a daare a zeili kago-vara dwi maama ba tega kam ne. Konto maa wó pa-ba pwola se ba taa zoore gaao ne, naa ba peini goa wone, ye foone bá taa jege-ba.#Izaya 54:10 26Amo nam wó swɛ ba swolim, se de yi jei selo maama na kaare amo tete peo kom to. A maa wó pa se do-mimina taa nena ka maŋa ne chekke. Do-mimina kam konto mo wó ja swolim ka pa-ba. 27Konto mo wó pa ba teeni dem lei bia lanyerane, ye tega kam de ke wodiiru dedɛ ka pa-ba. Nɔɔna bam maama wó taa jei ba teo kom ne ye kolokolo ba daane-ba. Ba laam maa wó lɔre we amo mo ye Baŋa Wɛ, ne a ná jaane nabɛ yɔgese delo ba dona na de ba ba ne to a bwori a yage pa ba nwoŋi ba kabɛɛne ne. 28Dwi-gɛ tiina daa bá ba ba vere-ba. Kago-vara de nam daa bá ja-ba ba tore ba di. Ba wó taa jei ba teo ne de yazura mo, ye nɔɔn-nɔɔno bá fugi-ba. 29A maa wó pa-ba te-ywoŋa se ba jeini ka baŋa ne ba va. Konto wó pa se kana daa yé ja-ba, se dwi-gɛ tiina bam taa jege-ba ba yaala. 30Ba laam maa wó lɔre we amo wolo na ye ba Tu Baŋa Wɛ wom to wo ba tei ne, ye banto Isarele dwi tiina bam de maa ye amo nɔɔna. Yuu-tu Baŋa Wɛ na tage kolo to mo konto. 31A maa yeini a nii abam baŋa ne, ne nayero na nii o pei-kɔgɔ tei to, ye á ye nabiina. Á ye amo nɔɔna mo, ye amo de ye abam Wɛ. Yuu-tu Baŋa Wɛ na tage kolo to mo konto.’ ”#Lei 74:1; 79:13; 100:3

Currently Selected:

Ezekeli 34: KBG

Highlight

Copy