MATEO 9

Na cuyuri ushajuj runatami Jesusca alichishca

(Mar. 2:1-12; Luc. 5:17-26)

1Chai jipallami Jesusca, canoapi tiyarishpa, pai causajushca puebloman cuchata chimbashpa rirca. 2Chaipi cajpimi, na cuyuri ushajuj runata huandupi churashpa apamunajurca. Tucui shunguhuan crishpa shamunajujta Jesús ricushpami, chai na cuyuri ushajuj runataca cashna nirca:

“Ñuca huahualla, shinlli tucuilla. Cambaj juchataca ñami perdonashca” nirca.

3Shina nijpimi, mandashca Shimita yachachijpuramanda huaquingunaca: “Cai runaca, Diostami na alicachijun” nishpa paicunapaj shungu ucupi yarinajurca. 4Chashna yarinajujta Jesús yachashpami, paicunataca cashna nirca:

“¿Imashpata cangunapaj shungupica, chashna na alitara yarinajunguichi? 5Shina cashpaca: ‘Cambaj juchacunataca ñami perdonashca’ ¿ninachu ali? Na cashpaca: ‘Jatarishpa rilla’ ¿ninachu ali canga? 6Runa Aichayuj tucushca Ñucataca, cai pachapi causajcunapaj juchacunata perdonangapa ushaita charijta yachachunmi, na cuyuri ushajuj runataca: Jatarishpa, can sirijushca camatapash apashpa huasiman rilla” nircani-nirca.

7Shina nijpimi chai runaca, jatarishpa paipaj huasiman rirca. 8Chaita ricushpami, gentecunaca ninan manllaihuan, Taita Diostaca alicachinajurca. Ninan ushaita gentecunaman carashcamandami chashna alicachinajurca.

Mateo runata, Jesús cayashcamanda

(Mar. 2:13-17; Luc. 5:27-32)

9Jesusca chaimanda rijushpami, Mateo runata ricurca. Paica, gentecunapaj impuestota japishpa tiyarinapimi tiyajushca carca. Paitami:

“Ñucata catihuai” nirca.

Shina nijhuanga, jatarishpa catircallami.

10Chai jipaca cashnami tucurca: Jesusca, Mateopaj huasipi micungapa tiyajujpimi, impuestota japij ashtaca runacunapash, juchayu gentecunapash shamushca carca. Paicunami Jesushuan, Paipaj yachajujcunahuan tandanajushpa micungapa tiyarinajurca. 11Shina tiyanajujta fariseocuna ricushpami, Jesuspaj yachajujcunataca:

“¿Imashpata cangunata Yachachijca, impuestota japishpa causajcunahuan, juchayu runacunahuan micushpa tiyajun?” ninajurcami.

12Chashna ninajujta Jesús uyashpami, paicunataca cashna nirca:

“Nanaita na charijcunaca, jambij runataca na mascanllu. Nanaita charijcunallami mascan. 13‘Shuj gentecunata llaquishpa causachunmi munani. Animalcunata huañuchishpa Ñucaman carachunga, napacha munanichu’ nijushca shimi ima cajta yachajungapa richi. Alitalla rurajcunata cayangapaca, na shamurcanichu. Ashtahuangarin, juchayu gentecuna ninanda llaquirishpa Diospajman tigrarichun cayangapami shamurcani” nircami.

Na micushpa Diosta mañanamanda

(Mar. 2:18-22; Luc. 5:33-39)

14Chai jipallami Bautizaj Juanbaj yachajujcunaca, Jesuspajman shamushpa cashna tapunajurca:

“Ñucanchipash, fariseocunapash, tauca punllacunatami na micushpa Diosta mañashpa chishanchi. Cambaj yachajujcunaca, ¿imashpata na chashnallata ruran?” ninajurcami.

15Shina nijpimi Jesusca, cashna nijurca:

“¿Cazarai huasipi, cazarajuj noviohuan tiyanajushpaca, huañui huasipishna llaquillachu canga? Shina cajpipash, cusata apana punllacunaca chayamungami. Chai punllacunami na micushpa Diosta mañashpa chishanajunga.

16Mauca churajuna liquirishcataca, mushuj finduhuanga pipash na siranllu. Shina sirajpica, mauca churajunataca mushuj finduca yaicurishpami, ashtahuan liquin. 17Shinallata, chaira rurashca vinotaca, mauca cara muchilapica na churanllu. Chashna churajpica, chaira rurashca vinoca muchilata liquishpa jicharishpami, muchilandi tucurin. Chaimi chaira rurashca vinotaca, mushuj cara muchilapi churana. Shina churajpica vinondi, muchilandi ali tiyajunllami” nijurcami.

