योहान 16

1जे वाते मे तुमु काजे इनान कोरता कोयू कि तुमु ठूकर नि खाय. 2चे तुमु काजे प्रार्थना घोरोमा गोथो निकाव देसे, बाकीन ची टेम आवली छे, कि जो कुदु तुमुक मार नाखसे चू समजसे कि मे परमेश्वरोन सेवा कोरतेलु छे. 3ओसो चे इनान कोरता कोरसे कि चे नी बासो काजे जानतला, एने नि मेसेक जानतला छे. 4बाकीन जे वाते मे इनान कोरता तुमु काजे कोयू, कि जेतार इंदरी टेम आवे ती तुमुक फोम आव लागे कि मे तुमु काजे पेहेलेत कोय देदलु होतु.

चुखली आत्मान काम

“मे पेहेले गोथो तुमु काजे जे वाते इनान कोरता नि कोयू काहाकि मे तुमरे साते होतु.” 5बाकीन हिमी मे मेसेक मुकोलने वावानचा जाणे बाज रोयू; एने तुमरेमा गोथू कुदुबी मेसे काजे नि पुछता, “तू का जाणे बाज रोयू?” 6बाकीन मे ये वाते तुमु काजे कोयलु छे, इनान कोरता तुमरा मोने दुखसी भोराय गोयला छे. 7ते बी मे तुमु काजे छाचलीन कोयो कि मारो जाणो तुमरेन कोरता वारलो छे, काहाकि ओगर मे नी जाम ती चू मदतगार तुमरे साते नि आवे; बाकीन मे जाश, ती तीनाक तुमरेन कोरता मुकलीस. 8चू आवीन जोगो काजे पाप एने धारमिकता एने नियावोन बारामा कोय देसे. 9पापोन बारामा इनान कोरता कि चे मार पोर भुरसू नि कोरतेला; 10एने धारमिकतान बारामा इनान कोरता कि मे बासोनचा जाम, एने तुमु मेसेक ओवी नि देखे; 11नियावोन बारामा इनान कोरता कि जोगोन सरदार गुणावू ठेराय गोयलु छे. 12“मेसेक तुमरे साते ओवी बी घोनी सोवटी वाते कोरनो छे, बाकीन हिमी तुमु तीनाक सहन नी कर सोके.” 13बाकीन जेतार चू मतलब खोरलायीन आत्मा आवसे, ती तुमु काजे आखी खोरलायीन वाट देखाळसे, काहाकि चू तेरे जुव गोथू नि कोये बाकीन जो काय सोमोवसे चोत कोयसे, एने आवने वावा वाते तुमुक कोयसे. 14चू मारी महिमा कोरसे, काहाकि चू मारी वातोमा गोथू लीन तुमुक कोयसे. 15जो काय बासोन छे, चो आखो मारो छे; इनान कोरता मी कोयू कि चू मारी वातोमा गोथू लीन तुमु काजे कोयसे.

दुख खुशीमा बदलनो

16“थुलिक वारमा तुमु मेसेक नि देखे, एने ओवी थुलिक वारमा मेसेक देखसु.” 17तेत्यार तेरा चेला आपोसमा कोया, “यो काय छे जो चू आपनु काजे कोयतेलु, ‘थुलिक वारमा तुमु मेसेक नि देखे, एने ओवी थुलिक वारमा मेसेक देखसु? एने यो इनान कोरता कि मे बासोनचा जाम?’” 18तेत्यार चे कोया, “यु थुलिक वार जो चू कोये, काय वात छे? आमु नि जानता कि यु काय कोये.” 19येसु यो जानीन कि चे मारेसी पुछ्ने हिंड रोया, चू कोयू, “काय तुमु आपोसमा मारी इनी वातोन बारामा पुछपाछ कोर रोया, थुलिक वारमा तुमु मेसेक नी देखे, एने ओवी थुलिक वारमा मेसेक देखसु?” 20मे तुमु काजे छाचलीन-छाचलीन कोयो कि तुमु रोडसु एने दुख कोरसू, बाकीन जोग खुशी कोरसे; तुमुक दुख होयसे, बाकीन तुमरो दुख खुशीमा बदल जासे. 21बायर काजे फोवरी होयनेन टेमे दुख होयतलो छे, काहाकि तेरी दुखोन टेम आव लागली छे, बाकीन जेतार ची पुऱ्या काजे जन्म आप देतली, ती इना खुशीसी कि जोगोमा एक माणूस पोयदा होयू, तिना सोंकोट काजे पोछि फोम नी कोरतेली. 22तिना रितीसी तुमुक बी हिमी ते दुख छे, बाकीन मे तुमुक ओवी भेटीस एने तुमरा मोने खुशीसी भोराय जासे; एने तुमरी खुशी कुदु तुमरे जुव गोथू हापकी नि लेये. 23तिने दाहळे तुमु मेसेक काय नि पुछे मी तुमु काजे छाचलीन-छाचलीन कोयो, कोदि बासो जुव काहीन मांगसे, ती चू मारा नावोसी तुमुक आपसे. 24हिमी तोक तुमु मारा नावोसी काय नि मांग्या; मांगु, ती जोळसे काहाकि तुमरी खुशी पुरी होय जाय.

संसारपोर विजय

25“मे ये वाते तुमु काजे दाखलामा कोयलु छे, बाकीन जी टेम आव रोयी कि मे तुमु काजे एने दाखलामा नि कोयो, बाकीन उगाळीन तुमुक बासोन बारामा मे कोयीस.” 26तिने दाहळे तुमु मारा नावोसी मांगसु, एने मी तुमु काजे यो नि कोयतू कि मे तुमरेन कोरता बासो काजे विनता कोरिस;. 27काहाकि बास ते खुद तुमरे पोर मोंग कोरतेलु, इनान कोरता कि तुमु मार पोर मोंग कोरतेला छे एने यो बी भुरसू कोरला छे कि मे बासो जुव गोथू आवलु. 28मे बासो जुव गोथू जोगोमा आवलु छे; मे पोछु जोगो काजे छुळीन बासोनचा जाम. 29तेरा चेला कोया, “देख, हिमी ते तू उगाळीन कोये, एने कहाणलु दाखलू नि कोयतू. 30हिमी आमु जान गोयला छे कि तू आखो काय जानतलु छे, एने तेरी गोरोज नि होय कि कुदु तुसेक काहीन पुछे; इनासी आमु भुरसू कोरतेला छे कि तू परमेश्वरोनचा गोथू आवलु छे.” 31यो सोमवीन येसु तिनी काजे कोयू, “काय तुमु हिमी भुरसू कोरतेला छे? 32देखू, ची टेम आवे नीती आवीन पुगली छे कि तुमु आखा वेरवायीन आपनी-आपनी वाट धोर लेसे, एने मेसेक एखलु छुळ देसे; तीबी मे एखलु नि काहाकि बास मारे पुठी छे.” 33मे जे वाते तुमु काजे इनान कोरता कोयलु छे कि तुमुक मारेमा शांती जोळे जोगोमा तुमुक दुख होयतलो छे, बाकीन हिंमत धरु, मे जोगो काजे जीक लेदलु छे.

Currently Selected:

योहान 16: BFBNT

Highlight

Copy