योहान 20

ठारली कबर

(मत्ती 28:1-10; मरकुस 16:1-8; लुका 24:1-12)

1हाप्तान पेहले दाहळे मरीया मगदलीनी सोंदारे वेगीत आंदारो होतो ती मोळवाट्या पोर आवी, एने दोगळा काजे मोळवाट्या चा गोथू छेटू होयलु देखी. 2तेत्यार ची दोवळी एने शिमोन पतरस एने तीना दिसरा चेलानचा जीना पोर येसु मोंग कोरतु होतु, आवीन कोयी, “चे प्रभू काजे मोळवाट्यामा गोथा निकाव लीग्या, एने मेसेक नि मालूम कि तीनाक कां मेक देदा.” 3तेत्यार पतरस एने चू दिसरू चेलू निकवीन मोळवाट्या भूनी जाणे बाज गोया. 4चे दूय साते-साते दोवळता होता, बाकीन दिसरू चेलू पतरस गोथू ओगोव दोवळीन मोळवाट्यामा पेहले पुग गोयू, 5एने वाकू वोवीन कापळा पोड रोयला देख्यू, ते बी चू माहाय नि गोयू. 6तेत्यार शिमोन पतरस तेरे पोछोव पुग्यु, मोळवाट्या माहिय गोयू एने कापळा पोळ रोयला देख्यू;. 7एने चू फेटू यु तेरे मुंडका काजे बांदलू होतु, कापळा पुठी पोळलु नि बाकीन ओलोग एक जागे गुंडाविन मेकलु देख्या. 8तेत्यार दिसरू चेलू बी जू मोळवाट्यामा पेहले पुगलू होतु, माहाय गोयू एने देखीन भुरसू कोऱ्यु. 9चे ते हिमी तोक पवित्र शास्त्रान ची वात नि सोमोजता होता कि तीना काजे मोरलामा गोथू जीव उठनो पोळसे. 10तेत्यार जे चेला तिंदरे घोर पोछा जात रोया.

मारियान माग्दलिनीक देखायनो

(मरकुस 16:9-11)

11बाकीन मरीया रोड्ती जायीन मोळवाट्यान चांत बारथे उभरोय रोयी, एने रोडती-रोडती मोळवाट्या भूनी वाकी वोवीन, 12दुय सोरग दूतो काजे धोव्वा छिंदरा पेहेरला एक काजे मुंडीशा एने दिसरा काजे पायता बोस रोयला देखी, जा येसुन धोळ मेकायलो होतो, चे तिनी काजे कोया, “हे बाय, तू काहा रोडे?” ची तीनु काजे कोयी, “चे मारा प्रभू काजे चूटली गोया एने मी नि जानती कि हिना काजे कां मेक रोया.” 13एने पेहेले हिना काजे हन्ना जुव ली आया, काहाकि चू तीना सालोन महायाजक क्लायपान सेसरुस होतु. 14यो कोयीन ची पोछि फिरी एने येसु काजे उभू रोयलु देखी, बाकीन नि उवखी कि चू येसु छे. 15येसु तिनी काजे कोयू, “हे बाय, तू काहा रोडे? कुणी काजे हेरे?” तिना काजे मावी सोमजीन तीना काजे कोयी, “हे माहाराज, कोबी तू हिना काजे लीगोयू होसे ती मेसे काजे कोयती हीना काजे कां मेक रोयू, एने मी तीना काजे ली जाश.” 16येसु तिनी काजे कोयू, “मरीयम” ची पोछि फिरीन तीना काजे इब्रानिमा कोयी, “रब्बूनि” मतलब “हे गुरु.” 17येसु तिनी काजे कोयू, “मेसेक मा छिमे, काहाकि मी हिमी तोक बासोनचा उपोर नि गोयू, बाकीन मारा भाशोनचा जायीन हिनु काजे कोय दे, कि मे मारा बास एने तुमरू बास, एने मारू परमेश्वर एने तुमरू परमेश्वर तेरेनचा जाम.” 18मरीयम मगदलीनी जायीन चेला काजे कोयी, “मी प्रभू काजे देखी, एने चू मेसे काजे जे वाते कोयू.”

चेलान बिचमा येसुन होयनो

19तिने दाहळे यु हाप्तान पेहेले दाहळू होतु, सांतेन टेमे जेतार चा वावा झोपला पोर जां चेला होता, यहुदियान बिकोन मारे बोंद होता, ती येसु आयु तिंदरे इचमा मा उभू रोयीण तीनु काजे कोयू, “तुमु काजे शांती जोळे.” 20एने यो कोयीन चू तेरु हात एने तेरी कुख तीनु काजे देखाळ्यू तेत्यार चेला प्रभू काजे देखीन खुशी होया. 21येसु पोछु हिनु काजे कोयू, “तुमुक शांती जोळे; जोसू बास मेसेक मुकेललु छे, तोसुच मे बी तुमु काजे मुकलो.” 22यो कोयीन चू तिंदरे पोर फुक्यू एने तीनु काजे कोयू, “पवित्र आत्मा लेवू. 23जिंदरा पाप तुमु माफ कोरे, चे तिंदरे कोरता माफ कोराय गोयला छे; जिनान तुमु राखसू चे राखाय गोयला छे.”

देखानो एने भुरसू करनो

(मत्ती 28:16-20; मरकुस 16:14-18; लुका 24:36-49)

24बाकीन बारामा गोथू एक मतलब थोमा जू दिदुमुस कोवायतलु छे, जेतार येसु आयु ती तिंदरे पुठी नि होतु. 25हिमी दिसरा चेला तीना काजे कोयने बाज गोया “आमु प्रभू काजे देखला छे,” तेतार चू तीनु काजे कोयू, “जेतार तोक मी तेरा हातोमा खिवान डूचा नि देखलोम, एने तीना डूचामा मारी आंगवी नि घाल दोम, तेत्यार तोक मे भुरसू नि कोरो.” 26आठ दाहळान ओवतेन तेरा चेला पोछा घोरोन माहिय होता, एने थोमा तिंदरे पुठी होतु; एने झोपला बोंद होता, तेत्यार येसु आयु एने तिंदरे इचमा मा उभू रोयीण कोयू, “तुमुक शांती जोळे.” 27तेत्यार चू थोमा काजे कोयू, “तारी आंगवी न्या लावीन मारा हातो काजे देख एने तारू हात लावीन मारा कुखीमा घाल, एने कोम भुरस्या नि बाकीन विस्वासी बोन.” 28यो सोमवीन थोमा जोवाब आप्यू, “हे मारा प्रभू, हे मारा परमेश्वर.”

29येसु तीना काजे कोयू, “तू मेसेक देखलू छे, काय इनान कोरता भुरसू मेकलु छे? सोयावा छे चे जे बिना देखे भुरसू कोऱ्या.” 30येसु ओवी बी घोणा सोवटा चमत्कार चेलान सामने देखाळ्यू, जे इना किताबमा लिखाय नि गोया;. 31बाकीन जे इनान कोरता लिखाय गोयला छे कि तुमु भुरसू कोरे कि येसु परमेश्वरोन पुऱ्यु मसिह छे, एने भुरसू कोरीन हेरे नावोसी जीवन लेये.

Currently Selected:

योहान 20: BFBNT

Highlight

Copy