MATEO 10

Chunga ishcai apostolcunata Jesús agllashcamanda

(Mar. 3:13-19; Luc. 6:12-16)

1Chaimandami Jesusca, Paipaj chunga ishcai yachajujcunata cayashpa, mapata rurachij ayacunata llujchishpa cachana ushaita cararca. Shinallata, tucui nanaihuan, tucui ungüicunahuan huañujujcunata alichi ushachumbashmi ushaita cararca.

2Chai chunga ishcai apostolcunapaj shuticunaca caicunami: Callaripica, Simondami Pedro nishpa shutichirca. Paipaj huauquica Andresmi carca. Shinallata, Zebedeopaj churicunaca shujca Jacobo, shujca Juanmi carca. 3Shinallata, Felipe, Bartolomé, Tomás shuti runacunapashmi carca. Impuestota japij Mateopashmi carca. Alfeo runapaj churi Jacobopash, Tadeo nishca Lebeo shuti runapashmi carca. 4Cananista nishpa rijsishca Simón runapash, Jesusta japichij Judas Iscariotepashmi carca.

Chunga ishcaicunata, villachun cachashcamanda

(Mar. 6:7-13; Luc. 9:1-6)

5Chai chunga ishcaicunata cachajushpami Jesusca, cashna nishpa yachachijurca: “Na Israelcuna causanajuj llactacunataca, na rinachu canguichi. Samaria llacta gentecunapaj pueblomambash, na yaicunachu canguichi. 6Ashtahuangarin, Israel huasi ucupuramanda chingashca llamacunapajmanmi rina canguichi. 7Cashna nishpa villashpandi ringuichi: ‘Jahua pachamanda Dios mandanaca ñami chayamushca’ ninguichi. 8Huañujujcunatapash, lepra ungüihuan ungushcacunatapash alichinguichi. Huañushcacunatapash causachinguichi. Ayacunatapash, gentecunamanda llujchinguichi. Chai ushaitaca, juyashpa carajpimi japircanguichi. Shinallatami, juyaihuan rurana canguichi.

9Cangunaca chumbipica, curitapash, culquitapash, cobretapash na apanachu canguichi. 10Ñanda ringapaca cucabi muchilatapash na apanachu canguichi. Jahualla churajunatapash, ishcaitaca na apanachu canguichi. Chaquipi churajunatapash, tauna caspitapash na apanachu canguichi. Imata rurashpapash, pai rurashcamandaca micunata charingapachami.

11Ashtahuangarin maijan puebloman, na cashpaca uchilla puebloman yaicushpapash, cangunata cushilla mingachijtami, tapushpa mascana canguichi. Chaipica, shuj llactaman yalingacamanmi mingarina canguichi. 12Ña huasiman yaicushpaca: ‘Alillachu capanguichi’ ninami canguichi. 13Chai huasipi mingachij ali cajpica, paicunapaca shungupi ali causaimi tiyanga. Ashtahuangarin, na alicuna cajpica, chai ali causaica cangunamanllatami tigranga. 14Maijan huasipi cashpa, pueblopi cashpapash, cangunata na chasquishpa canguna villajujtapash na uyangapa munajpica, llujshishpa ringuichilla. Chaimandaca, cangunapaj chaquipi churajushcapi catijuj alpatapash chafsirishpami rina canguichi. 15Na llullashpami cangunataca cashna nini: Imatalla rurashcata Dios ricuchijui punllapica, Sodoma, Gomorra pueblocunapi causashca gentecunata llaquichishcatapash ashtahuan yalitami, chai pueblopi causajcunataca ninanda llaquichinga.

Gentecuna catiriyashpa llaquichinaca chayamujunmi

16Ñucami cangunataca atujcunapaj chaupipi, llamacunata cacharijshna cachajuni. Shinamandami cangunaca, culebrashna alitapacha yuyarishpa purina canguichi. Shinallata, palomashna, ali shungumi cana canguichi. 17Runacunamandaca huacaichirinami canguichi. Cangunata japishpaca, mandajpuralla tandanajushcapaj ñaupajmanmi apanga. Shinallata, sinagogacunapimi astinga. 18Ñucata catinajushcamandaca, llactata mandajcunapaj ñaupajman, jatun mandajcunapaj ñaupajmanmi apai tucunguichi. Paicunamambash, na Israelcunamambash, ñucata catijushcata ricuchingapami chashna apai tucunguichi. 19Ashtahuangarin, chashna apai tucushpaca: ‘¿Imashnashi rimasha, imatashi nisha?’ nishpaca, na manllanachu canguichi. Canguna imata rimachumbash Dios yarichijpimi rimanguichi. 20Chaipica, na cangunapaj munai rimanguichichu. Cangunapaj Taitapaj Espíritu shungupi yarichijpimi rimanguichi.

