योहान 18

बगीचामा येसुक धोरणो

(मत्ती 26:47-56; मरकुस 14:43-50; लुका 22:47-53)

1येसु जे वाते कोयीन आपना चेला काजे किंद्रेन खुद्राण पोरले धोळे गोया चा एक वाडी होती तीनामा चू एने तेरा चेला गोया. 2तीनाक धोरावने वावू यहुदा भी तीना जागाक जानतू होतु, काहाकि येसु आपना चेला साते चा जाया कोरतू होतु. 3तेत्यार यहुदा, सिपायळान एक टूवा काजे एने प्रधान पुजारू एने फरुशीनचा गोथो तिंदरा कामगार काजे लीन, दिवा काजे एने चिमण्या एने हत्यार काजे लीन चा आव्यु. 4तेत्यार येसु, तिनी आखा वातो काजे जी तेरे पोर आवने वावी होती जानीन, नीकाव्यू एने तीनु काजे कोयू, “कुणीक हेरने बाज रोयू?” 5चे तीनु काजे जोवाब आप्या, “येसु नासरी काजे” येसु तीनु काजे कोयू, “मे छे” तीनाक धोरणे वावू यहुदा बी तेरे साते उभू होतु. 6तेरो यो कोयतात, “मे छे” चे पोछा सोरकिन धोरती पोर पोड गोया. 7तेत्यार चे पोछा तीनाक पुछ्या, “तुमु कुणीक हेर रोया” चे बुल्या, “येसु नासरी काजे.” 8येसु जोवाब आप्यू, “मे ते तुमु काजे कोय देदलु छे कि मे छे, कोदि मेसेक हेरे ती इनुक जाणे देवू.” 9यो एरेन कोरता होयो कि चो वचन पुरो होय जाय यो चू कोयलु होतु “जीनुक तू मेसेक आपलु तीनुमा गोथू मे एकाक बि नी खुव्यू.” 10तेत्यार शिमोन पतरस तोलवार, जी तेरे जुव होती, हापक्यू एने महायाजकोन दास पोर चालाळीन तेरो डाखऱ्यो कानटो काटनी देदू तिना दासोन नाव मलखुस होतो. 11तेत्यार येसु पतरस काजे कोयू, “आपनी तलवार जागामा मेक दे जो प्यालू बास मेसेक आपलु छे, काय मी हिनाक नी पियो”?

हन्नान सामने येसु

12तेत्यार सिपायळा एने तेरा सुभेदार एने यहुदिन कामदार येसु काजे धोरावीन बांध लेदा, 13एने पेहेले हिना काजे हन्ना जुव ली आया, काहाकि चू तीना सालोन महायाजक कैफान सेसरुस होतु. 14यु चू कैफा होतु, जू यहुदिया काजे सोहलानी आपलु होतु कि आमरा माणसोन कोरता एक माणसोन मोरनो वारलो छे.

पतरसोन येसुक मना कोरनो

(मत्ती 26:69-70; मरकुस 14:66-68; लुका 22:55-57)

15शिमोन पतरस एने एक दिसरू चेलु भी येसुन पोछोव चाल पोळ्या. यु चेलु महायाजकोन उखायतू होतु, इनान कोरता चू येसुन साते महायाजकोन आंगनाम गोयू, 16बाकीन पतरस बारथे झोपला पोर उभू रोयू तेत्यार चू दिसरू चेलू यु महायाजकोन उखायतू होतु, बारथे निकव्यू एने झोपले राखवावी कोरणे वावाक कोयीन पतरस काजे माही लीन आव्यु. 17ची दासी जी झोपले राखवावी होती, पतरस काजे कोयी, “कोदि तू इना माणसोन चेला मायलु ते नि होय?” चू कोयू, “मे नि होय.” 18दास एने महायाजक सेवान वोजेसी कुयला आखठो धोपाळीन उबला ताप रोया होता, एने पतरस बी तिंदरे पुठी उबलू आगठो तापतू होतु.

पुढाऱ्यान सामने येसु

(मत्ती 26:59-66; मरकुस 14:55-64; लुका 22:66-71)

19तेत्यार महायाजक येसु काजे तेरा चेलान बारामा एने तेरा उपदेशोन बारामा पुस पास कोऱ्यु. 20येसु तीनुक जोवाब आप्यू, “मी जोगोमा खुलीन वाते कोयू; मी प्रार्थना घोरोमा एने मंदीरमा, जा आखा यहुदि एखठा होयता-होयता होता, कायम प्रचारुत कोऱ्यु एने डूकायली ओसी कायबी नि कोयू. 21तू मेसे काजे काहा पुछे? सोमवने वावा काजे पूछ कि मे तीनु काजे काय कोयू देख, चे जानतला छे कि मे काय कोयू.” 22जेतार चू जो कोयू, ती कामदार मा गोथू एक यु साते उभू होतु, येसु काजे थापुळ दिन कोयू, “काय तू महायाजक काजे इना रितीसी जोवाब आपे?” 23येसु तीनाक जोवाब आप्यू, “कोदि मे बुरो कोयू, ती बुरायीन गोवायी आप; बाकीन कोदि भोलो कोयू, ती मेसे काजे काहा देदू?” 24हन्ना हिना काजे बांधलूत कैफा महायाजकनचा मुकली देदु.

