MATEO 11

Bautizaj Juanga, villajcunatami Jesuspajman cachashca

(Luc. 7:18-35)

1Jesusca, Paipaj chunga ishcai yachajujcunaman aliguta yachachishca jipaca, shuj pueblocunapi yachachingapa, villangapami rirca.

2Bautizaj Juanga, prezuna huasipi cashpami, Cristo imacunatalla rurajujta uyashpa, paipaj yachajujcunamanda ishcaipurata Jesuspajman cacharca. 3Paicunataca, cashna nishpa tapuchunmi cacharca:

“¿Canllu, ñucanchi shuyanajushca Cristo capangui? Na cashpaca, ¿shujtachu shuyana capanchi?” nichunmi cacharca.

4Jesusca, Juan cachashca runacunataca cashnami nirca:

“Cunanga, imata uyashcata, imata ricushcatapash, Juanman villagrichi: 5‘Ñausacunapash ricunajunmi, jangacunapash alimi purinajun. Lepra ungüihuan causajcunapash, ali tucunajunmi, rinri na uyajcunapash uyanajunmi. Huañushcacunatapash causachijunmi. Imagutapash na charijcunamambash, quishpirinamanda villanajunmi’ nigrichi. 6Ñucata crishpa na pandajcunaca, ninandami cushijunga” nircami.

7Paicuna rijhuanmi Jesusca, Juanmanda gentecunaman villashpa cashna ni callarirca: “Jichushca pambapica, ¿imata ricungapata llujshircanguichi? ¿Sucusta huaira cuyuchijujta, ricungapachu rircanguichi? 8Na cashpaca ¿imata ricungapata llujshircanguichi? ¿juyailla churajushca runatachu ricungapa rircanguichi? Ricuichi, juyailla churajunata churajushcacunaca, jatun mandajcunapaj huasicunapimi causan. 9Ashtahuanga, ¿imatata ricungapa rircanguichi? ¿profetata ricungapachu rircanguichi? Ari, cangunataca cashnami nini: Cangunaca, profetatapash yalitami ricungapa rircanguichi. 10Juanmandaca, cashna nishpa quilcashcami tiyajun:

‘Ñucamanda villajtaca, canda ñaupashpa rishpa,

Can purina ñanda punda alichijuchunmi cachagrini’ nijunmi.

11Na llullashpami, cangunataca cashna nini: ‘Huarmimanda huacharishca jaricunapica, Bautizaj Juanda yali ali runaca na tiyanllu. Ashtahuangarin, tucuita yali uchillashna causaj runami, Taita Dios mandajuj llactapica, Juandaca ashtahuan yali canga’ nircami.

12Bautizaj Juan villajui punllamanda cunangamanmi, jahua pachamanda Dios mandanaca, ninan llaquicunata apajun. Chai llaquicunata mishajcunami, chasquishpa catinajun. 13Tucui profetacunapash, mandashca shimipash, Juan shamuna punllacamanllami villanajurca. 14‘Eliasmi shamunga’ nishpaca, Juan shamunamandami chashna villajushca. Chasquingapa munashpaca, chaitami crishpa chasquina canguichi. 15Uyangapa rinrita charishpaca, aliguta uyaichi.

16Ashtahuangarin cunan viñaicunataca, ¿imahuanda chimbapurashayari? Cunan viñaicunaca, plazacunapi tiyarishpa, paicunapaj cumbacunata caparinajuj huambracunashnami. 17Paicunaca, cashnami ninajurca: ‘Canguna tushuchun gaitajpipash, na tushushpami purircanguichi. Yarishpa yarishpa huacajpipash, na huacashpami purircanguichi’ ninajunmi. 18Bautizaj Juan shamushpaca, na micujurcachu, na ufiajurcachu. Shina cajpimi paitaca: ‘Aya jundashca runamari’ ninajun. 19Runa Aichayuj tucushca Ñuca shamushpami, micunatapash micushpa, vinotapash ufiashpa purijuni. Chaimandami: ‘Cai runaca yapata micuj runami, vinotapash ufiaj runami. Impuestota japishpa causanajuj runacunahuan, juchayu gentecunahuanmi cumba tucushpa purin’ ninajuhuan. Ashtahuangarin, ali yachanataca Diospaj huahuacunallami rurashpa ricuchinajun” nircami.

Na cazuj pueblocunaca, ¡aij imachari tucunga! nishcami

(Luc. 10:13-15)

20Tauca pueblocunapimi, pipash na rurai ushanallacunata ninanda rurashpa, Jesusca purijurca: Chaicunata ricushpapash, na llaquirishpa Diospajman tigrarinajurcachu. Chaimandami, Jesusca na alicachishpa shinllita cashna nishpa rimajurca: 21“Corazín pueblolla, ¡aij imachari tucungui! Betsaida pueblolla, ¡aij imachari tucungui! Tiro, Sidón pueblocunapi, pipash na rurai ushanallacunata rurashca cajpica, ninanda llaquirishpa, uchami Diospajman tigrarinajunman carca. Paicuna ninanda llaquirishcata ricuchingapaca, cañamuta churajushpami, uchufahuan shitarinajunman carca. 22Dios llaquichijui punllapica, Tiro, Sidón pueblocunata yalitami cangunataca llaquichinga. 23Capernaúm pueblopi causajcuna cangunaca: ‘Jahua pachaman rishunlla’ yanguichimi. Ashtahuangarin, ucu pachamanmi shitai tucunguichi. Sodoma pueblopi, pipash na rurai ushanallacunata juyailla rurashca cajpica, cunangamanmi chai puebloca tiyajunman carca. 24Chaimandami cangunataca cashna nini: Dios llaquichijui punllapica, chai pueblopi causajcunataca, Sodoma pueblotapash ashtahuan yalitami llaquichinga” nircami.

“Ñucapajman shamushpa samaichi” nishcami

(Luc. 10:21-22)

25Chai punllacunapimi, Jesusca cashna nirca: “Jahua pachatapash, cai pachatapash mandajuj Ñuca Taitalla. Canga alipacha yachajushcacunaman, alita yarishpa causajcunamambash, cai yachajunataca na ricuchircanguichu. Ashtahuangarin huahuashna, na jatun tucushpa causajcunaman yachachishcamandami, Candaca ninanda alicachini. 26Ari Ñuca Taitalla, canga chashna rurangapami munarcangui.

27Ñuca Taitami, tucuita Ñucaman carahuashca. Pipaj churi cajtapash, gentecunaca na yachahuanllu, Ñuca taitallami yachan. Ñuca taitatapash, pipash na rijsinllu. Ñucallami, Paipaj Churi cashpa rijsini. Shinallata, taitataca churi rijsichijpillami rijsin. 28Imatapash rurashpa shaijushcacuna, aparishcashna causajcuna, tucuilla Ñucapajman shamuichi. Ñucami cangunataca samachisha. 29Ñuca yuguta aparichi. Ñucallami, na ñapash fiñarij, jariyanatapash na yarij shunguta charini, chaita yachajuichi. Ñucata crishpallami samashpa causai ushanguichi. 30Ñucapaj yuguca fangallami, aparijpipash na llashangachu” nijurcami.

Currently Selected:

MATEO 11: QVI16

Highlight

Copy