Ezekeli 31
31
Ejipti Pa-faro wom taane
1Bena fuga-dedoa bene dem chane setɔ chana kam boboa dɛ dem ne, mo Baŋa Wɛ kwora yi amo we:
2“Nabiinu, ta n bere Ejipti pa-faro wom de o nɔn-kɔgɔ kom we:
‘Wɔ kamunni mo ma de nmo?
3Nam boŋe n nii Asiria teo na guri tei to.
Ko déem nye de Sedare tei-zɔŋɔ mo
na wo Lebanon teo kom ne.
Ko nɛ sem déem tage mo lanyerane
ye se ke vɔɔro pa woro wora goa kam ne.
Ko ma tiini ko ke dedɔrɔ
ko kɛ ko di wɛyuu baŋa baŋa.
4Na maa daga da se tio kom taa nyɔa.
Buli-yia yalo na nwoŋi tega kuri ne to
pɛ se ko be lanyerane.
Bu-nwaro maa wora jeiga kalo ko na jeiri to,
ye te na bam duri ba vo ba yi
teeni delo maama de na wo goa kam ne to.
5Tio kom konto ma tiini ko ke dedɔrɔ
ko dwoni goa kam wo teeni dedwonna dem maama.
Ko ma yɔɔre ko ta nɛ dedɛ,
ye se tiini se dɔra.
Ko nɛ sem nam na yarege konto to,
ko ye na bam na daga da to ŋwaane mo.
6Zuna dwi dwi ma ba
ba sɔ ba pworu ko nɛ sem yera ne.
Ko daare ye ga-vara de ba
ba maŋe ko nɛ sem kuri ne ba lo ba bia.
Logo baŋa dwi tiina balo maama na dana to de ma ba
ba jeini ko woro kuri ne.
7Ko déem yɔɔre ko jege lam de kamunni mo,
ye ko nɛ sem yarege se yi jei maama.
Kokuri to, ko bonno tem zo te kwaare tega ne mo,
pa se te yi na dedɛ tega kuri ne.
8Wɛ tete kara Sedare teeni dem
bá wane de maŋe de tio kom konto.
Ko ta ná ye Koperese de Pileeni tei-dedwaaro tem de,
te nɛ sem bá maŋe de konto nɛ sem na ye tei to.
Tio dwi déem maŋe ko tere Wɛ teeni kara kam ne,
se dé kwei dé ma dé maŋe de tio kom konto lam.
9Ko ye amo mo pɛ ko lana konto
pa ko jege nɛ selo na tiini se daga to,
ye Eden wo teeni dem maama
déem tiini de jege kazwe de di de tio kom konto.
10Konto ŋwaane, Yuu-tu Baŋa Wɛ na tage tei to mo tento: Tio kom tiini ko ke dedɔrɔ ko kɛ ko di wɛyuu kom, pa se ko bere ko tete. 11Mo kokuri, a kwei-ko a ke pɛ wolo na jege dam logo baŋa teene dem baŋa ne to jeŋa ne. Wonto laam ma yɔɔre o waare-ko se ko maŋe de ko keim-lwanno na mae tei to. Amo mo dole-ko a yage dáa ne. 12Konto ma pa se dwi-gɛ tiina balo na tiini ba ye nankɔ-nyena to ba ba gwoni-ko ba de tega ne, ba daare ba yage-ko pa ko tiga ko na to mɛ seeni to. Ko nɛ sem to mo se tigi peero yuni ne, de bwollu maama tega ne. Ko da-dwa de ma bwori ye se tigi tega kam gugworru maama wone. Teene delo nɔɔna ya na tigi ko woro kuri ne to ma duri ba daare-ko. 13Zuna bam laam ma ba ba jeini tio kom da-buŋa kalo na daare ka tigi to baŋa ne. Ga-vara bam de ma ba ba nɔne ko nɛ selo na to tega ne to baŋa ne. 14Ko nam na ye tei to, tio kolo maama na nae na ko nyɔ to daa bá fɔge ko ke dedɔrɔ ko di wɛyuu kom, ne tio konto ya na ye tei to. Na ná maŋe ba yi teeni dem tei maama de, de bá wane de taa dɔra konto dwoŋi. De jege se de te mo tega baŋa ne, ne ko na ye tei nabiina tei ne to. De maa jege se de maŋe nabiina tetare ne, ne banto na toa ye ba vei tega kuri ne tei to.
15Yuu-tu Baŋa Wɛ na tage tei to mo tento: Dɛ delo ne tio kom konto na to ko te ye ko tu ko zo churu to, amo ma pa buli-yia yam ni se ya keeri tio kom lua. A ma che bwi sem pa se na-fwaaro tem daa ba dura. A ma pa Lebanon tega kam maama ye lim, tio kom na to to ŋwaane. Teeni dem maama de ma kwaare de zega. 16Tio kom na to buru-tu-tu ye dwi-gɛ tiina bam ni to, a ma pa se ba yera sae, ko na tɔge de balo na vei tega kuri ne ko vo ko zo churu to ŋwaane. Eden kara kam wo teeni dem maama, de Lebanon tei-laaro tem, ko woli de teeni delo maama na na yi-de chekke to maama wo laam ma zuri. 17Logo baŋa dwi tiina balo maama ya na yeini ba jei tei-zɔŋɔ kom woro ne ye ba ye ko fara to de ma tɔge de-ko ba zo churu, ba woli de balo na maŋe ba te jara wone to.
18Eden kara wo teeni dem maama wone, tio kɔ kamunni de ko nenɔŋa mo ma de nmo? De ko de, ba lage ba gwoni nmo ba de tega ne, se nmo de woli Eden kara wo teeni dem mo n zo tega kuri. Dáane mo n lage n ta‑n tigi de balo na yeiri Wɛ to, dedaane balo maama na tega jara wone to.
Memaŋe dento bere ko na wó ke Ejipti teo pa-faro wom de o nɔn-kɔgɔ kom tei to mo. Yuu-tu Baŋa Wɛ na tage kolo to mo konto.’ ”
Currently Selected:
Ezekeli 31: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
