योहान 21

तीबिरीयासोन नदी धोळे चेलाक देखायनो

1इनी वातोन ओवतेन येसु खुदो काजे तिबिरियासोन दोरीयान काठे चेला काजे देखाय पोळ्यु, एने इना रितीसी देखाय पोळ्यु. 2शिमोन पतरस, एने थोमा यु दिदुमुस कोवायतू होतु, एने गलीलोन काना सोहोरोन नथनेल, एने जब्दिन पुऱ्यु, एने तेरा चेला मायला दुय एने दुय एने जोना एखठा होता. 3शिमोन पतरस तीनु काजे कोयू, “मे माछा धोरणेन जाम” चे तीना काजे कोया, “आमु बी तारे सात आवजे” आखरी चे निकवीन ढोंड्या पोर चोळ्या, बाकीन तिने राती काय नि धोऱ्या. 4सोंदारे होयताच येसु काठा पोर आवीन उभू रोयू; तीबी चेला नि उवख्या कि यु येसु छे. 5तेत्यार येसु तीनु काजे कोयू, “हे पुऱ्या, काय तुमरे जुव काहीन माछा छे?” चे जोवाब आप्या, “नि होय.” 6चू तीनु काजे कोयू, “ढोंड्यान जेवळे धोळे जावी नाखू ती जोळसे” आखरी चे जावी नाख्या, एने हिमी माछा जादा होयनेसी तीनुक हापकी नि सोक्या. 7हिमी तीनुक चेला जीना पोर येसु मोंग कोरतू होतु, पतरस काजे कोयू, “यु ते प्रभू छे!” शिमोन पतरस यो सोमवीन चू प्रभू छे, कोड्यामा डोगलो हापकीन बांध लेदू, काहाकि चू उगाळलु होतु, एने दोरीयामा कुदु पोळ्यु. 8बाकीन दिसरा चेला ढोंड्यो पोर माछान भोरली जावी हापेकता जायीन आव्या, काहाकि चे काठे गोथा जाफा नांबे नि, बाकीन काहीन दुय सोव हात पोर होता. 9जेतार चे काठ पोर उतऱ्या, ती चे कुयलान आखठो एने तीना पोर माछा मेकलो, एने रुटू देख्या. 10येसु तीनु काजे कोयू, “जे माछा हिमी धोरला छे, तीनामा गोथा काहीन लावू.” 11ती शिमोन पतरस ढोंड्या पोर चोळीन एकसोव त्रेपन मोटला माछा सी भोरली जावी काठ पोर हापक्या, एने ओतरा माछा रोयने पोर बी जावी नि फाटी. 12येसु तीनु काजे कोयू, “आवू, खाय लेवू” चेलामा गोथा कुदा काजे हिंमत नि होयी कि तीना काजे पुछे, “तू कून छे?” काहाकि चे जानता होता कि चू प्रभूता छे. 13येसु आव्यु एने रुटू लीन तीनुक आप्यू, तोसाच माछा बी. 14जी तिसरी कावार छे कि येसु मोरलामा गोथू जीव उठनेन बाद चेला काजे देखाय पोळ्यु.

येसुन पतरस साते वात करनो

15खाणो खाणेन बाद येसु शिमोन पतरस काजे कोयू, “हे शिमोन योहानोन पुऱ्यु, काय तू इंदरे गोथो बोढीन मार पोर मोंग कोरे?” चू तीना काजे कोयू, “होव, प्रभू; तू ते जानतलु छे कि मे तार पोर मोंग कोरतेलु छे” चू तीना काजे कोयू, “मारा तू मारा गाडरा काजे चार.” 16चू एने दिसरी कावार तीना काजे कोयू, “हे शिमोन, योहानोन पुऱ्यु, काय तू मार पोर मोंग कोरे?” चू तीना काजे कोयू, “होव, प्रभू; तू जानतलु छे कि मे तार पोरुत मोंग कोरतेलू छे” चू तीना काजे कोयू, “मारा गाडरान राखवावी कोर.” 17चू तिसरे कावार तीना काजे कोयू, “हे शिमोन, योहानोन पुऱ्यु, काय तू मार पोर मोंग कोरतेलू छे?” पतरस नाराज होयू कि येसु हिना काजे तिसरी कावार ओसू कोयू, “काय तू मार पोर मोंग कोरे?” एने तीना काजे कोयू, “हे प्रभू, तुते आखो काय जानतलु छे; तू यो जानतलु छे कि मे तार पोर मोंग कोरतेलू छे” येसु तीना काजे कोयू, “मारा गाडरा काजे चार. 18मे तुसे काजे छाचलीन कोय, जेतार तू जुवान्यू होतु आपनो कोड्यो बांधीन जां जुवे चा फिरतू होतु; बाकीन जेतार तू दाहालू होयसे आपनु हात पोसारसे, एने दिसरा तारो कोड्यो बांधीन जा तुसेक नि जुवे चा तुसेक लीजासे.” 19चू इनी वातो पोर इशारू कोऱ्यु कि पतरस ओसला मोरनेसी परमेश्वरोन महिमा कोरसे एने तेत्यार चू तीना काजे कोयू, “मार पोछोव आतरोय”.

येसु एने हेरु मोंगावू चेलु

20पतरस पोछु फिरीन तिना चेला काजे पोछोव आवतेलु देख्यू, जेरपोर येसु मोंग कोरतू होतु, एने जू खाणेन टेमे तेरी छाती भूनी वाकीन पुछ्लू होतु, “हे प्रभू, तुसेक धोरावने वावू कून छे?” 21तीनाक देखीन पतरस येसु काजे कोयू, “हे प्रभू, येरू काय हाल होयसे?” 22येसु तीना काजे कोयू, “कोदि जुवे ती चू मारे आवने तोक रुकाय रोये, ती मेसेक इनासी काय तू मार पोछोव आव लाग.” 23इनान कोरता भाशो मे जी वात फेलावरोयू कि यु चेलू नि मोरे; तीबी येसु हिना काजे यो नि कोयू कि होयू नि मोरे, बाकीन यो कि “कोदि मेसेक जुवे कि चू मारे आवने तोक रुकाय रोये, ती मेसेक हेरसी काय?”.

आभार

24होयू चू चेलू छे यु इनी वातोन गोवायी आपतलु छे एने यु इनी वातो काजे लिखलू छे, एने आमु जानतला छे कि हेरी गोवायी खोरली छे. 25ओवी बी जुदा सोवटा कामे छे, यो येसु कोऱ्यु; कोदि चे एक-एक कोरीन लिखाय जाता, ती मे सोमोजतलु छे कि किताब जे लिखाय जाता चे जोगोमा बी नी सोमायता.

Currently Selected:

योहान 21: BFBNT

Highlight

Copy