Ioane 18
18
Kua Puke Fakapagotā ia Iehu
(Mataio 26.47-56; Maleko 14.42-50; Luka 22.47-53)
1Kua uma te tatalo a Iehu, oi olo ai ma ona hoko kui atu i he vanu e igoa ko Kitelona. E i ei i kinā he fatoaga, oi olo ai ki loto. 2E iloa e Iuta te fakalata, te mea e i ei te fatoaga tēnei, auā e lahi nā taimi nae māfuta ai ia Iehu ma ona hoko i kinā. 3Oi fano ai ia Iuta ki te fatoaga ma kave he vāega o ni fitafita Loma fakatahi ma ni leoleo o te Mālumalu, na uga e nā ohitāulaga hili ma te kau Falehaio. Na kave a lātou meatau ma a lātou mōlī matagi ma nā mōlī lama. 4Kua uma te iloa e Iehu o nā mea uma ka pa ia ki ei, oi hau ai ki mua, ma lea vē atu ki a te ki lātou, “Ko ai ta koutou e hakili?”
5Kua tali mai ki lātou, “Ko Iehu te Nahaleta.”
Oi lea atu ai ia Iehu, “Ko au tēnei”
Ko Iuta te fakalata, e tutū fakatahi mai ma ki lātou. 6I te lea atuga o Iehu, “Ko au tēnei,” oi holomuli ai ki lātou ki tua ma pakukū ai ki te kelekele. 7Kua toe fehili atu ia Iehu ki a te ki lātou, “Ko ai ta koutou e hakili?”
Kua lea mai ki lātou, “Ko Iehu te Nahaleta.”
8Kua lea atu ia Iehu, “Kua uma toku lea atu ko au tēnei. Kāfai ko au ta koutou e hakili, tuku la nā tino iēnei ke olo.” ( 9Na lea vēnā ia Iehu kae ke taunuku ai tana kupu na lea ai vē, “Te Tamana, e hēki i ei he tino e fokotahi o ki lātou na kē fōki maia ki a te au, na māumau tona ola.”)
10Nae i ei te pelu a Himona Petelu, ma kua heki ake e ia ki luga, oi ta ai hētahi o kaukauna a te Ulu Ohitāulaga ma motu ai te taliga taumatau. Ko te igoa o te kaukauna, ko Malako. 11#Mat 26.39; Mlk 14.36; Luk 22.42Kua lea atu ia Iehu ki a Petelu, “Tuku tau pelu ki tona huluga! Ko tō manatu ko au ka hē inu ki te ipu#18.11 inu ki te ipu: I loto o nā Tuhituhiga paia, ko te ipu ko he fakailoga o te puapuagā. Ko te “inu ki te ipu” ko te talia o nā puapuagā. o nā puapuagā kua tuku mai e toku Tamana ki a te au?”
Kua Kave ia Iehu ki Mua o Anaha
12Oi na puke ai ia Iehu e nā fitafita Loma ma to lātou takitaki fakatahi ma nā leoleo o te Mālumalu. Kua noanoa nā lima o ia 13ma kave ai muamua ki a Anaha. Ko Anaha ko te tamana ia o te āvaga a Kaiafa, te Ulu Ohitāulaga i te tauhaga tēnā. 14#Ioa 11.49-50Ko Kaiafa tēnei te na fai tana fautuaga ki nā takitaki o Iutaia e vēnei, “E hili lele atu mo koutou te oti o he tino e fokotahi mo nā tino uma.”
Kua Fakafiti ia Petelu e hē ia iloa ia Iehu
(Mataio 26.69-70; Maleko 14.66-68; Luka 22.55-57)
15Kua mulimuli atu ia Himona Petelu ma tētahi o te kau hoko, ki a Iehu. Ko tētahi hoko, e iloa lelei e te Ulu Ohitāulaga, ma na mulimuli ki a Iehu i te kavega ki loto o te lōtoā o te fale o Kaiafa, 16ka ko Petelu kua tū i fafo o te faitotoka. Oi toe fano ai ki fafo tētahi hoko, kua faitala ki te teine leoleo faitotoka, oi kaumai ai e ia ia Petelu ki loto. 17Kua lea atu te teine i te faitotoka ki a Petelu, “E hē ko koe nei foki tētahi o hoko o te tamāloa tēia?”
Kua tali mai ia Petelu. “Hēai, e hē ko au.”
18Ona ko te mālūlū, na tafu ai he afi malala e nā kaukauna a te Ulu Ohitāulaga ma nā leoleo o te Mālumalu, ma kua tutū fakatāmilo ai i te afi oi fakamāfanafana. Oi fano ai ia Petelu kua tū i te mea e i ei ki lātou, oi fakamāfanafana.
Kua Fehiligia ia Iehu e te Ulu Ohitāulaga
(Mataio 26.59-66; Maleko 14.55-64; Luka 22.66-71)
19Kua fehiligia ia Iehu e te Ulu Ohitāulaga e uiga ki ona hoko ma ana akoakoga. 20Kua tali atu ia Iehu, “Ko au e tautala pea lava i mua o tagata; ma ko aku akoakoga e fai lava i loto o nā hūnako ma loto o te Mālumalu, nā mea e fakapotopoto ki ei nā tino Iutaia uma. E hēai he mea kua lea ai au, e mumunia i nā tino. 21He ā la te fehilihili mai ai koutou ki a te au? Fehili ki nā tino na fakalogo ki nā mea na lea ake ai au ki a te ki lātou — e ki lātou iloa nā mea na lea ai au.”
