MATEO 12

Jesuspaj yachajujcunaca, samana punllapimi trigo umata fitinajushca

(Mar. 2:23-28; Luc. 6:1-5)

1Jesusca, samana punllapimi trigo pambata yalijurca. Paipaj yachajujcunaca, ninanda yarjachishpami, trigo umata fitishpa micui callarinajurca. 2Chaita ricushpami fariseocunaca, cashna ninajurca:

“Ricui: ‘Samana punllapica, na chashna ruranachu’ nishpa mandashcata na cazushpami, Cambaj yachajujcunaca chashna ruranajun” ninajurcami.

3Ashtahuangarin Jesusca, cashnami nijurca:

“Jatun mandaj David, paihuan purijcunandi ninanda yarjachinajushpa imatalla rurashcataca, ¿nachu quilca catishcanguichi? 4Paicunaca yarjachishpami, Taita Diospaj huasiman yaicushpa, Diosman carashca tandacunataca micunajurca. Chaitaca, mandashca shimipi nijujshnaca, Davidpash, paihuan purijcunapash na micui ushanachu carca. Chaitaca, sacerdotecunallami micui ushana carca. 5Mandashca shimipica: Samana punllapi, Diospaj huasi ucupi, sacerdotecuna imata rurashpapash, na juchayu tucunllu, nijujtaca ¿nachu quilca catishcanguichi? 6Cangunataca cashnami nini: Diospaj huasitapash ashtahuan yali Jatunmi caipi. 7‘Shujcunata llaquishpa causachunmi munani, animalcunata cushpa huañuchinajuchunga na munanichu’ nishcata yachashpaca na yangata pitapash llaquichinguichimanllu. 8Runa Aichayuj tucushca Ñucami, samana punllatapash mandaj cani” nijurcami.

Maqui chaquishca runatami, Jesusca alichishca

(Mar. 3:1-6; Luc. 6:6-11)

9Chaimanda yalishpaca, paicunapaj sinagogamanmi shamurca. 10Chaipimi, shuj maqui chaquishca runapash tiyajurca. Chaipica, Jesusta juchachingapami cashna nishpa tapunajurca:

“Huañujuj runata, samana punllapi alichinaca ¿alichu canga?” ninajurcami.

11Shina nijpimi Jesusca, cashna nirca:

“Cangunapurapi maijambash shuj llamagutami charinguichiman, chai llamagu utujupi huashajujpica ¿samana punlla cajpipash nachu llujchinguichinman? 12¡Shuj runacarin, shuj llamagutapash yalimari! Samana punlla cajpipash, alita ruranaca alimi” nircami.

13Jesusca cashna nishpallami, chai huañujuj runataca:

“Maquita chutai” nirca.

Shina nijpi maquita chutajpica caishuj maquishnallatami ali tucurca. 14Chai ucumanda fariseocuna llujshishpaca, Jesusta huañuchingapami tandanajushpa parlanajurca.

Dios agllashca runamandami villajun

15Chaita yachashpami Jesusca, chaimanda llujshishpa rirca. Ashtaca gentecuna catinajujpimi, tucuilla huañujujcunatapash alichijurca. 16Pai chashna alichishcataca, pimambash na villanachu canguichi nishpami, shinllitapacha rimashpa mingarca.

17Profeta Isaías cashna nishpa villashca pactachunmi, chashna tucurca. Paica:

18“Ñucapajta ruraj, Ñuca agllashca runataca, Ñucami shinllichisha.

Paihuanmi, Ñucaca ninanda cushijusha.

Ñuca Espiritutaca, Paipimi churarcani.

Paimi, alitalla ruranataca, llactacunaman apamunga.

19Paica, na caparijungachu, na shinllita rimajungachu.

Pai rimashcapash, na ñangunapi uyarijungachu.

20Faquirinalla sucustapash, na faquingachu.

Huañunalla rupajuj michatapash, na huañuchingachu.

