योहान 19

येसुक चाबका देणो एने हासी उळावनो

1इनापोरसी पिलात येसु काजे चाबका देवळाव देदू. 2सिपायळा झाडक्यान मुकुट गुथीन तेरा मुंडका पोर मेक्या एने तिना काजे जामन्या छिंदरा पेराव्या, 3एने तेरे साते आवीन कोयने बाज गोया, “हे यहुदान राजा, प्रणाम” एने तीनाक थापळ्या बी देदा. 4तेत्यार पिलात पोछु बारथे निकवीन माणसो काजे कोयू, “देखू, मी तीनाक तुमरे जुव पोछु बारथे लावो; काहाकि तुमु जान लेये कि मे हेरेमा काहीन गुणू नि देख्यू.”

ख्रुस पोर चोळावने येसुक आपनो

5तेत्यार येसु काटान मुकुट एने जामन्या छिंदरा पेहरलु बारथे निकव्यू; एने पिलात तीनु काजे कोयू, “देखू, यु माणूस”. 6जेतार प्रधान पुजारू एने कामदार तीनाक देख्या, ती आयळीन कोया, “हिनाक ख्रुस पोर चोळाव, ख्रुस पोर” पिलात तीनु काजे कोयू, “तुमुत हिना काजे लीन ख्रुस पोर चोळावू, काहाकि मे हेरेमा काय गुणू नि देख्यू.” 7यहुदि माणसे तीना काजे जोवाब आप्या, “आमरो बी नियम शास्त्रो छे एने तीना शास्त्र नुसार चू मार नाखनेन लायक छे, काहाकि चू खुदो काजे परमेश्वरोन पुऱ्यु बोनाव्यू.” 8जेतार पिलात जी वात सोमव्यू ती ओवी बी बिह गोयू, 9एने ओवी पोछु किल्लान माही गोयू एने येसु काजे कोयू, “तू का वावू छे?” बाकीन येसु तीना काजे काय जोवाब नि आप्यू. 10इनापोरसी पिलात तीना काजे कोयू, “मारे पुठी काहा नि बुलतू? काय तू नि जानतू तुसेक छुळनेन होक मेसेक छे, एने तुसेक ख्रुस पोर चोळावनेन बी मेसेक होक छे.” 11येसु जोवाब आप्यू, “कोदि तुसेक उपोर गोथू नि आपाय जातु, ती तारो मार पोर काय होक नि रोयतू; इनान कोरता जू मेसेक तारे हातोमा धोरावलु छे तेरो पाप जादा छे.” 12इनापोरसी पिलात तीना काजे छुळ देनेन कोऱ्यु, बाकीन यहुदि आयळीन-आयळीन कोया, “कोदि तू इना काजे छुळ दिस, ती तू केसरोन दुस्ती नि होय, जो कुदु आपना खुदो काजे राजा बोनावतलु छे चू केसरोन सामना कोरतेलू छे.” 13जे वाते सोमवीन पिलात येसु काजे बारथे लाव्यू एने तीना जागा पोर एक बांधलु उटलु होतु जी इब्रानिमा “गब्बता” कोवायतो होतो, एने चा नियावोन गादीपोर बोश्यू. 14यो वोलांडोनोन तीहीवारोन तीयारीन दाहळू होतु, एने लगभग छटवे घंटान होतो तेत्यार चू यहुदि काजे कोयू, “देखू तुमरू राजा.” 15बाकीन चे आयळ्या, “ली जा ली जा! हिनाक ख्रुस पोर चोळाव” पिलात हिनु काजे कोयू, “काय मे तुमरा राजा काजे ख्रूस चोळावो?” प्रधान पुजारू जोवाब आप्यू, “केसर काजे छुळीन आमरू ओवी कुदु राजा नि होय.” 16तेत्यार चू येसु काजे तिंदरे हातोमा सोप देदू काहाकि चू ख्रुस पोर चोळाय जाय.

ख्रुस पोर चोळावनो

(मत्ती 27:32-44; मरकुस 15:21-32; लुका 23:26-43)

17तेत्यार चे येसु काजे लीगोया, एने चे आपना ख्रुस उचलीन तीना जागातोक बारथे गोयू, जो “खोपळीन जागू” कोवायतू होतु एने इब्रानिमा “गुलगुता”. 18चा चे तीनाक एने तेरे साते एने दुय माणसो काजे ख्रुस पोर चोळाव्या, एक काजे इंखुर एने एक काजे तिन्खुर, एने इचमा मा येसु काजे. 19पिलात एक गुणान चिट्ठी लिखीन ख्रुस पोर लागाळ देदु, एने तीनामा यो लिखलो होतो, “येसु नासरी, यहुदिन राजा.” 20यो गुणान-चिट्ठी घोणा सोवटा यहुदि वाच्या, काहाकि चू जागू जा येसु ख्रुस पोर चोळाय गोयलु होतु देसोन साते होतो; एने चिट्ठी इब्रानि एने लतीनि एने युनानीमा लिखलो होतो. 21तेत्यार यहुदियान प्रधान पुजारू पिलात काजे कोया, “यहुदियान राजा मा लिखे बाकीन यो कि चू कोयू, मे यहुदियान राजा छे,” 22पिलात जोवाब आप्यू, “मे यो लिख देदु, चो लिख देदु.” 23जेतार सीपायळा येसु काजे ख्रुस पोर चोळाव देदला, ती तेरा छिंदरा लीन च्यार भाग कोऱ्या, हर एक सीपायळान कोरता एक भाग, एने झोगु बी लेदा, बाकीन झोगु बिगोर सिवलू उपोर गोथू नेचू तोक गुथलू होतु. 24इनान कोरता चे आपोसमा कोया, “आमु इना काजे नि फाडता, बाकीन इनापोर चिठ्या नाखजे कि यु कुनीन होयसे” यो इनान कोरता होयो कि पवित्र शास्त्रामा जो कोवाय गोयलो होतो चो पुरो होये, “चे मारा डोगला आपोसमा वाट लेदा एने मारा डोगलापोर चिठ्या नाख्या.”

