MATEO 15

Runapaj shunguta imalla mapayachij cashcamanda

(Mar. 7:1-23)

1Chai jipaca Jerusalenmanda huaquin fariseocuna, mandashca Shimita yachachijcuna Jesuspajman shamushpami cashna ninajurca:

2“¿Imashpata cambaj yachajujcunaca, ñaupa taitacuna yachachishpa saquishcataca na cazunajun? Paicunaca, maquitapash na maillashpami tandata micunajun” ninajurcami.

3Shina nijpimi Jesusca cashna nirca:

“¿Imashpata cangunaca, Taita Dios mandashcataca na cazushpa, cangunapaj ñaupa taitacuna yachachishcatara catinajunguichi? 4Taita Diosca, cashna nishpami mandarca: ‘Cambaj taitata, cambaj mamataca, alicachishpa cazungui. Taitata, mamata fiñashpa na ali shimicunata rimajtaca, llaquitapash na llaquishpami huañuchina’ nircami. 5Ashtahuangarin cangunaca, cashnami ninajunguichi: Maijan cashpapash cambaj Taitata, cambaj mamataca: ‘Tucui ima tiyashcatapash Taita Diosman carangapallami charini, cangunaman caraitaca na ushanichu’ ninajunguichimi. 6Chashna nishpami, paicunapaj taitata, paicunapaj mamataca na yarishpa causanajun. Chashnami, Taita Dios mandashcataca yangapi churashpa, cangunapaj ñaupa taitacuna yachachishcatara catinajunguichi. 7Mishqui shimi, jayaj shungucunami canguichi. Canguna cashna tucuna cajpillatami, Profeta Isaiasca cashna villajurca:

8‘Cai gentecunaca, shimihuanllami ninanda alicachihuan.

Ashtahuangarin paicunapaj shunguca, ñucamandaca carupimi.

9Ñucataca yangallatami alicachinajun.

Ashtahuangarin gentecuna mandashcatallami,

ñuca yachachishcatashna yachachinajun’ nishpami villarca” nijurcami.

10Shina nishpallami, chai tucui gentecunata cayashpa Jesusca cashna nirca:

“Ñuca villashcataca, aliguta uyashpa yuyaipi japinguichi. 11‘Shimita ima yaicushpaca na mapayachinllu. Ashtahuangarin, shimihuan ima na alita rimashcami, gentecunataca mapayachijun’” nircami.

12Shina nijpimi, Paipaj yachajujcunaca Jesuspajman quimirishpa cashna ninajurca:

“Can chashna yachachijujta uyashpa, fariseocuna ninanda fiñarijtaca, ¿nachu yacharcangui?” ninajurcami.

13Shina nijpimi Jesusca cashna nirca:

“Jahua pachapi tiyajuj Ñuca Taita na tarpushca yuracunataca, tucuillatami sapimanda llujchishpa shitanga. 14Saquichilla, paicunaca shuj ñausa runata ñausallata pushashpa rijujshnami. Shuj ñausa runata ñausallata pushashpa rijushpaca, ishcandimi utujupi huashajunga” nircami.

15Shina nijpimi Pedroca cashna nirca:

“Yarichina shimicunahuan yachachishcataca, ñucanchiman aliguta yachachihuailla” nirca.

16Shina nijpimi Jesusca cashna nirca:

“¿Cangunapashchu, nara yuyaipi japinguichi? 17¿Nachu shimita ima yaicushpapash, vijsaman rishpa, uraiman llujshinlla? 18Ashtahuangarin na ali shimicunata rimanaca, shungumandami llujshimun. Chaimi runataca mapayachin. 19Na alita rurana yuyaicuna shungumanda llujshijpimi: Huañuchinajun, cazarashca jahua shujcunahuan causanajun, huainayanajun, shuhuanajun, llullanajun, imatapash na alitalla rimanajun. 20Chaicunami runataca mapayachin. Ashtahuangarin, maquita na maillashpa micushcamandaca, runaca na mapayanllu” nircami.

Canaán llactamanda alipacha crij huarmimanda

(Mar. 7:24-30)

21Chai llactamanda llujshishpa rijushpaca, Tiro, Sidón llactacunamanmi Jesusca chayarca. 22Chaipimi, Canaán llactamanda huarmica, Jesusta cashna nishpa caparimurca:

“¡Ñaupa taita Davidpaj Churi, ñucata llaquihuaiyari! Ñuca ushigumi, shuj aya ninanda llaquichijpi causajun” nircami.