Ashtahuangarin na llullashpa, alitallami ruranga.

21Paica, cai pachapica alitalla rurana tiyangacamanmi, tucuita pactachijunga.

Mama cucha manñacunapi causajcunapash, pai mandashcatami shuyanajunga” nircami.

Diospaj Espiritutami, na ali shimicunata rimashca

(Mar. 3:20-30; Luc. 11:14-23)

22Chai jipami, aya jundashca, ñausa, na rimai ushaj runata, Jesuspajman apamujpi Paica alichirca. Shina rurajpimi chai runaca, ricuitapash, rimaitapash usharca. 23Chashna rurajpimi, tucui gentecuna ninanda manllarishpa, cashna ninajurca:

“¿Cai runaca, Davidpaj Churichu, imashi?” ninajurcami.

24Ashtahuangarin fariseocunaca chaita uyashpami, cashna ninajurca:

“Cai runaca, ayacunata mandaj Beelzebupaj ushaihuanmi, ayacunataca llujchishpa cachajun” ninajurcami.

25Paicuna chashna yarinajujta Jesús yachashpami, cashna nirca:

“Mandajpura fiñanajushpa shicanyarijpica, chai llactaca llaquinayaitami tucurinman. Shinallata, pueblopi causajcuna cashpa, huasi ucupuracuna cashpapash fiñanajushpaca, shicanyarishpami tucurinman. 26Satanasllata, Satanasta llujchishpa cachajushpaca, paicunapura fiñanajushpa shicanyarishcami canman. Chashna cashpaca, ¿imashnata paica mandashpa catingayari? 27Beelzebupaj ushaihuan ayacunata, Ñuca llujchishpa cachajujpica, ¿pipaj ushaihuanda cangunapaj yachajujcunaca, ayacunata llujchishpa cachanajun? Shinamandami, cangunapaj yachajujcunallata cangunapaj juezcuna tucunga. 28Ashtahuangarin, Taita Diospaj Espirituta carajpi, ayacunata Ñuca llujchijushpaca, Taita Dios mandana cangunapajman pactamushcatami ricuchijuni.

29Shuj ninan shinlli runapaj huasiman shuhuangapa yaicushpa, chai runata nara huatashpaca ¿imashnata shuhuaita ushangayari? Paita huatashpallami, ima charishcatapash tucuilla shuhuai ushanga.

30Maijambash na Ñucahuan cashpaca, Ñucata fiñajmi. Maijambash na Ñucahuan tandachishpaca, calpachitarami calpachin.

31Chaimi cangunataca, cashna nini: Runacuna ima juchata rurashcatapash, ima na ali shimicunata rimashcatapash perdonangami. Ashtahuangarin, Diospaj Espirituta na ali shimicunata rimashcataca, napacha perdonangachu. 32Maijan cashpapash, Runa Aichayuj tucushca Ñucata na alicachishpa rimashcatapash perdonangami. Ashtahuangarin, jucha illaj Diospaj Espirituta ninanda na alicachishpa rimashcataca, cai causaipipash, jipa causaipipash napacha perdonangachu.

33Yurata ali viñachijpica, alimi fucunga, yurata na ali viñachijpica na ali fucungachu. Fucujta ricushpami, imashna yura cajtapash rijsi ushanchi. 34¡Culebrashna na ali miraicunamari canguichi! Cangunallata na alicuna cashpaca, ¿imashnata alita rimaitaca ushanguichiyari? Imata rimachumbash shungupi ninanda yarichijujpimi, shimica riman. 35Ali causaj runaca, paipaj shungupi alicunata yarichijpimi, imatapash aliguta riman. Ashtahuangarin na ali runaca, paipaj shungupi na alicunata yarichijpimi, na ali shimicunatalla riman. 36Ashtahuangarin cangunataca, Ñucami cashna nini: Gentecuna na alita yarishpa yangata rimashpa causashpaca, Dios llaquichijui punllapimi japi tucunga. 37Can alita rimashcamandami, alicachi tucungui, na cashpaca ninanda llaquichi tucunguimi” nircami.