21Huauquillatami, paipaj huauquitaca huañuchijcunaman japichinga. Taitallatami, paipaj huahuataca, huañuchijcunaman japichinga. Huahuacunapash taitata, mamata ninanda na ricunayachishpami, huañuchi tucuchun japichinga. 22Ñucata catinajushcamandami cangunataca, tucuilla gentecuna ninanda millanayachinga. Ashtahuangarin, tucurimui punllacaman llaquicunata mishajcunallami quishpiringa. 23Cangunata llaquichingapa cai pueblopi callarijpica, shuj puebloman pacajushpa ringuichilla. Na llullashpami, cangunataca cashna nini: Runa Aichayuj tucushca ñuca tigramungacamambash Israel llactapica nara tucui pueblocunapi villashcachu canguichi.

24Yachajujpash, paita yachachijtaca na yalichu, gañanbash paita mandajtaca na yalichu. 25Yachajujpash, paita yachachijshnallami cana. Gañanbash, paita mandajshnallami cana. Huasiyuj taitata: ‘Ayacunata mandaj Beelzebumi cangui’ nishpaca, huasi ucupuratacarin ashtahuanmi ninanda na alicachinajunga.

¿Pitata manllana canchi?

(Luc. 12:2-9)

26Chashna llaquichinata yachashpapash, na manllanachu canguichi. Na ricurishpa pacalla canaca imapash na tiyanllu. Na yachai ushanalla ima pacallapash na tiyanllu. 27Ñuca cangunaman yana tutapi villashcataca, punllami villana canguichi. Ñuca cangunaman rinripilla nishcataca, huasi jahuamanda caparishpami villana canguichi. 28Cangunapaj cuerpota huañuchijcunataca, na manllanachu canguichi, almataca na huañuchi ushangachu. Ashtahuangarin, almatapash, cuerpotapash ucu pachapi tucuchingapa ushaita charijtami manllana canguichi.

29¿Nachu ishcai gorriondaca, shuj uchilla culquipajlla jatun? Shina cashpapash chaicunaca, shujllapash cangunapaj Taita na cacharimujpica, na urmamunllu. 30Cangunapaj ajchatapash, tucuillata yupashcallami. 31Shina cajpimi na manllana canguichi. Cangunaca, alasyu uchilla animalcunatapash ashtahuan yalipachami canguichi. 32Maijambash shujcunaman, Ñucamanda villajpica, Ñucapash paicunataca jahua pachapi Ñuca Taitamanmi villasha. 33Ashtahuangarin gentecunapaj ñaupajpi: ‘Paitaca na rijsinichu’ nishpa Ñucata nijpica, Ñucapash jahua pachapi Ñuca Taitapaj ñaupajpimi: ‘Paitapash na rijsinichu’ nisha.

“Ñucata crijpica fiñangami” nishpami Jesusca yachachishca

(Luc. 12:49-53; 14:26-27)

34Cai pachapi causajcuna llaqui illaj causachunmi shamushca yanguichiman. Llaqui illaj causachunga na shamurcanichu. Ashtahuangarin macanajui tiyachunmi shamurcani. 35Shinallata churipash paipaj taitahuan, ushipash paipaj mamahuan, jachumbash paipaj suegrahuan fiñanajushpa shicanyarichunmi shamurcani. 36Chashna fiñajcunaca, quiquin huasi ucupurallatami canga.

37Paipaj taitata, mamatara, Ñucata yali ashtahuan juyashpaca, napacha Ñucapajlla causaita ushangachu. Shinallata, paipaj churita, paipaj ushitara, Ñucata yali ashtahuan juyashpaca, napacha Ñucapajlla causaita ushangachu. 38Maijan cashpapash, paipaj cruzta aparishpa Ñucata na catishpaca, napacha Ñucapajlla causaita ushangachu. 39Paipaj caipi causaitalla ashtahuan juyashpaca, chingaitami chinganga. Ashtahuangarin, Ñucata catijushcamanda huañuchi tucushpaca, causaitami taringa.

“Imata alita rurashpapash japinguichimi” nishcami

(Mar. 9:41)

40Pipash cangunata chasquishpaca, Ñucatami chasquijun. Ñucata chasquishpaca, Ñucata cachamuj Taitatami chasquijun. 41Profeta cajpi, chai profetata chasquishpaca, profeta japina cashcashnami japinga. Shinallata, alitalla ruraj cajpi, alitalla rurajta chasquishpaca, alitalla ruraj japina cashcashnami japinga. 42Na llullashpami cangunataca cashna nini: Pi cashpapash, Ñucamanda yachajuj cai huahuacunaman, maijanman cashpapash chiri yacugutallapash vasopi carashpaca, Dios carajpi japingapachami” nircami.

Currently Selected:

MATEO 10: QVI16

Highlight

Copy