23Shina nijujpipash Jesusca, upalla uyarcallami. Ashtahuangarin Jesuspaj yachajujcuna quimirimushpami:

“Chai huarmica, ñucanchitamari caparishpa catimujun, imagutallapash nishpa tigrachipayari” ninajurca.

24Shina nijpimi Jesusca:

“Llamashna chingashca Israel gentecunapajmanllami, Ñucataca cachamuhuarca” nirca.

25Ashtahuangarin chai huarmica, Jesuspaj ñaupajpi cungurishpami:

“¡Ñucata yanapahuayari, Apunchi Jesús!” nirca.

26Shina nijpimi Jesusca:

“Huahuacuna micunajuj tandata quichushpa, alcucunaman shitanaca na alichu” nirca.

27Shina nijpimi chai huarmica cashna nirca:

“Chashnapachamari capan Apunchi Jesús. Shina cajpipash huahuacuna micunajushpa jichashcataca, alcucunapash micupanllamari” nirca.

28Shina nijpimi Jesusca cashna nirca:

“Huarmigulla, canga alipacha crijmi cangui. Can munashcashnalla, ali tucuchun ninimi” nirca.

Shina cajpimi paipaj ushiguca, ñapash ali tucushca carca.

Ashtacacunata Jesús jambishcamanda

29Jesusca, chai llactamanda llujshishpa rijushpaca, Galilea cucha manñaman chayashpami, urcuman vichai rishpa chaipi tiyarirca. 30Chaipi tiyajujpimi, ashtaca gentecuna Paipajman chayamunajurca. Paicunaca, jangacunata, ñausacunata, na rimai ushajcunata, maqui illajcunata, huañunajuj ashtahuan shuj gentecunatapash, ashtacacunata apamushpa, Jesuspaj ñaupajpi churajpimi, Paica alichijurca. 31Shina alichijpica, na rimai ushajcunapash rimarcallami, maqui illajcunapash ali tucurcallami. Jangacunapash purircallami, ñausacunapash ricurcallami. Chaimandami gentecunaca ninanda manllarishpa, Israelcunapaj Taita Diostaca ninanda alicachinajurca.

Chuscu huaranga runacunaman micuchun carashcamanda

(Mar. 8:1-10)

32Chai jipami, Paipaj yachajujcunata cayashpa Jesusca cashna nirca:

“Cai tucui gentecuna ña quimsa punllata ñucahuan cashpa, ima micunapash illaj cajpimi, ninanda llaquini. Paicunaman na micuchishpa yarjaita tigrachingapaca na munanichu. Na micuchishpa yarjaita cachajpica, chaupi ñambillami na ri ushashpa shitarinajunga” nircami.

33Shina nijpimi, Paipaj yachajujcunaca:

“Cai tucui gentecunaman micuchun carangapaca, cai jichushca pambapica, ¿maipita ashtaca tandata tarishunyari?” ninajurca.

34Shina ninajujpimi Jesusca:

“Cangunaca, ¿mashna tandatata charinguichi?” nishpa tapurca.

Shina tapujpimi:

“Canchis tandata, huaquin pijitallami charinchi” ninajurca.

35Shina nijpimi Jesusca, chai tucui gentecunata: “Alpapi tiyarishpa samachi” nirca. 36Chaipimi, chai canchis tandatapash, pijicunatapash japishpa, Diosta pashi nishpa mañarca. Shina mañashpami, chaicunataca chaupishpa, Paipaj yachajujcunaman cujpi paicunaca, chai tucuicunaman caranajurca. 37Shina carajpimi gentecunaca, na munangacaman micurca. Paicuna na micui ushashcataca, canchis canasta jundatami, Paipaj yachajujcunaca tandachirca. 38Chaipi micushpa tiyanajujcunaca, jaricunalla chuscu huarangashnami carca. Huarmicunata, huahuacunatacarin na yupashcachu carca. 39Chai jipaca, gentecunata “cayacaman” nishpami, Jesusca barcopi tiyarishpa, Magdala puebloman rirca.

Currently Selected:

MATEO 15: QVI16

Highlight

Copy