MATEO 8

Lepra ungüihuan runata Jesusca alichishcamanda

(Mar. 1:40-45; Luc. 5:12-16)

1Jesús urcumanda ña urai shamujujpica, ashtaca gentecunami catimunajurca. 2Shina shamujujpimi, lepra ungüihuan huañujuj runaca ñapash Jesuspaj ñaupajpi cungurishpa:

“Apunchi Jesús, Can munashpaca mapa illajta saquihuai” nirca.

3Shina nijpimi Jesusca, maquita chutashpa chai runataca tacarirca. Shina tacarishpami:

“Ari, mapa illaj cachunmi munani” nirca.

Shina nijpimi, chai lepra ungüica chai runamandaca ñapash anchurirca. 4Chaimandami Jesusca cashna nirca:

“Can ali tucushcataca, pimambash ama villashpa sacerdotepajman rishpa ricurigri. Chaipica, Moisés mandashcashna ofrendata apashpa paicuna yachachun ricuchigri” nircami.

Patsaj macanajuj runacunata mandaj runapajta, ruraj runata Jesús alichishcamanda

(Luc. 7:1-10)

5Capernaúm puebloman Jesús yaicujpimi, patsaj macanajuj runacunata mandaj runaca, cashna nishpa,

6ninanda mañajurca:

“Apunchi Jesús, ñucapajta ruraj huambragumi, na cuyuri ushaj ungüihuan llaquinayaita huasipi sirijupan” nijurcami.

7Shina nijpimi Jesusca:

“Ñuca rishpa alichishallami” nirca.

8Shina nijpimi, patsaj macanajuj runacunata mandajca cashna nirca:

“Apunchi Jesús, Canda ñuca huasiman pushangapaca, jatun pinganayaimi capani. ‘Ali tucui’ nishpa Can rimajpillata, ñucapajta ruraj huambraguca ali tucupangallami. 9Mandajcuna mandajpimi, ñucapash causapani. Shinallatami ñucapash, macanajuj runacunataca mandani. Shuj runata: ‘Ri’ nijpica, rinllami. Shinallata: ‘Shamui’ nijpipash, shamunllami. Ñucapajta ruraj huambragutapash: ‘Caita rurai’ nijpica, ruranllami” nircami.

10Shina nijta uyashpami Jesusca, ninanda cushijushpa, Paita catijcunataca cashna nijurca:

“Cangunataca cashnami nini: Israel llactapipash, cai runagushna alipacha crijtaca, shujtallapash na tarishcanichu. 11Cangunataca, cashnatapashmi nini: Indi llujshimujmanda, indi huashajunmandami ashtacacuna shamunajunga. Paicunami, Abrahamhuan, Isaachuan, Jacobhuan, jahua pachapi Dios mandajuj llactapi tiyarinajunga. 12Ashtahuangarin, Dios mandajuj llactapi causagrina huahuacunarami, yana yana canllaman shitai tucunga. Chaipica huacashpa, quirutapash canirishpami tiyanajunga” nircami.

13Shina nishpallami Jesusca, patsaj macanajuj runacunata mandajtaca, cashna nirca:

“Rilla. Can crishcashnallata, paica ali tucungallami” nircami.

Shina nijhuanmi huambraguca, ña ali tucushca carca.

Pedropaj suegrata Jesús alichishcamanda

(Mar. 1:29-34; Luc. 4:38-41)

14Pedropaj huasiman Jesús chayashpaca, Pedropaj suegra tabardillo ungüihuan, na jatari ushashca camapi sirijujtami ricurca. 15Chaimandami Jesús maquita tacarijhuan, tabardillo ungüica ñapash anchurirca. Chashna ali tucushpami, paica jatarishpa micunata carajurca.

16Ña tutayajujpimi, aya jundashca ashtaca gentecunataca, Jesuspajman pushamunajurca. Jesusca, shimihuan rimashpallami, chai gentecunamanda ayacunataca llujchirca. Shinallata, tucui ungushcacunatami alichirca. 17Profeta Isaías villashca pactachunmi, chashna tucurca. Paica: “Paillatami, ñucanchipaj ungüicunatapash, ñucanchi nanaicunatapash aparca” nircami.

