Ioane 19

1Oi fakatonu ai e Pilato ke kini ia Iehu. 2Kua fai e nā fitafita he pale i nā lālā o he lākau tālatala, ma fakapale ai tona ulu; oi fakakofu ai i he kofu tatao lanu violē; 3ma ōmamai ai kua lea vē atu ki a Iehu, “Ke manuia te Tupu o tagata Iutaia!” Oi olo ai oi kini i o lātou lima.

4Kua toe fano ia Pilato ki fafo ma lea vē atu ki tagata Iutaia, “Kikila, ka fakatonu e au ke kaumai ia Iehu ki fafo ki a te koutou, ke iloa ai e koutou, e hēai he mea e kitea e au e tatau ai ke fakahala.” 5Oi hau ai ia Iehu ki fafo, e fai tona pale tuitui i tona ulu ma tona kofu tatao lanu violē. Kua lea atu ia Pilato ki a te ki lātou, “Kikila, tēnei te taulealea!”

6I te kitea atuga o Iehu e nā ohitāulaga hili ma nā leoleo o te Mālumalu, oi taukalalaga ai, “Fakahātaulo te tino tēnā! Fakahātaulo te tino tēnā!”

Kua lea atu ia Pilato ki a te ki lātou, “Kave lava la e koutou oi fakahātaulo, auā e hēai he mea e kitea e au e tatau ai ke fakahala.”

7Kua tali mai nā tino Iutaia, “E tuha ai ma te mātou tūlāfono, ko te tagata tēnei e tatau tāmate, auā kua fai tana fakamatalaga ko ia ko te Ataliki o te Atua.”

8I te lagona atuga e Pilato o te fakakupuga tēnei, oi fakaatili ai tona mataku. 9Oi toe fano ai ia Pilato ki loto o tona fale, ma fehili vē atu ki a Iehu, “Ko koe e hau mai fea?”

Kae e hēki tali ki ei ia Iehu. 10Oi kua toe lea vē atu ia Pilato ki ei, “He ā te hē tautala mai ai koe ki a te au? E hē kē iloa e ia te au te pule e mafai ke fakahaoloto pe fakahātaulo ai koe?”

11Kua tali mai ia Iehu, “Anei e hēki fōki atua e te Atua te pule ki a te koe, e hēai lele hau mea e fokotahi e mafai ke fai mai ki a te au. Ko te tino la na ia tukulima atua au ki a te koe, e hilihili atu te mamafa o tana agahala.”

12Kua lagona atu e Pilato nā kupu iēnei, oi taumafai ai ki he auala ke tatala ai ia Iehu. Kae kua taukalalaga mai ki ei nā tino Iutaia, “Kāfai e kē fakahaolotoa te tagata tēnā, ko koe la e hē ko he uō e a Kaihala te tupu! Ko te tino e lea ko ia he tupu, ko te tino tēnā e teteke ki a Kaihala.”

13I te lagona atuga e Pilato nā fakakupuga iēnei, oi kave ai e ia ia Iehu ki fafo, ma nofo ki luga o te nofoa fakamahino i te mea e takua ko te “Ala Folafatu” (Ko te igoa i te gagana Epelu ko te “Kapata.”) 14I te taimi tēnā, kua fakalata lele ki te vaeluaga o te aho e hohoko ki ei te Pāheka. Oi lea atu ai ia Pilato ki nā tino Iutaia, “Ko te tupu tēnei o koutou!”

15Ka kua taukalalaga mai ki lātou, “Tāmate te tino tēnā! Tāmate te tino tēnā! Fakahātaulo te tino tēnā!”

Kua fehili atu ia Pilato, “Ko koutou e fofou ke fakahātaulo e au te koutou tupu?”

Kua tali mai nā ohitāulaga hili, “E fokotahi oioti lava to mātou tupu ko Kaihala.”

16Oi na tuku atu ai loa e Pilato ia Iehu ki a te ki lātou, ke fakahātaulo.

Kua Fakahātaulo ia Iehu

(Mataio 27.32-44; Maleko 15.21-32; Luka 23.26-43)

Oi kave ai e nā fitafita ia Iehu. 17Kua takitaki e ki lātou ki fafo o te kakai e amo tona hātaulo, ma kua taunuku atu ki te koga e igoa ko te “Ulupoko.” (Ko “Kolokota” i te gagana Epelu.) 18Ko kinā na fakahātaulo ai e ki lātou ia Iehu; ma na fakahātaulo ai foki ma iētahi tamāloa e toka lua, e takitahi i nā itū kae e i to lā va ia Iehu. 19Na fakatonu foki e Pilato ke tuhi he fakaaliga ma tuku ki luga o te hātaulo. Ko te fakaaliga e vēnei, “Iehu te Nahaleta, te Tupu o Tagata Iutaia.” 20E tokalahi nā tino Iutaia na faitau ki ei, auā e hē mamao te mea na fakahātaulo ai ia Iehu ma te kakai. Ko te fakaaliga na tuhi i nā gagana Epelu, Latina ma te Eleni. 21Kua lea atu nā ohitāulaga hili ki a Pilato, “Nahe tuhia vēia ‘Te Tupu o nā Tino Iutaia,’ kae tau lava kua tuhi, ‘Ko te tino tēnei na lea, ko au ko te Tupu o Tagata Iutaia.’ ”

22Kua tali mai ia Pilato ki ei, “Ko te mea kua kō tūhia, ko tēnā lava.”

