प्रेषित 1

परिचय

1हे थियुफिलुस, मे पेहेली यी किताब तिनी आखी वातोन बारामा लिख्यू जो येसु पेहेले गोथू कोरतू एने सिकाळतू होतु.

2तिने दाहळे तोक जेतार चू तीनु सेवक काजे जीनुक चू नेवाळलु होतु पवित्र आत्मान लारे आग्या 3आपीन उपोर नि चूटायु गोयू. येसुन दुख हाकलनेन ओवतेन घोणा सोवटा पक्का सोबूत आपना खूदो काजे जीवतलु देखाळ्यू, एने चावीस दाहळा तोक येसु तीनु काजे देखा पोळ्यु, एने परमेश्वरोन राजोन वाते कोयतू रोयू.

चुखली आत्मान वायदू

4एने मेवीन तीनु काजे आग्या आप्यू, “यरुशलेम काजे छुळता झुनी, बाकीन बासोन वायदाक पुरी होयनेन वाट देखता रोयू, जेरी वाते तुमु मारेंचा गोथा सोमवला छे.”

5काहाकि योहान ते पाणीमा बाप्तिस्मा आप्यू बाकीन थुलाक दाहळान बादमा तुमु पवित्र आत्मासी बाप्तिस्मा लेसू.

6आखरी चे एखठा होयीन तीना काजे पुछ्या, “हे प्रभू काय तू इना टेमे इस्राईल काजे राज पोछो आपीस?”

7चू तीना काजे कोयू, “तिनी टेमोक एने काव काजे जाननेन, जीनाक बास आपना होकमा मेकलु छे, तुमरो काम नी होय.”

8बाकीन जेतार पवित्र आत्मा तुमरे पोर आवसे तेत्यार तुमुक ताकत जोळसे; एने यरुशलेम एने आखा यहुदियामा, एने सामरिया, एने धोरतीन जोगोन धोळे तोक मारा गोवा बोनसू.

येसुन सोरगोमा जाणो

9यो कोयीन चू तिंदरे देखते-देखते उपोर चूटायु गोयू एने वादवो तीनाक तिंदरे नोजोरमा गोथू डुकाळ लेदू.

10तेरे जाणेन टेमे चे सोरगोमा देखता रोया, ती देखू, दुय माणसे धोव्वा छिंदरा पेहेरलु साते आवीन उबरोय गोया.

11एने तीनु काजे कोया, “हे गलीली माणसो तुमु काहा उबरोयीन सोरगोमा देखता रोया? युत येसु तुमरेनचा गोथू सोरगोम चूटायु गोयलु छे जोसा तुमु तीना काजे सोरगोमा जातलू देख्या, तोसुच चू पोछु आवसे.”

एखठा होयीन प्रार्थना

12तेत्यार चे जेतुन नावोन बोयळाम गोथा यरुशलेमोन साते एक शब्बाथोन दाहळू थुलोक नांबे छे, यरुशलेममा गोया.

13जेतार चे चा पुग्या ती चे एक घोरोन तावापोर गोया, जा पतरस एने योहान, एने याकुब, एने शिमोन, एने अन्द्रियास, एने फिलीप एने थोमा, बरतुल्मै, एने मत्ती, एने हलफईन पुऱ्यु याकुब, एने शिमोन जीलोद एने याकुबोन पुऱ्यु यहुदा रोयता होता. 14ये आखा, घोणा सोवटा बायरा, एने येसुन आया मरीया, एने तेरा भाशो साते एक मोन लागाळीन प्रार्थना कोरता होता.

नवला अगवाक नेवाळनो

15तीनु दाहळान पतरस भाशोन इचमा जे एकसोव वीस माणसोन लगभग होता, उभा रोयीण कोयने बाज गोयू, 16“हे भाशो, जोरुरी होतो कि पवित्र शास्त्रन चू लेख पुरू होये जो पवित्र आत्मा दाऊदन मुखोसी यहुदान बारामा, यो येसुन धोरावनेन अगोववान्यू होतु, पेहेले गोथो कोयलो होतो. 17काहाकि चू आमरेमा गीनाय गोयू, एने इनी सेवकाईमा भागीदारी होयू.” 18(चू अधोरमोन कोमायीमा गोथू एक खेत मुले लेदू, एने मुनकान भुरसे पोळ्यु एने तेरो पेट फाट गोयो एने तेरा आखा आतळा निकवी पोळ्या. 19इनी वातो काजे यरुशलेममा रोयने वावा जान गोया, न्या तोकून कि तीना खेतोन नाव तिंदरी भाषामा “हकलदमा” मतलब “लुयोन खेत पोड गोयो).”

20भजन संहितान किताबमा लिखलो छे,

तेरो घोर उजळी जाय,

एने तीनामा कुदू नि वोसे,

एने तेरो पोद कुदु दिसरू ली लेये.

21इनान कोरता जोतरा दाहळा तोक प्रभू येसु आमरे साते आवतू जातू रोयू मतलब योहानोन बाप्तिस्मानचा गोथो लीन आमरेनचा गोथू चूटायतेलोग जे माणसे आमरे साते रोयला छे, 22वारू छे कि तिंदरेमा गोथू एक माणूस बाप्तिस्मा आपने वावु योहान आमरे साते तेरे जीव उठनेन गोवा होय जाय. 23तेत्यार चे दुय जोना काजे उभा कोऱ्या, एक युसूफ काजे जू बरसभा कोवायतलु छे, जेरु आडनाव युसतुस छे, दिसरू मतीयाह काजे, 24एने जी प्रार्थना कोऱ्या, “हे प्रभू, तू जे आखान मोन जानतलु छे, यो देखाळ कि इनू दुय जोनामा तू कुनी काजे नेवाळलु छे, 25कि चू सेवा काजे एने प्रेषितोन जागू ली लेये, जिना काजे यहुदा छुळीन आपने जागे जात रोयू.” 26तेत्यार चे तिंदरे बारामा चीठ्या नाख्या, एने मतीयाह नावोन निकवी आखरी चू तीनु ग्यारा प्रेषितोन साते गीनाय गोयू.

Currently Selected:

प्रेषित 1: BFBNT

Highlight

Copy