Ezekeli 32

Ejipti Pa-faro wom luseim leiŋa

1Bena fuga-yalei bene dem chane fuga-selei chana kam boboa dɛ dem ne, mo Baŋa Wɛ kwora tu ka yi amo we:

2“Nabiinu, mɔ luseim leiŋa n pa Ejipti teo pa-faro wom n ta ded‑o we:

‘Nmo ya bere n tete we n ye nywoŋo mo

ye n jege dam logo baŋa teene dem maama wone.

Ko nam na ye tei to, n yɔɔre n ye naneo wo juru mo.

Nmo ma‑n tigi n teo kom bwi sem ne

n jege na bam n pɔgele de n nɛ,

pa se na bam maama ji bworu yerane.

3Yuu-tu Baŋa Wɛ nam na tage tei to mo tento:

Amo wó la nɔn-kɔgɔ dedɛ mo

ye a daare a dole a bora se a ma a ja‑m.

Nɔɔna bam laam maa wó vaŋe‑m

ba ja ba nwoŋi buga kam ne.

4A maa wó dole‑m a yage te-kora baŋa ne,

se n ta‑n tigi pwola ne.

Amo ta wó pa se wɛyuu zuna bam maama ba

ba jeini nmo baŋa ne,

se ga-vara bam maama de ba ba di n yera yam ba su.

5A ta lage a kwei n ya-nɔna yam

a jare peero tem yuu ne mo.

Nmo yera yalo na daare ye ya pɔ to

maa wó faare bwollu tem maama.

6N jana wó duri ba taa tole tega kam jei maama ne mo

ba kɛ ba yi peero jei sem,

ye ba su gugworru tem de.

7Amo ná yɔɔre a chɔge‑m a ti,

a lage a li wɛyuu kom mo

se chalechwe sem yé ta se nwoŋi.

A ta wó pa se kunkwoŋo mo kwoli wea kam.

Chana kam de daa bá nye ka pwooni dem.

8Wɛyuu pwooni dwi maama wó ji lim ko pa‑m,

pa se n teo kom jei maama taa ye lim yerane.

Yuu-tu Baŋa Wɛ na tage kolo to mo konto.

9Logo baŋa teene dem ná nɛ nmo na yɔɔre n chɔge tei to,

a laam wó pa se lwia tiini ya ja-ba,

ko ná maŋe ko ye dwi-gɛ tiina

balo nmo ya na yeiri ba ni ne to de.

10A ta wó pa se nɔɔna dedɛ yera sɔɔre nmo ŋwaane.

Ba pwa bam wó fom mo ye ba yera taa sae,

a na wó kwei a se-zɔɔ kom

a liligi ba yiga ne to ŋwaane.

Nmo totoore dɛ dem ne mo foone wó ja ba maama,

ye lwia taa jege-ba maŋa maama

de ba ŋwea na lage ka ti tei to.

11Kokuri, Yuu-tu Baŋa Wɛ na tage tei to mo tento:

Babilon teo pɛ wom mo lage o ba

o jeeri n teo kom de jara.

12A nam lage a tɔge babɛ se-zɔɔro baŋa ne mo,

se a go n jar-keira bam maama.

Babɛ sem konto jege nankɔɔre mo

ba dwoi logo baŋa teene dem maama.

Ba lage ba chɔge Ejipti kamunim maama mo,

ye ba daare ba meere ba jar-keira kɔgɔ kom maama.

13Ko ta ná ye n teo kom naane delo na beeri bwi sem ni ne to,

a lage a chɔge de maama mo.

Nabiina daa bá de ba nɛ bwi sem na wone se ba pɔgele-ba.

Naane de napɔɔna de daa bá nɔne na bam wone

se ba pa ba pɔgele.

14Kwaga seeni mo a laam wó pa se

n teo kom bwi sem wo na bam tigisi,

se bu-nwaro tem na de taa duri ba kɛa ne nuga na ke tei to.

Yuu-tu Baŋa Wɛ na tage kolo to mo konto.

15Amo wó seene a pa Ejipti teo kom ji di-dwonnu yerane,

se kolokolo daa yé daare tega kam baŋa ne.

A ta wó mage balo maama na zoore ko wone to pa ba to tega ne.

Maŋa kam konto ne mo ba laam wó lɔre we amo mo ye Baŋa Wɛ wom.’

16Luseim leiŋa kanto mo ba lage ba leeni ba pa‑o. Ko nam ye dwi-gɛ tiina bam bukwa mo lage ba mɔ luseim leiŋa kam konto ba pa Ejipti teo de ko nɔn-bia bam maama. Yuu-tu Baŋa Wɛ na tage kolo to mo konto.”