23Kua uma te fakahātaulo o Iehu e nā fitafita, oi kave ai e ki lātou ona kofu oi vāevāe ki ni vāega e fa, e tofu lava te fitafita ma tona vāega. Na kave foki e ki lātou te kofu tatao, na fai i he kie lalaga e fokotahi, ma e hēai ni ona hokohokoga. 24#Hal 22.18Kua lea atu tētahi fitafita ki tētahi, “Nahe hahaea te kofu, kae fai he tātou vili pe ko ai te tino ka kave mo ia.” Na tupu te mea tēnei, kae ke taunuku ai te mea e lea mai ai te tuhituhiga paia:

“Na tufa e ki lātou oku kofu mo ki lātou

ma fai te lātou vili pe ko ai te ia kavea toku kofu tatao.”

Ma ko te mea tēnei na fai e nā fitafita.

25Nae tutū tafapili ki te hātaulo o Iehu tona mātua, te uho o tona mātua, ma Malia te āvaga a Kolopa, vēnā ma Malia te Makatala. 26I te kitea atuga e Iehu o tona mātua ma te hoko e hili tona alofa ki ei e tutū mai, oi lea vē atu ai ki tona mātua, “Ko tō ataliki te ia.”

27Kua lea atu foki ki tona hoko, “Tēia tō mātua.” Oi kave ai e te hoko te mātua ke nofo i tona fale, kāmata mai i te taimi tēnā.

Ko te Mate o Iehu

(Mataio 27.45-56; Maleko 15.33-41; Luka 23.44-49)

28 # Hal 69.21; 22.15 Kua iloa e Iehu kua uma te fakataunuku e ia o nā mea uma lele; ma kae ke taunuku ai te kupu a te tuhituhiga paia, na lea vē ai, “Ko au e fia inu.”

29Nae i ei he pēhini nae i kinā, e tumu i te uaina taugōfie; oi lolō ai e ki lātou he oma ki te uaina, oi tuku ai ki te pito o he mealākau mai te lākau e igoa ko te īhopo, ma hiki ake ai ki luga ki ona laugutu. 30Kua inu e Iehu te uaina, oi vē ake ai tana kupu, “Kua taunuku!”

Oi fakagaugau ifo ai ki lalo tona ulu, oi to ai loa tana mānava.

Kua Velo te Itū o Iehu i he Tao

31Oi talohaga ai nā takitaki o Iutaia ki a Pilato ke fakataga ake ki lātou ke tagau nā vae o nā tino kua fakahātaulogia, ma ke tuku ifo ki lalo o lātou tino mai nā hātaulo. Na lea vēnā ki lātou ona ko he aho Falaile te aho tēnā, ma e hēki fofou ki lātou ke i ei pea nā tino oti i luga o nā hātaulo i te Hāpati, ona ko te Hāpati he aho e pito hili ona fakamamalu. 32Oi olo ai nā fitafita kua tagau nā vae o te tino muamua ma tona lua o tino na fakahātaulo ma Iehu. 33Kae i te ologa ki a Iehu, na ki lātou kitea ai kua oti, ma e hēki tagaua e ki lātou ona vae. 34Kae kua velo e tētahi o nā fitafita tana tao ki te itū o Iehu, ma ko te taimi lava tēnā na maligi mai ai ki fafo te toto ma te vai. ( 35Ko tē na kikila ki ei kua takutino e ia, kae ke talitonu ai foki koutou. Ko tana takutinoga e hako, ma e ia iloa ko ia e tautala i te meamoni.) 36#Eho 12.46; Nūm 9.12; Hal 34.20Ko te mea tēnei na fai ke taunuku ai te kupu i te tuhituhiga paia e vē mai: “Ka hēai he ivi e fokotahi i tona tino e gagaua.” 37#Hkl 12.10; Fkl 1.7Ma e i ei foki tētahi tuhituhiga paia e lea mai, “Ka kikila ki lātou ki tē na ki lātou tuia i te tao.”

Ko te Tanuga o Iehu

(Mataio 27.57-61; Maleko 15.42-47; Luka 23.50-56)

38Kua uma atu nā mea iēnei, oi talohaga ai ia Iohefa, he tino e hau mai te kakai ko Alimatea, ki a Pilato ke kave e ia te tino o Iehu. (Ko Iohefa ko hētahi ia o nā tino nae mulimuli ki a Iehu, kae nae hē ia fakailoa lele auā e mataku i nā takitaki o Iutaia.) Na talia tana talohaga e Pilato, oi kave ai e ia te tino o Iehu. 39#Ioa 3.1-2Ko Nikotemo foki, tēia na fano muamua oi kikila ia Iehu i te pō, na olo ma Iohefa, ma na ia kavea e tuha ma te tolu hefulu kilo mea manogi na gaohia i nā lākau ko te mulo ma te aloe. 40Kua kave e ki lāua te tino o Iehu, kua uku i nā lolo manogi ma āfīfī i nā kie vavae, e vē ko te tu a Iutaia i te hāuniga o te tino oti ke tanu. 41E i ei te togālākau nae i te mea na fakahātaulo ai ia Iehu, ma nae i kinā he tugamau#19.41 tugamau: E keli ki loto o nā itū mauga. fou e hēki fakaaogāgia lele. 42Ona ko te aho tēnei e hohoko ki ei te Hāpati ma ko te tugamau e tafapili mai, na teu ai e ki lāua i kinā, te tino o Iehu.

Currently Selected:

Ioane 19: TNT

Highlight

Copy