Jairopaj ushimanda, Jesuspaj churajushcapi tacarij huarmimandapash

(Mar. 5:21-43; Luc. 8:40-56)

18Shina villajujpimi shuj mandaj runaca, Jesuspajman shamushpa cungurishpa cashna nirca:

“Ñuca ushigumi chairalla huañupan. Paipaj umapi, Cambaj maquita churangapa ripashunyari. Shina churajpica causaripangallami” nircami.

19Shina nijpimi jatarishpa Jesusca, Paipaj yachajujcunandi, chai runata catishpa rinajurca. 20Shina rijujpimi, shuj huarmica huashata quimirimushpa, Jesús jahualla churajushca pundapi tacarirca. Paica, chunga ishcai huatata yahuar shamujujlla huarmimi carca. 21Chai huarmica, paipaj shungupica: “Jesuspaj churajushcapi tacarishpalla ali tucushallami” yajurcami. 22Chai huarmita tigrarishpa ricushpami Jesusca:

“Ñuca huahualla, shinlli tucuilla. Canga, ñuca alichi ushanata tucui shunguhuan crishpami, ña ali tucushcangui” nirca.

Shina nijhuanmi chai huarmica ali tucurca.

23Chai mandaj runapaj huasiman Jesús chayashpaca, gaitanajujta, gentecuna caparinajujta, huacanajujtami ricurca. 24Chai gentecunataca:

“Caimanda llujshipaichi. Cai cuitsaguca na huañushcachu, puñuitallami puñujun” nircami.

Shina nijpimi Jesustaca asishpa ricunajurca. 25Chai gentecunata tucuilla llujchishca jipaca, Jesusca ucuman yaicushpa, chai cuitsaguta maquimanda japijhuanmi, chai cuitsaguca jatarirca. 26Chaita rurashcataca, tucui chai llactapimi yachaj chayarca.

Ishcaipura ñausa runacunata alichishcamanda

27Jesús chaimanda llujshishpa rijujpica, ishcaipura ñausa runacunami caparishpa, cashna nishpa catimunajurca:

“¡Davidpaj Churi, ñucanchitaca llaquihuayari!” ninajurcami.

28Huasiman Jesús chayajpi, ñausa runacuna Paipajman quimirimujpimi, Jesusca:

“¿Cangunata Ñuca alichinata crishpachu shamunguichi?” nirca.

Shina nijpimi:

“Ari cripanchimi, Apunchi Jesús” ninajurca.

29Shina nijpimi:

“Canguna crishcashna, ali tucuichi ninimi” nishpa Jesusca, paicunapaj ñavipi tacarirca.

30Shina tacarijpimi, paicunapaj ñavica pascarirca. Paicunatami:

“Caitaca pactarallapash pimambash villanguichiman” nishpami Jesusca mingarca.

31Ashtahuangarin paicuna ña rishpaca, Jesús alichishcataca, caipi chaipimi chai tucui llactapi villanajurca.

Na rimai ushaj runatami Jesusca alichishca

32Chai runacuna ña llujshinajujpica, aya jundashca na rimai ushajuj runatami, Jesuspajman apamunajurca. 33Chai na rimai ushaj runaca, ayata Jesús llujchijhuanmi rimai callarirca. Chaita gentecuna ricushpaca, ninanda manllarishpami:

“Israel llactapica, cashna rurajtaca napacha ricushcachu canchi” ninajurca.

34Ashtahuangarin fariseocunaca, cashnami ninajurca:

“Cai runaca, ayacunata mandajpaj ushaihuanmi, ayacunataca llujchishpa cachajun” ninajurcami.

Cozechanaca ashtacapachami nishcami

35Jesusca tucui llactacunata, pueblocunata rishpami, sinagogacunapi yachachijurca. Paica, jahua pachamanda Dios mandana punllami ña chayamushca, nishpami villajurca. Shinallata tucui nanaihuan, tucui ungüihuan huañunajuj gentecunatami alichijurca. 36Chai gentecunataca, michij illaj, jichushca llamacunashna causanajujta ricushpami, Jesusca ninanda llaquijurca. 37Shinamandami, Paipaj yachajujcunataca cashna nirca:

“Granota tandachinaca ashtaca ashtacamari. Shina cajpipash, tandachijcunaca huaquinllamari. 38Chaimandami granota tandachijcunata cachamuchun, chagrayuj Taitataca ninanda mañana canguichi” nirca.

Currently Selected:

MATEO 9: QVI16

Highlight

Copy