Jatun na ali miraicunaca, imatapash rurashpa ricuchijuchunmi munashca

(Mar. 8:12; Luc. 11:29-32)

38Chai jipami, mandashca Shimita yachachijcunapash, fariseocunapash cashna ninajurca:

“Yachachij, pipash na rurai ushashcata rurajta ricungapami munanchi” ninajurcami.

39Shina nijpimi Jesusca, cashna nirca:

“Cunan cai na ali miraicunaca, cazarashca jahua shujcunahuan causajcuna cashpami pipash na rurai ushashcata rurajta ricungapa mañanajun. Shina cashpami, pipash na rurai ushashcata rurajta ricungapa munashpapash napacha ricunga. Ashtahuangarin, profeta Jonás ima tucushcatallami ricunga. 40Jonasca, quimsa punlla, quimsa tutatami, jatun pijipaj vijsa ucupi tiyajurca. Shinallatami, Runa Aichayuj tucushca Ñucapash, quimsa punlla, quimsa tutata, alpa ucupi pambashca casha. 41Nínive pueblopi causajcunaca, Jonás villajpimi ninanda llaquirishpa Diospajman tigrarirca. Dios llaquichijui punllapimi, Nínive pueblopi causashca gentecunaca, cunan miraicunataca: ‘Ninanda llaquichi tucunapachami canguichi’ nishpa jataringa. Ñucami, Jonastapash yali caipi cani. 42Alipacha yachaihuan Salomón yachachijujta uyangapaca, Sabá shuti llactata jatun mandaj huarmimi, caru llactamanda shamurca. Chai huarmimi, Dios llaquichijui punllapica, cunan miraicunataca: ‘Ninanda llaquichi tucunapachami canguichi’ ningapa jataringa. Ñucami, Salomondapash yali caipi cani.

Ayata llujchijpipash cutin tigranllami

(Luc. 11:24-26)

43Mapata rurachij aya shuj runamanda llujshishpaca, chaquishca pambacunapi samangapa mascashpa purijushpapash na tarinllu. 44Chashna cashpami paica cashna nin: ‘Ñuca maipi causajushca huasimanllata tigrashalla’ nishpami tigran. Shina tigrashpaca aliguta fichashca, juyailla alichishca, chushaj huasitami tarin. 45Chashna tarishpaca, chai ayaca paitapash yali ashtahuan millai ayacunata, canchispurata pushangapami rin. Chai ayacunaca, chai runapi yaicushpaca, punda causajushcatapash yali na alimanmi tigrachin. Chashnallatami cunan na ali miraicunaca, ashtahuan na aliman tigranga” nircami.

Jesuspaj mamapash, huauquicunapash shamushcamanda

(Mar. 3:31-35; Luc. 8:19-21)

46Chai gentecunaman Jesús villajujpillatami, Paipaj mamapash, huauquicunapash, Paihuan parlangapa munashpa canllapi shuyanajurca. 47Chaimandami shuj runaca:

“Cambaj mamapash, huauquicunapash, Canhuan parlangapami canllapi shuyanajun” nishpa, Jesusman villarca.

48Chaita villaj shamuj runataca, Jesusca cashnami nirca:

“¿Pita Ñucapaca mama canga? ¿Pita Ñucapaca huauquicuna canga?” nircami.

49Shina nishpallami Jesusca, Paipaj yachajujcunata maquihuan ricuchishpa, cashna nirca:

“Ricuichi, caicunami Ñucapaca mama, caicunami Ñucapaca huauquicuna. 50Jahua pachapi Ñuca Taita munashcata rurajcunallami, Ñucapaca huauqui, Ñucapaca pani, Ñucapaca mama” nircami.

Currently Selected:

MATEO 12: QVI16

Highlight

Copy