MATEO 14

Bautizaj Juanda huañuchishcamanda

(Mar. 6:14-29; Luc. 9:7-9)

1Chai punllacunapica, Galilea llactata mandaj Herodes tetrarcami#14:1 tetrarca shutica chuscupi chaupishcamanda shujtaca paimi mandajun nijunmi, Jesús imata rurashpa purijujta uyarca. 2Shina uyashpami paipajta rurajcunataca, cashna nirca: “Paica, Bautizaj Juanmari canga. Huañushcacunamanda causarishca cashpami, chashna ninan ushaitaca charinga” nirca.

3Juandaca, Herodes japishpami cadenahuan huatashpa, prezuna huasipi churashca carca. Chashna rurachunga, paipaj huauqui Felipepaj huarmi Herodiasmi mañashca carca. 4Juanga: “Cambaj huauquipaj huarmihuan causanaca, napacha alichu” nishcami carca.

5Shinamandami Herodesca, Juanda huañuchingapa munarca. Ashtahuangarin: “Juanga profetami” nishpa gentecuna alicachishca cajpimi, manllashpa na huañuchi usharca. 6Herodespaj huacharishca huata chayashca cajpimi, cushijuita rurajurca. Herodías huarmipaj ushica, tucuicunapaj ñaupajpi tushujujpimi, Herodesca ninanda cushijushpa ricujurca. 7Shinamandami, Herodesca tucui imata mañashcatapash carashapachami nishpa juramenturca.

8Shina nijpimi chai cuitsaca paipaj mama yachachishcashna, Bautizaj Juanbaj umata caipillata, shuj platopi carahuai nishpa, Herodestaca mañarca.

9Shina mañajpimi, jatun mandajca ninanda llaquirirca. Ashtahuangarin, paihuan tiyanajujcuna uyajta juramentushca cashpami, mañashcata cugrichun cacharca. 10Shina cachashpami, prezuna huasipi Juanbaj umata fitigrichun mandarca.

11Juanbaj umata platopi apamushpami, chai cuitsaman cunajurca. Paica, paipaj mamamanmi curca.

12Chai jipami, Juanbaj yachajujcuna shamushpa, cuerpogutaca apashpa pambagrirca. Chai jipami, Jesusman tucuita villangapa rinajurca.

Picha huaranga runacunaman micuchun carashcamanda

(Mar. 6:30-44; Luc. 9:10-17; Juan 6:1-14)

13Shina uyashpami Jesusca canoapi tiyarishpa, gentecuna na causaj, jichushca pambaman rirca. Chashna rishcata uyashpami, gentecunaca pueblocunamanda llujshishpa, chaquilla catishpa rinajurca. 14Jesusca, canoamanda llujshijushpa, ashtaca gentecunata ricushpami, ninanda llaquishpa, huañujujcunatapash alichijurca. 15Ña tutayajujpimi, yachajujcunaca, Jesuspajman quimirishpa cashna ninajurca: “Ñamari tutayan. Cai pushtuca, jichushca pambami. Cai tucui gentecunaca, uchilla pueblocunaman rishpa, imatapash randishpa micunajuchun, ‘cayacaman’ nishpa cachapailla” ninajurcami.

16Shina nijpimi, Jesusca: “Paicunaca na ringachu. Cangunallata micunata caraichilla” nirca.

17Shina nijpimi, Paipaj yachajujcunaca: “Ñucanchica, picha tandaguta, ishcai pijigutallami charipanchi” ninajurca.

18Shina nijpimi, Jesusca: “Chaigutallapash caiman apamuichi” nirca.

19Shina nishpallami gentecunataca: “Cai jihua pambapi samaichi” nishpa mandarca. Jesusca, picha tandaguta, ishcai pijiguta japishpami, jahua pachata ricushpa, Diosta pashi nirca. Chai tandacunata chaupishpami, Paipaj yachajujcunaman cujpi paicunaca, tucuicunaman caranajurca. 20Shina carajpimi tucuicunallata, na munangacaman micurca. Paicuna na micui ushashcataca, chunga ishcai canasta jundatami tandachinajurca. 21Chaipi micushpa tiyanajujcunaca, jaricunallami picha huarangashna carca. Huarmicunata, huahuacunatacarin na yupashcachu carca.

Yacu jahuata Jesús purijushcamanda

(Mar. 6:45-52; Juan 6:15-21)

22Chai jipami, Jesusca Paipaj yachajujcunata canoapi tiyachishpa cuchata chimbachun, ñaupachishpa cacharca. Shina cachashpallami Jesusca, chai tucui gentecunata “cayacaman” nirca. 23Ña tucuicunata “cayacaman” nishpallami, Diosta mañangapa Pailla urcuman vichai rirca. Ña tutayashcapimi Jesusca, Pailla tiyajurca. 24Paipaj yachajujcunaca, ña chaupi cuchata canoapi rinajujpimi, ninan huaira jatarishpa, yacuta caiman chaiman shitajurca. 25Ña punllayanallapimi Jesusca, yacu jahuata purishpa, paicunapajman shamujurca. 26Yacu jahuata Jesús shamujujta ricushpami, Paipaj yachajujcunaca ninanda manllarishpa: “¡Ayamari shamujun!” nishpa, ninanda caparinajurca.

27Ashtahuangarin Jesusca, paicunata uchalla rimashpami: “¡Shinlli tucuichi, Ñucami cani, na manllarinachu canguichi!” nirca. 28Shina nijpimi, Pedroca:

“Apunchi Jesús, Can cashpaca yacu jahuata purishpa, Canda tuparichun cayahuai” nirca.

29Shina nijpimi, Jesusca:

“Shamuilla” nirca.

Shina nijpimi Pedroca, canoamanda uriajushpa, Jesusta tuparingapa yacu jahuata purishpa rijurca. 30Ashtahuangarin, ninan huaira jatarimujta ricushpami, manllarirca. Ña asha asha yacuman huashajujushpami:

“¡Apunchi Jesús, quishpichihuaiyari!” nishpa, ninanda caparirca.

31Shina caparijhuanmi Jesusca, uchashpa Pedrota maquimanda japishpa:

“¡Na tucui shunguhuan crij! ¿Imashpata na ali crircangui?” nirca.

32Paicuna canoapi tiyarijpica, huairapash chulunlla saquirircallami. 33Shina tucujpimi, canoapi tiyanajuj Paipaj yachajujcunaca, Jesuspaj ñaupajpi ninanda alicachishpa:

“Canga, Taita Diospaj churipachami capangui” ninajurca.

Genesaret pueblopimi Jesusca huañujujcunata alichishca

(Mar. 6:53-56)

34Chai cuchata chimbashpaca, Genesaret pueblomanmi paicunaca chayamurca. 35Chaipi causanajuj gentecuna Jesusta rijsishpami, chai muyundipi causajcunaman tucuicuna yachachun, villachun cacharca. Shina cachajpimi, tucuilla huañunajuj gentecunataca Jesuspajman apamunajurca. 36Paicunaca: “Cambaj churajushca pundagupillapash tacarichun saquihuai” ninajurcami. Jesús churajushcapi tacarijcunaca, tucuillami ali tucurca.

Currently Selected:

MATEO 14: QVI16

Highlight

Copy