MATEO 13

Tarpuj runamanda yarichispa yachachishcami

(Mar. 4:1-9; Luc. 8:4-8)

1Jesusca, chai punllallata huasimanda llujshishpami cucha manñapi tiyarirca. 2Chaipi ashtaca gentecuna tandanajujpimi, Jesusca canoapi yaicushpa tiyajurca. Gentecunaca cucha manñapimi shayanajurca. 3Paicunamanmi, imahuambash yarichishpa cashna yachachijurca: “Ricuichi, shuj tarpuj runami tarpungapa rirca. 4Shina tarpujujpica, huaquin muyuca ñan manñaman rijpimi, alasyu animalcuna shamushpa micurca. 5Shinallata huaquin muyuca, alpa ashalla tiyaj, rumilla, na jundu alpapi urmashpa ñapash viñajpimi, 6indi llujshimushpa chaquichirca. Sapita na charishcamandami chashna chaquirca. 7Shinallata huaquin muyuca, casha chaupipimi urmarca. Cashacuna yalishpa viñashpami llapishpa ismuchirca. 8Ashtahuangarin huaquin muyuca, ali alpapi urmashpami sumajta fucurca. Huaquinga shujmandalla patsajta, huaquinga sucta chungata, huaquinga quimsa chungatami granoshpa fucurca. 9Uyangapa rinrita charishpaca, aliguta uyaichi” nijurcami.

Imapa chashna yarichishpa yachachishcatami villajun

(Mar. 4:10-12; Luc. 8:9-10)

10Chai jipami Paipaj yachajujcunaca, Jesuspajman quimirimushpa cashna nishpa tapunajurca:

“¿Imashpata imahuambash yarichishpa yachachijungui?” ninajurcami.

11Shina tapujpimi Jesusca cashna nirca:

“Jahua pachamanda Dios mandajujpi imashna canata, pipash na yachai ushanatami cangunamanlla yachachishca. Ashtahuangarin, caishuj gentecunamanga na yachachishachu. 12Maijan charijmanga, ashtahuan carajpimi, ashtahuan charinga. Ashtahuangarin, maijan na charijtaca, ashagutalla charishcatapashmi quichunga. 13Shinamandami, imahuambash yarichishpa yachachijuni. Paicunaca, ricushpapash na ricunajunllu, uyashpapash na uyanajunllu, yuyaipipash na japinajunllu. 14Shinamandami, profeta Isaías villashcapash paicunapi pactashca. Paica cashnami nishca:

‘Uyaitaca uyashpapash, yuyaipi na japishpami causanguichi.

Ricuitaca ricushpapash, napacha ricushcashnami causanguichi.

15Cai gentecunapaj shunguca, ninanda shinlliyashcami.

Uyashpapash, na ali uyanajunllu.

Ama ricungapami, ñavitapash vichashca causanajun.

Rinripash ama uyachun, shungupipash yuyaita ama japichun,

ñucapajmambash ama tigrarichun,

ñucapash ama paicunata alichijuchunmi, chashna tucushca’ nircami.

16Ashtahuangarin cangunaca, ñavipash ricujushcamanda, rinripash uyajushcamandaca ninanda cushijuichi. 17Na llullashpami cangunataca cashna nini: Tauca profetacunapash, alitalla rurashpa causajcunapash, canguna ricunajujta ricungapa munashpapash na ricurcachu. Shinallata, canguna uyanajujta uyangapa munashpapash na uyarcachu.

Tarpuj runamanda yarichishpa yachachishca ima cashcatami Jesusca villashca

(Mar. 4:13-20; Luc. 8:11-15)

18Tarpuj runamanda yarichishpa cangunaman yachachishcataca aliguta uyahuaichi. 19Dios mandajujmanda villajuj shimita uyashpapash, huaquingunaca na yuyaipi japinllu. Paipaj shungupi tarpushcata, diablo shamushpa cungachijpica, ñan manñapi urmashca muyushnami tucun. 20Rumilla alpapi tarpushca muyushna cashpaca, Diospaj Shimita villajpi uyashpapash, ashacamanllami cushijushpa chasquin. 21Paica, sapita na charij yurashna cashpami, ashacamanlla catin. Shina cashpami llaquicuna japijpi, na cashpaca Diospaj Shimita catijujpi catiriyashpa llaquichijpica, nitijajshna pandanajun. 22Casha chaupipi tarpushca muyushna cashpaca, Diospaj Shimita villajpi, aliguta uyashpapash, cai causaipilla ashtahuan ninanda charingapa munashpa musparishpami pandachi tucun. Chai tucui munaicuna Diospaj Shimita cungachijpimi, grano na ali fucujshna tucun. 23Ashtahuangarin, ali alpapi tarpushca muyushna cashpaca, Diospaj Shimita uyashpa ali yuyaita japishpami, aliguta fucujshna mirachijun. Huaquingunaca, shujlla muyumanda patsajta, shujcunaca sucta chungata, shujcunaca quimsa chungata fucunshnami mirachin” nircami.