17Bena fuga-yalei bene dem chane fuga-selei chana kam#32:17 naa boboa chana kam da fuga-yanu dɛ dem ne, mo Baŋa Wɛ kwora yi amo we:

18“Nabiinu, yɔɔre n ta‑n keeri Ejipti teo nɔn-bia bam ŋwaane. Banto jege se ba tɔge de te-kamunnu dedwonna nɔɔna mo se ba maama te ba daare ba tu tega kuri jei sem ne. 19Ta de-ba we, ‘Abam boŋe we á jege lam á dwoi dwia yadwonna mo na? Á nam jege se á tu tega kuri ne á ta‑á tigi de balo na yeiri Wɛ to mo.’ 20Ba nam wó tɔge de balo na to jara wone to mo ba te. Se-zɔɔro lage te ba te go-ba mo lela! Ejipti teo kom de ko nɔn-bia bam maama ye se ba dona bam mo zi-ba ba ja ba viiri. 21Bembɛ selo na maŋe ba wo churu wone to wó ta Ejipti teo de ko fara bam taane ba we, ‘Ba laam tu debam tei se ba taa tigi de balo na yeiri Wɛ to, dedaane balo na tege jara wone to.’

22Asiria teo de ko jar-keira bam maama maa wora. Banto tege jara wone ye ba yibeela tigi da. 23Ba déem na ŋwe tega baŋa ne to, ba tiini ba fugi nɔɔna dedɛ. Ba maama ma te jara wone, ye ba yibeela yam wo tega kuri gwoŋo kom gugworru wone.

24Elam teo de maa wora de ko nɔn-bia bam maama ba tigi ba yibeela wone. Ba maama déem tege jara wone mo. Balo maama ya na ŋwe ye ba tiini ba fugi nɔɔna dedɛ to laam mo zo churu ye ba ta yeiri Wɛ. Ba ma tɔge de balo maama na zo tega kuri gwoŋo kom wone to mo ba na ba chaveera. 25Ba ma kwɛ jeiga ba pa Elam teo churu ne se ko taa tigi o jar-keira bam maama tetare ne. Banto maama yeiri Wɛ ye ba laam ba ba te jara wone. Ba ma tɔge de balo maama na zoore churu wone to ba na ba chaveera, ba ya ta na ŋwe ye ba fugi nɔɔna dedɛ to ŋwaane. Ba laam maa tigi balo na tege jara wone to tetare ne.

26Meseka de Tubal de maa wora, ba woli de ba nɔn-bia bam maama ye ba tigi ba yibeela wone. Ba maama nam yeiri Wɛ ye ba te jara wone, ba ya ta na ŋwe ye ba tiini ba fugi nɔɔna dedɛ to ŋwaane. 27Ba nam wo suli-ba de zula ne ba na ke tei de faŋa faŋa bembɛ selo na tege jara wone to mo. Banto déem zo churu wone ye ba jege ba se-zɔɔro ba ma ba yeiri ba yuni, ba daare ba jege ba jara nantane ba kwoli ba yera. Bembɛ sem konto ya ta na ŋwe to, ba ya tiini ba fugi nɔɔna dedɛ.

28Ejipti teo pɛ, ko nam ná ye nmo, nmo de lage n te mo, se n tɔge n taa wo balo na yeiri Wɛ ye ba go-ba jara ne to wone.

29Edom teo, de ko pwa, de ko dedɛɛra bam de maa tɔge ba wo churu wone. Ba tu ba tɔge de balo na tege jara wone to, de ba na maŋe ba jege dam tei maama to de. Ba laam maa tigi de balo ya na yeiri Wɛ ye ba zo tega kuri gwoŋo kom wone to.

30Baŋa seeni teene dem dedɛɛra dedaane Sidon teo tiina bam maama maa wora. Ba ma tɔge de balo na tege jara wone to ba na ba chaveera ye ba te, de ba ya na maŋe ba da ba dam-fɔrɔ ŋwaane ba fugi nɔɔna tei to de. Ba laam maa tigi ba yibeela wone ye ba ta yeiri Wɛ. Ba de di ba chaveera ne balo maama na zo tega kuri gwoŋo kom wone to mo.

31Ejipti teo pa-faro wom wó na kolo na yi teene dem konto maama de de nɔn-bia bam to. O wo laam wó zuri de o tete jar-keira bam na tege jara wone tei to. Mo ko na wó ke Ejipti pa-faro wom de o jar-keira bam maama tei to. Yuu-tu Baŋa Wɛ na tage kolo to mo konto. 32Amo ya mo seene a pa‑o dam se o fugi tega baŋa nabiina bam. Wonto de o nɔn-kɔgɔ kom maama nam tɔge de balo maama na tege jara wone to mo ba tigi balo na yeiri Wɛ to tetare ne. Yuu-tu Baŋa Wɛ na tage kolo to mo konto.”

Currently Selected:

Ezekeli 32: KBG

Highlight

Copy