पतरसोन येसुक एने मना कोरनो

(मत्ती 27:1-2,11-31; मरकुस 15:1-20; लुका 23:1-25)

25शिमोन पतरस उभरोयीन आगठो तापतो होतो तेत्यार चे तीना काजे कोया, “कोदि तू बी तेरा चेला मायलु ते नि होय?” चू इनकार कोरीन कोयू, “मी नि होय.” 26महायाजकोन दासोमा गोथू एक, जो तेरा घोरल्यामा गोथू होतु जेरो कानटो पतरस काटनी नाखलु होतु, कोयू “काय मे तुसेक हेरे पुठी बोगीचा मा नि दाखलू होतु?” 27पतरस एने इनकार कोर देदु, एने तेत्यारुत कुकळू वास देदू.

येसुक पिलातोन साने लावनो

(मत्ती 27:1-2,11-31; मरकुस 15:1-20; लुका 23:1-25)

28तेत्यार चे येसु काजे कैफान चा गोथा किल्लामा लीगोया, एने सोंदारेन टेम होती, बाकीन चे आपसात वाळामा नि गोया काहाकि विटोव नि होये बाकीन वोलांडोनोन खाणो खाता आवडनो जुवे. 29तेत्यार पिलात तिंदरे साते बारथे निकवीन आयु एने कोयू, “तुमु इना माणसो पोर काहनला वातोन गुणू लागाळ रोया?” 30चे तीनाक जोवाब आप्या, “कोदि यु गुणावू नि रोयतू ती आमु हिनाक तारे हाते नि सोपता.” 31पिलात तीनु काजे कोयू, “तुमु इना काजे लीजायीन आपना नियम शास्त्रान नुसार येरु नियाव कोरु” यहुदि तीना काजे कोया, “आमु काजे होक नि होय कि कुदान जीव लेजे.” 32यो इनान कोरता होयो कि येसुन ची वाट पुरी होय जाय जी चू यो इशारू आपतू जायीन कोयलु होतु कि हेरो मोरोन कोसो होयसे. 33तेत्यार पिलात पोछु किल्ला माही गोयू, एने येसु काजे बुलावीन तीना काजे पुछु, “काय तू यहुदियान राजा छे?” 34येसु जोवाब आप्यू, “काय तू जी वात खुद कोयने बाज रोयू कि दिसरा मारा बारामा तुसे काजे यो कोयला छे?” 35पिलात जोवाब आप्यू, “काय मी यहुदि छे? तारीत जाती एने प्रधान पुजारू तुसेक मारा हातोमा सोपला छे, तू काय कोरलु छे?” 36येसु जोवाब आप्यू, “मारो राज इना जोगोम नि होय; अगर मारो राज इना जोगोम रोयतो, ती मारा सेवक लोळायता कि मी यहुदान हातोमा सोपाय नि जातु बाकीन मारो राज न्या वावो नि होय.” 37पिलात तीना काजे कोयू, “तू काय राजा छे?” येसु जोवाब आप्यू, “तू कोये कि मी राजा छे मे इनान कोरता पोयदा होयू एने इनान कोरता जोगोमा आव रोयू कि खोरलायीन गोवायी आपो जो कुदू खोरलायीन छे, चू मारू बुल सोमवतलु छे.” 38पिलात हीना काजे कोयू, “खोरलो काय छे?” यो कोयीन चू पोछु यहुदिया साते जात रोयू एने तीनु काजे कोयू, “मे ते हेरेमा काय गुणू नि देख्यू”.

येसु नीती बरब्बा

39बाकीन तुमरी जी रिती छे कि मे वोलांडोनोन तीहीवारोमा तुमरेन कोरीन एक माणसोक छुळ दोम आखरी “काय तुमुक लागे कि मी तुमरेन कोरता यहुदान राजा काजे छुळ दोम?” 40तेत्यार चे पोछा आयळीन कोया, “इनाक नि, बाकीन आमरेन कोरीन बरब्बा काजे छुळ दे” एने बरब्बा डाखू होतु.

Currently Selected:

योहान 18: BFBNT

Highlight

Copy