Trigohuan, balicuhuan chimbapurashpami yachachishca

24Jesusca, cutinmi yarichina shimicunahuan cashna yachachijurca:

“Jahua pachamanda Dios mandajujca, shuj runa paipaj alpapi ali muyuta tarpushcashnami. 25Ashtahuangarin, tucuilla puñunajujpimi, paita fiñaj runa shamushpa trigo pambapi, balicu muyuta tarpushpa rirca. 26Trigo ña viñashpa grano llujshijpimi, balicupash chapurishca ricurirca. 27Chaita ricushpami, huasiyuj taitapajta ruraj runacuna shamushpaca, cashna tapurca: ‘Taitalla, cambaj alpapica ¿nachu ali muyuta tarpurcangui? ¿Maimandata balicupash tiyanga?’ nishpami tapunajurca. 28Shina tapujpimi paica: ‘Ñucata fiñaj runami, chashna rurashca’ nirca. Shina nijpimi, chai runacunaca: ‘¿Chai balicuta sapimanda pilashpa shitagrichun munanguichu?’ nishpa tapunajurca. 29Shina tapujpimi, paica: ‘Balicu jihuata pilashpaca, trigondimi llujchinguichi, saquipaichilla. 30Tandachina punllacaman ishcandillata viñachun saquipaichilla. Chai punllapimi, tandachij runacunataca: Balicutara tandachishpa, rupachingapa asha asha huatapaichi. Trigotaca, ñuca huasipi alichipaichi’ nisha” nircami.

Mostaza muyumanda yarichishpami yachachishca

(Mar. 4:30-32; Luc. 13:18-19)

31Cutinmi cashna chimbapurashpa yachachijurca: “Jahua pachamanda Dios mandajujca, shuj runa paipaj alpapi mostaza muyuta japishpa tarpushcashnami. 32Chai muyuca, tucui muyucunatapash yali jamzi jamzipachami. Ashtahuangarin, chai muyu viñashpaca, micuna jihuatapash yalishpa viñashpami, jatun yura tucun. Chai yurapaj malquicunapimi, alasyu animalcunaca tazinda rurashpa causanajun” nircami.

Levaduramanda yarichishpami yachachishca

(Luc. 13:20-21)

33Cutin shuj yarichina shimicunahuanmi cashna yachachijurca: “Shuj huarmica, quimsa batea junda jacupi levadurata chapushpami, tucuilla masa punguingacaman pacashpa saquin. Jahua pachamanda Dios mandajujca, chashnapachami” nircami.

Yarichishpa yachachishcacunaca, imapa cashcatami villajun

(Mar. 4:33-34)

34Jesusca, cai tucuicunatami yarichina shimicunahuan gentecunaman yachachijurca. Imata yachachishpapash, yarichishpa yachachinahuanllami yachachijurca. 35Profeta cashna nishpa villashca pactachunmi, chashna tucurca. Paica:

“Yarichishpa yachachingapami ñuca shimitaca pascasha.

Cai pachata Dios churashcamandapacha,

pipash na yachashcatami villasha” nircami.

Balicu jihuamanda yarichishpa yachachishcatami, Jesusca villashca

36Gentecunata, “cayacaman” nishpami Jesusca huasiman yaicurca. Chaipimi, paipaj yachajujcunaca, Jesuspajman quimirishpa cashna ninajurca:

“Pambapi balicu jihuahuan, yarichishpa yachachishca ima cajta aliguta villayari” ninajurcami.

