Ezekeli 30

Ejipti teo luseim leiŋa

1 Baŋa Wɛ kwora ma yi amo we, 2“Nabiinu, pworisi se n ta we, ‘Yuu-tu Baŋa Wɛ na tage tei to mo tento:

Chwoosi-na se á ta we,

“Lɛɛro naa!”

3Kokuri to, dɛ dem yi de ti.

Baŋa Wɛ dɛ-kamunu kom mo konto.

Kunkwon-lilirru wó kwoli tega kam

ye lɛɛro yi logo baŋa teene dem

maŋa kam konto ne.

4Jara mo lage ya to Ejipti teo wone.

Cham de maa wó yi Kusi tiina bam.

Ejipti tiina dedɛ wó te jara wone.

Ba dona wó zeŋe ba jejegero tem ba ja ba viiri,

ba daare ba chɔge teo kom

se ko taa zege di-dwonnu yerane.

5Ko ta ná ye Kusi, de Puti, de Ludi, de Arabia tiina maama, de Libia tiina, de balo na nwoŋi amo ni-gwonim tega kam ne to, ba maama wó da de Ejipti tiina bam mo ba te jara wone.

6 Baŋa Wɛ na tage tei to mo tento:

Balo na zege Ejipti teo kwaga ne to lage ba to tega ne mo.

Dam delo Ejipti tiina bam na teere de baŋa ne to maa wó jei.

Ko na zege Migidola ne, se ko yi Sayene#30:6 Sayene = Aswan to,

ba maama lage ba te jara yalo na wó yi Ejipti to wone mo.

Yuu-tu Baŋa Wɛ na tage kolo to mo konto.

7Ba jei sem wó yɔɔre se ji kagoa

teene delo maama na chɔge to wone.

Ba teene dem wó taa ye di-dwonnu yerane mo,

ye di-dwonnu de gilimi-de.

8Ba laam maa wó lɔre we amo mo ye Baŋa Wɛ wom,

ne a na wó pa se Ejipti teo kom ja mini,

ye a daare a nɔne ko fara maama a meere to.

9Dɛ dem konto ná yia, a ta lage a toŋe nɔɔna nabwooru wone se ba ja a kwora ba vo ba pa Kusi teo tiina, de ba na jei de yazura tei to de. Lwia nam wó pɔpɔ ya ja-ba Ejipti teo chɔgem maŋa kam ne, ko na wó seene ko ke to ŋwaane.

10Yuu-tu Baŋa Wɛ nam na tage tei to mo tento:

Amo lage a tɔge Babilon teo pɛ Nebukadeneza baŋa ne mo

se a chɔge Ejipti jar-keira bam dam.

11Wonto de o jar-keira bam keim tiini de chana

de dwoi tega baŋa nɔɔna maama na ye tei to.

Ba lage ba jeeri Ejipti teo kom de jara mo,

se ba daare ba chɔge ba tega kam.

Ba maa wó pa twa faare Ejipti tega kam maama.

12Amo wó pa se Naili buga kam we,

ye a kwei ba tega kam a pa nɔn-balwaaro.

A yɔɔre a lage a tɔge veira baŋa ne mo

a chɔge ba tega kam de kolo maama na wo ka wone to.

Amo Baŋa Wɛ mo tage konto.

13Yuu-tu Baŋa Wɛ ta na tage tei to mo tento:

A lage a chɔge ba jwona yam mo,

ye a pa se ya nyenyero telo na wo Memfisi ne to jei.

Ejipti teo kom daa bá taa jege pwa.

A maa wó pa foone zo ko nɔɔna bam maama.

14Amo wó pa se Paforosi taa ye yɔɔ yerane,

ye a pa se mini zwɛ Zoan teo kom.

A nam ta wó waare Tebesi de.

15A yɔɔre a lage a lwo a ban-lom dem Pelusi baŋa ne mo,

ko na ye Ejipti dam jei sem to ŋwaane.

A ta wó go Tebesi jar-keira bam maama.

16A lage a pa mini mo ja Ejipti teo kom,

ye Pelusi tiina bam wó taa wowole de cham.

Tebesi teo kabiri sem lage se chɔge mo.

Foone maa wó tiini de ja Memfisi tiina dɛ maama wone.

17Ona#30:17 Ona = Heliopolis, de Pi-besefa#30:17 Pi-besefa = Bubastis nɔn-donno maama wó te jara wone.

Ba maa wó ja teene dem konto nɔɔna#30:17 nɔɔna naa kaana bam ba vo sa-teo yiga yiga.

18Wea maŋa ne Tapanahesi teo kom wó ji lim yerane,

ne a ná jaane Ejipti teo dam dem a ja a chɔge a yage.

Ba ya maa na teere kolo baŋa ne to maama wó ti.

Kunkwon-lilirru mo wó kwoli ba tega kam.

Ko ta ná ye Ejipti teene dem maama,

ba lage ba ja de nɔn-bia bam

ba vo sa-teo yiga yiga mo.

19Amo laam maa ná waare Ejipti teo kom a ti,

ba wó lɔre we amo mo ye Baŋa Wɛ wom.’ ”

20Bena fuga-dedoa bene dem boboa chana kam da yarepɛ dɛ dem ne, mo Baŋa Wɛ kwora yi amo we:

21“Nabiinu, amo jaane Ejipti pa-faro wom jeŋa mo a bwori. Nɔɔn-nɔɔno nam wo vɔge gare-zɔŋɔ se o kwei-ka o de ko wone. Ko laam ma pa se o jeŋa kam wo twoŋi se ka taa dana se ka wane se-zɔɔ ka zeeri. 22Yuu-tu Baŋa Wɛ nam na tage tei to mo tento: Amo dwoni de Ejipti teo pa-faro wom mo. A yɔɔre a lage a bwori o je sem maama mo, ne ko ná ye o je-laao kom de je-bubwora kam maama. Konto to, o se-zɔɔ kom wó lwei ko to tega ne. 23A nam ta lage a pa Ejipti tiina bam mo jage ba vo yiga yiga se a yage-ba logo baŋa teene dem maama wone. 24A maa wó pa Babilon teo pɛ na dam ye a kwei a se-zɔɔ a ke o jeŋa ne. A laam maa wó bwori Ejipti pa-faro wom vɔna, se o taa vuvuni de cham Babilon pɛ wom yiga ne, ne wolo na nɛ zonne ye o lage o te to. 25Chega to, a wó pa Babilon teo pɛ je sem na dam. Se ko ná ye Ejipti pa-faro wom, o vɔna lage ya to tega ne mo vareba. Ba laam maa wó lɔre we amo mo ye Baŋa Wɛ, ne a ná kwei a se-zɔɔ kom a ke Babilon pɛ wom jeŋa ne, se o de kwei-ko o ma o fugi Ejipti tiina bam. 26A nam wó seene a jage Ejipti tiina bam pa ba vo yiga yiga se a yage-ba logo baŋa teene dem maama wone. Konto baŋa ne ba wó lɔre we amo mo ye Baŋa Wɛ wom.”

Currently Selected:

Ezekeli 30: KBG

Highlight

Copy