Jesusta catingapa munajcunamanda

(Luc. 9:57-62)

18Jesusca, ashtaca gentecuna, Paipaj muyundipi jundariyajta ricushpami, cuchata chimbachun mandarca.

19Chaipica, mandashca shimicunata quilcashpa causaj shuj runa chayamushpami:

“Yachachij, Can maita rijujpipash catipashallami” nirca.

20Shina nijpimi Jesusca cashna nirca:

“Añascunapash, paicuna causana utujuta charinmi. Jahuata rij alasyu animalcunapash, tazinda charinmi. Ashtahuangarin, Runa Aichayuj tucushca Ñucami, umaguta maipi samanatallapash na charini” nirca.

21Paipaj yachajujpuramanda shuj runami, Jesusta cashna nirca:

“Apunchi Jesús, ñuca taitatara pambashpa tigramugringapa saquihuangui” nirca.

22Shina nijpimi Jesusca, cashna nirca:

“Ñucata catihuailla. Huañushcacunaca, huañushcapurallata pambanajuchun saquilla” nirca.

Ninan huairahuan cucha jatarijujta Jesús chulunyachishcamanda

(Mar. 4:35-41; Luc. 8:22-25)

23Canoapi Jesús tiyarijpimi, Paipaj yachajujcunapash catishpa rinajurca. 24Ña cuchata rinajujpica, ninan huaira ñapash shamushpami, cucha yacuta jatarichirca. Chaimi yacuca, canoapi jundamui callarirca. Ashtahuangarin Jesusca, puñujurcallami. 25Shina puñujujpimi, Paipaj yachajujcuna shamushpa, Jesusta rijchachishpaca:

“¡Apunchi Jesús, quishpichihuai, huashajushpa huañugrinchimari!” ninajurca.

26Shina ninajujpimi Jesusca, cashna nirca:

“Na tucui shunguhuan crij runacuna: ¿Imashpata cashna ninanda manllaringuichi?” nishpa jatarirca.

Shina jatarishpa huairatapash, cuchatapash jarcashpa rimanhuanmi, chulunlla tucurca.

27Chaimandami, chai runacunaca ninanda manllarishpa:

“¿Cai runataca maijan cajpita, huairapash, cuchapash cazunlla?” ninajurca.

Gadara llactapi aya jundashca runacunamanda

(Mar. 5:1-20; Luc. 8:26-39)

28Cuchata chimbashpaca, Gadara llactamanmi, Jesusca chayarca. Chaipimi, aya jundashca ishcaipura runacunaca, huañushcata pambana utujucunamanda llujshimushpa, Jesusta tuparingapa shamurca. Chai runacunaca, manllanayai millaicuna cajpimi, chai ñanda yalitaca pipash na ushaj carca. 29Paicunaca, ninanda caparishpami cashna ninajurca:

“Taita Diospaj Churi Jesús. Canga ñucanchihuanga, ¿imatata ricunata charingui? Ninanda llaquichina punllapash nara chayajpillataca, ¿imapata ñucanchitaca llaquichingapa shamungui?” ninajurca.

30Chaimanda carullapimi, ashtaca cuchicuna micushpa shayanajurca. 31Shina cajpimi, chai ayacunaca:

“Cai runacunamanda ñucanchita llujchishpaca, chai cuchicunapi yaicuchun saquihuai” nishpa, ninanda mañanajurca.

32Shina nijpimi, Jesusca:

“Richilla” nirca.

Shina nijpi, chai runacunamanda ayacuna llujshishpaca, cuchicunapi yaicungapami rirca.

Shina yaicujhuanmi, chai ashtaca cuchicunaca, jaca jahuamanda cuchaman huashajushpa huañunajurca.

33Cuchicunata michijcunaca, llactaman calpashpami, ima tucushcatapash tucuita gentecunaman villanajurca. Shinallata aya jundashca runacuna ima tucushcatapashmi villanajurca. 34Shina villajpimi, chai llactamandaca tucuilla gentecuna Jesuspajman shamushpaca: “Cai muyundi llactamandaca ripailla” nishpa mañanajurca.

Currently Selected:

MATEO 8: QVI16

Highlight

Copy