37Shina ninajujpimi Jesusca, cashna nirca:

“Runa Aichayuj tucushca Ñucami, ali muyuta tarpuj cani. 38Cai pachapi causajcunaca, tarpuna pambashnami. Ali muyuca, Dios mandajpi causanajuj huahuacunami. Ashtahuangarin diablopaj huahuacunaca, balicu jihuashnami. 39Balicuta tarpuj chai fiñaj runaca diablomi. Cai pacha tucurimui punllami, cosechai punllashna canga. Cosechajcunaca, angelcunami canga. 40Imashnami balicu jihuata pilashpa ninapi rupachin, chashnallatami cai pacha tucurimui punllapipash ruranga. 41Runa Aichayuj tucushca Ñucami, Ñuca angelcunata cachamusha. Paicunami, nitijachijshna juchata rurachijcunatapash, na alita rurajcunatapash, Ñuca mandajujmandaca tucuilla tandachishpa anchuchinga. 42Shina tandachishpami chai gentecunataca, na huañushpa rupajuj hornopi shitanga. Chaipimi huacashpa, quirutapash canirinajunga. 43Ashtahuangarin, alitalla rurashpa causajcunaca, paicunapaj Taita mandajuj llactapimi, indishna punchapamba causanga. Uyangapa rinrita charishpaca aliguta uyaichi.

Alpa ucupi curi culquita pacashcamanda

44Jahua pachamanda Dios mandajujca, alpa ucupi curi culquita pacashcashnami. Chai curi culquita shuj runa tarishpaca, chaipillatami ashtahuan pacashpa saquin. Chai runaca, ninanda cushijushpa rishpami, pai imata charishcatapash tucuilla jatushpa chai alpataca randin.

Perlahuan chimbapurashpa parlashcamanda

45Shinallata, jahua pachamanda Dios mandajujca, juyailla perlacunata randishpa jatuj runashnami. 46Shuj juyailla perlata ricushpaca, pai imata charishcatapash tucuilla jatushpami, chai perlataca randin.

Pijita japina linllimanda

47Shinallata, jahua pachamanda Dios mandajujca, tucui tiyashca pijicunata mama cuchapi japigrina linllishnami. 48Linllipi pijicuna jundajpica, manñaman llujchishpami, pijita japijcunaca tiyarishpa, alitaca agllashpa canastacunapi churan. Na alicunataca, shitashpami saquin. 49Chashnallatami, cai pacha tucurimui punllapipash canga. Angelcuna shamushpami, na ali gentecunataca, alitalla rurashpa causajcunapaj chaupimanda anchuchinga. 50Chai na alicunataca, na huañushpa rupajuj nina hornopimi shitanga. Chaipimi huacashpa, quirutapash canirinajunga” nircami.

Curi culquimanda

51Jesusca, cashnami tapurca:

“Tucui caicunataca, ¿ñachu yuyaipi japircanguichi?” nircami.

Shina nijpimi paicunaca:

“Ari, Apunchi Jesús” ninajurca.

52Shina nijpimi Jesusca, cashna nirca:

“Jahua pachamanda Dios mandajujmanda, alipacha yachajushpa, mandashca shimicunata yachachij runaca, curi culquita huasiyuj taita huacaichishpa charishcata, mushujtapash, maucatapash llujchijshnami” nircami.

Jesús Nazaret pueblopi cashcamanda

(Mar. 6:1-6; Luc. 4:16-30)

53Cai yarichina shimicunahuan yachachishca jipami, Jesusca llujshishpa rirca. 54Paipaj llactaman chayamushpami, paicunapaj sinagogapi Jesusca yachachijurca. Shina yachachijujpimi, gentecunaca ninanda manllarishpa, cashna ninajurca:

“Cai runaca, ¿maipita alipacha yachajushpa, pipash na rurai ushanallacunata ruranatapash yachajushcanga? 55¿Nachu cai runaca, caspicunahuan imatapash ruraj runapaj churi? ¿Nachu paipaj mamaca María shuti? ¿Nachu paica Jacobopaj, Josepaj, Simonbaj, Judaspaj huauqui? 56¿Nachu paipaj panicunapash, caipi ñucanchihuanllata? Paica, ¿maipita cashnapacha cai tucuitaca yachajushcanga?” ninajurcami.

57Chashna nishpami, Jesusta na crishpa maitapash nishpa pandarinajurca. Ashtahuangarin Jesusca, paicunataca cashnami nirca:

“Profetataca, shuj llactacunapirami alicachishpa chasquin. Ashtahuangarin, paipaj llactapi, paipaj huasipi causajcunaca, na chasquinllu” nircami.

58Chai gentecuna, Paita na crishcamandami, pipash na rurai ushanallacunataca chaipica na ashtahuan rurarca.

Currently Selected:

MATEO 13: QVI16

Highlight

Copy