योहान 17

येसुन खुदोन कोरता प्रार्थना

1येसु जी वाते कोयू एने आपना डूवा सोरगे भूनी उचा कोरीन कोयू, “हे बास, ची टेम आव पुगली छे; आपना पुऱ्यान महिमा कोर कि पुऱ्यु बी तारी महिमा कोरे, 2काहाकि तू तिना काजे आखा जोनावर पोर होक आप्यू, कि जीनुक चू तीनुक आपलु छे तीनु आखा काजे ओमोर जीवन आपे. 3एने ओमोर जीवन यो छे कि चे तुसेक एक धोळ्या खोरला परमेश्वर काजे येसु मसिह काजे, जीनाक तू मुकेललु छे, जाणे. 4जो काम तू मेसेक कोरणे कोरीन आपलु होतु, तीनाक पुरो कोरीन मे कोवीमा तारी महिमा कोरलु छे. 5हिमी हे बासो, तू आपने साते मारी महिमा तिनी महिमासी कोर जो जोगोन कोवोन पेहेले, मारी तारे साते होती.”

येसुन चेलान कोरता प्रार्थना

6“मे तारो नाव तीना माणसो पोर प्रगट कोरलु छे जीनाक तू जोगोमा गोथू मेसेक आपलु छे चे तारा होता एने तू मेसेक आप्यू, एने चे तारा वचन काजे मान लेदला छे.” 7हिमी चे जान गोयला छे कि जो काहीन तू मेसेक आपलु छे चो आखो तारे जुव गोथो छे;. 8काहाकि यो वचन तू मेसेक आप्यू, मी तीनुक तीनु काजे पुगाळ देदू; एने चे तीनु काजे ग्रहण कोऱ्या, एने खोरलो-खोरलो जान लेदला छे कि मे तारे जुव गोथू आवलु छे, एने भुरसू कोर लेदलु छे कि तूत मेसेक मूकल्यु. 9मे तिंदरेन कोरता विनता कोरो; जोगोन कोरता विनता नि कोरतू बाकीन तिंदरेन कोरता जीनुक तू मेसेक आपलु छे, काहाकि चे तारा छे;. 10एने जो काहीन मारो छे चो आखो तारो छे, एने जो तारो छे चो मारो छे, एने इनासी मारी महिमा देखायली छे. 11मे हिमी जोगोमा नि रोयो, बाकीन जे जोगोमा रोयसे, एने मे तारेनचा आवो हे चुखलु बास, आपना तीना नावोसी जो तू मेसेक आपलु छे तीनुक सोमाव कि चे आमरेन तोसा एक होये. 12जेतार मे हिंदरे पुठी होतु, ती मे तारा तीना नावोसी, जो तू मेसेक आपलु छे तिनान राखवावी कोऱ्यु. मी तेरी पुस-पास कोऱ्यु, एने नाशोन पुऱ्या काजे छुळीन तिंदरेमा गोथू मोटलु नाश नी होय, इनान कोरता कि पवित्र शास्त्रामा जो कोवाय गोयलो चो पुरो होये. 13हिमी मे तारेनचा आवो, एने जे वाते जोगोमा कोय, कि चे मारी खुशी हिंदरेमा पुरी जोळे. 14मे तारो वचन तीनुक पुगाळ देदलु छे; एने जोग तिंदरे पोर दुष्मोनी कोऱ्यु, काहाकि जोसो मे जोगोन नि होय, तोसाच चे बी जोगोन नि होय. 15मे यो विनता नि कोरतू कि तू हिनुक जोगोमा गोथू चूट ले; बाकीन यो कि तू हिनुक तिना बुराईसी सी वाचाडीन राख. 16जोसू मी जोगोन नि होय, तोसात चे बी जोगोन नि होय. 17खोरलान लारे हिनुक चुखो कोर तारो वचन खोरलो छे. 18जोसू तू मेसेक जोगमा मूकल्यु, तोसुच मे बी हिनु काजे जोगमा मूकल्यु;. 19एने तिंदरेन कोरता मी आपना खुदो काजे चुखो कोरो, काहाकि चे बी खोरलान लारे चुखा कोराये जाय.

येसुन विस्वास्यान कोरता प्रार्थना

20“मे निस्तु इंदरेन कोरता विनता नि कोरतु, बाकीन इंदरेन कोरता बी जे इंदरा वचनोन लारे मार पोर भुरसू कोरसे, 21कि चे आखा एक होये; जोसू तू छे बास मारेमा छे, एने मे तारेमा छे, तोसाच चे बी आमरेमा होये, जीनामा जोग भुरसू कोरे कि तूच मेसेक मुकेललु छे.” 22ची महिमा जी तू मेसेक आपलु ची मे हिनुक आपलु छे, कि चे तोसाच एक होये जोसा कि आमु एक छे, 23मे तिंदरेमा एने तुमरेमा कि चे खोरलो होयीन एक होय जाय, एने जोग जाणे कि तू मेसेक मुकेललु, एने जोसू तू मारे पोर मोंग कोऱ्यु तोसोच तिंदरे पोर मोंग कोऱ्यु. 24हे बासो, मे चाहो कि जीनुक तू मेसेक आपलु छे, चे जा मे छे चा चे बी मारे साते रोये, ती चे मारी तिनी महिमा काजे देखे जो तू मेसेक आपलु छे, काहाकि तू जोगोन पेहेले गोथू मार पोर मोंग कोऱ्यु. 25हे धोरमी बासो, जोग मेसेक नि जान्यू, बाकीन मे तुसेक जान्यू; एने जेबी जान्या कि तूच मेसेक मुकेललु चे. 26“मी तारो नाव तीनु काजे कोयू एने कोयतू रोयीस जो मोंग तुसेक मार पोर होतो चो तिंदरेमा रोये, एने मे तिंदरेमा रोयो.”

Currently Selected:

योहान 17: BFBNT

Highlight

Copy