25आखरी सीपायळा तोसात कोऱ्या येसु ख्रुस साते तेरी आया एने तेरी आयान बहोनिश, क्लोपासोन लाडी मरीयम, एने मरीयमन मगदलीनी उभी होती. 26जेतार येसु आपनी आया, एने तीना चेला काजे जेरे पोर चू मोंग कोरतू होतु साते उबरोयला देख्यू ती तेरी आश काजे कोयू, “हे बायर, देख, यु तारू पुऱ्यु छे.” 27तेत्यार चू चेला काजे कोयू, “जी तारी आया छे” एने तीनित टेम सी चू चेलू तिनीक आपने घोर लीन गोयू.

येसुन काम पुरो होयनो

(मत्ती 27:45-56; मरकुस 15:33-41; लुका 23:44-49)

28इनान ओवतेन येसु यो जानीन कि हिमी आखो पुरो होय गोयलो छे, इनान कोरता कि पवित्र शास्त्रमा जो कोवाय गोयलो चो पुरो होये, कोयू, “मे तीसलु छे.” 29चा आंबोन भोरलो एक टाहारो होतो, आखरी चे आंबोमा भिगाडीन स्पंच काजे नांबली लाकळी पोर मेकीन मुये लागाळया. 30जेतार येसु चो आंब पीदू, ती कोयू, “पुरो होयो” एने मुनको नेचो कोरीन जीव छुळ देदु.

भालू गुपनो

31इनान कोरता कि चू तीयारीन दाहळू होतु, यहुदिया पिलातोस काजे विनता कोऱ्या कि तेरा पाय तुडाये एने चू उताराय जाय, काहाकि शब्बाथोन दाहळे तेरो डील ख्रुस पोर नि रोये, काहाकि चू शब्बाथोन दाहळू मोटलु होतु. 32आखरी सिपायळा आवीन तिना माणसो मायलान पेहलान पाय तुड्यु तेत्यार दिसरान बी, जे हेरे साते ख्रुस पोर चोळावला होता;. 33बाकीन जेतार येसु साते आवीन देख्या कि चू मोर गोयलु छे, ती हेरा पाय नि तुड्या. 34बाकीन सिपायळा मायला एक जोणु भाले कोरीन तेरा कुखीमा भालू गुप्यू, एने तीनामा गोथो तेतारुत लुय एने पाणी निकव्यो. 35यो चे देख्या, चे गोवायी आपला छे, एने तिंदरी गोवायी खोरली छे; एने चू जाणे कि चू खोरलू छे कि तुमु बी भुरसू कोरु. 36ये वाते एरेन कोरता होया कि पवित्र शास्त्रम जो कोलो छे चो पुरो होये, “तेरी काहनली हाडकी तुडाय नि जाय.” 37एने ओवते पवित्र शास्त्रमा यो लिखलो छे, “जीनाक चे भालू देदला छे, तीना पोर चे नोजोर लागाळसे”.

येसुक गाळनो

(मत्ती 27:57-61; मरकुस 15:42-47; लुका 23:50-56)

38इना वातोन ओवतेन अरिमतियाह युसूफ जू येसुन चेलू होतु, बाकीन यहुदियान बिकोसी इनी वातो काजे डूकाळीन राखतू होतु, पिलात सी विनता कोऱ्यु कि काय मी येसुन धोळे लीन जाय सोके पिलात हेरी विनता सोमव्यू, एने चू आवीन हेरो धोळे लीगोयू. 39निकदेम बी, जू येसुनचा राती गोयलु होतु, पोचास शेर लगभग जोळलो गंधरस एने एलवा लीन आव्यु. 40तेत्यार चे येसुन धोळ लेदा, एने यहुदियान गाळनेन रितीसी तीनाक घोनो वारू इत्तर काजे कापळामा गुंडाव्यू. 41तिना जागा पोर जां येसु ख्रुस पोर चोळाय गोयलु होतु, एक बाग होतो, एने तिनी वाळीमा एक नोवलो मोळवाट्यो होतो जीनामा कोबी कुदु नी मेकलो होतो. 42इनान कोरता यहुदियान तीयारीन दाहळान वोजेसी चे येसु काजे तीनामा राख्या, काहाकि चो मोळवाट्यो साते होतो.

Currently Selected:

योहान 19: BFBNT

Highlight

Copy