22I te leaga vēnā o Iehu, kae po e hētahi o nā leoleo ma lea vē atu ki ei, “Kai koe te hē māfaufau ma au fai tautala e fai ki te Ulu Ohitāulaga?”
23Kua tali atu ia Iehu ki te leoleo tēnei, “Kāfai e i ei he mea kua lea ai au e hehē, taku mai ke iloa e nā tino uma i kinei, pe he ā. Kae kāfai e hako te mea kua lea ai au, he ā la te kini tauanoa ai au e koe?”
24Oi fakatonu ai e Anaha ke kave ia Iehu ki a Kaiafa te Ulu Ohitāulaga, ma ona lima koi noanoa lava.
Kua Toe Fakafiti ia Petelu e hē ia iloa ia Iehu
(Mataio 26.71-75; Maleko 14.69-72; Luka 22.58-62)
25Ko Petelu koi tū lava i kinā, e fakamāfanafana i te afi. Oi lea atu ai iētahi tino ki ei, “E hē ko koe nei tētahi o hoko o te tino tēia?”
Kae na fakafiti ia Petelu ma lea vē atu, “Hēai, e hē ko au.”
26Ko tētahi o kaukauna a te Ulu Ohitāulaga, e kāiga ma te tino na tipi tona taliga e Petelu, kua fehili vē, “E hē ko koe te na kō kitea e fakatahi ma ia i te fatoaga?”
27Kae kua toe fakafiti foki ia Petelu; ma i te taimi tonu lava tēnā, na vivini ai te moa.
Kua Kave ia Iehu ki mua o Pilato
(Mataio 27.1-2, 11-14; Maleko 15.1-5; Luka 23.1-5)
28I te taeaopō, oi kave ai ia Iehu mai te fale o Kaiafa ki te fale o te kōvana. Ko nā takitaki o Iutaia e hēki olo ki loto o te fale o te kōvana; nae mumuhu nā ki lātou e hē mamā i nā mea tau tāpuakiga, ona kua nonofo fakatahi ma nā tino nukukehe, ma hē mafai ai ki lātou ke kakai i te Kaiga Fakamanatuga o te Pāheka. 29Oi fano ai ia Pilato ki a te ki lātou i fafo ma lea vē atu ki ei, “He ā te holi tūlāfono kua mōlia ai e koutou te tino tēnei?”
30Kua tali mai ki lātou, “Anei ake te tagata nei e hēki holia e ia te tūlāfono, e hēki ki mātou kaumaia ki a te koe.”
31Kua lea atu ia Pilato ki a te ki lātou, “Kave lava la e koutou oi fakamahino, e tuha ai ma autou tūlāfono.”
Kae kua tali mai ki lātou, “E hē fakataga ki mātou i te tūlāfono, ke fakahala oti he tino.” 32#Ioa 3.14; 12.32(Ko te mea tēnei na tupu, kae ke taunuku ai te mea na lea ai ia Iehu, e uiga ki te itūkāigā oti e oti ai ia.)
33Kua toe fano ia Pilato ki loto o tona fale ma fakatonu ke kaumai ia Iehu. Oi fehili vē atu ai ki ei, “Ko koe moni ko te Tupu o tagata Iutaia?”
34Kua tali mai ia Iehu, “Ko te fehili nei tēnā e a koe lava, pe na lea atu ni tino ki a te koe e uiga ki a te au?”
35Kua tali atu ia Pilato, “Ko tō manatu ko au ko he Iutaia? Ko nā tino lava o koe ma nā ohitāulaga hili te na ki lātou kaumaia koe ki a te au. Ko he ā ta koe na fai?”
36Kua tali mai ia Iehu, “Ko toku mālō e hē o te lalolagi tēnei; anei toku mālō e o te lalolagi tēnei, ko aku kaukauna na tau kae ke nahe pukea ai au e nā takitaki o Iutaia. Hēai, ko toku mālō e hē o te lalolagi.”
37Oi fehili atu ai ia Pilato ki ei, “Ko koe la ko he tupu, ni?”
Ka kua tali mai ia Iehu, “Ko koe tēnā e lea ko au he tupu. Ko au na fānau mai ma na hau ki te lalolagi nei ke molimau ki te meamoni. Ko ki lātou uma e i te meamoni, e uhitaki mai ki a te au.”
38“He ā te meamoni?” kua fehili atu ki ei ia Pilato.
Kua Fakahala ia Iehu i te Oti
(Mataio 27.15-31; Maleko 15.6-20; Luka 23.13-25)
Oi toe fano ai ia Pilato ki fafo kinā tino Iutaia, ma lea vē atu ki ei, “E hēai he mea e kō kitea, e tatau ke fakahala ai te tino tēnei. 39Kae e tuha ai ma te tū kua māhani ai koutou, e tatau ke kō tatala atua he pagotā mo koutou i te taimi o te Pāheka. E fofou koutou ke tatala atu e au ki a te koutou te Tupu o tagata Iutaia?”
40Kua taukalalaga mai ki lātou, “Hēai, e hē ko ia. Ko ki mātou e fofou ki a Palapa.” (Ko Palapa ko he tino kaihohoa.)
Currently Selected:
Ioane 18: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
